Jɑ̂ŋ Mɛtú-nu
Mɛtú-nu
Jɑ̂ŋ kɑ pɔ́ tɑ́Ꞌ ŋu nǔu ɡɑŋku-Yɛ́su ntsɔ̌ppɑ́ nɛ́ nɛɡɛ́m. A cú nu nǔu túmbʉʉ yɛ́ lɑ́ ŋ́kɛ́ ḿbɔɔ lík yɛ́ kẅíi, ɑ cú nu pɔ nǔu lík wɛcɔ́ «ŋɡɑŋku-Yɛ́su» (pɑk 18.15) wi «Yɛ́su kɑ pɔ́ ŋ́kɔŋ wɛ́ tɛꞋ» (pɑk 13.23). Jɑ̂ŋ kɑ́ cú nu nǔu ŋɡɛnɛ mɛnu-Yɛ́su mbɑ sẅiŋɛ yɛ́ pɑ́Ꞌ pɛcɔ́ pʉɔ cúnɛ yɔ́p tsɛt mɛcɔ́ mɛŋwɑꞋnɛ-Ŋkʉʉ Sʉ́Ꞌnɛ pɔ́. Tɛ ńtsʉ́Ꞌ pɔ́Ꞌɔ, mbɔ jʉ́ zɛ́nɛ́jʉ́ lɛ́Ꞌlɛ́nɛ mɛcɔ́ mɛnu pɑ́Ꞌ [nu-lɑ́ɑndɑ́-Cɑ́nɑ (pɑk 2.1-12) mbɑ pɑ́Ꞌ Yɛ́su pɔ́p Nikɔdɛ̂m kɑ cẅɛ́Ꞌnɛ́nɛ (pɑk 3.1-21), pɑ́Ꞌ pɔ́p mɑŋɡɛ́-Sɑmɑlîi kɑ cẅɛ́Ꞌnɛ́nɛ (pɑk 4.1-12), mbɑ nu-ŋɡɑŋpʉ̈ɔ́Ꞌtɛ-Mbɛtzɑ́tɑ (pɑk 5.1-18), kɛ mbɑ nu-ŋu wí pɛ́ kɑ ɡɔ́ ḿbí wɛ́ ɑ pɔ́ fʉmík (pɑk 9.1-41)]. Jɑ̂ŋ ɡɔ́ ńzɛ ŋwɑꞋnɛ yɛ́ ḿbiitɛ ńnyɛt ŋɡɔ Yɛ́su Sẅíŋɛ-Sɛ́ yi ɛ́ kɑ shɔtnɛ́nɛ ńtsʉ́Ꞌ mbɑp-mbʉʉ, ŋɡɔ jʉ́ kɑ lɔknɛ kyɛꞌ mbɑ nu nɛ́nẅín ńtɔ́ (pɑk 1.1-18). Pɔ́Ꞌɔ, Jɑ̂ŋ pɛn ńdɛꞌlɛ nu yi ɑ kɑ jʉ́ɔnɛ Yɛ́su ɡɛ kɛ mbɑ yi pɛcɔ́ pʉɔ kɑ jʉ́ɔnɛ yɔ́p (pɑk 1.19-51). Ŋ́ɡɛ pɔ́Ꞌɔ ḿbɛn ńnyɛt mɛŋkʉꞋnɛ mɛnu sɑɑmbɑ́ mi Yɛ́su kɑ ɡɛnɛ ńdɔk ńdɛꞋlɛ ŋu ẅí ɑ jʉ́. Ḿbɛn ńcú pɑ́Ꞌ Yɛ́su pɔ́p pʉɔ tɛ ńzɑ́ɑ kɑ cẅɛ́Ꞌnɛ́nɛ. Jɑ̂ŋ pɔ́ ŋkɑ́ tsʉʉ ńnyɛt pɑ́Ꞌ Yɛ́su pɔ́p pʉɔ tɛ ńzɑ́ɑ kɑ pɔ́ ńtɛmtɛ pɔ́Ꞌɔ, ɑ zíꞋ wɔ́p nɛ́ mɛyúu tɛ ɛ́ zɑ́ɑ. Jɑ̂ŋ lɛꞋlɛ pɑ́Ꞌ nɛzɑ́ɑ pɑsɑ́Ꞌlɑ́-Pɑyúdɑ kɑ pɑɑnɛ Yɛ́su pɔ́Ꞌɔ tɛ ḿbɔɔ pɛ́m ŋɡɔ ɑ Nzɑ́Ꞌŋkʉ wi Sɛ́ kɑ kɑꞋnɛ ŋɡɔ ɑ tɔ́ ŋ́ɡɛ pɔ́p luk pɔ́ (pɑk 2-12) Ɛ́ lɛɛ pɔ́Ꞌɔ, Jɑ̂ŋ cú pɑ́Ꞌ Yɛ́su kɑ ɡɑ́nɛ ndẅiknzʉʉ ntík mbɔ̌ ɡɑŋku pɛ́ mbɑ cɛꞋlɛ Sɛ́ yi ɑ kɑ ɡɛnɛ nǔu tú yɔ́p (pɑk 13-17) Jɑ̂ŋ pɛn ńcú pɑ́Ꞌ pɛ́ kɑ ŋɑknɛ Yɛ́su lɑ ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ (18-19); ḿbɛn ńcú nǔu pɑ́Ꞌ Yɛ́su kɑ zẅíimɛ́nɛ nǔu nɛvú [mbɑ ntɛ́ yi ɑ kɑ nyɛtnɛ mbʉʉ yɛ mbɔ̌ Mɑlíyɑ-Mɑkdɑlɑ mbɑ mbɔ̌ ɡɑŋku pɛ́]. Jɑ̂ŋ cú ŋɡɔ ɑ kɑ ŋwɑꞋnɛ pɑ́Ꞌ ńdɔk ɛ́sẅíi pʉɔ ŋɡɔ Yɛ́su ɑ Nzɑ́Ꞌŋkʉ wi Sɛ́ kɑ kɑꞋnɛ, mɔ́ɔ-Sɛ́ wi ŋu lɑɑ ńzɑ́p tʉ́m yɛ́ nǔu wɛ́ mbɔ ɑ kɛ́ lɑ́Ꞌ ḿbɛ́ pɔ́, mbɔ ɑ ŋ́ɡẅɛɛ Luk kɛ́mɛ (pɑk 20-21).
Currently Selected:
Jɑ̂ŋ Mɛtú-nu: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017