Jɑ̂ŋ 18

Pɛ́ ɡʉ ŋ́ɡẅɛɛ Yɛ́su

1Yɛ́su kɑ cú pɔ́Ꞌɔ, pɔ́p pɛ́ ɡɑŋku pɛ́ ɡʉ, ŋ́kúu tsɛt fúꞋ, ńtúu nɛtʉŋ-ŋki-Sɛdɛlɔŋ, ŋ́ɡʉ nǔu yɛcɔ́ njʉ́n. Yɛcɔ́ ŋkɑ́Ꞌ pɔ́ zúꞋu, pɔ́p pɛ́ ɡɑŋku pɛ́ kúu tsɛtú. 2Ɛ́ kɑ ɡɔ́ ḿbɔ́ Jẅidɑ ẅí ɑ ɡʉ fɛn wɛ́ pɔ́ ńjí zʉꞋ ɛ̂yɑ́ kwɑꞋ sʉ́Ꞌnɛ, mbíꞋŋɡɔ Yɛ́su pɔ́p ɡɑŋku pɛ́ m̄bɔ́ ńnɑ́ŋ ńcúꞋlɛ zúꞋu. 3Jẅidɑ nɑ́ŋ tɛ ńtɔ́, ḿbɔ́ mbi tsɛtsɛt pɑlʉ̈ɔ́Ꞌntsɔ-Lɔ́mɑ pɔ́p pɑpyɛ́p ndɑ́-nɔŋpɔꞋ, pí pɛtɑ́tndɑ́-pɑnɔŋ pɔꞋ pɔ́p pɑfɑlísɑy lɑ́Ꞌnɛ ńtúu. Pɔ́p ɡẅɛ mɛkyɛꞋ múk, nɛ́ túlúkɑ́ŋ, mbɑ yúu-ntsɔ. 4Yɛ́su jí nu yí ɛ́ sɛ́ ńtɔ́ nǔu wɛ́, ńtɔ́ mbi pɔ́p ńcú ŋɡɔ: «Pʉʉ lɔɔ wɔ̌?» 5Pɔ́p tsɔ́Ꞌ mbɔ̌ wɛ́ ŋɡɔ: «Yɛ́su wɛ Nɑ̌ɑzɑlɛt.» A tsɔ́Ꞌ mbɔ̌ pɔ́p ŋɡɔ: «A mɔ.» Ŋ́ɡɔ ńcú pɑ́Ꞌnɛ, Jẅidɑ ẅí ɑ lɑ́Ꞌnɛ ɛ́fɛn wɛ́ pɔ́ tsɛtsɛt pɔ́p. 6Yɛ́su pɔ́ tɛ ńcú mbɔ̌ pɔ́p ŋɡɔ: A mɔ, pɔ́p pɛn nzʉʉ nɛ nzʉʉ, ḿvutɛ sɛ́. 7Yɛ́su pɛn ḿbíkŋɛ wɔ́p ŋɡɔ: «Pʉʉ lɔɔ wɔ̌?» Pɔ́p cú ŋɡɔ: «Yɛ́su wɛ Nɑ̌ɑzɑlɛt.» 8Yɛ́su tsɔ́Ꞌ mbɔ̌ pɔ́p ŋɡɔ: «Ɛ sẅíi wʉ́ʉ ŋɡɔ ɑ mɔ. Ɛ́ lɑɑ ŋ́kɛ́ ḿbɔ́ yi pʉʉ tɔ́ lɔɔ wɑ́ɑ, pʉʉ ńnɑ́ pɔ pʉɔ pɔ́p ɡʉ.» 9Ɛ́ kɑ pɔ́ pɔ́Ꞌɔ, sẅiŋɛ yí Yɛ́su lɑ́Ꞌnɛ ńcú mbɔ̌ Sɛ́ lɔk ḿbuutɛ. Ɛ́ pɔ ńcú ŋɡɔ: «Wɛcɔ́ tɑ́Ꞌ nǔu pʉɔ pí ɔ kɑ ɡɑ́nɛ mbɔ̌ mɔ lɑ́, ŋkɑɑ pɛ́.»

10Símɔ̂ŋ Pyɛ̂ ẅí ɑ kɑ ɡẅɛɛnɛ níi-ntsɔ ɡɔ́ɔ ŋ́kɛ́ ɛ́sɔŋ níi tsɛt mbɑ́ɑ, ńzwɑ́ nɛtúutɛ ŋɡɑŋfɑꞋ tɑ́tndɑ́-pɑnɔŋ pɔꞋ nǔu ɡúŋ pɔ́ tʉʉ. Lík ŋu ɛ̂wɑ́ kɑ pɔ́ ŋɡɔ Mɑlkus. 11Lɑ́ Yɛ́su cú nɛ́ pyɛ̂ ŋɡɔ: «NíꞋ níi yu mbɑ́ɑ!» Ŋ kɛ́ nɔ́ ŋɡʉ̈ɔ́Ꞌ#18.11 Nɔ ŋɡʉ̈ɔ́Ꞌ: ɛ́ nɛpɛ́m nɛjʉ́ɔ ŋɡʉ̈ɔ́Ꞌ. yí Tɑ̌ɑ mɔ ɡɑ́nɛ ŋɡɔ n nɔ́ pɔ́ ɔɔ?

Pɛ́ lɔk Yɛ́su ŋ́ɡʉ nɛ́ njɛ́Ꞌ-tɑ́tndɑ́-pɑnɔŋ pɔꞋ Áɑnɑ

12Nɔɔ-pɑlʉ̈ɔ́Ꞌntsɔ, pɔ́p pɛtɑ́tndɑ́-pɑnɔŋ pɔꞋ pɔ́p pɑpyɛ́p zʉꞋ-nɔŋpɔꞋ, pí pɛkɛ́m-Pɑyúdɑ lɑ́Ꞌnɛ ńtúu, ɡɔ́ɔ ŋ́kɛ́ ŋ́ɡẅɛɛ Yɛ́su, ŋ́kút wɛ́. 13Pɔ́p kút Yɛ́su pɔ́Ꞌɔ, ńdɔk wɛ́ ḿbiitɛ ŋ́ɡʉ ntɔ́Ꞌ-Áɑnɛ. Áɑnɑ ḿbɔ́ pɔ́Ꞌɔ, ḿbɔ́ tɑ́kẅíꞋ-Kɑifɑ ẅí ɑ kɑ pɔ́ ŋɡuꞋ ɛ̂yɑ́, ḿbɔ́ tɑ́tndɑ́-pɑnɔŋ pɔꞋ. 14Jʉ́ Kɑyífɑ, pɔ́ ŋu ẅí ɑ kɑ cúnɛ mbɔ̌ pɛkɛ́m-Pʉɔ-Yúdɑ ŋɡɔ: «Mbi pɑ́Ꞌ ɛ́ lɑɑ ḿbɔ́ tɑ́Ꞌ ŋu pfú nǔu tú lɑ́Ꞌ»

Pyɛ̂ ɡʉ muŋɛ ŋɡɔ ɑ kɑ́ pɔ́ ŋɡɑŋku-Yɛ́su pɔ́

15Símɔ̂ŋ Pyɛ̂ pɔ́p wɛcɔ́ ŋɡɑŋku-Yɛ́su kɑ pɔ́ nzʉʉ Yɛ́su. Pɑ́Ꞌ tɑ́tndɑ́-pɑnɔŋ pɔꞋ kɑ pɔ́ ńjí ẅîwɑ́ ŋɡɑŋku-Yɛ́su lɑ́, pɛ́ ɡɔ́ ńdɔk Yɛ́su ńtɔ́k nɛ́ tsɛt ntɔ́Ꞌ-tɑ́tndɑ́-pɑnɔŋ pɔꞋ, ɑ pɔ́ yɛ́ pɔ nzʉʉ. 16Pyɛ̂ ɡɔ́ŋ píi ńtʉ́ʉ, ntsu-ntɔ́Ꞌ. Wɛcɔ́ ŋɡɑŋku-Yɛ́su wɑ́ ẅi tɑ́tndɑ́-pɑnɔŋpɔꞋ kɑ pɔ́ ńjí wɛ́ lɑ́, ɡʉ ńcú nu mbɔ̌ mɑŋɡɛ́ ẅi ɑ pyɛ́pnɛ ntsu-ntɔ́Ꞌ, ŋ́ɡɛ pyɛ̂ kúu tsɛt ntɔ́Ꞌ. 17Mɑŋɡɛ́ ɛ̂wɑ́ ẅi ɑ pyɛ́pnɛ ntsu-ntɔ́Ꞌ cú mbɔ̌ Pyɛ̂ ŋɡɔ: «Ɔ kɑ́ pɔ́ yú wɛcɔ́ tɑ́Ꞌ nǔu ɡɑŋku ŋu wɑ́ pɔ́ ɔɔ?» Pyɛ̂ tsɔ́Ꞌ ŋɡɔ: «Ŋ kɑ́ pɔ́ ŋɡɑŋku wɛ pɔ́.» 18Ɛ́ ɡɔ́ ḿbɔ́, mbɔ ɡɑŋfɑꞋ pɔ́p pɑpyɛ́p ndɑ́-nɔŋpɔꞋ lɑ́Ꞌ ńniitɛ múk. Fɑ́k pɔ́ ŋ́kɔ́, pɔ́p pɔ́ ńzɔ́k múk. Pyɛ̂ tʉ́ʉ yɛ́ pɔ́p pɛ́ pɔ́p pɔ́ ńzɔ́k múk.

19Yɛ́su pɔ́ ŋkɑ́ ɛ̂yɑ́ ḿbɔ́ mbi nɔŋpɔꞋ wɛ ɡwɛ́#18.19 Áɑnɑ kɑ piitɛ ḿbɔ́ nɔŋpɔꞋ wɛ ɡwɛ́, lɑ́ Kɑyífɑ tɔ́ ḿbɔ́ jʉ́. Pɛ́ kɑ nɑ́ ndu pɛ́ Áɑnɑ pɔ́ pɑ́Ꞌ nɔŋpɔꞋ wɛ ɡwɛ́ mbíꞋŋɡɔ ɑ kɑ ɡẅɛɛ nɛpfú lɑ́ pɛ́ tík wɛcɔ́ wɛ ndɛꞋ.. A pɔ́ ḿbíkŋɛ wɛ́ nɛ́ nu nǔu ŋɡɑŋku wɛ́, mbɑ nǔu yúu mi ɑ zíꞋnɛ pʉɔ. 20Yɛ́su tsɔ́Ꞌ mbɔ̌ wɛ́ ŋɡɔ: «Ŋ kɑ pɔ́ sɑ́ɑnɛ sɑ́ɑnɛ́nɛ ńcú nu mbɔ̌ lɑ́Ꞌ, ŋ kɑ pɔ́ ńzíꞋ pʉɔ tsɛt mɛndɑ́-cúꞋlɛ, mbɑ tsɛt ndɑ́-nɔŋpɔꞋ, zʉꞋ yí Pɑyúdɑ cúꞋlɛ́nɛ zúꞋu. Mɔ ŋkɑɑ ḿbɔ́ ńcú yɛcɔ́ nu pɔ ńdʉɔ lʉɔmɛ́nɛ pɔ́. 21Mɛlɑ́Ꞌ ku ɔ píkŋɛnɛ wɑ́ɑ nɛ́ mɛnu? Píkŋɛ nu yí ŋ kɑ cúnɛ mbɔ̌ pʉɔ pí pɔ́p kɑ pɔ́ ńzúꞋ. Pɔ́p sɛ́ ńniitɛ ńjí yúu mi ŋ kɑ cúnɛ.» 22Yɛ́su cú pɔ́Ꞌɔ, wɛcɔ́ tɑ́Ꞌ nǔu pɑpyɛ́p ndɑ́-nɔŋpɔꞋ ẅí ɑ ḿbɔ́nɛ zúꞋu tɛ́m pɔ́ nɛtúutɛ yɛ́, ńcú ŋɡɔ: «Yɑ́ pɑ́Ꞌ ɔ tsɔ́Ꞌnɛ nu mbɔ̌ NɔŋpɔꞋ wɛ ɡwɛ́?» 23Yɛ́su tsɔ́Ꞌ mbɔ̌ wɛ́ ŋɡɔ: «Ɛ́ lɑɑ ḿbɔ́ yí n cú kɛpɔŋ, ɔ sẅíi wɑ́ɑ nɛ́ yúu mi ɛ́ nǔu ḿbɔ́ yi kɛpɔŋ, ŋ́kɛ́ ḿbɔ́ yí n cú sʉ́Ꞌnɛ, mbɔ ɔ pɛn ńtswɑ́ɑ wɑ́ɑ mɛlɑ́Ꞌkʉ̈ɔ́?» 24Áɑnɑ cú, tɛ Yɛ́su pɛ́t pɔ mɛŋkʉ, pɛ́ lɔk wɛ́ ŋ́ɡʉ ŋ́ɡɑ́ mbɔ̌ Kɑyífɑ, nɔŋpɔꞋ wɛ ɡwɛ́.

25Pyɛ̂ kɛ́ ḿbɛ́t ḿbɔ́ ńzɔ́k pɔ múk, pɛ́ cú nɛ́ jʉ́ ŋɡɔ: «Gu yú, ɔ kɑ́ pɔ́ wɛcɔ́ tɑ́Ꞌ ŋɡɑŋku ŋu wɑ́ pɔ́ ɔɔ?» Pyɛ̂ muŋɛ, ńcú ŋɡɔ ŋ kɑ́ pɔ́ ŋɡɑŋku wɛ pɔ́. 26Wɛcɔ́ tɑ́Ꞌ ŋɡɑŋfɑꞋ-NɔŋpɔꞋ wɛ ɡwɛ́, ḿbɔ́ mɔ́ɔmɑ́ pɛ́ ŋu wɑ́ ẅi pyɛ̂ kɑ zwɑ́nɛ nɛtúutɛ nɛ́ lɑ́, cú mbɔ̌ pyɛ̂ ŋɡɔ: «Mɔ ŋkɑɑ jʉ́ɔ wʉ́ʉ pɛ́ pɔ́p tsɛt ŋkɑ́Ꞌ pɔɔ?» 27Pyɛ̂ pɛn ḿmuŋɛ. Mɔ̂ŋkʉ̈ɔ́Ꞌ ɡɔ́ɔ ńtɔ́ŋ.

Yɛ́su mbi Pilɑ́tɔ

28Pɛ́ fú ntɔ́Ꞌ-Kɑyífɑ, ńdɔk Yɛ́su ŋ́ɡʉ nɛ́ njɛ́Ꞌ-ŋɡɔ́mnɑɑ-Pʉɔ-Lɔ́mɑ. Ɛ́ pɔ́ mbɑꞋmbɑꞋɑ́. Pɛkɛ́m pí pɔ́p lɔknɛ Yɛ́su ńtɔ́ kɛ́ mbɔɔ yɔ́p ndɑ́ ŋɡɔ́mnɑɑ kúu, ḿbɔ́k nɛtíi lɔ́Ꞌ, ɛ́ tɔꞋ wɔ́p nɛjʉ́ ndínɑ-Pɑ́skɑ. 29Pilɑ́tɔ kẅɛ́ɛtɛ wɔ́p píi, ńcú ŋɡɔ: «Pʉʉ ɛ́fɛn ŋu wɔ mɛlɑ́Ꞌkʉ̈ɔ́?» 30Pɔ́p tsɔ́Ꞌ ŋɡɔ: «Ŋu ɛ̂wɑ́ lɑ́Ꞌ ḿbɔ́ pɛ́Ꞌɛ ḿbɔɔ nu kɛpɔŋ ɡɛ, mbɔ pɛk kɑ́ lɔk wɛ́ ńtɔ́ mbi wú pɔ́.» 31Pilɑ́tɔ ɡɔ́ɔ ńcú mbɔ̌ pɔ́p ŋɡɔ: «Pʉʉ lɔk wɛ́ ŋ́ɡʉ ŋ́ŋɑk wɛ́ zɛ́nɛ pʉʉ, pɑ́Ꞌ nɛpʉ́ʉ nʉ́ʉ ŋ́kɔŋnɛ pɔ́Ꞌɔ.» Pɛkɛ́m tsɔ́Ꞌ ŋɡɔ: «Nɛpʉ́ʉ nʉkŋɛ kɑ́ pɛ́m ŋɡɔ pɛk jẅí ŋu pɔ́.» 32Ɛ́ lɔk ḿbuutɛ nǔu nu yí Yɛ́su kɑ tsʉ́Ꞌ nɛcú ntɛ́ yí ɑ ɡʉ ŋ́ɡɛ ḿpfú ńcú.

33Pilɑ́tɔ ɡɔ́ɔ ḿbɛn ndɑ́, ŋ́ɡɛ Yɛ́su tɔ́, ɑ píkŋɛ wɛ́ ŋɡɔ: «Ɔ fɔɔ-Pɑyúdɑ ɔɔ?» 34Yɛ́su tsɔ́Ꞌ ŋɡɔ: «KwɑꞋ ɡu kɛ́ nɛ́ ŋ́kwɑŋɛ ńcú, kɛ pɛcɔ́ pʉɔ sẅíi wú ŋɡɔ mɔ fɔɔ?» 35Pilɑ́tɔ tsɔ́Ꞌ ŋɡɔ: «Ɔ zúꞋ ŋɡɔ mɔ ŋu Pɑyúdɑ? Pɑlɑ́Ꞌ pʉ́ʉ pɔ́p pɛkɛ́m-pɑnɔŋpɔꞋ fɛnnɛ wú mbɔ̌ mɔ. Ɔ kɑ ɡɛ ku?» 36Yɛ́su tsɔ́Ꞌ ŋɡɔ: «Nɑ́ɑ nɛfɔɔ kɑ́ pɔ́ nɛ́ yɔ mbí pɔ́. Nɛfɔɔ nɑ́ɑ pɛ́Ꞌnɛ ḿbɔ́ nɛ́ yɔ mbí, mbɔ pʉɔ pɑ́ɑ lɑ́Ꞌ mbɔɔ nɑ́ nzʉʉ yɑɑ, tɛ pɛ́ níꞋ wɑ́ɑ mbɔ̌ pɛkɛ́m-Pɑyúdɑ pɔ́. Lɑ́, n zɛɛ ńcú ŋɡɔ nɑ́ɑ nɛfɔɔ kɑ́ pɔ́ nɛ́ ndǔmbí yɔ pɔ́.» 37Pilɑ́tɔ píkŋɛ wɛ́ ŋɡɔ: «Ɔ lɔk ḿbɔ́ fɔɔ pɔ́ ɔɔ?» Yɛ́su tsɔ́Ꞌ ŋɡɔ: «Gu cúnɛ pɔ́Ꞌɔ, mɔ fɔɔ. ZúꞋ yúu mi ɛ́ kɑ ɡɛnɛ pɛ́ pí wɑ́ɑ, ḿbɛn ńzúꞋ yúu mi ɛ́ kɑ ɡɛnɛ n tɔ́ ndǔmbí. Ŋ kɑ tɔ́ nɛcú yúu mi n jínɛ nǔu nu nɛ́nẅín. Ŋu pɔ́ nǔu nu nɛ́nẅín, ńzúꞋ ŋɡi yɑɑ.» 38Pilɑ́tɔ cú nɛ́ jʉ́ ŋɡɔ: «Nu nɛ́nẅín ɛ́ yɛ́t?» Ńcú pɔ́Ꞌɔ, ḿbɛn ɛ́fú ndɑ́ ńcẅɛt, ŋ́ɡʉ ńjʉ́ɔ pɛkɛ́m-Pɑyúdɑ píi.

Ńcú nɛ́ pɔ́p ŋɡɔ: «N zɛɛ ḿbɔɔ ńjʉ́ɔ yúu mi pɛ́ ɡʉ ńdɛɛ nǔu lɑ ńcú ŋɡɔ ŋu wɔ vu ntsɑŋ pɔ́. 39Lɑ́, pɑ́Ꞌ ɛ́ mɑt mbɔ̌ pɛkŋɛ nɛpɔ́ ŋkɑ́-ndínɑ-pɑ́skɑ, ńtsɔ́Ꞌ tɑ́Ꞌ ŋɡɑŋtsɑ́ŋ lɑ́, pʉʉ kɔŋ ŋɡɔ n tsɔ́Ꞌ fɔɔ-Pɑyúdɑ ŋ́ɡɑ́ nɛ́ pʉʉ?» 40Pɔ́p pɛn ŋ́ɡɑ́ ɡwɑ́t, ńcú ŋɡɔ: «Ŋɡɑ́ŋ, kɔɔ tsɔ́Ꞌ wɑ́ ŋu, tsɔ́Ꞌ pɔ Bɑlɑbɑs, ńcú pɑ́Ꞌnɛ Bɑlɑbɑs ɛ̂wɑ́ pɔ́ kwɑꞋ ntʉʉ ntsɔ́ŋ.»

Currently Selected:

Jɑ̂ŋ 18: JGO

Highlight

Copy