Lûk 7
7
Yɛso bàâŋ kɔ̀ɔ fə Komndzūghū
(Mat 8:5-13)
1A m bùghò Yɛso kə̀a mɛʼɛ̀ tsughu ghəa ghən gho a dzə̀m â ghì ghò, ù n daŋso nùghù ndùw aŋ Kàpɛnùm. 2Komndzūghū ù tə̀sùghugòʼ ù lì n lo a fughu, ki kɔ̂ɔ fə wə̄n ù ŋge gaʼ fə̀ŋ a te. Kɔ̂ɔ fə te fə n dzaŋà, kuu kòʼò ndùw. 3A m bùghò komndzūghū vʉ zuw zɔ̂ŋ u Yɛso wò, ù n tum tsughu noo n Tə̀dzûu n lǐ mò enyəa ghe ndûw tɔŋɔ̄ fughuu tsughu wə̄n tò ù bùghò baāŋ kɔʼ kɔ̂ɔ fə wə̄n fì. 4A m bùghò ghe bughò kôʼ wô Yɛso, ghe ŋ ŋge buʼ tsughu kəghu â wə̄n enyə, dzɛ̀ â wən enyəa, “Ù kɔʼkpe nû tò ghù è yôsò wə̄n, 5tɔŋlo enyəa ù lə̀ghaa nù naʼ e sɛ̀ zò, vʉ̀a ù yòso, naʼ zəa e bəgha Ndùghènē.”
6Yɛso fi nughù ndùw nǔ ghèe ghee. Ghəa Yɛso kuʼso nduw fughu an ndughu, Komndzūghū vʉ ŋ kòom tùm wò fən a wə̄n a vʉ̀a wə̄n enyəa, “Mughùbè, kà ghue wʉ̀a ù bûʼ kòom fə̀mso, nu Ŋ̀ kâ bùʼ kɔ̀ʼkpè tò ghù è nyə am pfʉ̌a kaŋā. 7Zə̀ lò e ghee M̀ mô kôʼ tsughu enyəa Ŋ̀ kâ bùʼ kɔʼ kpe alebùghò a vʉ̀a ghù, kuuwn saʼ tsughu ko dzə̀, kɔ̂ɔ faŋa fə tughuu doʼò wô. 8Nu Ǹ lo ghùw wəla Ǹ tsəghàsò lâŋ kò, sùghugòʼ tia tə lo a tsəlà mùghò; abugho Ǹ tsəghàsò tsughu lâŋ kò â ghùw enyəa, ‘Ndùw!’ Ù mò è nduw; â ù lì wən enyəa, ‘Bùghò!’ Ù mò è bugho. Abugho Ǹ tsəghàsò tsughu sughò lâŋ kò â kɔ̀ɔ faŋa fo enyəa, ‘Ghəəŋ ndùw enyə,’ fə ŋ ghəŋlo è nduw.”
9A m bùghò Yɛso zuw shwaʼ wən wo, dzughu zə n zum wə̄n a zəŋò komndzūghū vʉ̀, ù m fə̀n dzɛ̀ ndùw â saʼ kə aghì chia kə mô bughōo a bàâ wə̄n enyəa, “Ǹ so Ǹ dzâa wô â ghɛ̀ enyəa, Ŋ̀ kaam bûʼ kòʼ kòʼ dzə̀ ŋgòʼ è èboo zən an Ezə̀lɛ̂.” 10Tum tì mo e kwəla nyəa ndùw èbàm, ndùw kòʼ ndùw ko mo kɔ̂ɔ fi fə n dzàŋ tughu.
Wɛ ù wìkpuw zôo wò alo evʉ̄
11Gha kə ŋ kè kôom sə, Yɛso n nùghù nyə̀ ndùw an nāʼ è li zo ghe tɔŋlo enyəa à lò Nâe, tsə̀təndə̄ghā tə wə̄n tə n nùghù ndùw ghèe ghee, nɔ̂e kə aghì kə̀ n sə̀ tə̀ŋò ndùw sùghò à bàâ wə̄n. 12A m bùghò ù kuʼso ndûw fu ū ughɔ̄ŋ wə enaʼ u te wo, ghe n tɛ̀tsə̀n kɔ̀ʼ aghî mo ghe yia boʼn səā wô â gwən e ghûw zò; mò à lǒ sɔ̀ʼ kə wɛ̄ kə̀ nûu kò â zə̀, tɔɔŋ wìkpuw ù lì. Ndə̀m è àghì n tə̂əŋ sə̌a wò fughu alo enaʼ ghèe ghê wìkpuw vʉ̀. 13A m bùghò Mughu ù te kôʼ tsughu nughò vʉ̀, ù ŋ kwuso èse, gɔ̀ɔŋ tsùghu wə̄n enyəa, “Kà dî sùghò ma.” 14Ù n daŋso sə kəŋo kwū tsughu kəmbùŋ, ghî ghəla ghe mò boʼò kele mbùŋ chì ko n tēe è tsughu. Ù n dzɛ̀ tsùghù enyəa, “Ǒ wɛ̂ɛtùghu, Ǹ dzɛ̂ enyəa, ghù nughu kɔʼ.” 15Ghùw kpǔuw vʉ n daŋso nùghù dòʼò è kɔʼ, kàʼ wò ghəa à kəaa gho. Yɛso fi kôom fughu kɔʼ nû nʉ̀ghà vʉ̀ â wɛ̀.
16Fə̂ŋ tə̀ n sə ghee, ghe n daŋso kàʼ ndùw Zə̀ kə̀ kɔʼso ko; dzàa tsùghuu enyəa, “Sɛ̀ ŋ ghùwshʉ̀gha ù ne kele am bvʉa e sɛ̀.” Àsùghò enyəa, “Zə̀ kə̀ ŋ ghì a wə̄n a bâŋ kòʼ.”
17Zɔ̂ŋ u Yɛso wə ŋ kùm ŋgəa tsughu mbùʼ è Dzùdîa e dzə̀m, sòʼ tɛ̀ mìa ndùw alo tə ŋgwə̀là.
Yɛso ghèe Dzɔ̌n Fùghùu mùghù ŋ Kə̀zə̀
(Mat 11:2-19)
18Tsə̀təndə̄ghā tə Dzɔ̌n tə n ndùw dzɛ̀ tsùghù sùghò ghəa a Yɛso a te gho â Dzɔ̌n enyə kpe. 19Dzɔ̌n n tɔŋɔ tum tsughu tsə̀təndə̄ghā tə wə̄n tə bə̀ghà enyəa ghe ndûw bvʉ â Mughu ù te enyəa, “À lò ghû ghùw wəla ù mo ki alebùghò ŋkāa a ki aleləmā tsughu ghùw ù nùghu a?”
20Ghî ghən n ndùw kòʼ ndùw sùghò wə̄n, bvʉ â wə̄n enyəa, “Dzɔ̌n Fùghùu mùghù ŋ Kə̀zə̀ tum wò ghàʼ enyəa, a bughò bvʉ â ghù enyəa, à sə̀ yia lo ghû ghùw wəla ù mò ki alebùghò ŋkāa a ki aleləmā tsughu ghùw ù nùghu a?”
21Aŋghəa ghe naām ti a fughu êzə̀, Yɛso n sùw màʼà tsùghù ezəŋ a zəŋò ghì ghò, baaŋ tsùghù ndə̀m an dzàŋà tə ghee, shùan sə tsughu zʉ̀ ù biigh wo, tsʉ̀ sùghò sə a ndə̀mà tə ghì à foō gho. 22#Èzy 35:5, 6; Èzy 61:1 Yɛso n daŋso bɛ̀lɛ̀ ndùw ghee enyəa, “Ndùw nlò ebàm, ghɛ̀ nduw dzɛ nduw fə̄ghā kə̀là ghɛ̀ kôʼ tsughu, zùw è sugho, ghî à foō a koʼò wò tə̀ luʼū, à ndɔɔ̄ bwiī yia bwîi wô tsəghatsəgha, tsùghò tia tə zəghàan wô ghî à tətsùghò ghò, kùʼ vʉa zuūw wô tuūŋ wo, ghî à kpuuwn yìa zôom wô alo evʉ̄, à laa yia zuw kɔʼ Làbəlà è Kə̀zə̀. 23Dzɔ̀ lǒ ghùw wəla ù sò pfʉso yô nʉghà wò a zəŋò mùghò.”
Yɛso kɛ̌ɛ Dzɔ̌n
24A m bùghò tsə̀təndə̄ghā tə Dzɔ̌n tə nùghù tsughu, Yɛso ŋ kàʼ ndùw aletesō Dzɔ̌n â nɔ̀e kə aghì chì; ù n dzɛ̀ â ghee enyəa, “Ghɛ̌ fə̀ aŋ ŋgwən soʼ alenyəŋo lɛɛn kwò? Ghɛ̌ fə̌ fughu nduw alendùw lɛɛn kə̀dzaŋ a, kǔɛɛ kə nôʼso a? 25Ghɛ̌ fə̀ laʼa soʼ alendùw kôʼ kwò? Alendùw kôʼ ghùw mò ù ŋ ghue u lā an ndzʉ̀ è dzùŋ à? Kòʼô nlò, ghî ghəla ghe laā ghue zo an ndzʉ̄ tə̀ dzûŋ tò, mùghù sugho kədzûŋ, ghe lo am gbe ù ne wo tò udwə̀ŋ. 26Ghɛ̌ fə̀ kuuwn nyəŋo lɛɛn kwò? Ghùwshʉ̀ghà ŋkāa? Òhòŋò, Ǹ so Ǹ dzâa wô â ghɛ̀ enyəa, à fə̀ lo ghùw, mò ù ŋ ghùwshʉ̀gha tsə̀ghàtàʼà. 27#Mal 3:1 À lǒ wə̄n ghe tɔm naŋā am mwàʼsò kə Kəzə̀ enyəa, ‘Ǹ tuu wò nǔ tum zaŋā â sə ko, ù kè bughò fəghaan naŋa dzì zə̀ghà, sěe ghù lo bughōo.’ 28Ǹ so Ǹ dzâa wô â ghɛ̀ enyəa, ghùw tsò yò fɛ am mbī ghe dzə an ndùm ù tsə̀ghà taʼā Dzɔ̌n, zəa e kuūwn lô enyəa Dzɔ̌n kâ kǔuwn kɔ̀ʼ ŋgàla ghè ghèe ghùw wəla ù lò bam ko alo kəwālā.”
29 #
Mat 21:32; Lûk 3:12 A m bùghò ghe zuw tsughu ghəa ghən gho, ghî yì à dzə̀m ghèe ghê dzə̀akə̀mwàʼsò m boo fughu ndùw â Zə̀ kò, ghe màʼa fə̀ lo mò Dzɔ̌n maā ghee â mùghù ŋ Kə̀zə̀ m fughu. 30Ghî a Falàsîi ghə̀ ŋ kuūwn tùe màʼà ghəa ghəla Zə̀ kə fə̀ ləghaa enyəa ghe e ghəŋlo ghèe ghê dèekə̀làŋ, ghe màʼa fə̀ tue enyəa Dzɔ̌n ka ghee â mùghù ŋ Kə̀zə̀ m fughu.
31Yɛso n dzɛ̀ tsùghù enyəa, “Ǹ lo alebiso dzâa tsughu enyəa, ghî a nɛ ghən lo ênzə̂n, ghe mboʼo fwêen kwò enyəa à? 32Ghe lo tò wɛghêtùghu an lùʼù kə bekewə̄n ghe tsəghàsò kə̂aa ghəa gho aŋ ghùe e ghee enyəa,
‘Yia a tso tɔŋ ndɔ̄ŋ, ghù kà ghuw kə dzùghòo kè alebən.
Yia a zom zôo tə esē to, ghù kà dì kè.’
33Dzɔ̌n Fùghùu mùghù ŋ Kə̀zə̀ ndùw bùghò nù, vʉ̀a ù zəa yô bɛ ko, mʉa sùghò yǒ lʉ̀ mò, ghɛ̀ yia a so enyəa, ‘Ù zə̀ghaa ùzʉ̀.’ 34Wɛ ù Ghùw vʉ̀a ù bùgho, zəa, mʉa sùghò nlʉ̀, ghɛ̀ yia a so enyəa, ‘Kòʼ âtsàadzəgha wəlà, ghùw ù kàla, fə̀n ù ghê dzə̀akə̀mwàʼsò à ghì à biigh gho!’ 35Ghî ghəla ghe boō fughu an tɔ u Kəzə̀ dèe wò nù enyəa tɔ u te u lo tɔ ù səŋò wò.”
Wìzən ù bǐigh ù lì tsoʼsô fwe e Yɛso
36Falàsîi ù lì n nàʼà tsùghù Yɛso alezɔ̀ʼ wə̄n. Ù n nyə̀ də̀ghàan ndùw èzə an ndughu lô Falàsîi vʉ̀. 37#Mat 26:7; Mâk 14:3; Dzn 12:3 Nughò ù lì ghe fə̀ kwo fughu alo enaʼ tǒ yìzən ù bǐigh n zuw tsughu enyəa Yɛso zə̌a an ndughu alô ghùw Falàsîi vʉ̀, ù n nì kɔʼ fəbɔm à vʉa fə̀ ləə̄m fo a te, ndùw â ghè fò a fughu an ndughu. Ghe mo e tâatsə̂n fughu an ndughu nughò vʉ sô nyə̌a wò nù, à vʉa fə̀ ləə̄m fì. 38Ù m bùghò fùʼu tsughu a tsəla efwēe e Yɛso dìi, sə̀ ŋ wə̄n mə̀ n tsoom tsughu aŋ ghùw a Yɛso. Ù n zè màʼà tsughu ghuw a te gho an nyùŋ tə kətuw tə wə̄n, nyɔ̀ŋ è kɔʼ daŋso tsoʼso tsughu am vʉ̄a fì. 39Falàsîi vʉ̀a ù fə̀ zɔʼɔ̄ wə̄n ŋ kòʼ ghəa yì, dzɛ̀ tsùghù aŋ ghùe u wə̄n enyəa, “Abugho bəghà wə̄n mô lo ghùwshʉ̀gha, to ù mâa kèle ŋgòʼ è fə̀ghà kəla yìzən wəla ù mɔ̀ɔ wo wə̄n lo â ghè kò, enyəa à lǒ yìzən ù bǐigh.”
40Yɛso m bɛ̀lɛ̀ ndùw wə̄n enyəa, “Sǎemòn, Ŋ̀ ki ghəa è li zo aledzɛ̀ â ghù.”
Sǎemòn mo enyəa, “À lò êndūghō a Wàdè?”
41Yɛso n dzɛ̀ enyəa, “Ghî à li gho a bə̀ghà fə̀ ki ghùw ù lì, ù fɔ̀ɔn fughuu tsəghà kua wo, â ndàŋ kò, u mɔ̀ʼ fə̀ ki kəndàŋ aŋ ghə̀m n təkam n tɛ̀, u mɔ̀ʼ ŋ ki alo təkam tə tɛ̀. 42A m bùghò ghe sô tsoō tsəā yo, ù n zə̀ghàa màʼà ndùw â ghee. Êzə̄ŋ, aŋ ghì a kəndàŋ ghən à bə̀ghà, à sò ghùw fɔ̌ɔn fughuu wə̄n ləghaa ndùghò, ù tsə̀ghàa sə wàazə̌ a?” 43Sǎemòn, mo enyəa, “M̀ moʼò enyəa, à lò wəla ù mò zəghàa maʼa ndə̀m aŋ ghùu wə̀n.” Yɛso n dzɛ̀ â wə̄n enyəa, “Ghù n num alo efə̄ŋ.”
44Ù n daŋso bɔe lɛɛn tsughu nughò vʉ̀, bvʉ â Sǎemòn enyəa, “Ghù vʉ̀a ghù kòʼò nughò wə̀n à? Ghəa M̀ mô nyə fɛ an ndughu zəghà, ghù kà mò mùghò â mùghù ŋ kɛ̀lɛ mə̀ àghùw mò fughu. Ù fɛ lo ù n tsǒʼn sə̀ mò aŋ ghùw ghaŋā vʉ̀ ù zè an nyùŋ tə kətuw tə wə̄n. 45Ghù kà mò mùghò bvʉ̂ mǎaŋ kele, ù fɛ tsôo zǔuw kô ghuw ghaŋa alenyɔŋ ghûechìa M̀ mô nyə fɛ̄. 46Ghù kà mò mùghò â tuw ko alo mvʉ̄ tsōʼsō, ù m mùghò â fwee zo alo mvʉ̄ kuuwn tsōʼsō. 47Zən lò e ghee, Ǹ so Ǹ dzâa wô â ghù an tə̀ŋ kə̀ è chi enyəa, ndə̀mà tə təbòo tə̀là ù tso bûʼ ki ko fɛ, mùghò n nì zə̀, zuŋufia, ù ŋge dê ləgha zo. Yia a bugho ghùw wəla ù dè mbeʼe fə eləgha fo, Zə̀ kə̀ bôo tə wə̄n tə zə̂a sùghò mbəs.”
48Yɛso n daŋso dzɛ̀ ndùw â yìzən vʉ enyəa, “Zə̀ kə̀ m bôo tə̀ghà tə̀ zə̂ ma.”
49Ghî ghəla ghèe ghee fə̀ dzeŋe zəa ŋ kàʼ ndùw alebvʉ̄nlō aŋ ghùe e ghee enyəa, “À è wən lo ndughoo ù sə̀ buʼù zə̂a wô sughò bôo tə a ghì tǒ a?”
50Yɛso n dzɛ̀ â nùghò ù te enyəa, “Fə̀ŋ zə̀ghà zəla ghù gaʼ tsughu a zəŋò Zə̀ kò, zə̀ ŋ ghù bəghasə; ndǔw è zəghà zò nyàʼànyàʼà.”
Currently Selected:
Lûk 7: agq
Highlight
Share
Copy
Want to have your highlights saved across all your devices? Sign up or sign in
