Lúkɑ́shi 13
13
Ɛ́ pɔ́ŋ pʉɔ tsʉʉ mɛꞋ mɑt kɛpɔŋ
1Ɛ́ pɔ́ ŋkɑ́ yîyɑ́, pɛcɔ́ pʉɔ tɔ́ ḿbɔ́ ḿbɛ́ɛtɛ mɛnu mi ɛ́ kɑ lɛɛnɛ sẅíi Yɛ́su, ɛ́sẅíi wɛ́ pɑ́Ꞌ Pilɑ́tɔ kɑ ɡɛnɛ pɛ́ jẅítɛ pʉɔ-Ŋɡɑlíliyɑ, ŋkɑ́ yi pɔ́p kɑ pɔ́ ŋ́ɡɑ́ yúu pɔꞋ mbɔ̌ Sɛ́. 2A zẅíꞋlɛ tɛ ɛ́ kuꞋ, ɑ tsɔ́Ꞌ mbɔ̌ pɔ́p ŋɡɔ: «Pʉʉ lɔk ŋ́kwɑŋɛ ŋɡɔ pʉɔ-Ŋɡɑlíliyɑ pîpɑ́ kɑ pɔ́ ḿpfú pɔ́Ꞌɔ, ńdɔk ḿbɔ́ ɡɑŋmɛ́fɑɑ ńtsɑ pɛcɔ́ kíi? 3Ŋɡɑ́ŋ, ɛ́ nu pɔ́. Jínɛ ŋɡɔ pʉʉ lɑɑ ŋ́kɛ́ ḿbɔɔ kúpmɛ wʉʉ mɑt pɔ́, mbɔ pʉʉ ɡʉ ŋ́ɡɛ ḿpfútɛ yʉ́ʉ pɔ pɑ́Ꞌ pɔ́p lɑ́. 4Zɛnɛ ŋ́kẅíitɛ pʉɔ ntsɔ̌pɛ́nɛ́fɔ́m nɛ́ nɛɡɛ́m pinɛ mɑ́mɑ́ ndɑ́ kɑ kɛ́mɛ jẅítɛ wɔ́p Silɔɛ́ lɑ́. Pʉʉ kwɑŋɛ ŋɡɔ pîpɑ́ pʉɔ kɑ lɔk ḿbɔ́ pʉɔ kɛpɔŋ ńtsɑ pɛcɔ́ pʉɔ-Yɛlúsɑlɛm tsʉʉ pɔ́ɔ? 5Ŋɡɑ́ŋ, ɛ́ kɑ́ pɔ́ nu pɔ́. Pʉʉ lɑɑ ŋ́kɛ́ ḿbɔɔ kúpmɛ wʉʉ mɑt pɔ́, mbɔ pʉʉ ɡɛ ḿpfútɛ yʉ́ʉ pɔ pɑ́Ꞌ pɔ́p.»
Nu tʉ́ yi ɛ́ kɑ́ pɔ́ ńzɛ́m pɔ́
6Yɛ́su ɡɔ́ɔ ŋ́kɛ́ ńcú yɔ sɑknɛkɛt ŋɡɔ: «Wɛcɔ́ ŋu kɑ pi tʉ́ mbɛ́lɛ́ ŋkɑ́Ꞌ yɛ, ŋ́ɡɛ ńnɑ́ŋ tɛ ńtɔ́ nɛkɑ́p, ḿbɔɔ yúu jʉ́ɔ, 7ńcú mbɔ̌ ŋɡɑŋfɑꞋ ŋɡɔ: Ɛ́ ŋkɔ̂ɔnɛ ńdɔk ḿbɔ́ ŋɡuꞋ yɛ́tɑ́t pɑ́Ꞌ mɔ sɛ́ ńtɔ́ ńdɔ́ɔ ntɑ́ɑ nǔu tʉ́ yɔ ḿbɔɔ ńjʉ́ɔ pɔ́, kʉ́ɔꞋ ḿmɑꞋ sɛ́, mbíꞋ kʉ̈ɔ́ ɛ́ jʉ́ zʉꞋ-tsɛ́tsɑ́Ꞌ níinɛ? 8ŊɡɑŋfɑꞋ pɑꞋ ŋɡɔ: “Tɑ̌ɑ mɔ, pɛ́ nɑ́Ꞌ ńnɑ́ wɛ́ yɔ ŋɡuꞋ, mɔ ŋ́ɡɛ ńtúŋ nɛtsɛ́n nɛ́, ńdɔk kyɑŋɛ ńtsɑ́p. 9Pɔ́Ꞌɔ, kɛ ɛ́ lɑɑ ḿbɔ́ ɛ́ lɑ́Ꞌ ŋɡuꞋ lɑ́ɑnɛ ńzɛ́m mɛntɑ́ɑ ɔ́ɔ? Ŋ́kɛ́ ḿbɛn ḿbɔɔ zɛ́m ɔ cú ŋ kʉ́ɔꞋ.”»
Yɛ́su ɡɛ wɛcɔ́ mɑŋɡɛ́ fíitɛ lɛ́Ꞌnji-Pɑyúdɑ
10Ɛ́ pɔ́ yɛcɔ́ lɛ́Ꞌnji-Pɑyúdɑ, Yɛ́su pɔ́ ndɑ́-cúꞋlɛ-Pɑyúdɑ ḿbɔ́ ńdɛꞋlɛ nu-Sɛ́ mbɔ̌ lɑ́Ꞌ. 11Wɛcɔ́ mɑŋɡɛ́ pɔ́ yɛ́ zúꞋu, mbɔ ɛ́ ɡɛ ŋɡuꞋ ntsɔ̌pɛ́nɛ́fɔ́m nɛ́ nɛɡɛ́m pɑ́Ꞌ yɛcɔ́ zẅikŋɛ kɛpɔŋ kɑ ɡẅɛɛnɛ wɛ́ ḿbʉ̈ɔ́Ꞌ ŋkwɛn yɛ́. Tɛ wɛcɔ́ nɛpɛn ḿbʉꞋ mbʉʉ yɛ ńtʉ́ʉ tʉ́ʉnɛ pɔɔ ɡú pɔ́. 12Yɛ́su jʉ́ɔ wɛ́, ɛ́fúŋ wɛ́, ńcú mbɔ̌ wɛ́ ŋɡɔ: «Gɔɔ yú yɔ ḿmɛ, ɔ luk!» 13Ńcú pɔ́Ꞌɔ, ńzɑ́p mbɔ́ mɛ́ tú-mɑŋɡɛ́ ɛ̂wɑ́. A ɡɔ́ɔ ḿbʉꞋ mbʉʉ yɛ ńtʉ́ʉ ndʉ́ŋndʉŋ, ŋ́ɡúꞋlɛ Sɛ́. 14Lɑ́ fɔɔ tsɛt yîyɑ́ ndɑ́-cúꞋlɛ Pɑyúdɑ jʉ́ɔ pɔ́Ꞌɔ, nu zɑ́ŋ wɛ́, mbíꞋŋɡɔ Yɛ́su ɡɛ ŋu fíitɛ lɛ́Ꞌnji. A cú mbɔ̌ lɑ́Ꞌ ŋɡɔ: «Mɛlɛ́Ꞌ-fɑꞋ pɑ́Ꞌɑ ḿbɔ́ pɛ́nɛ́ntúkú, pʉʉ nɑ́ŋ ńdɔk pɛ́ɡɔɔ pʉ́ʉ ńtɔ́ nǔu mîmɑ́ mɛlɛ́Ꞌ pɛ́ zɔŋ wɔ́p, kɔɔ pʉʉ tɔ́ lɛ́Ꞌnji!» 15Lɑ́ Yɛ́su tsɔ́Ꞌ mbɔ̌ wɛ́ ŋɡɔ: «Pʉʉ ɡɑŋcɔtnu, wɔ̌ nǔu pʉʉ kɑ́ pɔ́ ŋ́ɡʉ lɛ́Ꞌnji wɛkŋɛ, ŋ́kíɛꞋ fɔŋ wɛ, kɛ pɔ Njɑkɑ́ɑshi wɛ pɔ́, ńdɔk ŋ́ɡʉ ɑ nɔ́ ŋki pɔ́ ɔɔ? 16Ŋ́ɡʉ nǔu mɑŋɡɛ́ wɔ ẅí ɑ nǔu njẅɛt-Ábɛlɛhɑ̂m, mbɔ Sɑ́ttɑ kɑ ɡɔ́ɔ ŋ́kút wɛ́, tɛ ɛ́ ŋkɔ̂ɔnɛ ńdɔk ḿbɔ́ ŋɡuꞋ ntsɔ̌pɛ́nɛ́fɔ́m nɛ́ nɛɡɛ́m, ɛ́ ŋ́kɑɑ ḿbɔ́ ḿbíkŋɛ ŋɡɔ ŋ kíɛꞋ ŋkʉ kɛpɔŋ nǔu wɛ lɔ́Ꞌnɛ, mbɑ pɑꞋ yɔ lɛ́Ꞌnji pɔ́ ɔɔ?» 17Yɛ́su pɔ́ ńcú pɔ́Ꞌɔ, sʉ́ʉ kɔ́ ɡɑŋmbuu pɛ́, lɑ́ nɛlʉ́m pʉɔ zúꞋu ḿbɔ́ ńtsɑ́ɑtɛ tsɑ́ɑtɛ́nɛ nǔu mɔ mɛnu sʉ́Ꞌnɛ tsʉʉ mi Yɛ́su ɡɛnɛ.
Sɑknɛkɛt yi ɛ́ lɛꞋlɛ́nɛ pɑ́Ꞌ nu-Sɛ́ lɔknɛ ḿbɔ́ pɔ́Ꞌɔ
(Mɑtʉ̈ɔ 13.31-33; Mɑ́lɛ́kúshi 4.30-32)
18Yɛ́su pɛn ńcú ŋɡɔ: «nɛfɔɔ-Sɛ́ pɛꞋnɛ ḿbɔ́ pɑ́Ꞌɑ, ḿbɔ́ n dɔk kʉ̈ɔ́ ḿbɛ́ɛ fʉꞋ? 19Ɛ́ ɡɔ́ɔ ɛ́fí pɔ yɛcɔ́ ntɛ́ nɛsɑɑ-sɛ́súk yi ŋu kɑ pɛ́ɛnɛ ḿmɑꞋ ŋkɑ́Ꞌ yɛ́, ɛ́ ɡɛ sɑ́Ꞌ, ŋ́ɡúꞋ, tɛ ńtsʉ́Ꞌ tʉ́, ńtɔ́k mbɔ́ mɛ́, pɛshʉ́ŋ tɔ́ ḿbɑ́Ꞌ mɛŋkɑɑ mɔ́p tsɛt pɛpɔ́ pɛ́.» 20Yɛ́su pɛn ńcú ŋɡɔ: «Mɔ ḿbɛn ńdɔk kʉ̈ɔ́ ḿbɛ́ɛ fʉꞋ nǔu nɛfɔɔ-Sɛ́? 21Ɛ́ pɛn ḿbɔ́ pɔ pɑ́Ꞌ mɔ́zʉꞋ fɛntɛ wi mɑŋɡɛ́ lɔknɛ ɛ́fɛntɛ fɑlîn tɛ ɛ́ ɡɛ fɑlîn ɛ̂yɑ́ tsʉʉ kɔ́Ꞌ.»
Wɔ̌ ɡɛ ŋ́kúu nǔu nu-nɛfɔɔ-Sɛ́?
22Yɛ́su kɑ pɛn ńtʉ́ʉ sɛ̂ndúŋ ḿbɔ́ ŋ́ɡʉ Yɛlúsɑlɛm, ńdɛɛ tsɛt mɛtʉ́sɔŋ pɔ́p mɛlɑ́Ꞌ tɛ ńzɑ́ɑ, ńnɛn ńdɛꞋlɛ nu-Sɛ́ mbɔ̌ pʉɔ.
23Ŋ́kúu yɛcɔ́ zʉꞋ, wɛcɔ́ ŋu píkŋɛ wɛ́ ŋɡɔ: «Tsɑpʉɔ, tɛ ɛ́ pɑ́Ꞌɑ, Sɛ́ ńdɑ́Ꞌ ŋ́ɡɛ mbɔ́ntɑ́Ꞌ pʉɔ luknɛ kíi?» Yɛ́su tsɔ́Ꞌ mbɔ̌ pʉɔ pɛ́tsʉʉ ŋɡɔ: 24«Pʉʉ lɔ́ɔ shʉ́ pɔ nɛtɔ́k nǔu ntsundɑ́ ẅi ɛ́ kʉ́ʉpɛ kʉ́ʉbɛ́nɛ. Pʉʉ jí sʉ́Ꞌnɛ ŋɡɔ pʉɔ tɛ ńzɑ́ɑ ɡɛ ńdɑ́Ꞌ ńdɔ́ɔ nɛkúu tsɛtú lɑ́ ḿbɛn ŋ́kɛ́ ḿbɔɔ kuꞋ.»
25Ŋkɑ́ ɡɛ ńdɑ́Ꞌ ŋ́kuꞋ, ŋɡɑŋndɑ́ lɔ sɛ́ ńjʉ̈ɔ́Ꞌ ntsundɑ́, pʉʉ pi pʉʉ pɛ́t píi lɑ́, pʉʉ zɛ nɛpúꞋ ntsundɑ́, ḿbɔ́ ḿbúꞋ mbɔ́ mbɔ̌ wɛ́ ŋɡɔ: «Tsɑpʉɔ, tsɔ́Ꞌ ntsundɑ́ pɛk kúu ndɑ́. Lɑ́, ɑ cú mbɔ̌ pʉʉ ŋɡɔ: Ŋ kɑ́ pɔ́ ńjí pʉɔ pinɛ pʉʉ pɛ́t pɔ́!»
26«Pʉʉ zɛ nɛcú mbɔ̌ wɛ́ ŋɡɔ: “Kɛ ŋɡɔ pɛkŋɛ m̄bɔ́nɛ ńtɛmtɛ yúu ŋ́kwɛ́t, ńtɛ́mɛ mɛluꞋ ḿbɔ́ ńnɔ́ pɛꞋnɛ lɑ́? Ɔ ŋkɑɑ pɔ́ ńnɛn ndǔ mɛsɛ̂ndúŋ mɛk mbɑ tsɛt mɛtʉ́sɔŋ mɛk, ńdɛꞋlɛ nu-Sɛ́ pɔ?”» 27Lɑ́, ɑ pɛn ńcú mbɔ̌ pʉʉ ŋɡɔ: «Ŋ kɑ́ pɔ́ ńjí pʉɔ pinɛ pʉʉ pɛ́t pɔ́. Pʉʉ fú ntsundɑ́ mɔ ŋ́ɡʉtɛ, pʉʉ ɡɑŋmɛzɛm!» 28Pʉʉ ɡɔ́ɔ ŋ́kɛ́ ńzɛ nɛkíi, lɔ́ŋ wʉʉ pɔ́ kɔ́Ꞌ. Ɛ́ ɡɔ ḿbɔ́, mbɔ pʉʉ mɑꞋ mík ńjʉ́ɔ Ábɛlɛhɑ̂m, ńjʉ́ɔ Ɛ́sɑk, mbɑ Yɑkɔ̂p, mbɑ pɛŋɡɛ́mndʉ̈ɔ́Ꞌ-Sɛ́ pɛtsʉʉ. Pɔ́p pɔ́ tsɛt nɛfɔɔ-Sɛ́. Mbɔ pɛ́ jʉ́ɔꞋ wʉ́ʉ píi. 29Ɛ́ ŋ́ɡɛ ńdɑ́Ꞌ ḿbɔ́ ŋkɑ́ ɛ̂yɑ́, pɛ́ fú nɛsɑ́Ꞌ-nɛm, ɛ́fú mbɛ́nɛm, ɛ́fú kɔŋ, ɛ́fú ntsʉ́ʉ, ńtɔ́ ńcúꞋlɛ tsɛt nɛfɔɔ-Sɛ́, ḿbɔ́ ŋ́ɡɛ mɑ́mɑ́ tsɑ́ɑtɛ. 30Pʉʉ jí ŋɡɔ pɛcɔ́ pɑluŋmbi ŋkɔ̂ɔnɛ ɡɛ ńdɑ́Ꞌ ńtsʉ́Ꞌ pɑ́ lẅiknzʉʉ, pɛcɔ́ pɑ́ lẅiknzʉʉ ŋkɔ̂ɔnɛ lɑ́Ꞌ ḿbɔ́ pɑ́ luŋmbi.
Yɛ́su líŋɛ Yɛlúsɑlɛm mɛjʉ́ŋ mɛ́ kɔ́ wɛ́
31Yɛ́su pɔ́ ńcú pɔ́Ꞌɔ, pɛcɔ́ pʉɔ-Fɑlísɑy tɔ́ ńcú mbɔ̌ wɛ́ ŋɡɔ: «Fú zɑ́Ꞌnɛ ŋ́ɡʉ, mbíꞋŋɡɔ fɔɔ Ɛlɔ̂dɛ sɛ́ ńdɔ́ɔ nɛjẅí wú.» 32Yɛ́su cú mbɔ̌ pɔ́p ŋɡɔ: «Pʉʉ ɡʉ ńcú mbɔ̌ pɑꞋŋkwɛn ɛ̂wɑ́ ŋɡɔ: m bɛ́t ŋ́ɡẅɛɛ yɔ lɛ́Ꞌ, mbɑ zɔ́n nɛlɔk ńzuŋ mɛzẅikŋɛ kɛpɔŋ mi ɛ́ mbʉʉ pʉɔ, ḿbɛn ŋ́ɡɛ ɡɑŋɡɔɔ fíitɛ. Ɛ́ ḿbɔ́ nǔu mbɑ́ɑtɛ lɛ́Ꞌ pɛ́tɑ́t, mɛkŋɛ fɑꞋ yɑ́ɑ. 33Lɑ́, ɛ́ pɔ́ŋ ŋɡɔ m bɔ́ ŋ́ɡʉ. Zɔ́n m bɛn ḿbɔ́ pɔ sɛ̂ndúŋ, tɛ mbɑ wɛcɔ́ zɔ́n. Ɛ́ sɛ́ ḿbíkŋɛ ŋɡɔ ŋ ɡʉ tɛ ŋ́kúu Yɛlúsɑlɛm, mbíꞋŋɡɔ ɛ́ kɑ́ pɔ́ŋ ŋɡɔ pɛ́ jẅí ŋɡɛ́mndʉ̈ɔ́Ꞌ zʉꞋ ndɛꞋ kɛ́ pɔ́ pɔ Yɛlúsɑlɛm pɔ́.»
34Ŋkɑ́ kuꞋ, ɑ mɑɑ ŋɡɔ: «Pɑyɛlúsɑlɛm, Pɑyɛlúsɑlɛm, pʉʉ pʉɔ pínɛ pʉʉ ńjẅínɛ pɛŋɡɛ́mndʉ̈ɔ́Ꞌ-Sɛ́ jẅínɛ, ńdɔk mɛŋɡɔꞋ ńtɛ́mtɛ pʉɔ pinɛ Sɛ́ túunɛ mbɔ̌ pʉʉ jẅítɛ, ɛ́ ŋkɑ́ yɛ́sʉ́Ꞌ pɑ́Ꞌ n dɔɔnɛ nɛcúꞋlɛ pɔ́ɔ pʉ́ʉ, pɑ́Ꞌ mɔ̂ŋɡɛ́p cúꞋlɛ pɔ́ɔ pɛ́ tsɛt mɛpɑ́p mɛ́, pʉʉ kɛ́ ńdʉꞋ lʉꞋnɛ? 35Tsʉ́Ꞌnɛ ŋ kɛ ɛ́sẅíi wʉ́ʉ, ndɑ́-nɛnɔŋpɔꞋ yʉ́ʉ ɡɛ tsʉꞋ fɛ́m ndɑ́, mbɔ Sɛ́ mɛꞋ wʉ́ʉ. Pʉʉ pɔɔ pɛn ńjʉ́ɔ wɑ́ɑ pɔ́, tɛ ńdɑ́Ꞌ ŋ́kúu lɛ́Ꞌ yi pʉʉ ɡɛ cú ŋɡɔ: mbɔ́tnɛ-Sɛ́ pɔ́ nɛ́ ŋu ẅí ɑ tɔ́nɛ nǔu lík Tsɑpʉɔ.»
Currently Selected:
Lúkɑ́shi 13: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
