Lúkɑ́shi 22
22
Ŋɡʉ̈ɔ́Ꞌ-Yɛ́su sɛ́ ŋ́ɡʉ ńzɛ
(Mɑtʉ̈ɔ 26.1-5, 14-16; Mɑ́lɛ́kúshi 14.1-2, 10-11; Jɑ̂ŋ 11.47-53)
1Lɛ́Ꞌ tsɑ́ɑtɛ-Pɑyúdɑ yi pɛ́ kɑ pɔ́ ɛ́fúŋ nɛ́ Pɑ́skɑ ɡɛ ḿbɔ́ ŋ́kuꞋ, ńdɔk ńzɛ ŋɡɑp yi pɔ́p kɑ pɔ́ ŋ́kwɛ́t yɛcɔ́ ntɛ́ mbɛlɛ̂ɛt kɛ́ fɛntɛ. 2Pɛtɑ́tndɑ́ pɑnɔ́ŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ ńdɔ́ɔ shʉ́ nɛɡɛ pɛ́ jẅí Yɛ́su, lɑ́ ḿbɔ́ ḿbɔ́k mík-lɑ́Ꞌ. 3Sɑ́ttɑ kúu tsɛt tʉ́m Jẅídɑ, ɑ pɔ́ wɛcɔ́ tɑ́Ꞌ ŋu nǔu pʉɔ ntsɔ̌ppɑ́ nɛ́ nɛɡɛ́m, ẅi yɛcɔ́ lík yɛ́ kɑ pɛnnɛ ḿbɔ́ ŋɡɔ Iskɑlyɔt. 4A ɡɔ́ɔ ŋ́kɛ́ ŋ́ɡʉ ńjʉ́ɔ Pɛtɑ́tndɑ́ pɑnɔ́ŋpɔꞋ pɔ́p pɑtʉ́ʉ mbi nǔu nɛpyɛ́p ndɑ́-nɛnɔŋpɔꞋ, pɔ́p pɛpɔ́p ŋ́kwɑŋɛ pɑꞋ ɑ ɡʉ ŋ́ɡɛ lɑ́ ɛ́fɛn Yɛ́su mbɔ̌ pɔ́p. 5Ɛ́ puu ḿbɔŋ wɔ́p, tɛ pɔ́p pɛ́m ŋɡɔ pɔ́p ɡʉ ŋ́ɡɑ́ ŋkɑ́p mbɔ̌ wɛ. 6A pɛ́m, ŋ́ɡɔ́ɔ ńzɛ nɛlɔ́ɔ shʉ́ pɑꞋ ɑ ɡʉ ɛ́fɛn Yɛ́su mbɔ̌ pɔ́p tɛ lɑ́Ꞌ pɔɔ jí.
Yɛ́su túu ɡɑŋku pɛ́ nɛniitɛ wɔp tsɑ́ɑtɛ-Pɑ́skɑ
(Mɑtʉ̈ɔ 26.17-19; Mɑ́lɛ́kúshi 14.12-16)
7Lɛ́Ꞌ Pɑ́skɑ ɛ̂wɑ́ ɡɔ́ɔ ŋ́kɛ́ ńtɔ́, ḿbɔ́ lɛ́Ꞌ yi pɛ́ kɑ pɔ́ ŋ́ɡwɑt pɔ́ɔ-njinjɔ-tsɑ́ɑtɛ. 8Yɛ́su túu Pyɛ̂ pɔ́p Jɑ̂ŋ, ńcú mbɔ̌ pɔ́p ŋɡɔ: «Pʉʉ ɡʉ niitɛ yɛkŋɛ yúu-Pɑ́skɑ, pɛkŋɛ jʉ́.» 9Pɔ́p píkŋɛ wɛ́ ŋɡɔ: «Ɔ kɔŋ ŋɡɔ: “Pɛk ɡʉ ɡʉ̈ɔ́ niitɛ?”» 10A cú ŋɡɔ: «Pʉʉ zúꞋ sʉ́Ꞌnɛ, pʉʉ ɡʉ ŋ́ɡʉ tɛ ŋ́kúu tʉ́sɔŋ, ńjʉ́ɔ ŋu mbɛ́ɛnɛ ɡẅɛɛ tʉ́ɔ-ŋki, pʉʉ cʉ́ɔ nzʉʉ yɛ, tɛ ɑ kúu ndɑ́ pʉʉ kúu yʉ́ʉ. 11Ńcú mbɔ̌ ŋɡɑŋndɑ́ ŋɡɔ: “Cícɑ cú ŋɡɔ pɛk píkŋɛ wú ŋɡɔ lûmndɑ́ yi pɔ́pɡɑŋku pɛ́ ɡʉ ńjʉ́ Pɑ́skɑ zúꞋu wɛ́tɛ́ ɔ́ɔ?” 12A ɡʉ ńnyɛt wʉ́ʉ mɑ́mɑ́ lûmndɑ́ ndǔ ndɛ̂k wɛ tʉ́, tɛ ḿbɔ́ pɛ́ ńdɑ́Ꞌ mɔ́ ńniitɛ sʉ́Ꞌnɛ, ɛ́ zʉꞋ yi pʉʉ ɡʉ niitɛ yɛkŋɛ yúu-tsɑ́ɑtɛ zúꞋu.» 13Pɔ́p ɡʉ ŋ́kúu zúꞋu, ńjʉ́ɔ mbɑ kʉ̈ɔ́ lɑ́ pɔ́ pɔ pɑꞋ Yɛ́su sẅíinɛ wɔ́p. Pɔ́p niitɛ yúujʉ́-Pɑ́skɑ zúꞋu.
Yúujʉ́-Tsɑpʉɔ
(Mɑtʉ̈ɔ 26.26-29; Mɑ́lɛ́kúshi 14.22-25; 1 Kɔlɛ̂ŋtɛ 11.23-25)
14Ŋkɑ́ ɡɛ ŋ́kuꞋ, Yɛ́su pɔ́p ɡɑŋntúu pɛ́ tɔ́ ńnɑ́ŋ sɛ́, 15ḿbɔ́ ŋ́kwɛ́t yúu, ɑ cú mbɔ̌ pɔ́p ŋɡɔ: «Ŋ kɑ zɛɛ ńtsɑ́ɑ tɛꞋ pɑꞋ pɛkŋɛ ɡʉ ńjʉ́ wɔ Pɑ́skɑ lɑ́ n jʉ́ɔ ŋɡʉ̈ɔ́Ꞌ. 16Tsʉ́Ꞌnɛ ɛ sẅíi wʉ́ʉ sʉ́Ꞌnɛ: “Mɔ ńdɑ́Ꞌ ḿbɛn ńjʉ́ wɛcɔ́ Pɑ́skɑ pɔ́, tɛ ńdɑ́Ꞌ ŋ́kúu ŋkɑ́ yi nu wɔ tsɑ́ɑtɛ puutɛnɛ, Sɛ́ tsʉ́Ꞌnɛ ḿbɛn ɛ́sɑ́Ꞌ mbí.”» 17A kɑ sẅíi wɔ́p pɔ́Ꞌɔ, ŋ́ɡɔ́ɔ ŋ́kɛ́ ńtíi ntúꞋ mɛluꞋ, ŋ́ɡɑ́ pɑ́Ꞌlɑ́ mbɔ̌ Sɛ́, ńcú mbɔ̌ pɔ́p ŋɡɔ: «Pʉʉ kɔ ntúꞋ yɔ ńnɔ́ tɛ ḿmɛk wʉ́ʉ. 18Pʉʉ jí ŋɡɔ mɔ ńdɑ́Ꞌ ḿbɛn ńnɔ́ mɛluꞋ pɔ́ tɛ ńdɑ́Ꞌ ŋ́kúu ŋkɑ́ yi Sɛ́ ńtsʉꞋnɛ ɛ́sɑ́Ꞌ mbí.» 19A kɑ pɛn ḿbɛ́ɛ mbɛlɛ̂ɛt, ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌ ŋ́ɡɔ ŋ́ɡɑ́ mbɔ̌ ɡɑŋku pɛ́ ńcú ŋɡɔ: «Yɔ mbɑp-mbʉʉ yɑɑ yi pɛ́ ɡɑ́nɛ nǔu tú yʉ́ʉ. Pʉʉ tsʉ́Ꞌ ḿbɔ́ ŋ́ɡɛ pɑꞋnɛ ńdɔk ŋ́kẅíitɛ wɑ́ɑ.» 20Pɔ́p kɑ kwɛ́t yúujʉ́ tɛ ḿmɛk, Yɛ́su tíi ntúꞋ mɛluꞋ ńcú ŋɡɔ: «NtúꞋ yɔ pɑꞋnɛ ḿbɔ́ kɑɑ fí yi Sɛ́ lɔknɛ mɛci mɑ́ɑ ŋ́ɡwɑt. Ɛ́ tswɛtnɛ ntɛ́ wʉ́ʉ.»
21Ŋ kɛ ńcú pɑꞋnɛ ŋu ẅí ɑ ɡɛ ɛ́fɛn wɑ́ɑ pɔ́ pɔ zɑꞋnɛ tɛ pɛkŋɛ pɔ́ tɛmtɛ ńjʉ́ yúu. 22Ɛ́ nu ŋɡɔ Mɔ́ɔ-Ŋu ɡʉ ḿpfú pɑꞋ Sɛ́ kɑ lɑ́Ꞌnɛ ńzɑ́p, lɑ́ ndɔ́ɔ tú ŋu ẅí ɑ ɡʉ ńcɑklɛ wɛ́ ŋ́ɡɑ́ pɛ́ jẅí wɛ́. 23Pɔ́p zúꞋ pɔ́Ꞌɔ, ḿbuu mɑɑ, ɛ́shɔtnɛ ḿbíkŋɛ tsɛtsɛt pɔ́p ŋɡɔ: Wɔ̌ pɑꞋnɛ ḿbɔ́ tsɛtsɛt pɔ́p ŋ́kuꞋ nɛfʉꞋ yɔ ntɛ́ nu ɔ́ɔ?
Wɔ̌ ndʉ́m?
24Gɑŋku-Yɛ́su ɡɛ ńzɛ nɛzɔŋ nu, ńdɔ́ɔ ŋu ẅí ɑ tsɛtsɛt pɔ́p ḿbɔ́ ndʉ́m. 25Yɛ́su cú mbɔ̌ pɔ́p ŋɡɔ: «Pʉʉ pɛn ńjí yʉ́ʉ ŋɡɔ pɛfɔɔ pɑ́ kɛ́ jí Sɛ́ ḿbɔ́ ɛ́sɑ́Ꞌ mɛlɑ́Ꞌ mɔ́p, ḿbɔ́ ńnɔꞋ pʉɔ, ŋ́kɛ́ ŋ́kɔŋ pɔ ŋɡɔ pɛ́ fúŋ wɔ́p ŋɡɔ pɑɡɛ nu sʉ́Ꞌnɛ. 26Lɑ́, kɔɔ pʉʉ fʉꞋnɛ wɔ́p. Tɛ ńtsʉ́Ꞌ pɔ́Ꞌɔ, ŋu ẅí ɑ tsɛtsɛt pʉʉ ḿbɔ́ ndʉ́m shɔtnɛ ńtsʉ́Ꞌ mɔ́ɔ, ŋu ẅí ɑ pɛn ńtʉ́ʉ mbi pʉʉ, ḿbɔ́ ɛ́sɑ́Ꞌ wʉ́ʉ, ɑ pɔ́ pɔ pɑꞋ ŋɡɑŋfɑꞋ wʉʉ lɑ́. 27Pʉʉ zɛɛ ɛ́sẅíi wɑ́ɑ: “Ɛ́ ɡʉ nǔu ŋu ẅí ɑ nɑ́ŋnɛ Sɛ́ ḿbɔ́ ŋ́kwɛ́t yúu pɔ́p ŋu ẅí ɑ lɑ́Ꞌnɛ ńnɛ́ɛ ńtíi tík pɛꞋnɛ, wɔ̌ pɔ́ ndʉ́m?” Ŋu ẅí ɑ ńnɑ́ŋnɛ sɛ́ ŋ́kwɛ́t jʉ́ kɑ́nɛ pɔ́ ndʉ́m pɔ́ ɔɔ? Lɑ́, ŋ kɛ́ ḿbɔ́ tsɛtsɛt pʉʉ, ḿbɔ́ pɔ ŋu ẅí ɑ fɑꞋnɛ mbɔ̌ pʉʉ.»
28Pʉʉ pɔ́p kɑ ńnɑ́ŋnɛ nɛjɔ́ŋ mɔ nǔu ŋkɑ́ ŋɡʉ̈ɔ́Ꞌ yɑɑ. 29Ɛ́ yɛ́t lɑ́, ndʉ́ŋndʉŋ pɑꞋ Tɑ̌ɑ mɔ kɑ ɡɑ́nɛ nɛfɔɔ mbɔ̌ mɔ lɑ́, ŋ ɡɛ ńdɑ́Ꞌ ŋ́ɡɑ́ nʉ́ʉ nɛfɔɔ. 30Ŋkɑ́ yi mɔ ŋ́ɡɛ ḿbɔ́ Fɔɔ lɑ́, pɛkŋɛ tɛmtɛ yúu ńjʉ́, ńnɔ́, pʉʉ pɛn ńnɑ́ŋ ndǔ mɛkɔꞋ-nɛfɔɔ, ŋ́ŋɑk njẅɛtndɑ́-Íslɑyɛ̂l ntsɔ̌ppɑ́ nɛ́ nɛɡɛ́m.
Yɛ́su kɑ́k nɛtúutɛ-Símɔ̂ŋ Pyɛ̂
(Mɑtʉ̈ɔ 26.31-35; Mɑ́lɛ́kúshi 14.27-31; Jɑ̂ŋ 13.36-38)
31Yɛ́su pɛn ńcú mbɔ̌ Pyɛ̂ ŋɡɔ: «Símɔ̂ŋ, Símɔ̂ŋ, Sɑ́ttɑ ńdɑ́Ꞌ mɔ́ ńdɔ́ɔ nɛtɑꞋ wʉ́ʉ pɛtsʉʉ ńtíitɛ, pɑꞋ pɛ́ tɑꞋnɛ mɛkúu ńtíitɛ lɑ́. 32Lɑ́, n cɛꞋlɛ Sɛ́ nǔu tú yú, nɛpɔ́ yi ɔ kɛ́ puu ŋ́kɑ́ɑ kɑ́ɑnɛ nǔu nɛzɑ́p tʉ́m nǔu mɔ pɔ́. Ɔ ɡɛ ḿbɛn ḿbɔ́ tɛ ńtsuŋ ńzɑ́p tʉ́m yú nǔu mɔ, ḿbɔ́ ńníꞋ tʉ́m-pɔ́ɔpɛ́mɑ́ pú.» 33Pyɛ̂ cú ŋɡɔ: «Tsɑpʉɔ, ɛ́ lɑɑ ḿbɔ́ pɔ nɛkúu tsɑ́ŋ, mbɔ ɑ pûu, ńtɔ́ ŋ́kɛ́ ḿbɔ́ pɔ nɛvú, mbɔ ɑ pûu.» 34Yɛ́su cú ŋɡɔ: «Pyɛ̂, tsʉ́Ꞌ ŋ kɛ́ ɛ́sẅíi wú: Mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ ńtɔ́ŋ nɛtúꞋ lɔ́Ꞌnɛ, mbɔ ɔ muŋɛ mɔ́ wɑ́ɑ ŋkɑ́ yɛ́tɑ́t.»
Yɛ́su sẅíi ɡɑŋku pɛ́ ntɛ́ yi pɔ́p ɡʉ ńdɔk niitɛ tʉ́m yɔ́p
35Yɛ́su pɛn ḿbíkŋɛ ɡɑŋku pɛ́ ŋɡɔ: «Pʉʉ kẅíitɛ ŋkɑ́ yi ŋ kɑ túunɛ wʉ́ʉ ŋɡɑ sɛsɑ, pʉ́ʉ kɑ ɡʉ kɛ́ mɔ́ɔpɑɑ kɛ́ pɑɑlyɛpnɛ kɛ́ mɛtɑp, pʉʉ kɛ ńtswɛ́ ńnɛn pɛꞋnɛ, ńdɑ́Ꞌ ńjɑ́k kʉ̈ɔ́?» Pɔ́p cú ŋɡɔ ŋɡɑ́ŋ, yúu ŋkɑɑ zɑ́k. 36A cú ŋɡɔ: «Ɛ́ ŋkɔ̂ɔnɛ pɑꞋnɛ, mbɔ ɛ́ kúpmɛ tɛ ŋu lɑɑ ŋ́ɡẅɛɛ mɔ́ɔpɑɑ-ŋkɑ́p wɛ, ɑ pɛ́ɛ, ŋ́ɡẅɛɛ pɑɑlyɛpnɛ yɛ, ɑ lyɛp. Ŋu ẅí ɑ kɑ́ ɡẅɛɛ níi-ntsɔ pɔ́, ɑ fɛn ndẅí-fɑ́k yɛ ńdɔk ńzúu yɛ.» 37N cú pɑꞋnɛ, nu yí pɛ́ kɑ ŋwɑꞋnɛnɛ ntɛ́ wɑ́ɑ sɛ́ ŋ́ɡʉ ḿbuutɛ. Pɛ́ kɑ ŋwɑꞋnɛ tsɛt ŋwɑꞋnɛ ŋɡɔ: «Pɛ́ ɡʉ ńdɑ́Ꞌ ɛ́sɑ́ŋ wɛ́ tsɛtsɛt pɛfút. Mbɑ kʉ̈ɔ́ lɑ́ kɛ ḿbɔ́ pɑꞋnɛ ńzɛ zɛnɛ nɛpuutɛ.» 38Gɑŋku pɛ́ cú mbɔ̌ wɛ́ ŋɡɔ: «Tsɑpʉɔ, mɛníi-ntsɔ mɑ́ɑ sɛ́ mɛmbɑ́.» Yɛ́su cú ŋɡɔ: «pʉʉ nɑ́ pɑ́Ꞌ.»
Yɛ́su ɡʉ ndǔ nɛŋkɔ́Ꞌ-mɛtʉ́-mɛɡwɛ́t-Ɔlíivɛ, nɛcɛꞋlɛ Sɛ́
(Mɑtʉ̈ɔ 26.36-45; Mɑ́lɛ́kúshi 14.32-41)
39Yɛ́su kɑ cú pɔ́Ꞌɔ, ńcẅɛt, pɔ́p ɡɑŋku pɛ́ ŋ́ɡʉ nɛ́ ndǔ nɛŋkɔ́Ꞌ-mɛtʉ́-mɛɡwɛ́t-Ɔlíivɛ, pɑꞋ ɛ́ kɑ pɔ́nɛ mɑt mbɔ̌ wɛ. 40Pɔ́p kɑ ɡʉ tɛ ŋ́kúu zúꞋu, ɑ cú mbɔ̌ pɔ́p ŋɡɔ: «Pʉʉ ńcɛꞋlɛ Sɛ́ ḿbɔ́k nɛkúu tsɛt ŋkwɑꞋnɛ ɛ́ tsɑ wʉ́ʉ.» 41Ń cú pɔ́Ꞌɔ, ńnɑ́ wɔ́p ḿbɛn ńtʉ́ʉ nɛmɑꞋ ŋɡɔꞋ, ńcúŋ ŋ́kẅíꞋlɛ sɛ́, ḿbɔ́ ńcɛꞋlɛ Sɛ́ ńcú ŋɡɔ: 42«Tɑ̌ɑ mɔ, ɔ lɑɑ ńjʉ́ɔ, ɔ pɑꞋnɛ wɑ́ɑ nǔu yɔ ŋɡʉ̈ɔ́Ꞌ yi, ɛ́ sɛ́ ńtɔ́ nǔu mɔ lɑɑ. Lɑ́, mɔ ńcú ŋɡɔ ɔ ɡɛ pɔ wɑɑ nɛkɔŋtɛ pɔ́. Gɛ pɔ wu nɛkɔŋtɛ.» 43Ńcú pɔ́Ꞌɔ, tɑ́Ꞌ Cʉ̈ɔꞋ-Sɛ́ tɔ́ ḿbɔ́ ńtɔ́ɔtɛ wɛ́. 44Nɛvú pɔ́ ŋ́kwɛ́t wɛ́, ɑ ŋ́kẅiꞋ ńcɛꞋlɛ Sɛ́ ńníꞋ tú, tɛ ziꞋnɛ tsʉ́Ꞌnɛ ńcẅɛt nǔu wɛ, ńcʉ́ɔtɛ sɛ́, ɛ́fí pɔ mɛtyɑk-mɛci lɑ́. 45ŃcɛꞋlɛ Sɛ́ tɛ ḿbɔ́tnɛ ńnɑ́ŋ, ḿbʉꞋ mbʉʉ yɛ, ḿbɛn nɛ nɛjɔ́ŋ ɡɑŋku pɛ́, ŋ́ɡɔ ńtɔ́, mbɔ pɔ́p mʉk mɔ́ tɛ ŋ́kɑ́ɑ ńdɛ́tɛ. 46A cú ŋɡɔ: «Pʉʉ nɑ́ŋ kɛ́ lɛ́, ḿbɔ́k nɛkúu tsɛt ŋkwɑꞋnɛ, ɛ́ tsɑ wʉ́ʉ.»
Pɛ́ ɡẅɛɛ Yɛ́su
(Mɑtʉ̈ɔ 26.47-55; Mɑ́lɛ́kúshi 14.43-49; Jɑ̂ŋ 18.2-11)
47A kɑ pɛ́t ńcú cúnɛ, nɔɔ-lɑ́Ꞌ tɔ́, tɛ Jẅídɑ ẅí ɑ ḿbɔ́nɛ wɛcɔ́ tɑ́Ꞌ ŋu tsɛtsɛt ɡɑŋku pɛ́ ntsɔ̌ppɑ́ nɛ́ nɛɡɛ́m pɔ́ mbi, ŋ́kẅɛ́Ꞌlɛ ńtɔ́ nɛ́ nɛjɔ́ŋ Yɛ́su, ńtɑ́ŋtɛ wɛ́, ńcɛꞋlɛ wɛ́. 48Yɛ́su cú mbɔ̌ wɛ ŋɡɔ: «Jẅídɑ, ɔ ɡʉ ńdɔk pɔ nɛtɑ́ŋtɛ lɑ ńcɑklɛ Mɔ́ɔ-Ŋu pɔ?» 49Gɑŋku-Yɛ́su pɔ́p ḿbɔ́nɛ nɛjɔ́ŋ yɛ jʉ́ɔ yúu mi ɛ́ ɡɛ ńdɛɛ, ḿbíkŋɛ wɛ́ ŋɡɔ: «Tsɑpʉɔ, pɛk lɔk mɛníi ńdʉ̈ɔ́Ꞌ?» 50Wɛcɔ́ ŋu wɔp ɡɔ́ɔ ɛ́sɔŋ níi nɛlɔk ŋ́kʉ́ɔꞋ ŋu ńtɔ́ nɛkʉ́ɔꞋ, ńcẅɛɛtɛ nɛtúutɛ-ŋɡɑŋfɑꞋ-tɑ́tndɑ́-pɑnɔŋpɔꞋ nǔu ɡúŋ-pɔ́ tʉʉ. 51Lɑ́ Yɛ́su kɑkŋɛ wɛ́ ńcú ŋɡɔ: «pʉʉ pɔ́tnɛ ńnɑ́ŋ, ɛ́ kɛ ŋ́ɡɔ́ɔ ŋ́kuꞋ pɑ́Ꞌ.» Ŋ́ɡɔ́ɔ ńzɑ́p pɔ́ yɛ́ nǔu nɛtúutɛ ɛ̂nɑ́, ɛ́ fíitɛ. 52Yɛ́su ɡɔ́ɔ ŋ́kɛ́ ńcú mbɔ̌ pɛtɑ́tndɑ́-pɑnɔ́ŋpɔꞋ pɔ́p pɛtɑ́tndɑ́ pɑpyɛ́p ndɑ́-nɛnɔŋpɔꞋ pɔ́p pɛkɛ́m-lɑ́Ꞌ pinɛ pɔ́p tɔ́nɛ nɛɡẅɛɛ wɛ́ ŋɡɔ: «Pʉʉ ɡɔ́ ńtɔ́ nɛɡẅɛɛ wɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ pɑꞋ ŋkɑ́ yi pʉʉ ɡʉ ɡẅɛɛ tsɔ́ŋ pɑꞋnɛ ŋɡɔ ku? 53Lɑ́ mɔ, ŋ kɑ pɔ́ lɛ́Ꞌ tsʉʉ, ŋ́kɛ́ ḿbɔ́ pɔ tsɛtsɛt pʉʉ tsɛt ndɑ́-nɛnɔŋpɔꞋ, pʉʉ kɛ ḿbɔɔ lɔ́ɔ nɛɡẅɛɛ wɑ́ɑ pɔ́. Lɑ́, yʉʉ ŋkɑ́ pʉ́ɔ, mbɔ ɛ́ ɡɔ́ɔ mɔ́ ŋ́kɛ́ ŋ́kuꞋ, ḿbɔ́ ŋkɑ́ yi Fɔɔ-mɛnu-nzɛ́nzʉ́ʉ tɔ́ mɔ́ tɛ ḿbɔ́ ɛ́sɑ́Ꞌ lɑ́Ꞌ yɛ.»
Pyɛ̂ muŋɛ Yɛ́su
(Mɑtʉ̈ɔ 26.57-58; Mɑ́lɛ́kúshi 14.53-54; Jɑ̂ŋ 18.15-16)
54Pɔ́p ɡẅɛɛ Yɛ́su ńdɔk ŋ́ɡʉ nɛ njɛ́Ꞌ tɑ́tndɑ́-pɑnɔ́ŋpɔꞋ, Pyɛ̂ cʉ́ɔ nzʉʉ pɔ́p, lɑ́ ŋ́kɛ́ ḿbɔ́ pɔ ŋɡɑ sɛsɑ. 55Pɔ́p kúu zúꞋu, pɛ́ niitɛ múk sɔŋ-tɛtɑ́ɑ ńnɑ́ŋ sɛ́ ḿbɔ́ ńzɔ́k. Pyɛ̂ tɔ́ yɛ́ ńnɑ́ŋ tsɛtsɛt pɔ́p.
56Wɛcɔ́ mɔ́ɔ mɑŋɡɛ́ ẅi ɑ ḿbɔ́ fɑꞋ njɛ́Ꞌ ɛ̂yɑ́, nɑ́ŋ tɛ múk kyɛꞌ zʉꞋ, ɑ líŋɛ Pyɛ̂ pɑ́Ꞌ ɑ nɑ́ŋnɛ zúꞋu, ńcú ŋɡɔ: «Ŋu ẅí pɛ́ ɡẅɛɛnɛ wɛ́ lɑ́, pɔ́p ŋu wɔ ŋ́kɛ́nɛ ḿbɔ́ ńnɛn.» 57Pyɛ̂ lʉꞋ, ńcú mbɔ̌ wɛ́ ŋɡɔ: «Mɑŋɡɛ́ wɔ, ŋ kɑ́ pɔ́ ńjí wɛ́ pɔ́!» 58Ɛ́ pɛn ŋ́ɡɔ́ ńdɑ́ɑtɛ, wɛcɔ́ ŋu mbɛ́ɛnɛ líŋɛ yí wɛ́ tɛ ńcú ŋɡɔ: «Ɔ yú wɛcɔ́ ŋu wɔp.» Pyɛ̂ tsɔ́Ꞌ mbɔ̌ ŋɡɑŋ ŋɡɔ: «Ŋu wɔ! Ŋɡɑ́ŋ, ɛ́ kɑ́ pɔ́ nu pɔ́.» 59Pɛ́ nɑ́Ꞌ ńnɑ́ŋ, wɛcɔ́ ŋu ndɛꞋ cú yɛ́ tɛ ŋ́kɑɑ Sɛ́ ŋɡɔ: «Ɛ́ kɑ́ pɔ́ nu lʉɔmɛ́nɛ pɔ́, ŋu wɔ ḿbɔ́ tsɛtsɛt pɔ́p, pʉʉ zɛɛ ńjʉ́ɔ pɑꞋ ɑ ŋu-Ŋɡɑlílɛɛ pɑꞋ jʉ́.» 60Pyɛ̂ tsɔ́Ꞌ ŋɡɔ: «ŋu wɔ! Ŋ kɑ́ jí nu yi ɔ pɑ́Ꞌ ńdɔk ńcú pɔ́.» Pyɛ̂ pɛ́t ńcú cúnɛ, mɔ̂ŋkʉ̈ɔ́Ꞌ ɡɔ́ɔ ńtɔ́ŋ. 61Yɛ́su shɔtnɛ ńdíŋɛ Pyɛ̂, mík mɔ́pnɛ puutɛ. Pyɛ̂ ɡɔ́ɔ ŋ́kẅíitɛ nu yi Tsɑpʉɔ lɑ́Ꞌnɛ ńcú mbɔ̌ wɛ́ ŋɡɔ: «Mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ ńtɔ́ŋ lɔ́Ꞌnɛ, mbɔ ɔ muŋɛ wɑ́ɑ ŋkɑ́ yɛ́tɑ́t.» 62Pyɛ̂ fú tɛtɑ́ɑ ńcẅɛt, ḿbuu ŋ́kíi tɛꞋ.
63Pʉɔ pinɛ pɔ́p kɑ ɡẅɛɛnɛ Yɛ́su kɑ pɔ́ ńtswɑ́ɑ wɛ́, ḿbɔ́ ńzɔɔtɛ wɛ́. 64Pɔ́p kɑ pɛn ŋ́kút shʉ́ wɛ́, ḿbɔ́ ńtswɑ́ɑ wɛ́, ḿbíkŋɛ wɛ́ ŋɡɔ: «Kyɛ́ꞌ ŋu ẅí ɑ tswɑ́ɑnɛ wú.» 65Pɔ́p kɑ pɔ́ pɔ́Ꞌɔ, ḿbɛn ḿbɔ́ ŋ́kẅiꞋ ńnyɑklɛ wɛ́.
Pɛ́ zɛ nɛŋɑk Yɛ́su
66Njí ɡɛ ḿbɔ́ tɛ ŋ́kiɛ, pɛkɛ́m tsɛt lɑ́Ꞌ pɔ́p pɛtɑ́tndɑ́-pɑnɔ́ŋpɔꞋ, mbɑ pɑkyɛ́Ꞌtɛ nɛpʉ́ʉ-Mɔ̌sɛ̂ɛ cúꞋlɛ, ńcú pɛ́ lɔk Yɛ́su ńtɔ́ zʉꞋ-cúꞋlɛ-ŋɡɔŋ. 67Pɔ́p píkŋɛ wɛ́ ŋɡɔ: «Ɔ lɑɑ ḿbɔ́ Nzɑ́Ꞌŋkʉ, ɔ sẅíi wɛk.» Yɛ́su tsɔ́Ꞌ mbɔ̌ pɔ́p ŋɡɔ: «Mɔ sẅíi wʉ́ʉ pʉʉ pɔɔ pɛ́m, 68ḿbɛn ḿbíkŋɛ wʉ́ʉ nɛ́ nu, pʉʉ pɔɔ tsɔ́Ꞌ. 69Tɛ mbɑ pɔ́Ꞌɔ, ɛ́ ŋkɔ̂ɔnɛ pɑꞋɑ, mbɔ ɛ́ kɛ ŋ́ɡɔ́ɔ ŋ́kuꞋ pɑꞋ Sɛ́ ŋɡɑŋmɛtʉʉ tsʉʉ ɡʉ ńníꞋ Mɔ́ɔ-Ŋu nǔu ɡúŋ-pɔ́ yɛ yi tʉʉ.» 70Pɔ́p pɛtsʉʉ kɑ zúꞋ ńcú ŋɡɔ: «Ɔ lɔk ḿbɔ́ mɔ́ɔ-Sɛ́ pɔ?» Yɛ́su tsɔ́Ꞌ ŋɡɔ: «Ɛ́ cẅɛt pɔ ntsu pʉʉ, mɔ kwɑꞋ wɛ́t.» 71A kɑ cú pɔ́Ꞌɔ pɔ́p ɡɔ́ɔ shɔtnɛ ńcú tsɛtsɛt pɔ́p ŋɡɔ: «Tɛ ɛ́ lɑɑ ḿbɔ́ pɑꞋnɛ, pɛkŋɛ kɛ ḿbɛn ńdɔ́ɔ wɛcɔ́ ŋu ẅi ɑ ńcú nu nǔu wɛ́ kɛkʉ̈ɔ́? KwɑꞋ pɛkŋɛ tsuŋnɛ ńzúꞋ nu yi ɛ́ cẅɛtnɛ ntsu wɛ́.»
Currently Selected:
Lúkɑ́shi 22: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
