GÉNESIS 22
22
Taita Diosca Abrahamtaca paipaj churi Isaacta paiman cushpa rupachichun mandashcami
1Tucui chaicuna q'uipami Taita Diosca Abrahamtaca pai ima shina crij cashcata ricungapaj:
–Abraham– nishpa cayajpi paica:
–Caipimi cani– nirca.
2Chaipimi Taita Diosca Abrahamtaca:
–Cunanca cambaj c'uyashca shujlla churi Isaacta pushashpa, Moriah llajtaman ri. Chaipi tiyaj urcucunamanta shuj urcutami canman ricuchisha. Chai urcupi Isaactaca ñucaman cushpa tucui rupachingui– nirca.
3Abrahamca, cayandij tutamanta utcata jatarishpami burrota parejashpa paipajta ruraj ishqui runacunatapish, paipaj churi Isaactapish tandachirca. Chai q'uipaca Taita Diosman cunata tucui rupachingapaj yantata p'itishpami Taita Dios mandashca shinallataj chai urcuman rirca. 4Ña quimsa punllata purishpami Abrahamca carumanta chai urcuta ricushpaca, 5paipajta rurajcunataca cashna nirca:
–Cancunaca burrondij caillapi shuyacuichij. Ñucaca ñuca churindij chai urcuman rishpa, Taita Diosta chaipi adorashpa caillamantaj tigramushunllami– nirca.
6Chaimantaca Abrahamca, Taita Diosman cunata tucui rupachina yantataca paipaj churi Isaacman apachishpa cuchillotapish, ninatapish pai apashpami ishquindij rircacuna. 7Chai q'uipami Isaacca paipaj yaya Abrahamtaca:
–Ñuca yayito– nijpi, Abrahamca:
–Ñuca huahualla ¿imatataj ningui? caipimi cani– nijpi Isaacca:
–Yantatapish, ninatapish charinchijmi. Ashtahuanpish Taita Diosman cushpa tucuita rupachina ovejaca ¿maipitagari?– nirca.
8Chaimi Abrahamca:
–Ñuca huahualla, Taita Diosca paiman cushpa tucuita rupachina ovejataca cungallami– nishpaca, ishquindijtaj rircallacunami.
9Taita Dios ricuchishca urcuman ña chayashpaca, Abrahamca shuj altarta rurashpami, yantatapish allichishpa chai altar jahuapi churarca. Paipaj churi Isaactapish tsagnashpami chai yanta jahuapi churarca. 10Chai q'uipaca cuchillota japishpa Abraham paipaj churita ña huañuchigrijpimi, 11Mandaj Diospaj angelca jahua pachamanta:
–¡Abraham! ¡Abraham!– nijpi paica:
–Caipimi cani– nirca.
12Chaimi angelca:
–Cambaj churita llaquichingapajca ama maquita chutaichu. Imata ama ruraichu. Mandaj Diosta manchajtaj cashcataca ñami yachani. Chashna cashpami cambaj churica shujlla cajpipish mana mitsashpa chaitataj ñucaman cushcangui– nirca.
13Shina nijpi Abraham ricunapajca, paipaj huashanijpi shuj carnero zarza casha yurapi gachucuna churarishpa shayacujtami ricurca. Abrahamca chai carnerota japishpami, paipaj churipaj randi Taita Diosman cushpa tucui rupachirca. 14Chaimi Abrahamca chaitaca: “Ima illashcata Mandaj Dios cuna urcu” shutita shutichirca. Chaimi cunancama: “Ima illashcataca Mandaj Diospaj urcupimi cunga” nincuna.
15Mandaj Diospaj angelca, Abrahamta cutinllataj jahua pachamanta cayashpaca, 16cashnami nirca:
–Cambaj churitaca pailla cajpipish ñucaman cunataca mana mitsashpa cushcamantaca ñuca shutillapitajmi cashna nini: 17Cantaca alli cashca cachun nishatajmi. Cambaj huahua huahuacunataca jahua pachapi caj luzerocunata shina, mama cucha uripi tiyaj t'iyu allpata shinami yallitaj mirachisha. Cambaj huahua huahuacunami paicunata p'iñajcunataca mishanga. 18Ñuca mandashcata can cazushcamantami, cambaj huahua huahuacunamantaca tucui cai pachapi causajcunapish alli nishca cangacuna– nircami.
19Chai q'uipaca, Abrahamca paipajta rurajcuna maipi cashcaman tigrashpami paicunahuan tandanacushpa Beersebaman tigrarca. Abrahamca Beersebapimi causarca.
Nacorpaj huahua huahuacunami
20Tucui chaicuna q'uipami Abrahammanca: “Cambaj huauqui Nacorpaj huarmi Milcapish cambaj huauquipajta huahuacunayuj tucushcami” nishpa huillarca. 21Nacorpaj punta churica Uzmi carca. Chaipaj q'uipa churica Buzmi carca. Buzpaj q'uipaca Kemuelmi carca. Paimi Arampaj yaya carca. 22Chai q'uipaca Nacorca Quesed, Hazo, Pildas, Jidlaf, Betuel shuti churicunatapishmi charirca. 23Betuelca Rebecapaj yayami carca. Abrahampaj huauqui Nacorpaj huarmi Milcaca, chai pusaj churicunatami huacharca.
24Nacorca Reúma shuti paipaj caishuj huarmipipish Teba, Gaham, Tahas, Maaca shuti churicunatapishmi charirca.
Currently Selected:
GÉNESIS 22: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
