SALMOS 116
116
SALMO 116
Huañuimanta quishpichishca cashcamanta Taita Diosta pagui nishcami
1Ñucaca Mandaj Diosta c'uyanimi.
Paimari ñuca mañashcata,
ñuca caparishcata uyahuarca.
2Ñuca mañajpica, paipaj
rinrinta mañachishpami uyahuarca.
Chaimanta ñuca tucui causaipimi
mañacushalla.
3Huañuica ñucataca
huatashpami charicurca.
Ña huañushca pambashca cashca shina tucushpami llaquihuan huañucurcani. Llaqui, nanaimi ñucataca japirca.
4Chaimi ñucaca Mandaj Diospaj shutipi:
“Mandaj Dioslla, ñucata
quishpichihuayari” nishpa mañarcani.
5Mandaj Diosca llaquijmi, cashcata rurajmi.
Ñucanchij Taita Diosca llaquijtajmari.
6Mandaj Diosca mana jatun tucushcacunata
huaquichijmi.
Ñucataca ña huañunallatamari
quishpichihuarca.
7Cunantajca samari tucunimi.
Mandaj Diosmari ñucapaj allita rurarca.
8Quiquinmari huañuimanta quishpichircangui.
Ñuca ñahuimantapish huiquita
p'icharcanguimi.
Ñuca chaqui lluchcarinamanta
llujshichircanguimi.
9Cai pacha runacunahuan causashcacamaca,
Mandaj Diosllatami cazushpa causasha.
10Jatun llaquipi cashpapish crij cashcamantami cashna rimarircani.
11Utcami cashna nircani:
“Tucui gentecuna llullacunami” nirircanimi.
12Ñucapaj tucui allicunata
rurashcamantaca, Mandaj Diosmanca
¿imatataj cushari?
13Quishpichirina copata
japishami,
Mandaj Diospaj shutipi mañacushallami.
14Cunanca Mandaj Diosman cushatajmi nishcacunataca cushami.
Tucui paipaj cajcunapaj ñaupajpimi
cusha.
15Mandaj Diospajca jucha illajcuna
huañujpica, yallitaj cushicunamari.
16Mandaj Dioslla, quiquinpajta rurajmi cani.
Quiquinpajta ruraj ñucaca quiquinpajta ruraj huarmipaj churimi cani.
Quiquinmari ñuca huatashca cashcamantaca cacharihuarcangui.
17Taita Diosmanca cantashcatami cuni.
Mandaj Diospaj shutipimi cantani.
18Mandaj Diosman cushatajmi nishcacunataca, cushami.
Tucui paipaj cajcunapaj ñaupajpimi cusha.
19Mandaj Diospaj huasi canllapimi cusha.
Jerusalén,
chaupipimi cusha.
¡Mandaj Diosta alabaichigari!
Currently Selected:
SALMOS 116: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
