MATEO 19

Manataj shitanacunachu nishpa Jesús yachachishcami

(Mr 10.1-12; Lc 16.18)

1Chashna yachachishca q'uipami Jesusca Galilea llajtamantaca Jordán yacu ch'imbanij Judeapi caj llajtacunaman rirca. 2Jesús chaiman ricujpica achcacuna catishpa ricujpimi, ungushca cajcunata alliyachirca.

3Chaipimi fariseocunaca Jesús mana allita nijpica juchachishun nishpa c'uchuyashpaca:

–Cusaca, paipaj huarmita ¿imapi mana alli cajpica shitanalla ninchu?– nircacuna.

4Chaimi Jesusca:

–Diosca callaripi tucuita ruracushpaca, “Shuj c'ari shuj huarmillata rurashcataca” ¿manachu rezashcanguichij? nishpaca, 5cashnapishmi nirca: “Chaimanta c'arica, yaya mamata saquishpa, paipaj huarmihuan tandanacushpa, ishquindijmanta shuj aichallami tucunga” nircami. 6Chaimanta ña mana ishquichu, shuj aichallami. Dios tandachishcataca, ni pi amataj ch'icanyachichun– nircami.

7Chaimi fariseocunaca:

–¿Ima nishpataj Moisesca, huarmita shitashcata ricuchij quillcata cushpaca shitanallami nishpa mandarca?– nircacuna.

8Shina nijpi Jesusca:

–Cancunaca rumi shungucuna cajpimi, Moisesca cancunapaj huarmicunata shitachun saquirca. Ashtahuanpish callaripica, mana chashnachu carca. 9Ñucaca cashnami nini: Maijanpish paipaj huarmita manapish huainayajpi shitashpa shujtajhuan cazarajca, huainayanmi. Shinallataj cusa shitashca huarmihuan cazarajpish huainayanmi– nircami.

10Chaimi paipaj yachacujcunaca:

–C'arica paipaj huarmita manataj shitana cajpica, mana cazaranami alli canman– nircacuna.

11Chaimi Jesusca:

–Mana cazaranataca mana tucuicuna chasqui tucunchu. Ashtahuanpish Dios chaita cushcacunallami chasqui tucuncuna. 12Maijancunaca mamapaj huijsamantatajmi capashca shina huacharincuna. Maijancunaca runacuna capashca cashcamantami mana cazarai tucuncuna. Maijancunaca jahua pachapi caj Diospajllata rurangapajmi chashna tucuncuna. Maijanpish chashna cai tucunata charishpaca chashna rurachunlla– nircami.

Huahuacunapaj umapi maquita Jesús churashcami

(Mr 10.13-16; Lc 18.15-17)

13Chaimanca huaquin huahuacunatami, paicunapaj jahuapi maquita churashpa Diosta mañachun, Jesuspajman pushamurcacuna. Ashtahuanpish yachacujcunaca sinchita rimashpami jarcarcacuna.

14Chaimi Jesusca:

–Huahuacuna ñucapajman shamuchun saquichij, ama jarcaichijchu. Cai huahuacuna shina tucujcunatami jahua pacha Diosca mandacun– nircami.

15Jesusca huahuacunapaj jahuapi maquita churashca q'uipaca, chaimanta rircallami.

Achcata charij moso Jesusta tapushcami

(Mr 10.17-31; Lc 18.18-30)

16Chaimanta Jesús ricujpimi, achcata charij moso c'uchuyashpaca:

–Yachachij canca allimari cangui. Huiñai causaita charingapajca ¿ima allitataj rurana cani?– nijpimi,

17Jesusca:

–¿Ima nishpataj ñucataca alli ningui? Allica pi mana tiyanchu, shujllami tiyan, chaica Diosmi. Ashtahuanpish huiñai causaiyuj canaman yaicungapajca, Dios mandashcacunata cazui– nircami.

18Chaimi chai mosoca:

–¿Chaicunaca maijanllatagari?– nijpi, Jesusca:

–Ama huañuchingui, ama huainayangui, ama shuhuangui, ama llullashpa huillangui. 19Cambaj yaya mamata alli ningui. Shujtajcunatapish can quiquinta shinallataj c'uyangui ninmi– nircami.

20Shina nijpi chai mosoca:

–Tucui caicunataca, huahuamanta pachami ruracuni. ¿Ima shujtajtaj illan?– nirca.

21Chaimi Jesusca:

–Diospaj ñaupajpi tucuita pajtachij cashca ricuringapajca, can imalla charishcacunata tucui c'atushpa, huajchacunaman cugri. Jahua pachapimi, achcata charingui. Chai q'uipa ñucata catingui tigramugri– nircami.

22Chai moso uyashpaca, achcata charij cashcamantaca llaquirishpa rircallami.

23Chaimi Jesusca, paipaj yachacujcunataca:

–Jahua pachamanta mandacujpica, achcata charijca mana jahualla yaicui tucungachu. Chaica chashnatajmi canga. 24Cutin cashnami nini: Shuj camellorajmi auja rinrintaca jahualla pasan. Dios mandacujpi shuj charij chaiman yaicunaca, chaitapish yalli sinchimari– nircami.

25Jesuspaj yachacujcunaca, achcata mancharinacushpami:

–Shinashpaca ¿pitaj quishpiri tucungari?– nircacuna.

26Jesús paicunata chaparashpaca:

–Gentecunapajca caica sinchitajmari, ashtahuanpish Diospajca imapish jahuallami– nirca.

27Chaimi Pedroca:

–Ñucanchij tucuita saquishpa, quiquinta catishcamantaca ¿imatataj charishun?– nishpa tapurca. 28Chaimi Jesusca:

–Dios tucuita mushujyachi punllapimi, Runa Aichayujca paipaj sumaj jatun tiyanapi tiyaringa. Cancunapish ñucata catishcamantaca, chaipimi chunga ishqui jatun tiyanacunapi tiyarishpa chunga ishqui Israel aillucuna imalla rurashcata paicunaman ricuchinguichij. Chaica chashnatajmi canga. 29Maijanpish paipaj huasita, huauquicunata, panicunata, yaya mamata, huarmita, huahuacunata, allpacunata saquishpa ñucata catishcamantaca, patsaj cutinhuan yallitami japinga. Huiñai causaitami chasquinga. 30Ashtahuanpish cunan puntapi cajcunaca, achcacunami huashayachishca cangacuna. Cunan huashaman cajcunaca, puntapi churashcami cangacuna.

Currently Selected:

MATEO 19: QCHI04

Highlight

Copy