Matìo 7

Kǎ ghùw sāʼ

(Lûk 6:37-38, 41-42)

1“Kà nlò ghî ghə̀ èsaʼa, ghe lô saʼā sughò ghɛ. 2#Mâk 4:24Tɔŋlo enyəa ghe lô ghɛ̀ bɔɔm saʼa ko an dziī è mɔ̀ʼɔ zəla ghɛ̀ saʼa sughò ghî ghò a te. Ghəa ghəla ghɛ̀ ghəŋlo â ghì gho, Zə̀ kə lo â ghɛ̀ bɔɔm ghəəŋ sùghò êzə̂. 3À lǒ kwò ghù sò koʼò ko sugho e fəkàʼ zəa e lo an sə e wàazùghù, kuuwn kòʼò yò tɔ̂ŋ chia kə lo alô è zəghà zò esə à? 4Ghù lò ênzə̂n aledzàa ndûw â wàazùghù enyəa bùghò tò Ǹ nîi nughù səā wô sugho e fəkàʼ e zəa e lo an sə zəghà a, mò ghù kà bùʼ nì nùghù sə̀ wò dzə̀ tɔ̂ŋ kə fəkàʼ chia kə lo alô è zəghà zò esə à? 5Ghùw ù kə̀bàŋàdzə̀m wən! Bùʼu nǐi nùghu sə wò dzə̀ tɔ̂ŋ fə fəkàʼ chia kə lo an sə zəghà, sěe ghù sò lô alekòʼ sugho e zəa e lo an sə e wàazùghù.

6Kà nî fʉghazəa ù baa wo ghù fughu â bvʉ to, abugho ghù bùʼ fughu ko nû, tə n nāam nùghù ŋaŋè wò ko ghù. Ŋkāa, kà nî kɔ tə ufʉgha wʉ̀a ù dzəəŋ wo ghù fughu nduw â kwə̀lebʉ̄ghā wo, abugho ghù bùʼ fughu ko nû, ghê n nì dzùghòon màʼà tsùghù alo aghùw.”

Bvʉ tsughu fʉgha wəla ghù ləghaa alo egɔ̀ŋlò

(Lûk 11:9-13)

7“E bvʉa tsughuu nlò fəgha ko, Zə̀ kə m fùghù wò â ghɛ̀, e kəŋo tsughuu nlò fəgha ko, Zə̀ kə n dè wò â ghɛ̀, e tsʉʉn tsughuu nlò bâʼ kò, Zə̀ kə n tsʉ̀ è tsughu. 8Nu ghùw wəla ù nɔe tsughu fəhga ko, ù sò kèle fəgha kə te ko; wəlà ù kəŋ, ù sò kòʼò nù; wəla ù tsʉʉn tsughu sugho, ghe n tsʉ tsughu kəbâʼ â wə̄n. 9À lò ghû ndùghò abugho wɛ wʉ̂a wô ghû â bɛ ko a, ghù m fwə̀n fùghù ndùw wə̄n â tia zo a? 10Ŋkāa abugho ù bvʉ wô tsəgha zo, ghù m fwə̀n fùghù ndùw zughu à? 11Ghɛ̀ ghəla ghɛ̀ lô ghî à biigh gho, abugho ghɛ̀ lo alekwo alefughuu wɛ ghɛʼɛ gho â fʉgha ù dzûŋ wò, Tsele wɛʼɛ wəla ù lò alo kəwālā lo alebòʼò fughu ênzə̂n fʉgha ù dzûŋ wò â ghì ghəla ghe bvʉ nduw â wə̄n à! 12#Lûk 6:31 À fi lo enyəa, ghəa ghə̀là ghù ləghaa enyəa ghî ghə̀ è ghəəŋ wo â ghù, e bɔɔm ghəəŋ nduw sugho ŋgòʼ è ghəa a te gho â ghì ghò. Kən lò fəgha kəla kə lo an laŋ kə Musî àsùghò fəgha kəla mwàʼsò kə Kəzə̀ kəla ghiīshʉ̀ghà a fə̀ tɔ naŋa tsughu.”

Tsə̀gha nyə am fù u mbɛ̀ ù tughoon wo alenyə am fɔ̀ u kəwālā

(Lûk 13:24)

13“Tsəgha nyə am fù u mbɛ̀ ù tughoon wo. Ndə̀mà tə aghì tə̀ tùghuu tsə̀ghàa nyə̌a ko am fù u mbɛ̀ u ne wo, mò à lǒ dzì è bùghùun zəla ghe lo dzûuw maʼà ndə̀mà tə ghì ghəla ghe tsəghàa nyəā a te. 14Fu u mbɛ̀ wəla u nîi nduw ghùw am mùghùu zəla e doʼò tən kuuwn too nù, dziī fə te fia fə bə̂əŋ lô sugho; à fughu tsəghà nyə̌a kô sə fə aghì.”

A kâʼ fə̀ koʼò kɛ̀lɛ an tam kə wə̄n

(Lûk 6:43-44)

15“Nǐ nlò ghôom zò, ghiīshʉ̀ghà ghə agha a lo nû; ghe bughòo a vʉ̀a ghɛ̀ tò təndzì, mo ghe biso lo ubʉgha. 16Ghɛ̀ lô ghee kele ko am mwam e ghee. Nu ghùw yo alekʉ̀ɛɛ səā tsughuu wô tə̀lama kwùu tə tənyɔ̌ɔŋmgbê ŋkāa ghùw yo sughò alekʉ̀ɛɛ səā tsughu wô àŋgəm aŋ kàʼ fə echwàn. 17Kâʼ fə̀ dzûŋ fə telè mʉ̌a tsughu kô twam u dzûŋ wò sughò. Kâʼ fə̀ biigh fia fə telè mʉā tsughu sughò twam ù biigh wo. 18Kâʼ fə̀ dzûŋ fə mʉa yo tam kə̀ biigh ko, kâʼ fə̀ biigh fia fə yô sugho alemʉ tam kə̀ dzûŋ kò. 19#Mat 3:10; Lûk 3:9Kâʼ fəla fə mʉa yô twam ù dzûŋ wò, a m gbò è kpaa. 20#Mat 12:33E fi lo enyəa ghɛ̀ kê ghiīshʉ̀ghà ghə agha a kele am mwam e ghee. 21Ghî ghəla ghe tsôo ŋgɔɔ̄ zee ko mugho enyəa, ‘Mughùbè, Mughùbè.’ À yò dzə ghee a dzə̀m ghe lo tsəghàa nyəā am fɔ̀e u kəwālā, à kè kǔuwn lò ghî ghəla ghe bwiī an làŋ kə Tsele waŋā wəla ù lò alo kəwālā. 22Abugho tsuʼ ù saʼa u aghì ù kê kpe tsughu, ghî ghə̀ e ke dzaā wo â mùghò enyəa, ‘Mughùbè, Mughùbè, ghǎʼ mò mgbaŋ yo ghiīshʉ̀ghà ghə̀a ghò à, a n dzûum sə zʉ̀ ù biigh wo zən zəghà, fwàʼ sùghò kɔ tə aghəa ndə̀m an zən zəghà à?’ 23#Sms 6:8Ŋ̀ kê daŋso dzâa mgbaāŋ səā ndûw â ghee enyəa, ‘Ŋ̀ kwo tsəgha yo ghɛ; nùghu nlò a vʉ̀a mùghò, ghî à biigh ghən.’ ”

Bɔ̀ɔtə̀ndughu ù tɔ̌ɔ àsùghò ù làʼso

24“Ghùw wəla ù zuw shwaʼ waŋa wən wo vʉ̀a ù bwìi nduw a te, ù lo dòʼn ko tǒ ghùw ù tɔ̀ɔ wəla ù fə̀ so e bəgha ndughu, kùʼ dzɔ̀ tsughu kəbəghànlò alo atīa. 25Ghuuw zə mo è tsughu, fʉ̀ghàdzughù tə̀ mô è sə, zəŋ n tsəghàa è sugho, bùghò tsɔ̀ɔ ko èghue a fughu an ndughu e te, ndughu è te ŋ kè tsughuu bvʉ̂, ghe mo sô kuʼ dzɔ̂ tsughu bəghàan kò alo atīa. 26Yia abugho ghùw wəla u zuw shwaʼ waŋa wən wo, vʉ̀a ù tàʼkè naŋa kə̀tuŋlo a te, ù lo dòʼn ko tǒ làʼsò kə ghûw kəla kə fə̀ so e bəghaa ndughu, ù m bəgha tiso kɔʼ ndùghù è wə̄n alo kəshīashīa. 27A m bùghò ghuuw e tsughu tsughu, fʉ̀ghàdzughù tə̀ mo è sə, zəŋ mô è tsəgha bughò zaʼa wò ughue an ndughu e te, zə m bɛ̀lɛ̀ bvʉ̀ è tsughu, dəm kə mo è səŋ.” 28#Mâk 1:22; Lûk 4:32 A m bùghò Yɛso kə̀a mɛʼɛ̄ tsughu ghəa ghən gho, tuw kə m kpuw saʼ kə aghì chì an dziī zəla ù zoʼn ghəa gho a te. 29Nu ù fə̌ ghee zoʼn yo tò ghê dèekə̀làŋ, ù fə̌ ghe zoʼnlo tǒ ghùw wəla ù ki dwaʼa u te wo.

Currently Selected:

Matìo 7: agq

Highlight

Copy