Lûk 8

Yîzən ghəla ghe mò təə̄m ndûw ghue zo ghèe ghê Yɛso

1Yɛso n daŋso nùghù è tsughu, bwìin kǎaŋ ndùw nàʼà tə̀nàʼà, nàʼn ndùw Làbəlà è Dzùŋ. Tsə̀təndə̄ghā tə̀n èghəm à ghè tò tə bə̀ghà n lo ghèe ghee, 2#Mat 27:55, 56; Mâk 15:40, 41; Lûk 23:49 àsùghò yîzən à li gho Yɛso fə̀ baāŋ tsughu dzaŋà tə ghee to, shûaan sə̀ sùghò zʉ̀ ù biigh wo a zəŋò ghee; Mèle Màʼdàlêen wəla ghe fə̀ shûaa sə zʉ̀ wò sə̀ghàmbəgha a zəŋò wə̄n n lo mɔ̀ʼ, 3Dzwǎnà n lo, tɔɔŋ wì ù kɔ̀ɔ fə Hɛlɔ̀d, Chuwsà. Sùsana n lo, à ndə̀m à ghee à li gho. Ghe n yosò ndùw ghê Yɛso am fʉgha wəla ghe mò ki.

Kwə̀ən kə ushwāʼ aŋ Ghûwsūm

(Mat 13:19; Mâk 4:19)

4Ghî ghə̀ n nughùun ndùuŋ wò nàʼà tə̀nàʼà, zùuŋ wò a vʉ̀a Yɛso. Ù ŋ kwə̀ən kə̀a ndùw â ghee enyəa, 5“Bəghà ù lì fə̀ soʼ kuw kə̀ taa ko, a m bùghò ù təmā fʉgha ù taa wo, sə à li ghə n tsɔ̄ʼn dòʼò tsùghù aŋ kwàn u dziī, ghî ghə̀ m bughò dzùghòon màʼà dàŋ è tsəgha, nwə̀n mə̀ m bùghò chǔuwn pfʉ̀ nùghù kɔ̀ʼ è sugho. 6À lì ghə ŋ kuūwn bvʉ̀ dòʼò ndùw aŋ gɔ̀ʼnlò; ghə m fwə̀n è kɔʼ, kpùw kòmlò è tsughu, gɔ̂ʼnlò u màʼà zuū. 7Sə à li ghə m bvʉ̀ dòʼò ndùw an tənyɔ̌ɔŋmgbê; ghən m fwə̄n dzə̄əŋ kɔʼ ko ghèe ghê nyɔ̌ɔŋmgbê tò, nyɔ̌ɔŋmgbê tə̀ ŋ kwù ŋgwùu è tsughu. 8À li ghə m bvʉ̀ tsùghù am fòon kə kəlùʼu; ghən n noo bɔ̀ŋ dzɔ̀ è tsughu.” Aŋghəa Yɛso kə̀a mɛʼɛ̀ tsughu shwaʼ wən wo, ù n nùghù dzɛ̀ sə kɔʼ an dzə̂ è tughu enyəa, “Mò ghùw kì kətuŋlō, ù zuw.”

9Aŋghəa tsə̀təndə̄ghā tə wə̄n tə bvʉ tsughu â wə̄n enyəa kwə̀ən kə ushwaʼ kən biso mòʼò èndūghō. 10#Èzy 6:9 Ù n dzɛ̀ â ghee enyəa, “Ghe ŋ ghɛ̀ â shʉ̀ghà u fɔ̀e ù Kəzə̀ ù dê fughu; yia a bughò ghî à li ghən Ŋ̀ ghəa gho â ghee kə̂a kwə̀n kə̀ kwən enyəa ghe e lɛnlo, kòʼò kɛ̀lɛ yo, zənlo, zuuw tɔɔ yo. 11Moʼnlò e kwə̀ən kə ushwāʼ kən lò ènyə; ŋgòʼ zəa ghe mò təm lo shwaʼ u Kə̀zə̀. 12Sə ghəla aŋ kwàn u dziī fɛ̄ lo ghî ghəla ghe zuūw tsughuu shwaʼ u te wo, vʉatsə̄a ghə m fùʼ bùghò sɔ̀ŋ nùghù sə kɔʼ shwaʼ u te wo am fə̀ŋ tə ghee, enyəa ghe lô dɔ̂ɔm boōm tsughuu shwaʼ u te wo, ghe zəā kɔʼ kə̄tūw. 13Ghəlā aŋ gɔ̀ŋlò, fɛ lo ghəla abugho ghe zuw tsughu shwāʼ u te wo, ghe n nì ko aŋ ghùe è ghɛɛ̄n zo; wə ŋ kè kuūwn nyəā mə̄lā ghee alo tə fə̀ŋ, tɔŋlo enyəa ghe dzə̂a kwǔu kele kə̄əŋ ndùw kô boo e te zo enyə, à m bùghò nəgha è mɔɔ̄ koʼō e ghee e kpe tsughu, ghê n tìgh zə̀ghà è tsughu. 14Ghəlā an nyɔ̌ɔŋmgbê, fɛ kuuwn lò ghəla ghe zuw tsughu shwāʼ wə̄n; â ghee alekuūwn ndûw â sə ko, fəm kə mbī kə ŋ kwù ŋgwùu tsùghu ghee, fʉgha u m mbī wə̂ ŋ kwù ŋgwùu è tsughu, sʉ̂ e mbī zə̂ ŋ kwù ŋgwùu tsùghù sùghò ghee, tam kə ghee kə ŋ kè tughu. 15Yia a bughò ghəla an lùʼu kə̀ foōn ko, à lò ghəla ghe zuw tsughu shwaʼ u te wo, ghe n nyɛ̀ nì kɔ̀ʼ an zumso kə fə̂ŋ kə ghee kə̀ dzûŋ kò, wə m bùghò fughu kɔʼ kətam, aŋ ghùe zəla ghe zumso tsughu a te.

16 # Mat 5:15; Lûk 11:33 Ghùw ù lì yo ù dàa tsughuu lâm ù ŋ kòom nì nàn nàŋa nyə kɔʼ a tsəla uchùa, mò ù kà lǎam tiso naŋa kɔʼ an ti kə lâm enyəa ghî ghəla ghe nyəā wo an ndughu e koʼō sə gho a te.

17 # Mat 10:26; Lûk 12:2 Nu fəgha kə̀ li kə yo kə nân doʼō mo a kê kòʼò yò, tsɔŋ kə eghəa kə̀ li kə yo sughò kə kê səā kɔʼɔ yo an ndɛ.

18 # Mat 25:29; Lûk 19:26 Ghɛ̌ fi ki aletɔ̀ʼɔ̀ tee an dzì zəla ghɛ̀ zyəə̄n ghəa gho a te, mbuu ghî ghəla ghe ki fəgha ko, Zə̀ kə̀ lo fughuu kpeʼe ndùw ghee â ndə̀m, ghəla ghe ki yo, fəla fə bûʼ lo ko to ghe ki nû, Zə̀ kə̀ lo nìi nùghùun kɔ̀ʼɔ nù.”

Zə̂ Yɛso ghèe ghê wɛ gho

(Mat 12:46-50; Mâk 3:31-35)

19Êzə̄ŋ, zə̂ Yɛso m bùghò ghèe ghê waazə̂ a Yɛso ghò, alebùghò kôʼ Yɛso, dzì n sô kǔuwn buw â ghee aletsə̀ghàa nyəā kôʼ wə̄n, ghî a màʼa fə̀ ŋge tsūŋ. 20Ghùw ù lì n dzɛ̀ tsə̀ghà ndùw â Yɛso enyəa, “Zughù tì fɛ a beē ghèe ghê waazughù ghò, ghe ləghaa alekòʼ ghù.”

21Ù m fwə̀n dzɛ̀ â ghee a dzə̀m enyəa, “Nughò àsùghò waazə̂ ghaŋa gho, a lò ghî ghəla ghe zuūw tsughuu shwaʼ u Kəzə̀ wò, ghe m bwìi ndùw an dzə̂ è te.”

Yɛso bu bughuso zə̄ŋ

(Mat 8:23-27; Mâk 4:35-41)

22Tsu fə̀ li fo Yɛso n nyə̀ dòʼò kɔ̀ʼ alo kəkwə̀n ghèe ghê tsə̀təndə̄ghā tə wə̄n to, ù n dzɛ̀ â ghee enyəa, “Bùghò nlò sɛ̀ daŋà səā ndûw aŋ ŋgùŋ è lì e zə̂.” Ghe n də̀ghàan ndùw a lùʼù daŋā wo. 23Ghəa ghe daŋà nduw, Yɛso m bvʉ̀ tsùghù təmgbīi, zə̀ŋ è bǐigh è lì ŋ kaʼ tsughu aletsə̀ghà, tsə̀ghàa nyə̌a tsughuu wò fughu alo enyʉ̀, mùghù mə̀ ŋ kaʼ tsughu alenyə alo kəkwə̀n, ghe m bən lò fʉgha wə evʉ̄. 24Ghe n daŋso ndùw zòm nùghùu kɔ̀ʼ Yɛso, dzɛ̀ â wə̄n enyəa, “Wo Mughùbè lô, sɛ̀ m mìaa lɛ̂, wo Mughùbè lô, sɛ̀ m mìa lɛ̂!”

Yɛso n nùghù ke naŋa ndùw kùɛɛ kə te ko à ŋgaam kə kətùŋutùŋu kə te ko, zəŋ è te n tsùghù bùghù è tsughu, nyʉ̂ zə̀ n nùghù dòʼò tsùghù mɔŋ. 25Ù n dzɛ̀ â ghee enyəa, “Boo zɛʼɛ̄ e ndûw ghɛ̀ à?”

Fə̂ŋ tə̀ n sə ghee, tuw kə m kpùw sùghò ghee. Ghe ŋ kàʼ ndùw a lùʼù kəā wo enyəa, “Wə̄n biso lò ndughoo, ù sə̀ tsəghàsò lâŋ kò â kùɛɛ ko a, àsùghò â dzùghù a, ghe yia a zuūw â wə̄n à?”

Yɛso shùaa sə̀sô zʉ̀ u biigh wo a zəŋò ghù ù lì

(Mat 8:28-34; Mâk 5:1-20)

26Ghe n daŋso dàŋsə̀ ndùw an naʼ e tə̀ Dzɛlàsîn, enaʼ, e lɛɛ̄n dāŋà wô Galèlîi. 27A m bùghò ù sə tsughu alo kəkwə̀n, ghùw ù zʉ̀ ù lì a fughu alo enaʼ n ndùw a vʉ̀a wə̄n. Tûw vʉ n lo mò ù tsò mùghù tsəgha dzə̀ən tsə̀ghà yò ndzʉ̄ to, bùʼ mùghù tsəgha sugho yo an ndughu, mùghù tən tsəgha ko aŋ gə̀maghùw. 28A m bùghò ù kòʼ tsughu Yɛso, ù n sɛ kəbɔ̂ŋ, tə̀m ndùw tuw wə anyʉ̄ a tsəlà wə̄n, kum naŋa tsughu kətuw, dzàa sə̌a kɔʼɔ an dzə̂ è tughu enyəa, “Kee to â ghù a Yɛso, wɛ ù Zə̀ kə̀ ghaʼa kən kə̀ dzə̀m, kà mugho ndzāŋsō.” 29Nu à fə̀ lo mò ù ŋ ghùw vʉ̀ mʉso enyəa zʉ̀ biigh vʉ səā nughù a zəŋò wə̄n. Tɔŋlo enyəa tûw vʉ fə̀ lo abugho ndzɔŋ bughò sə bo tsughu a zəŋò wə̄n, ghe ŋ kwù kùm tsùghu wə̄n alo tətsāʼ, kɔ̀n tsùghù alo ugbāʼ, ghe n chînlò, ù n nùghù těen màʼà tsùghù fʉgha u te wo, zʉ̀ vʉ wə n sè sòʼ ndùw wə̄n aŋ ŋgwən.

30Yɛso n daŋso bvʉ tsughu â wə̄n enyəa, “Zən zəghà è lo ndughoo a?”

Ù mo enyəa, “Ndza!” Tɔŋlo enyəa à fə̀ lo mò zʉ̀ ù biigh u mafə̄ a zəŋò wə̄n ŋge nyə bɛɛ dòʼò tsughu. 31Zʉ̀ u te wə m buʼu kə̀ghu â Yɛso enyəa, e kwo ù lò nîi tuū nduw ghee alô fə̀bɛʼɛ̀bigh.

32Êzə̄ŋ, saʼ kə ukwə̀lebʉ̄ghā kə̀ li kə n zəa kaaŋ fughu aŋ ŋgàŋlò e ukwàʼ, zʉ̀ vʉ wə m būʼ tsughu kə̄ghū â wə̄n enyəa, ù nìi zəghàa nyəā ndûw ghee am bvʉa e ghee. Ù n nì zə̀ghàa nyə̀ è nduw. 33Zʉ̀ vʉ n daŋso sə̀ nùghù wò a zəŋò bə̀ghà vʉ̀, nùghù nyə̀ ndùw an sāʼ kə ukwə̀lebʉ̄ghā chì, saʼ kə ukwə̀lebʉ̄ghā kə te kə n daŋso nùghù tə̀ŋò nyə̀ŋ nyə̀ tsùghù ndùw aŋ gwōo chì aŋ ŋgùŋ è ènyʉ̀, bvʉ̀ nyə̀ tsùghù ndùw alo enyʉ̀, məla è nduw.

34A m bùghò ghî ghəla ghe fə̀ chiīn kwə̀lebʉ̄ghā vʉ̄ kôʼ ghəa yi gho, ghe n sə bālā tsughu â ghuw à tiigh gho, tì kwə̀n bùghò zùghòo tsùghù ghəa yì ènàʼ, nàʼà ndùw sùghò alo təŋgwə̀là. 35Naʼ e fi zôo sə̀ wò nù alebùghò kôʼ fəgha kəla kə sə, ndùw bùghò a vʉ̀a Yɛso, bùghò kòʼ wò ghùw vʉ̀a zʉ̀ ù sə nughù tsughu a zəŋò wə̄n mò vʉ̀a ù dòʼ a tsəla efwē e Yɛso à ndzʉ to a zəŋo ughùe, mò ù lò an tɔ u wə̄n. Fə̂ŋ tə̀ n sə ghee. 36Ghî ghəla ghe mô kôʼ ghəa yi m fəghaan teso dzɛ̀ ndùw ghəa ghe mô baāŋ ghùw ù zʉ̀ ù biigh vʉ̀ a te, â ghee. 37Ghî a mbùʼ è Dzɛlàsîn a dzə̀m n dzɛ̀ â Yɛso enyəa ù zə̀ghàa tsughu naʼ e ghee, nu fə̂ŋ tə̀ maā ghee sə bonlo. Ù fi kôom bɔ̌ɔm nì kɔ̀ʼ sùghò nǔ kwə̀n chì ko, nùghù wò â dàŋ kò. 38Tûw vʉ̀a zʉ̀ ù mô sə nughù tsughu a zəŋò wən m buʼ kəghu enyəa to e mô lò ko ghèe wə̄n; Yɛso ŋ kuūwn bàʼ kòom ndùw wə̄n, dzɛ̀ â wə̄n enyəa, 39“Ndùw ebàm alô ghù, ghù nduw dzɛ ndùw fwàʼ kə̀là Zə̀ kə̀ fwâʼ tsughu â ghù.”

Ghùw ù te n nùghù e tsughu, nàʼn ndùw kô fwàʼ kəla Yɛso fwàʼ tsughu â wə̄n luʼū ten tə̀ dzə̀m.

Wɛ ù Dzaelùs àsùghò nughò wəla ù fə̀ mɔm ndzʉ̀ è Yɛso

(Mat 9:18-26; Mâk 5:21-43)

40Ghəa Yɛso dàŋà səā wô ènyə ebàm, saʼ kə aghì kə̀ n ti, ghe mô ləə̄m wə̄n; ghe m kpènì kɔ̌ʼ wə̄n. 41Dzaelùs, tɔɔŋ kətuw an Ndùghène è Tə̀dzûu è ghee è lǐ fughu n daŋso ndùw è bugho, tə̀m ndùw tuw wə anyʉ̄ a vʉ̀a Yɛso, buʼ kəghu â wə̄n enyəa ù bùghò tɛ̂ alô wə̄n. 42Ù fə̀ ghəa yi ghəŋlo bòʼ sɔ̀ʼ kə wɛ̄ kə wə̄n kə̀ zən kə mò kuu koʼō nduw nû. Wɛ wə̄n fə̀ lo tənûu eghə̄m à ghè tò tə bə̀ghà. Aŋghəa Yɛso ndǔuw, nɔ̂e kə aghì chì kə m fâʼn ndùuw ko ghèe ghee kûwtə̀kùw. 43Wìzən ù lì n lo an saʼ kə aghì kə te ko, mò ù m fɔ̀n tsɛ̀lɛ̀ alo tə̀nùu eghə̄m à ghè tò tə bə̀ghà, ghe yia a baāŋ kêe tsəgha. 44Nughò vʉ m fàʼn sə̀ kɔ̀ʼ wò ko a fi a bǎà Yɛso, bùghò mɔ̀m tsùghù dzughu e təndzʉ̄ e wə̄n, daŋso tùghù è kɔʼ nəgha e wə̄n zə m bùghù dòʼò kɔʼ alekòom sə. 45Yɛso n nùghù bvʉ tsughu enyəa, “À mùghò ènyə mɔ̀m ndùghò a?”

Ghəa ghe sô məghaan kaāŋ wo, Pità mo enyəa, “Mughùbè ghî à fâʼn bwìi wò ghàaghee, bùghò tùuŋ dàŋà tsə̀ghà ghù!”

46Yɛso m fwə̀n dzɛ̀ tsùghù enyəa, “Ghùw ù lì m mùghò mɔ̂m; nu Ǹ zuwkɛlɛ tsughu aŋghəa daʼa kə sə nughù tsughu a zəŋò mùghò.” 47Ghəa yìzən vʉ kôʼkɛlɛ̄ tsughu enyəa e lɛso yò alenàn ghue u ghee, ù n tsə̀ghà sə̀ è wo kàʼkàʼkàʼkàʼkàʼ, ù tsəŋlo, tə̀m ndùw tuw wə anyʉ̄ a tsəlà Yɛso. Ù n dzɛ̀ ndùw soo kəla e mɔm Yɛso a te an sə kə ghì yì à dzə̀m, dzɛ̀ sùghò ghəa e daŋso dzâŋ tughu kɔʼ ghəa e mɔ̂m tsughu wə̄n. 48Yɛso n dzɛ̀ â nùghò vʉ̀ enyəa, “Êwɛ̀, fə̀ŋ zə̀a zəla ghù gaʼ tsughu a zəŋò Zə̀ kò, zə̀ ŋ ghù baŋlo; nduw alo ebughunlo.”

49Ghəa ù sə̀ naam kə̂aa ghəa gho, tum n səŋo teen wò, è nùghù wô alô ghùw ù ndùghène vʉ̀, dzàa wò â wə̄n enyəa, “Kǎ wàdè kôom lɛ̌ɛn fəmso, wɛ wʉ̂a m kpuw.”

50Yɛso n zuw tsughu ghəa yì, fwə̀n dzɛ̀ â Dzaelùs enyəa, “Kà tsəŋ; boo tsughu ko nû, ù sə̀ tughūu doʼò wô.”

51A m bùghò Yɛso bùghò tɛ̂ tsughu fughu an ndughu, ù n tue enyəa ghùw nyə̌a yo fughu an ndughu mò à yò Pità, Dzɔ̌n, Dzɛ̂ms, tselè wɛ̌ vʉ̀ à zə̀. 52Ghe mǒ fughu tee nduw mo ləm wə n tsən aŋ ghùu kwǔukwǔu zə̀ èdì, ghe diī wɛ̄ vʉ̀. Yɛso m fwə̀n dzɛ̀ â ghee enyəa, “Kǎ nlò dî sùghò kpe mò ù kpùw nû, ù bwǐi nù nû.”

53Ghe n tsoʼ wə̄n fughu, ghe màʼa fə̀ kwo ten enyəa wɛ̂ɛzən vʉ ŋ kùm kpuw. 54Yɛso ŋ kuun kwū tsughu ko wɛ̂ɛzən vʉ aŋ ghu â wə̀n à, “Êwɛ̀wɛ, nùghu kɔʼɔ̀!” 55Wɛ̂ɛzən vʉ n daŋso zòo è wo, daŋso nùghù è kɔʼ. Yɛso n dzɛ̀ enyəa ghe kəŋo fughuu wô kə̀fəgha tò ù zə. 56Dzughu zə n zum ghê zə̀, Yɛso m fwə̀n fughu tsughu kəlâŋ enyəa e kwo ko ghe lô dzâa ghəa zən â ghùw.

Currently Selected:

Lûk 8: agq

Highlight

Copy