JUECES 10
10
Tolapish, Jairpish israelcunata mandaj tucushcami
1Abimelecpaj q'uipaca, Isacar aillupuramanta caj Tola runami israelcunata llaquimanta llujshichingapajca jatarirca. Paica Fuapaj churi, Dodopaj nietomi carca. Tola runaca Efraín urcupi caj Samir pueblopimi causarca. 2Tola runaca ishqui chunga quimsa huatatami israelcunataca mandarca. Pai huañujpica, Samir pueblollapitajmi pambarcacuna.
3Tolapaj q'uipaca, Galaadpi causaj Jair runami israelcunata mandangapaj jatarirca. Paica ishqui chunga ishqui huatatami mandarca. 4Paica quimsa chunga churicunatami charirca. Tucuicunami tiyarishpa puringapajca shuj shuj burrota charircacuna. Galaad llajtapipish tucuicunami shuj shuj quiquin pueblota charircacuna. Chai quimsa chunga pueblocunaca cunancama: “Jairpaj pueblocuna” shutillahuantajmi. 5Chai q'uipami Jairca huañurca. Paitaca Camón pueblopimi pambarcacuna.
Jefteca amonitacuna llaquichicunmanta israelcunata llujshichishcami
6Israelcunaca baal shuti, Astarot shuti dioscunata, Siria llajtapaj dioscunata, Sidón llajtapaj dioscunata, Moab llajtapaj dioscunata, amonitacunapaj dioscunata, filisteocunapaj dioscunata adorashpami, Mandaj Diospaj ñaupajpica cutinllataj millaita rurarcacuna. Mandaj Diosmanta anchurishpami, Mandaj Diospajtaca ña mana ashtahuan rurarcacuna. 7Mandaj Diosca nina sindirij shina israelcunahuan p'iñarishpami filisteocunapaj, amonitacunapaj maquipi churarca. 8Chaimi paicunaca israelcunataca chunga pusaj huatata yallitaj llaquichishpa causarcacuna. Jordán yacu ch'imbanijpi caj amorreocunapaj llajtapi caj Galaad llajtapi causaj israelcunatapishmi llaquichircacuna. 9Amonitacunaca Judá ailluhuan, Benjamín ailluhuan, Efraín ailluhuan macanacungapajpishmi Jordán yacuta ch'imbarcacuna. Israelcunaca yallitaj llaquitami apacurcacuna.
10Chaimi israelcunaca Mandaj Diostaca: “Ñucanchijmi, can ñucanchij Diosta saquishpa, baal dioscunapajllata rurashpa can Diosta p'iñachishpa juchallishcanchij” nishpami caparishpa mañarcacuna.
11Mandaj Diosca israelcunataca: “Egipto runacuna, amorreocuna, amonitacuna, filisteocuna, 12Sidonpi causajcuna, amalecitacuna, Maonpi causajcuna llaquichicujpi ñucata mañajpica ¿manachu paicunapaj maquimanta llujshichircani? 13Chai jahuamari ñucamanta caruyashpa shujtajcunapaj dioscunapajta rurashcanguichij. Ñucapish cancunataca ña mana ashtahuan quishpichishachu. 14Cunanca cancunapaj llaquicunamanta llujshichichunca, cancuna agllashca dioscunallatataj caparishpa mañagrichijlla” nircami.
15Israelcunaca Mandaj Diostaca: “Ñucanchijca juchallishcanchijmi. Cunanca cambaj ima ashtahuan alli canata rurailla. Cunan cai cutinllahuan ñucanchijta quishpichihuai” nishpami mañarcacuna.
16Israelcunaca paicunapaj chaupimanta shujtajcunapaj dioscunata tucuita anchuchishpami, Mandaj Diospajllata rurarcacuna. Mandaj Diospish israelcuna ashtahuan llaquita apacuchunllaca ña mana ashtahuan saquircachu.
17Amonitacunaca tucuicuna tandanacushpami, Galaadpi carpa huasicunata shayachishpa tiyarircacuna. Israelcunapish tandanacushpami, Mizpa pueblopi carpa huasicunata shayachishpa tiyarircacuna. 18Chaipimi Galaadtapi causaj israelcunapish pushajcunapish: “Amonitacunahuan cai macanacuitaca ¿maijanshi pushanga? Maijanpish chai macanacuita pushajca chaimi Galaad llajtapi tucui causajcunata pushaj canga” nishpami caishuj chaishuj ninacurcacuna.
Currently Selected:
JUECES 10: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.