Matìo 11

Tsə̀təndə̄ghā tə Dzɔ̌n Fùghùu mùghù ŋ Kə̀zə̀

(Lûk 7:18-35)

1A m bughò Yɛso tsʉ̀ mɛʼɛ̀ tsughu tsə̀təndə̄ghā tə wə̄n tən èghəm a ghè tò tə bə̀ghà, ù n zə̀ghàa tsùghù luʼu chìa ù mò lo a te, nùghù nyə̀ ndùw an nàʼà mə̀la ŋ kùʼù lo kaāŋ tsəgha a fughu, ndùw kàʼ ndùw ghì a zoʼn gho a fughu. Ù n zoʼn ndùw aghì naʼà tə̀ nàʼà a fughu am mbùʼ e te, kə̀a ndùw sughò shwaʼ u Kəzə̀.

2A m bùghò Dzɔ̀n zuw tsughu zwɔ̂ŋ u Yɛso wò an ndùghùtsāʼ, ù n tum tsughu tsə̀təndə̄ghā tə wə̄n tə̀ li to 3enyəa ghe ndûw bvʉ â Yɛso enyəa, “À sò yia lo ghû Kə̀lestò wəla ù mò ki alebùghò, ŋkāa a ləmā tsughu ghùw ù nughù a?” 4Ghəa tsə̀təndə̄ghā tə Dzɔ̌n ti ndûw bvʉ nduw, Yɛso n dzɛ̀ â ghee enyəa, “Ndǔw dzǎa ndǔw â Dzɔ̌n fəgha kə̀là ghɛ̀ zuw, kòʼò àsùgho kəla ghɛ̀ koʼ; 5#Èzy 35:5, 6; Èzy 61:1 ghî à foō a koʼò wò tə̀luʼū, à məla bwiī yia bwîi wô tsəghatsəgha, yia baaŋ ghî a tətsùghò ghò, kùʼ vʉa u zuūw wô ghəa gho, ghî à kpuuw yia zôom nùghùun kɔʼɔ alo evʉ̄, yìa M̀ fughuu sugho Làbəlà è Dzùŋ â ghì à laa gho. 6Dzɔ̀ lǒ â ghùw wəla ù pfʉsō yô nʉ̀ghà wò a zəŋò mùghò.”

7Ghəa tsə̀təndə̄ghā tə Dzɔ̀n ti tə̀ nughù nduw, Yɛso ŋ kàʼ ndùw alekə̀a ghəa a Dzɔ̌n â saʼ kə aghì chì ko, dzɛ̀ â ghee enyəa, “Ghɛ̀ fə aŋ ŋgwə̄n nyəŋo soʼo lɛɛn kə kwò? À lo kədzaŋ kùɛɛ kə foō kaŋlo ŋkāa? Ɛ̂ŋgaŋ dzə̂! 8Ghɛ mò nyəŋ soʼ lɛɛn kwò à? Ghùw mò ù ŋ ghue u la an dàla è dzùŋ ŋkāa? Ɛ̂ŋgaŋ dzə̂! Kòʼô nlò, ghî ghəla ghe laā ghue zo alo tədàla, ghe mughu am mbɛ̀ tə udwə̀ŋ. 9Ghɛ̀ mo a fughu kuuwn nyəŋo soʼo alendùw kôʼ kə̀ kwò? Alendùw kôʼ ghùwshʉ̀ghà ŋkāa? Òo, Ǹ dzâa wô â ghɛ̀ enyəa ù mò buʼ tsəghataʼā sə ghùwshʉ̀ghà. 10#Mal 3:1 À lǒ ghùw wəla ghe mò tɔm naŋa kùu ndùw wə̀n enyəa, ‘Kòʼo nlò, Ǹ tuu ndùw tum zaŋā â sə ko, ù ndùw bian naŋā tsughu tə̀luʼū â ghù.’ 11Kùmkùm, aŋghəa Ǹ dzâa wô fɛ â ghɛ̀, ghùw ù lì yo ghe dzə fɛ am mbī, ù tsə̀ghàtàʼà sə Dzɔ̌n Fùghùu mùghù ŋ Kə̀zə̀; tsəlachìa e ghûw zəla e kuūwn lô alo kəwālā, e tsəghàtàʼà sə Dzɔ̌n wə̄n. 12#Lûk 16:16 Alenìi nughù wô an tsuʼù Dzɔ̌n Fùghùu mùghù ŋ Kə̀zə̀ u Kə̀zə̀, fɔ̂e ù Kəzə̀ ù fɛ bwìi ndùw tsə̀ghà ko alo esə̀ŋ alo esə̀ŋ, ŋgaam tə aghì tia tə dəmà sughò alenyə a te alo kədaʼa. 13Tɔŋlo enyəa ghiīshʉ̀ghà ghə̀n à dzə̀m mafə̄ ŋge kə̀a ghəa a fɔ̀e u kəwālā a te gho, lâŋ kə Musî chia kə fə̀ tso kə̂a sugho alebùghò kɔʼɔ̄ kûu wô an tì kə Dzɔ̌n; 14#Mal 4:5; Mat 17:10-13; Mâk 9:11-13 mò ghɛ̀ ləghaa dzə̀ alebōo, à lǒ wə̄n Elaedzà wəla ù mò ki alebùghò. 15Ghùw wəla ù ki tuūŋ ko, ù zuw.

16Ǹ lo tò mùghò è dzâa tsughu enyəa ghî a nɛ ghən fween kə̀ kwò a? Ghe lo tò wɛghêtùghu ghe nɔɔ̄m ndughu to am fwànlò, chìa mò â wàazə̀ enyəa;

17‘Yia a tso tɔŋ ndɔŋ enyəa ghɛ̀ bən, ghɛ̀ kâ tsò bə̄n.

Yia a zom zôo tə ese to, ghɛ̀ kâ tsə̀n dì.’

18Nu Dzɔ̌n mò nduw bugho fɛ̄, zəa yo, mʉa sùghò yǒ lʉ̀ mò, ghî ghə̀ ŋ kə̂aa kàŋlo enyəa, ‘Ù lǒ ghùw ù ùzʉ̀.’ 19Wɛ̀ ù Ghùw vʉ̀a ù ndùw bugho, zuuw ko èzə, mʉa sùghò nlʉ̀, ghe yia so enyəa, ‘Kòʼo ko ghùw wə̀n à, ghùw ù kàla, ghùw fə̀n ù ghê dzə̀akə̀mwàʼsò ghèe ghê ghì à biigh gho!’ Ghî à koʼòkɛ̀lɛ̂ kô tɔ u Kəzə̀ aŋ ghəa zəla e sə kɔʼ a te.”

Naʼà təla tə mò boōm fughuu ndûw yo â Yɛso

(Lûk 10:13-15)

20Ghì ghə̀ ŋ kè tiī kûuwn fə̀ŋ tə ghee aŋ ghəa a ghee à biigh gho an nàʼà təla Yɛso fə̀ ŋge de sə̀ghàa mò a fughu êzə̀, ù daŋso kàʼ ndùw ghee aletsɔ̀mlò, dzɛ̀ tsughu enyəa, 21#Èzy 23:1-18; Ɛ̀zi 26:1—28:26; Dzw 3:4-8; Amò 1:9, 10; Zâk 9:2-4“Ghî a Kolàzîn ghò, àsùghò ghɛ̀ a ghî a Bɛ̀dsǎedà ghò, ghɛ̀ ke kòʼò mùlùŋ! Tɔŋlo enyəa abugho a mô fwaʼā num tə aghəa tən â ghì a Tâe ghì àsùghò ghì a Sidɔ̀n ghò, to ghe maā ndzʉ tə təmbə̀ghà tə̀ ki ka aledzə̀là, tsòʼnlò utuw an udzə̀m, aledèe tsughu enyəa ghe m fə̀ŋ tə ghee tə ti kuwnlo. 22M̀ fɛ so ŋ kuūwn dzâa wô â ghɛ̀ enyəa, a kê bugho an tsuʼ u sāʼ, Zə̀ kə̀ kê tsǒo kwuso yo se zo a zəŋò ghɛ̀ tò kə kê kwusō a zəŋò ghì a Tâe ghò àsùghò ghì a Sidɔ̀n ghò. 23#Èzy 14:13-15; Dzs 19:24-28Yia a bughò ghɛ a ghî Kàpɛnùm ghò, ghɛ̀ moʼò enyəa ghɛ̀ lo so e kɔʼ alo kəwālā a? Ɛ̂ŋgaŋ dzə̂. Zə̀ kə̀ kê ghɛ̀ màʼn nyə̌a tsughuu am kpǎaghùw. Tɔŋlo enyəa num tə aghəa təla ghe mò fwaʼ an naʼ zɛʼɛ̄, abugho ghe mô fwaʼà ghəa a te gho an naʼ e Sodòm, to ghəa a te a mô nǎam lǒ alebùghò sə nɛ. 24#Mat 10:15; Lûk 10:12Ǹ so Ǹ dzâa wô a ghɛ̀ enyəa an tsuʼ fəla Zə̀ kə̀ kê zaʼa ghî gho a te, Zə̀ kə̀ lo kwuso èse a zəŋò naʼ e Sodòm tsəghàtàʼà sə̀ aŋghəa kə lo kwuso a zəŋò ghɛ̀.”

Bùgho zʉ̀nlò nlò a tsəlà mùghò

(Lûk 10:21-22)

25Yɛso n dzɛ̀ tsùghù an nə̀ghà e te zo enyəa, “M̀ fughu zɔ̀ɔŋ kə̀a a Tsele waŋā, Mughu ù kəwala à ghueekətsə̄ ko, enyəa ghù ŋ ghəa ghən nân nàŋa â ghì à tɔɔ gho, ghù vʉ̀a ghù dè fughu tsughu â wɛghêtùghù gho. 26Òo a Tsele waŋā, ghù mò ghəəŋ tsughu enyəa e doʼò tsughu êzə̀ aŋghəa ghù mò ləgha tsughu.”

27 # Dzn 3:35; Dzn 1:18; 10:15 Ghəa Yɛso gɔ̀ɔŋ mɛʼɛ̀ tsughu, ù n dzɛ̀ â ghì ghò enyəa, “Bəghà m mùghò â ghəa gho a dzə̀m fughu; ghùw ù lì kwò yo Wɛ ù tè mò à gɔ̀ʼɔ̀ ko yo Tsele ù te, ghùw ù li kwò sugho yo Tsele u te, mò à mìaa ko yo wɛ ù te àsùghò ghùw wəla wɛ ù te tsə̂m tsughu aledè â wə̄n. 28Ghɛ̀ ghî ghə̀là ghɛ̀ fanlō, zuuw sùgho ŋgōʼ, ghɛ̀ bugho nlò a tsəlà mùghò, Ǹ nîi naŋa ghɛ̀, ghɛ̀ zʉʉn ghue zo. 29#Dzl 6:16Nyə kɔʼ nlò am fàŋà kaŋā, ghɛ̀ zoʼn kele ghəa gho aŋ ghùu mùghò, nu Ǹ lo zʉ̀ kə ghûw, yìa M̀ bughunlō â fə̀ŋ, ghɛ̀ lo daŋso zʉnlō. 30Tɔŋlo enyəa fàŋà kaŋā kə tughuu yo aledzə̀là, mbùŋ kaŋa chia kə zâŋsò sugho.”

Currently Selected:

Matìo 11: agq

Highlight

Copy