LUCAS 3

Bautizaj Juan huillashcami

(Mt 3.1-12; Mr 1.1-8; Jn 1.19-28)

1Tiberio shuti César chunga pichca huatata mandacujpica, Poncio Pilatoca Judea llajtata, Herodesca Galilea llajtata, paipaj huauqui Felipeca Iturea llajtata, Traconite llajtatapishmi mandacurca. Lisaniasca Abilinia llajtatami mandacurca. 2Anaspish, Caifaspish curacunata jatun pushajcunami carca. Chai punllacunapimi shitashca pambapi Zacariaspaj churi Juanmanca, Dios rimarca. 3Chaimi Juanca, Jordán yacu c'uchulla tucui llajtacunata rishpa, Diosman cutirishpa bautizarichij. Juchacunata perdonachun nishpa huillarca. 4Chaica profeta Isaías quillcashca libropi nishca shinallatajmi tucurca. Chaipica cashnami nicun:

“Shitashca pambapi caparijca:

“Jatun Diospaj ñanta allichichij, chaqui ñancunatapish allichichij.

5Tucui pugru pugrucunapish jundachishcami canga.

Tucui urcucunatapish, lomacunatapish pambajllatami ruranga.

Huishtu ñancunatapish derechangami.

Jutcu jutcu ñancunatapish llambujllatami ruranga.

6Tucuicunami Dios cachashca Quishpichijtaca ricungacuna” ninmi”.

7Bautizai nishpa shamuj chai tucuicunataca, Juanca cashnami nirca:

–¡Culebra shina millaicuna! Dios p'iñarishpa ñalla jatunta llaquichinamanta quishpirichunca ¿pitaj huillarcari? 8Mana allita ruracushcata saquishpa cutirishcataj cashpaca alli causashpa ricuchichigari. “Ñucanchijca Abrahamtami yayata charinchij” nishpaca ama yuyaichijchu. Cashnami nini: Diosca, cai rumicunatapish Abrahampaj huahuacuna cachun rurai tucunmi. 9Mana p'ucuj yurataca sapimanta p'itishpami rupachin. Chashnallatajmi Diospish chai yura shina mana p'ucujcunata urmachingapaj hachataca yura sapipi ña churashca– nircami.

10Chaipi cajcunaca:

–Shinashpaca ¿imatataj rurashun?– nircacuna.

11Chaimi Juanca:

–Pipish ishqui churanata charijca, mana charijman shujta cuchun. Micunata charijpish, mana charijman carachun– nirca.

12Impuestota japijcunapish bautizarishun nishpa shamushpaca:

–Yachachij, ñucanchijca ¿imatataj rurashun?– nircacuna.

13Shina nijpi Juanca:

–Impuestota japichun nishca shinalla japichij. Ama yallihuan japichijchu– nirca.

14Shinallataj maijan soldadocuna shamushpaca:

–Ñucanchijca ¿imatataj rurana canchij?– nijpi, Juanca:

–Pitapish manchachishpa ama quichuichijchu. Ama yanga juchachichijchu. Cancuna trabajashcamanta japishcallahuan cushi caichij– nircami.

15Tucui chaipi cajcunaca Juantaca:

–¿Caichu Quishpichij Cristo canga imashi?– nishpami paicunapaj shungullapi tapuricurcacuna. 16Chaipimi Juanca, tucuicunaman cashna nishpa cutichirca:

–Cancunataca ñucaca yacullapimi bautizani. Ashtahuanpish ñucapaj q'uipa shamujmi Espirituhuan ninahuanpish bautizanga. Paica ñucata yalli poderyujmi. Ñucaca paipaj pargatellatapish mana pascaipajmi cani. 17Trigo montonta chuyanapajca palaca ñami paipaj maquipi. Paipaj trigota tandashpaca huaquichinapimi churanga. Ujshataca manataj huañuj ninapimi rupachinga– nircami.

18Cai shinapish, shujtaj shinapish cunashcacunahuanmi Juanca, chaipi cajcunamanca alli huillaitaca huillarca. 19Mandaj Herodestaca, paipaj huauqui Felipepaj huarmi Herodiashuan apanacushpa causacushcamanta shujtaj mana allicunata rurashcamantapishmi, Juanca sinchita rimaj carca. 20Tucui chaicunata ruracushca jahuami Juanta carcelpi churashpaca yallitaj millai tucurca.

Jesusta bautizashcami

(Mt 3.13-17; Mr 1.9-11)

21Juanca paipajman shamujcunataca tucuicunatami bautizarca. Jesustapish bautizajpi Diosta Jesús mañacujpica, jahua pachami pascarirca. 22Jahua pachamantaca jucha illaj Espiritumi paloma shina cuerpoyuj paipaj jahuaman shamurca. Shinallataj jahua pachamantaca: “Canca ñuca c'uyashca Churimi cangui, canpimi cushicuita charini” nishpa rimashcapishmi uyarirca.

Jesuspaj ñaupa yayacunami

(Mt 1.1-17)

23Jesusca pai rurana cashcata rurai callarinapajca, quimsa chunga huata shinatami charirca. Paitaca, Josepaj churi cashcallatami yuyarcacuna. Joseca, Elipaj churimi. 24Elica, Matatpaj churimi carca. Matatca, Levipaj churimi carca. Levica, Melquipaj churimi carca. Melquica, Janapaj churimi carca. Janaca, Josepaj churimi carca. 25Joseca, Matatiaspaj churimi carca. Matatiasca, Amospaj churimi carca. Amosca, Nahumpaj churimi carca. Nahumca, Eslipaj churimi carca. Eslica, Nagaipaj churimi carca. 26Nagaica, Maatpaj churimi carca. Maatca, Matatiaspaj churimi carca. Matatiasca, Semeipaj churimi carca. Semeica, Josepaj churimi carca. Joseca, Judapaj churimi carca. 27Judaca, Joanapaj churimi carca. Joanaca, Resapaj churimi carca. Resaca, Zorobabelpaj churimi carca. Zorobabelca, Salatielpaj churimi carca. Salatielca, Neripaj churimi carca. 28Nerica, Melquipaj churimi carca. Melquica, Adipaj churimi carca. Adica, Cosampaj churimi carca. Cosamca, Elmodampaj churimi carca. Elmodamca, Erpaj churimi carca. 29Erca, Josuepaj churimi carca. Josueca, Eliezerpaj churimi carca. Eliezerca, Jorimpaj churimi carca. Jorimca, Matatpaj churimi carca. 30Matatca, Levipaj churimi carca. Levica, Simeonpaj churimi carca. Simeonca, Judapaj churimi carca. Judaca, Josepaj churimi carca. Joseca, Jonanpaj churimi carca. Jonanca, Eliaquimpaj churimi carca. 31Eliaquimca, Meleapaj churimi carca. Meleaca, Mainanpaj churimi carca. Mainanca, Matatapaj churimi carca. Matataca, Natanpaj churimi carca. 32Natanca, Davidpaj churimi carca. Davidca, Isaipaj churimi carca. Isaica, Obedpaj churimi carca. Obedca, Boozpaj churimi carca. Boozca, Salmonpaj churimi carca. Salmonca, Naasonpaj churimi carca. 33Naasonca, Aminadabpaj churimi carca. Aminadabca, Arampaj churimi carca. Aramca, Esrompaj churimi carca. Esromca, Farespaj churimi carca. Faresca, Judapaj churimi carca. 34Judaca, Jacobpaj churimi carca. Jacobca, Isaacpaj churimi carca. Isaacca, Abrahampaj churimi carca. Abrahamca, Tarepaj churimi carca. Tareca, Nacorpaj churimi carca. 35Nacorca, Serugpaj churimi carca. Serugca, Ragaupaj churimi carca. Ragauca, Pelegpaj churimi carca. Pelegca, Heberpaj churimi carca. Heberca, Salapaj churimi carca. 36Salaca, Cainanpaj churimi carca. Cainanca, Arfaxadpaj churimi carca. Arfaxadca, Sempaj churimi carca. Semca, Noepaj churimi carca. Noeca, Lamecpaj churimi carca. 37Lamecca, Matusalenpaj churimi carca. Matusalenca, Enocpaj churimi carca. Enocca, Jaredpaj churimi carca. Jaredca, Mahalaleelpaj churimi carca. Mahalaleelca, Cainanpaj churimi carca. 38Cainanca, Enospaj churimi carca. Enosca, Setpaj churimi carca. Setca, Adanpaj churimi carca. Adanca, Diospaj churimi carca.

Currently Selected:

LUCAS 3: QCHI04

Highlight

Copy