GÉNESIS 23
23
Sara huañujpi pambashcami
1Saraca, 127 huatatami causarca. Chai tucui huatacunatami causarca. 2Saraca Canaán llajtapi caj Hebrón nishca Quiriat-arba pueblopimi huañurca. Chaimi Abrahamca Sara huañujpi llaquijlla tucushpa huacangapaj shamurca. 3Abrahamca paipaj huarmi huañushca chaimanta jatarishpa rishpaca, Hetpaj huahuacunatami cashna nigrirca:
4–Ñucaca cancunapurapica caru llajtamanta pasacujlla shinami causacuni. Chashna cajpipish cancunapurapi caj pambana jutcuta cuhuaichij. Huañushca ñuca huarmita chaipi pambangapaj– nirca.
5Chaimi Hetpaj huahuacunaca Abrahamtaca:
6–Ñucanchij amito, caita uyapai. Canca ñucanchijpurapica Taita Dios churashca mandajmi cangui. Huañushca cambaj huarmitaca ñucanchijpurata pambanapaj rurashca jutcucunamantaca ashtahuan alli jutcuta agllashpa pambailla. Paita pambachunca ñucanchijpurapi cajcunaca pi mana mitsangachu. Pambachun saquingallami– nircacuna.
7Chaimi Abrahamca shayarishpa Hetpaj huahuacunapaj ñaupajpi cumurishpaca, 8paicunataca cashna nirca:
–Huañushca ñuca huarmita cancunapurapi cajcunata pambana jutcupi pambachun saquishpatajca Zoharpaj churi Efronpajman ñucapaj randi rishpa, 9paipaj allpa uripi tiyaj Macpela shuti pambana jutcuta mashna valishcapi ñucaman c'atuchun nishpa rogapaichij. Chaimi cancunapurapica pambana jutcutaca ñuca quiquinpajtataj charisha– nirca.
10Heteocunapura caj Efronca Hetpaj huahuacunahuan chaillapitaj cashpami, tucui hititacunapaj ñaupajpipish, chai puebloman tucui yaicujcunapaj llujshijcunapaj ñaupajpipish Abrahamtaca cashna nirca:
11–C'atunataca mana c'atunichu. Ashtahuanpish ñuca amitolla, caita uyapai. Tucui ñuca llajtapi causajcunapaj ñaupajpimi chai allpatapish, pambana jutcutapish canmanca convidani. Huañushca cambaj huarmitaca chai pambana jutcupi pambailla– nirca.
12Shina nijpipish Abrahamca, chai llajtapi causajcunapaj ñaupajpi cutinllataj cumurishpami, 13Efrontaca tucui chaipi cajcunapaj ñaupajpi:
–Can chashna munashpapish ñuca rimashcata uyachunmi rogapani. Chai allpamantaca mashna valishcatami pagasha nini. Japipailla. Can chai cullquita japijpimi, ñuca huarmitaca pambasha– nirca.
14Chaimi Efronca, Abrahamtaca:
15–Ñuca amitolla, ñuca nishcata uyapai. Chai allpaca 400 siclo cullquimi valin. Ashtahuanpish ¿chaica cambajpish, ñucapajpish ima mana canchu? Cambaj huarmitaca ña pambailla– nirca.
16Chaimi Abrahamca, Efrón mashna mañashcata cuna tucushpa, c'atushpa randishpa purijcunapaj mandashcapi nishca shina, 400 siclo cullquitaca hititacunapaj ñaupajpi pezashpa Efronman curca. 17Efronpaj cashca Macpela shuti allpaca Mamre pueblomanta inti llujshin ladomanmi. Chai allpaca chaipi tiyaj tucui yuracunandij, pambana jutcundij, chai allpa maillata cashcami, 18Abrahampaj tucurca. Abrahamca chai allpataca, hititacunapish, chai puebloman yaicujcunapish llujshijcunapish tucuicuna ricucunpimi randirca.
19Chai q'uipami Abrahamca, pai randishca Macpela shuti allpapi tiyaj jutcupi paipaj huarmi Sarataca pambarca. Chai allpaca Mamre pueblomanta inti llujshinmanmi. Chai Mamre pueblollatatajmi Hebrón nincuna. Chai Hebrón puebloca Canaán llajtapimi. 20Hititacunaman pambana jutcundij randishca allpaca Abrahampajca quiquin pambana allpami tucurca.
Currently Selected:
GÉNESIS 23: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
