Dzɔ̌n 18
18
Ghe kwu Yɛso
1A m bùgho Yɛso gɔ̀ɔŋ mɛʼɛ̀ tsughu, ù n dàŋ sə kɔʼ bɔ̂ʼ kə̀ loʼ ko ghe fə̀ tɔŋlo enyəa Bɔ̂ʼ kə Kidə̀lɔ̀n ghèe ghê tsə̀təndə̄ghā tə wə̄n to. Ghe n ndùw dəŋò kəla sum ù li u fə̀ lo a te, ghe n nyə̀ ndùw fughu an usum u te wo. 2À n lo êzə̀ mò Dzudàs wəla ù fə̀ fêe fughu wə̄n kwo nû luʼū kə te ko, tɔŋlo enyəa Yɛso fə̀ nduūw kpeen zee tsəgha fughu ghèe ghê tsə̀təndə̄ghā tə wə̄n to. 3Dzudàs n ndùw bùghò fughu an sum u te wo à saʼ kə təsùghugòʼ kò ghèe ghê gbè tə̀ tə Ndùghù è Kə̀zə̀ è ne an Yɛ̀lusalɛ̀m tə̀ li to, mò a tùm wò tuw u təfɔ̀e ghèe ghê ghì a Falàsîi ghò, ghe ŋ ki fʉgha wə ntɔ̄, à kɛ̀ʼɛ̀ wò. 4Yɛso ŋ kwo ziī fəgha kəla kə ki alesə̄ a zəŋò wə̄n. Ù n tee sə̀ è wo èsə̄, bvʉ â ghee enyəa, “Ghɛ̀ kəŋo ndùghò?”
5Ghe m bɛ̀lɛ̀ ndùw wə̄n enyəa, “Ghàʼ kəŋo Yɛso, ghùw ù Nazalɛ̀t.”
Yɛso dzɛ̀ â ghee enyəa, “À lò mugho wə̄n.” À n lo êzə̀ mo Dzudà wəla ù fèe fughu Yɛso n ti dzəəŋ sugho fughu ghèe ghee. 6Ghəa Yɛso dzɛ̀ sə nduw â ghee enyəa, “À lò mugho wə̄n.” Ghe n ti səəŋ kəŋo è nduw, bvʉ̀ dòʼò ndùw a ghueetsə̄. 7Yɛso ŋ kòom bvʉ kpeʼe ndùw ko â ghee enyəa, “Ghɛ̀ kəŋo ndùghò a?” Ghe n naam dzɛ̀ ndùw ko â wə̄n enyəa, “Yɛso, ghuw ù Nazalɛ̀t.” 8Yɛso m bɛ̀lɛ̀ ndùw ghee enyəa, “Mùghò n dzɛ̀ â ghɛ̀ enyəa à lò mugho wə̄n, Abugho à lò enyəa ghɛ̀ kəŋo mughò, zəghā nlò ghî ghə̀n gho to ghe nughù.” 9Zən fə̀ lo aleluesō tsughu shwaʼ wəla Yɛso fə̀ kə̂a naŋā tsughu enyəa u bùghò èsəŋò enyəa, “Aŋ ghî ghə̀là ghù mo fughu â mùghò, ghùw ù mɔ̀ʼ a te kâ mìaa sə a te.” 10Sàemòn Pità ŋ ki kɔʼ, ù n daŋso sɔ̀ŋ sə̀ è kɔʼ, tswɛ̀ kə̀a màʼà ndùw tûuŋ kə kwe u zə̂a kə kɔ̀ɔ fə Tuw kə fɔ̀e è nē a te; zən e kɔ̀ɔ fə te fə mò lo Maakùs.
11 #
Mat 26:39; Mâk 14:36; Lûk 22:42 Yɛso n dzɛ̀ â Pità enyəa, “Zughu naŋa nyə tsughu kɔ zəghà ebàm am būʼ. Ŋ̀ ki alebòʼò mbùŋ kəla bəghà fughu â mùghò enyəa M̀ boʼò.”
Ghe nî ndùw Yɛso a vʉ̀a Anàs
12Komndzūghū ù tə̀ sùghùgòʼ à sùghùgòʼ tə wə̄n to ghèe ghê gbè tə Tə̀dzûu ti tə n daŋso kwù kɔ̀n tsùghù Yɛso. 13Ghe n nì ndùw dzə̀ wə̄n esə a vʉ̀a Anàs, tɔɔŋ bə̀ghàwi ù Kaefàs wəla u fə̀ lo tuw kə fɔ̀e è nē an nùm kə te ko. 14#Dzn 11:49, 50 Kaefàs fə̀ lo ghùw wəla ù fə̀ tsʉ̂ ndûw ghî à ne a Tə̀dzûu ghò, dzɛ̀ â ghee enyəa, “Dzɔ̀ lo enyəa to ghùw u mɔ̀ʼ mò kpuw an tuw u ghì ghə̀n à dzə̀m.”
Pità tùe màʼà Yɛso
15Tsə̀ndə̄ghā e mɔ̀ʼ àsùghò Sàemòn Pità n nùghù ndùw a bàâ Yɛso. A m bùghò tsə̀ndə̄ghā e lì zən sò lo mò fɔ̀e è nē fə̀ kwo nu wə̄n, ù nyə daŋso ndùw ghèe ghê Yɛso am mbɛ̀ è Fɔ̀e è ne è te. 16Pità n kuuwn tee dòʼò tsughu a fǔu ù mbɛ̀; tsə̀ndə̄ghā è li zə̀a Fɔ̀e è ne tɔ̂ʼ kwo n daŋso ndùw kə̀a ndùw àghəa â kɔ̀ɔ fə̀ zən fəla fə ti a fǔu mbɛ̀, fə n zə̀ghàa nyə̀ wo Pità. 17Kɔ̂ɔ fə̀ zən fə te fə m bvʉ â Pità enyəa, “Ghù mgbaŋ̀ yò sugho tsə̀ndə̄ghā e ghùw wəla a?”
Pità mô è tue, enyəa, “Hǎe dzə̄, Ǹ yo dzə̄ tsə̀ndə̄ghā è wə̄n!”
18Fwo u fə̀ lo nû, kɔ̀ɔ mi mə̀ m kpàa kɔ̀ʼ uwən ghèe ghê gbè tə̀ tɔ̄ʼ to, ghe n zʉɛɛ, Pità n ti sugho fughu, ù zʉɛɛ̄ sughò wən u te wo.
19Zə n lo êzə̀, Fɔ̀e è ne zə m bvʉnlo àghəa â Yɛso kùu ndùw tsə̀təndə̄ghā tə wə̄n àsùghò tsʉ̀ e Yɛso zò. 20Yɛso m bɛ̀lɛ̀ ndùw wə̄n enyəa, “Mùgho mò ghəa ghaŋa a kəaa an ndɛ â ghì ghò a dzə̀m an Ndughutə̀ne tə Tə̀dzûu tò àsùghò an Ndùghù è Kə̀zə̀ an Yɛ̀lusalɛ̀m, luʼū kəla aghî à dzə̀m bùghò zûŋlo a te. Ŋ̀ kaām ghəa è li zə n nân kə̀a kòʼ. 21À lò kə kwò ghɛ̀ sô bvʉʉ̄n mugho â ghəa ghən gho a? Bvʉ tsughu â ghî ghəla ghe mò zuw shwâʼ waŋa wo, enyəa mùgho mò â ghee dzɛ êndūghō, nu ghe maā zuw fəgha kə̀là mùghò mo kəaa ghè kò.” 22A m bùghò Yɛso bɛ̀lɛ̀ nduw wə̄n enyə, gbè è lôʼ fughu n sə̀ghàa bu wə̄n alo kəsɛ̄ɛ, bvʉ â wə̄n enyəa, “À lǒ kwò ghù bɛ̀lɛ̀ Fɔ̀e è ne an ŋgòʼ è dzì zəla à?”
23Yɛso m bɛ̀lɛ̀ ndùw wə̄n enyəa, “Abugho à lǒ mò mùghò ŋ kə̀a bonlo, teso dzàa wò â ghî ghò a dzə̀m, mò Ŋ̀ kuuwn kə̀a dzɔ̀ nù, à sò lo kə kwò ghù sə̀ghàa bu mugho a?”
24Anàs n nì tùm ndùw Yɛso a vʉ̀a Kaefàs, tɔɔŋ Fɔ̀e è ne è zə̀, mò ghe naam kɔ̀n nàŋa ko wə̄n am mbgāʼ.
Pità nǎam tùe màʼà ko Yɛso
25Sǎemòn Pità n naam ti ko fughu, zʉɛɛ ù wən. Ghî à li ghə m bvʉ â wə̄n enyəa, “To ghù lo sugho tsə̀ndə̄ghā e wə̀n à?”
Pità mo â ghee enyəa, “Hǎe dzə̂, Ǹ yo dzə̂.” 26Kɔ̂ɔ fə Fɔ̀e è ne fə̀ li fo, tɔɔŋ ghùw kèndughu ù ghùw wəla Pità fə̀ sugho nughù kɔʼ tûŋ kə wə̄n ko m bvʉ â Pità enyəa, “To mugho mò koʼ ghɛ̀ à Yɛso an usum u vʉ a?” 27Pità n nāam tue ko nù. Nùu mbvʉ n daŋso tɔ̀ŋ è kɔʼ.
Yɛso ti a vʉ̀a Paelɛ̀t
28Ghî à ne a Tə̀dzûu ghə̀ n daŋso nì sə̀ wò Yɛso an ndùghù è Kaefàs, ndùw fùghù ndùw wə̄n am mbɛ̀ a lô Paelɛ̀t, tɔɔŋ gɔvə̀nò am mbùʼ è te, â zùwzùw kə utsūʼ ko. Ghuūghùe e ghee zə kè kuūwn nyə an Pə̀lə̀tɛlùm#18:28 pfʉ̌a kəla ghe nyəā saʼā ghî ghò a te, ghî ghəla ghe ghəə̄ŋ boōn tsughu ghəa zo., e kwo ko ghe lô dzəsō ghue e ghee zo, ghe doʼò mo ghe kâ zə̌ zə kə̀ Zəŋso Naaŋ ko, to aŋghəa e fə̀ lo am bùghoo kə ghee#18:28 enyəa ghùw yò alezə zə kə te ko mò ù dzə̌a nù aŋ ghəa a wə̄n à ghəəŋ gho.: 29Paelɛ̀t n daŋso bùghò sə̀ kòʼ wò ghee a beē, bvʉ â ghee enyəa, “Ghɛ̀ ghùw wə̄n kwu enyəa ù bǒon kə̀ kwò?” 30Ghe n bɛ̀lɛ̀ ndùw wə̄n enyəa, “Abugho ghùw wə̄n mô tâʼkè ghəə̄ŋ bonlo èghəa, to ghàʼ kâ mò nì wò dzə̂ wə̄n fɛ a vʉ̀a ghù.” 31Paelɛ̀t n dzɛ â ghee enyəa, “Abugho e lô êzə̀, biso nîi ndǔw nlǒ wə̄n, ghɛ̀ nduw saʼ nduw wə̄n aŋghəa lâŋ kɛʼɛ kə deē.”
Ghê ne a Tə̀dzûu tə mo â wə̄n enyəa, “Lâŋ kə̀ dêe dzə̀ yò enyəa ghàʼ lo nû alewi ghù aŋ ŋgəŋ zaʼā.” 32#Dzn 3:14; 12:32 E fə̀ enyə sə aleluesō tsughu shwaʼ wəla Yɛso fə̀ kə̂a naŋā aledè ŋgòʼ è evʉ̄ zəla ù lo kpuūw ghè zò.
33Paelɛ̀t ŋ kôom nùghù nyə ndùw èbàm am pə̀lɛ̀tɛ̀lùm, tɔŋɔ tsughu Yɛso, bvʉ â wə̄n enyəa, “À lǒ ghû Də̀ŋ kə Tə̀dzûu kò à?” 34Alebɛ̀lɛ̀ ndûw, Yɛso m bvʉ â wə̄n enyəa, “Ghù ghəa ghən kə̂aa sə̌a wò ghə̀là ghù kwo â mùghò ŋkāa à lò ghəla ghe bughò dzɛ̂ wô nû â ghù a?” 35Paelɛ̀t m bɛ̀lɛ̀ ndùw wə̄n enyəa, “À lǒ mò Ǹ lo ghùw ù Tə̀dzûu à? À lò ghî ghə enaʼ ghə̂a ghèe ghê Tuw u təfɔ̀e wò, ghe nî fughu tsəgha wo ghu â mùghò. Ghù biso boōn kə̀ kwò?” 36Yɛso m bɛ̀lɛ̀ ndùw wə̄n enyəa, “Fɔe waŋa u yo dzə̂ u mbī wo. Abugho fɔe waŋa u mô lô fɛ u mbī wo, to ghî a kəfwàʼ ghaŋa kâ mo tso boo dzə̀ enyəa Dzûu tə̀ gaʼ kəghu a zəŋò mughò. A sò fɛ lo enyəa fɔe waŋa u kâ fɛ am mbī sə dzə̀.” 37Paelɛ̀t m bvʉ â wə̄n enyəa, “À fi lo enyəa ghù lo kədə̀ŋ à?”
Yɛso m bɛ̀lɛ̀ ndùw wə̄n enyəa, “Ghù dzɛ̀ enyəa Ǹ lo kədə̀ŋ; ghe mò dzə mugho tò kədə̀ŋ. Soo kə eghəa kəla mùghò mò bughò fɛ a te am mbī mò lo alebùghò kə̂a èsəŋò. Ghùw wəla ù ləghaa səŋò e te zo zuuw â mùghò.” 38Paelɛ̀t m bvʉ â wə̄n enyəa “Səŋò e lo kə kwò?”
Ghəa Paelɛ̀t bvʉ tsughu êzə̀, ù n daŋso nùghù sə kpeʼe ndùw a beē a vʉ̀a Dzûu tò, dzɛ â ghee enyəa, “Ŋ̀ kâ ghəa e biigh e li e kôʼ a zəŋò ghùw wə̄n. 39A nyɔʼ lò bughoo kɛʼɛ̄ enyəa, mùghò e tsʉa zəghaan səa wò ghùw ù ndùghù tsaʼ u mɔ̀ʼ â ghɛ̀ an nə̀gha e zə kə̀ Zəŋso naaŋ ko. Ghɛ̀ ləgha nù enyəa Ǹ tsʉā zəghàa səā wô ghɛ̀ â Də̀ŋ kə̀ Tə̀dzûu kə̀là a?” 40Ghe m bɛ̀lɛ̀ nduw wə̄n alo mbɔ̀ŋ enyəa, “Ɛ̂ŋgaŋ dzə̂, ghàʼ ləghaa ko Bàlabâ.” Bàlabâ fə̀ lo ghùwtsɔ̀ŋɔ ù bǐigh.
Currently Selected:
Dzɔ̌n 18: agq
Highlight
Share
Copy
Want to have your highlights saved across all your devices? Sign up or sign in
