GÉNESIS 18
18
Diosca Abrahamman shuj huahuata cusha nishcami
1Mandaj Diosca Abrahammanca, Mamre shuti runapaj encina yuracuna tiyanpimi ricurirca. Abrahamca chaupi punlla shinata yallitaj rupachicujpimi, paipaj carpa huasi punguman llujshishpa tiyacurca. 2Abrahamca paipaj chaininijllapi quimsa runacuna cajta ricushpami, paipaj carpa huasi pungumanta callpashpa tupanaman rishpa paicunapaj ñaupajpi pambaman tupajta cumurishpaca, 3cashna nirca:
–Amito, canpi ñuca alli ricurishca cajpica, cambajta rurajpaj c'uchuta pasacushpaca ama pasajta richunmi rogapani. 4Cancunapaj chaquicunata maillachun asha yacuta apamuchisha. Chai q'uipaca cai yura ucupi samaringuichijllami. 5Cambajta rurajpaj c'uchuta pasacushpatajca, ashata samaripaichij. Ñami asha micunata apamusha, ña micushca q'uipaca fuerzata cutin japishpa ripanguichijllami– nijpi paicunaca:
–Can nishca shina rurailla– nircacuna.
6Chaimi Abrahamca, carpa huasiman rishcahuan paipaj huarmi Sarataca:
–Chuscu chunga libra ashtahuan alli cutata japishpa, utcashpa tandata rurashpa cusai– nirca.
7Chai q'uipaca Abrahamca vacacunapajman callpashpa rishpami, tucuimanta yalli huira bizita apamurca. Chaitaca paipajta rurajcunapuramanta shujman cujpimi utca huañuchishpa aichata allichirca. 8Abrahamca mantequillatapish, lechetapish, bizi aichata yanushcatapish apashpami chai runacunaman cararca. Chai runacunaman carashpaca, Abrahampish chai yura ucullapitajmi saquirirca.
9Chai q'uipaca:
–¿Cambaj huarmi Saraca maipitaj?– nishpa tapujpimi Abrahamca:
–Cai carpa huasi ucupimi– nirca.
10Shina nijpimi paicunapuramanta shujca:
–Shamuj huatapish canta ricunaman tigramushami. Chai punllacunapajca cambaj huarmi Saraca, ñami shuj c'ari huahuayuj canga. Chashnatajmi canga– nirca.
Chashna parlanacucujtaca Saraca, Abrahampaj carpa huasi huashanijpi caj paipaj carpa huasi pungumantami uyacurca. 11Abrahampish, Sarapish yallitaj yuyajcunami carca. Chaimi huarmicuna unguna quilla ungüitaca Saraca ña mana ungucurca. 12Chaimi Saraca paipaj shungullapi asishpaca: “Ñucaca ñamari yallitaj yuyaj cani. C'arihuan chayarina munaitapish mana charishachu. Ñuca amitopish ñamari yallitaj yuyaj” nishpa yuyacurca. 13Chaimi Mandaj Diosca, Abrahamtaca:
–¿Ima nishpataj Saraca, ñucaca ña yuyaj cashpapish huachashatajchu imatagari nishpa asicun? 14Taita Diospajca imapish mana sinchichu. Ña nishca shinallataj shamuj huatami cambajman tigramusha. Chaipajca Saraca ñami shuj c'ari huahuayuj canga– nirca.
15Shina nijpi Saraca mancharishpami:
–Mana asircanichu– nijpi Mandaj Diosca:
–Mana chashnachu. Asircanguimi– nirca.
Sodoma pueblota Dios ama llaquichichun Abraham mañashcami
16Chai runacuna chaimanta jatarishpaca, Sodoma puebloman rina ñantami rircacuna. Abrahampish paicunahuanmi rirca. 17Chaipimi Mandaj Diosca: “Ñuca imata rurana cashcataca Abrahammanca ricuchinami cani. 18Abrahamca imatapish rurai tucuj jatun llajtami tucunga. Paimantami cai pachapi tiyaj tucui llajtacunapish alli nishca cangacuna. 19Abrahamtaca paipaj huahua huahuacunatapish, chaicunapaj huahua huahuacunatapish Mandaj Dios mandashcacunataca cashcata rurashpa causanata, pai nishca shinataj rurashpa pajtachina cashcata yachachinataca yachanimi. Abrahamca Mandaj Dios paiman cusha nishcacunata pajtachichunmi chashna rurana can” nircami. 20Chaipimi Mandaj Diosca Abrahammanca:
–Sodoma, Gomorra pueblopi causajcuna yallitaj millaita rurashcacunataca ashtahuan ashtahuanmi caparishpa huillacun. Paicunaca yallitaj jatun millaitami rurashcacuna. 21Chaimanta cunanca caparishpa ñucaman huillashcacuna chashnataj cashcata, mana chashna cashcata ricungapajmi uriyagrini– nirca.
22Chai runacuna Abrahammanta ch'icanyashpaca Sodoma pueblomanmi rircacuna. Abrahamca Mandaj Diospaj ñaupajpimi saquirirca. 23Chaipimi Abrahamca Mandaj Diospajman c'uchuyashpaca:
–¿Cashcata rurajcunataca, Diosta mana rijsijcunahuanchu chingachigringui? 24Chai pueblopi causajcunapurapi cashcata rurajcuna pichca chungallapish tiyajpica: ¿Chai pueblotaca chingachinguillatajchu? Chai pichca chungacunata c'uyashcallamantapish ¿manachu perdonangui? 25Cashcata rurajcunata Diosta mana rijsijcunahuan llaquichinaca canpica mana tiyanchu. Nunca mana chashna ruranguichu. Canca tucui cai pachapaj Juez cashcamanta imatapish cashcatatajmi rurangui– nircami.
26Shina nijpimi Mandaj Diosca:
–Sodomapi causajcunaca cashcata rurajcuna pichca chungallapish tiyajpica, paicunata c'uyashcamanta chai pueblotaca mana chingachishachu– nirca.
27Chaimi Abrahamca cutinllataj:
–Ñucaca, Jatun Dioslla ñutu allpa shina ushpa shina cajpipish ñuca mañashcata uyachunmi rogapani. 28Cashcata rurajcuna pichca chunga canapaj pichca illajpica: Chai pichca illashcamanta chai pueblotaca ¿chingachinguillatajchu?– nijpimi Mandaj Diosca:
–Cashcata rurajcuna chuscu chunga pichcallapish chai pueblopi tiyajpica mana chingachishachu– nirca.
29Abrahamca cutinllatajmi:
–Chai pueblopi chuscu chungalla tiyajpica– nijpi Mandaj Diosca:
–Chuscu chungalla tiyajpipish, paicunata c'uyashcamanta mana chingachishachu– nirca.
30Abrahamca cutinpish rogarishpaca:
–Ñuca Jatun Dioslla, cashnapish nijpica ama p'iñaripangui: Chai pueblopi quimsa chungalla tiyajpica– nijpi Mandaj Diosca:
–Quimsa chungallapish tiyajpica mana chingachishachu– nirca.
31Abrahamca cutinllataj rogarishpaca:
–Ñuca Jatun Dioslla, ñuca canta chashna nishpaca yallitaj p'iñachijmari cani. Chai pueblopi ishqui chungalla tiyajpica– nijpi Mandaj Diosca:
–Ishqui chungallapish tiyajpica paicunata c'uyashcamanta mana chingachishachu– nirca.
32Abrahamca cutinmi:
–Ñuca Jatun Dioslla, ama p'iñaripangui, cai cutinllahuanmi rimagrini. Chai pueblopi chungalla tiyajpica– nijpi Mandaj Diosca:
–Chungallapish tiyajpica paicunata c'uyashcamanta mana chingachishachu– nirca.
33Mandaj Diosca Abrahamman ña tucui huillashca q'uipaca rircallami. Abrahampish, paipaj carpa huasiman tigrarcallami.
Currently Selected:
GÉNESIS 18: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
