MATEO 5

Jesusca urcupi yachachishcami

1Jesusca chai tucuicunata ricushpami, urcuman huichiyashpa chaipi tiyarirca. Paipaj yachacujcunapish c'uchuyarcacunami.

Cushichishcacunami canga nishcami

(Lc 6.20-23)

2Chaipi Jesusca tucuicuna uyajta yachachishpaca:

3Espiritupi huajcha cajcunaca cushichishcami.

Jahua pachamanta mandanaca ñami paicunapi mandacun.

4Huacajcunaca cushichishcami.

Paicunami cushicuita chasquingacuna.

5Manso shungucunaca, cushichishcami.

Japina cashca allpataca paicunami chasquingacuna.

6Cashcata ruraj canata yaricaihuan, yacunaihuan shina mashcajcunaca cushichishcami.

Paicunaca mana nijtami micungacuna.

7Llaquijcunaca, cushichishcami.

Paicunataca Taita Diosmi llaquinga.

8Chuya shungucunaca, cushichishcami.

Paicunami Taita Diostaca ricungacuna.

9P'iñanacushcata alli tucunacuchijcunaca cushichishcami.

Paicunaca Taita Diospaj huahuacuna nishcami cangacuna.

10Cashcata ruraj cashcamanta llaquichina yuyailla llaquichishcacunaca cushichishcami.

Jahua pachamanta mandanaca ñami paicunapi mandacun.

11Ñucata caticushcamanta tucui laya millai shimicunata rimashpa, llullashpa, c'amishpa, llaquichina yuyailla llaquichijpi llaquita apajcunaca cushichishcami.

12Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna.

Cai pachapaj cachimi canguichij nishcami

13Cancunaca, cai pachapaj cachimi canguichij. Cachica mishquiyachinata chingachishpaca, imapaj mana allichu. Canllaman shitajpi runacuna sarushca canapajllami.

Cai pachapaj luzmi canguichij nishcami

14Cancunaca cai pachapaj luzmi canguichij. Urcu jahuapi tiyaj puebloca, mana pacalla cai tucunchu. 15Luzta japichishpaca, cajón ucupi churangapajca pi mana japichinchu. Ashtahuanpish huasi ucupi tiyajcunata achijyachichunmi, lámpara tiyanapi churan. 16Cancunapish chai luz shinallatajmi runacunapaj ñaupajpica achijyachina canguichij. Cancunapaj alli rurashcacunata ricushpa, jahua pachapi caj cancunapaj Yayata jatunyachichunmi chashna cana canguichij.

Mandashcacunamantapish Jesusca imapaj shamushcamantapish

17Mandashcacunata anchuchingapaj, profetacuna quillcashcacunata anchuchingapaj shamushca canataca ama yuyaichijchu. Ashtahuanpish chai huillashcacuna pajtachunmi shamurcani. 18Jahua pachapish, cai pachapish manaraj tucurijpimi mandashcacunamanta huillashcacunaca shuj puntollapish, shuj tildellapish mana chingarishpa, chashnataj pajtanga. Chaica chashnatajmi canga. 19Chaimanta maijanpish, cai mandashcacunapi uchilla cajta p'aquishpa, shujtajcunatapish chashna p'aquij canata yachachijca, jahua pachamanta mandacunpica, uchilla nishcami canga. Ashtahuanpish chaitataj pajtachishpa yachachijca, jahua pachamanta mandacunpica jatun nishcami canga.

20Chaimanta cashnami nini: Mandashcata quillcajcunata, fariseocunata yalli cashcata rurashpa mana causashpaca, jahua pachamanta mandacunpica mana yaicunguichu.

Pitapish mana p'iñanachu

(Lc 12.57-59)

21Ñaupa yayacunamanca: “Ama huañuchingui. Maijanpish huañuchijca, jatunta llaquichishca canapaj juchachishcami canga” nishcatami uyarcanguichij. 22Ashtahuanpish ñucaca cashnami nini: Maijanpish shujtajta p'iñajtaca, jatunta llaquichinapaj juchachishcami canga. Shinallataj shujtajta: “Ch'ahuan” nijtaca, mandajcunalla tandanacushcapaj ñaupajpi juchachishcami canga. Maijanpish shujtajta: “Muspa” nijca, ucu pacha ninapi shitanapajmi saquiringa.

23Chaimanta Taita Diosman cungapaj ofrendata altarman apamucushpa, cambaj huauqui canhuan imamanta p'iñarishcata yuyarishpaca, 24Taita Diosman cuna ofrendata altar ñaupajpi saquishpa, cambaj huauquihuanraj alli tucugringui. Chashna rurashpaca, Taita Diosman cunaman tigranguilla. 25Maijanpish canta imamanta juchachishpa juezpajman apacujpica ñanta ricushparaj paihuan alli tucungui. Mana chashna rurajpica, juezpajman chayachijpi, juezca soldadoman cujpi carcelpimi churanga. 26Tucui cullquita pagangacama manataj llujshinguichu. Chaica chashnatajmi canga.

Mana huainayanachu nishcami

27Cancunaca: “Ama huainayanguichij” nishcatami uyarcanguichij. 28Ashtahuanpish ñucaca: Maijanpish shujtaj huarmita ricushpa munajca, paipaj shungupi ñami chai huarmihuan huainayan ninimi.

29Chaimanta cambaj alli lado ñahui imapi pandachisha nijpica, surcushpa shitangui. Cambaj tucui cuerpondij ucu pachapi shitashca canapaj randica, cambaj cuerpomanta shuj partellata surcushpa shitanami ashtahuan alli canga. 30Shinallataj cambaj alli lado maqui juchapi urmachisha nijpica, p'itishpa shitangui. Cambaj tucui cuerpondij ucu pachapi shitashca canapaj randica, cambaj cuerpomanta shuj partellata surcushpa shitanami alli.

Huarmita ama shitachun nishcami

(Mt 19.9; Mr 10.11-12; Lc 16.18)

31Shinallataj: “Maijan cashpapish huarmita shitajca, chaita ricuchij quillcata cuchun” nishcatami yacharcanguichij. 32Ashtahuanpish ñucaca cashnami nini: Maijan cusapish, manapish huarmi huainayashca cajpi shitajca, shujtajhuanmi huainayachin. Cusa shitashca huarmihuan cazarajpish huainayanmi.

Taita Diospaj shutipica mana rimanallachu

33Shinallataj ñaupa yayacunamanca: “Manapish pajtachingapajca, pajtachishami ama ningui. Ashtahuanpish can pajtachishami nishcataca Jatun Diospaj ñaupajpi pajtachingui” nishcatami uyarcanguichij. 34Ashtahuanpish ñucaca cashnami nini: Imata rurasha nishpapish ama rurashatajmi niringuichijchu. Jahua pacha nishpapish ama niringuichijchu. Jahua pachaca, Taita Diospaj jatun tiyanami. 35Cai pacha nishpapish ama niringuichijchu. Cai pachaca, Taita Diospaj chaqui sarunami. Jerusalén nishpapish ama niringuichijchu. Jerusalenca, jatun Mandajpaj pueblomi. 36Cambaj shutillapitajpish pajtachishami ama niringuichu. Shuj ajchallatapish yurajta yanata mana rurai tucunguichu. 37Ashtahuanpish canca: “Ari cajpica ari, mana cajpica mana ningui”. Imatapish yalli mana nirinaca millaimantami shamun.

Llaquichijpipish ama tigra llaquichingui

(Lc 6.27-36)

38Cancunaca: “Ñahuita surcujtaca paitapish ñahuita surcunami. Quiruta surcujtaca paitapish quiruta surcunami” nishcatami uyarcanguichij. 39Ashtahuanpish ñucaca cashnami nini: Maijan ima mana allita rurajpipish, ama c'ariyangui. Alli lado quijaduspi maijan huajtajpica, caishuj ladopipish huajtachingui. 40Maijanpish ucu churanata quichusha nishpa demandajpica, jahua churanatapish apachun saquingui. 41Maijan canta shuj cuadracama macanahuan caita apai nijpica ishqui cuadracama apangui. 42Maijanpish canta imata mañajpica cunguilla. Maijanpish canta imata mañachi nijpica, mañachinguilla.

P'iñajcunata c'uyanami

(Lc 6.27-28, 32-36)

43Cancunaca: “Canhuan alli cajcunallata c'uyangui, p'iñajtaca p'iñangui” nishcatami uyarcanguichij. 44Ashtahuanpish ñucaca cashnami nini: Cancunata p'iñajcunatapish c'uyanguichij. Cancunata llaqui tucushca cachun nijcunatapish alli cashca cachun ninguichij. P'iñajcunapajpish allita ruranguichij. Maipish cachun rimashpa, llaquichina yuyailla llaquichijcunamantapish Taita Diosta mañanguichij. 45Cancunaca jahua pachapi caj Yayapaj huahuacuna cashcata ricuchingapajmi chashna rurana canguichij. Paimi allicunaman, mana allicunamanpish intita cachan. Shinallataj cashcata rurajcunaman, mana cashcata rurajcunamanpish tamyata cachan. 46Cancunata c'uyajcunallata c'uyashpaca, cancuna japina cashcataca imata mana japinguichijchu. ¿Manachu impuestota japijcunapish paicunata c'uyajcunataca c'uyancuna? 47Cancunahuan alli cajcunallata allillachu canguichij nishpaca, ima allita mana ruranguichijchu. ¿Manachu Taita Diosta mana rijsijcunapish, chashnallataj rurancuna? 48Cancunapaj jahua pacha Yaya, cashcata ruraj caj shinallataj cancunapish cashcata rurajcuna caichij.

Currently Selected:

MATEO 5: QCHI04

Highlight

Copy