MATEO 9

Mana cuyurij runata Jesús alliyachishcami

(Mr 2.1-12; Lc 5.17-26)

1Chai q'uipami Jesusca, barcopi yaicushpa cuchata ch'imbashpaca, paipaj puebloman chayarca. 2Chaipi pai cajpica, mana cuyurij runatami, huandunapi huandushpa apamurcacuna. Jesusca paicuna crishcata ricushpami, mana cuyurij runataca:

–Huahua, ama manchaichu cambaj juchacunaca perdonashcami– nirca.

3Chaimantami mandashcacunata quillcaj maijancunaca: “Caica, Taita Diosta p'iñashpamari c'amicun” nishpa yuyacurcacuna. 4Jesusca paicuna ima shina yuyacushcata yachashpami:

–¿Ima nishpataj cancunapaj shungupica, millaita yuyacunguichij? 5¿“Cambaj juchacunataca perdonashcami” ninachu, mana cashpaca: “Jatarishpa puri” ninachu, imata ninataj ashtahuan jahualla canga? 6Runa Aichayujca cai pachapi causajcunapaj juchacunata perdongapaj cashcataca cunanmi ricuchisha– nishpaca, mana cuyurij runataca:

–¡Jatari, canta huandumushcata apashpa, cambaj huasiman ri!– nircami.

7Chashna nijpimi paica jatarishcahuan paipaj huasiman rirca. 8Chaita ricushpaca, tucuicuna mancharinacushpami, Taita Diosca runacunamanmi cai tucui rurai tucunata cushca nishpa Taita Diostaca jatunyachircacuna.

Mateota Jesús cayashcami

(Mr 2.13-17; Lc 5.27-32)

9Jesús chaimanta rishpaca, Mateotami, tributocunata japinapi tiyacujta ricurca. Paita ricushpaca:

–Ñucata cati– nijpi Mateoca jatarishcahuan Jesusta catircallami. 10Chaimanta rishpa, Jesusca Mateopaj huasipi mizapi micushpa tiyacujpica, impuestota japijcunapish, juchayujcunapish achcacuna chayashpami Jesusndij paipaj yachacujcunandij mizapi micungapaj tandalla tiyarircacuna. 11Chaita fariseocuna ricushpami, Jesuspaj yachacujcunataca:

–¿Ima nishpataj cancunata Yachachijca impuestota japijcunahuan, juchayujcunahuan micucunchu imamí?– nircacuna.

12Chaita Jesús uyashpaca:

–Mana ungushcacunaca jambijtaca mana mashcanchu, ungushcacunallami mashcancuna. 13“Sacrificiocunataca mana ninichu. Ashtahuanpish llaquij cachunmi munani” nishcaca imata nisha nishcataraj yachamugrichij. Ñucaca cashcata rurajcunataca mana cayaj shamurcanichu. Ashtahuanpish mana allita ruracushcata saquishpa cutirichunmi cayaj shamurcani– nircami.

Ayunanamanta tapushcami

(Mr 2.18-22; Lc 5.33-39)

14Juanpaj yachacujcuna Jesuspajman c'uchuyashpaca:

–Ñucanchijpish, fariseocunapish achca cutinmi ayunanchij. ¿Ima nishpataj cambaj yachacujcunaca mana ayunancuna?– nircacunami.

15Shina nijpi Jesusca:

–Bodapi cajcunaca novio paicunahuan cajpica mana llaquilla cai tucunchu. Ashtahuanpish noviota paicunapajmanta quichuna punllami chayamunga. Chaipimi ayunangacuna.

16Pipish mauca churanata mushuj linsohuanca mana llachapanchu. Mushujhuan llachapajpica, uchillayashpa mauca churanataca ashtahuanmi lliquin. 17Shinallataj mushuj vinotaca, mauca capachucunapica pi mana churanchu. Chai mauca capachucuna tugyajpi vinopish, capachupish chingarinmanmi. Ashtahuanpish mushuj vinotaca, mushuj capachucunapimi churana. Chashna cashpami caishujpish chaishujpish mana chingaringa– nircami.

Jairopaj ushushipish yahuar cacharirishca huarmipish

(Mr 5.21-43; Lc 8.40-56)

18Jesús chashna yachachicujpirajmi, judiocunata mandaj chayamushpa paipaj ñaupajpi cungurishpaca:

–Ñuca ushushimi huañun. Jacupai, cambaj maquita paipaj jahuapi churajpica, causaringallami– nirca.

19Shina nijpi Jesusca jatarishcahuanmi, paipaj yachacujcunandij chai runata catishpa rirca. 20Chaipica chunga ishqui huatacunata yahuar cacharirishpa ungushca shuj huarmimi, Jesuspajman huashata c'uchuyashpa Jesuspaj churana puntapi tuparirca. 21Paica paipaj yuyaipimi: “Jesuspaj churanapi tuparishpalla alliyanata yuyashpa” tuparirca. 22Jesús chai huarmita tigrarishpa ricushpaca:

–Huahua, ama manchaichu canca alliyachinata crishcamantami alliyashcangui– nirca.

Jesús chashna ninca alliyarcallami.

23Jesús chai mandajpaj huasiman yaicunapajca, flautacunapi tocacujta, gentecuna bullacujta ricushpami, 24Jesusca –Caimanta llujshichij, huambraca mana huañushcachu, dormicunllami– nijpimi paitaca asircacuna. 25Gentecunata ña canllaman llujshichijpi Jesús huasi ucuman yaicushpa huambrapaj maquipi japijpica huambraca jatarircallami. 26Jesús chashna rurashcaca tucui chai llajtapimi huashan huashan uyarirca.

Mana ricuj ishqui runata Jesús alliyachishcami

27Jesús chaimanta llujshishpa ricujpica, mana ricuj ishqui runacunami:

–¡Davidpaj Churi, ñucanchijta llaquihuayari!– nishpa caparihuan caticurcacuna.

28Jesús ña huasiman chayajpi, ñahui mana ricujcuna paipajman c'uchuyajpi Jesusca:

–¿Cancunaca ñuca alliyachina cashcata cringuichijchu?– nijpi paicunaca:

–Ari, amito– nircacuna.

29Jesusca, paicunapaj ñahuicunapi maquihuan tuparishpaca:

–Cancuna crishca shinallataj alliyaichij– nircami.

30Paicunapaj ñahuicunaca ricurcallami. Paicunataca Jesusca:

–Riquichij, pajta piman parlanguichijman– nirca.

31Shina nijpipish paicunaca chaimanta rishpaca, Jesús imallata ruracujtaca tucuicunamanmi huillaihuan huillaihuan rircacuna.

Mana rimaj runata Jesús alliyachishcami

32Alliyashcacuna llujshishpa rincami, supai japishcamanta mana rimaj shuj runata pushamurcacuna. 33Supaita Jesús llujshichincami, mana rimaj runaca rimarca. Chaipi caj gentecunaca mancharinacushpami:

–Cashnataj rurajtaca, Israelpica manataj ricushcanchijchu– nircacuna.

34Ashtahuanpish fariseocunaca:

–Supaicunata mandajhuan cashpami, supaicunata llujshichin– nircacunami.

Granocunata tandanaca achcamari

35Jesusca tucui pueblocunata llajtacunata purishpami, Taita Dios mandana alli huillaita paicunapaj sinagogacunapi yachachishpa tucui laya ungüihuan cajcunata, nanaihuan cajcunata tucuicunata alliyachirca. 36Chaipica michij illajlla, ovejacuna caita chaita puricuj shinata, achcacunata ricushpami paicunataca achcata llaquirca. 37Chaimantami paipaj yachacujcunataca: “Granocunata tandanaca achcami, ashtahuanpish tandajcunaca ashallami. 38Tandajcunata cachachun, Chagrayuj amota mañaichij” nircami.

Currently Selected:

MATEO 9: QCHI04

Highlight

Copy