GÉNESIS 11
11
Babel shuti jatun torreta rurashcami
1Cai pachapi causajcunaca tucuicunami shuj shinalla, shuj rimaillata rimajcuna carca. 2Inti llujshin ladomanta rishpaca, Sinar llajtapi caj pambamanmi chayarcacuna. Chaipimi causanata callarircacuna. 3Chaipi cashpami caishuj chaishuj: “Jacuchij, ladrillota rurashpa ninapi cusashunchij” ninacurcacuna. Chashnami rumicunapaj randica ladrillota, lodopaj randica breata charircacuna. 4Chai q'uipaca cashnapishmi nircacuna: “Shuj pueblota jahua pachaman chayaj torreyujta rurashunchij. Chashnami c'ari c'ari runacuna tiyashcaca tucuipi yacharishun, tucui cai pachata caita chaita rinatapish pararishun” nircacunami.
5Mandaj Diosca cai pachapi causajcunaca jahua pachaman chayaj torreyuj pueblota shayachicujpimi, chaita ricungapaj jahuamanta uriyamurca. 6Chaimi Mandaj Diosca: “Paicunaca tucuicuna shuj shinalla cashpa, shuj rimaillapi rimajcuna cashpami cashna ruranataca callarishcacuna. Chaimanta cunanca paicuna yuyarishcataca ima mana jarcai tucungachu. 7Cunanca caishuj chaishuj imata rimacushcatapish ama entendichun paicunapaj rimaitaca ch'ican ch'icanta rurashun” nirca.
8Chashnami Mandaj Diosca, paicunataca chai pambamantaca tucui cai pachata caita chaita cacharca. Chaimi paicunaca jatun pueblota shayachinataca saquircacuna. 9Mandaj Dios chai punllapi tucui cai pachapi causajcunapaj rimaita ch'ican ch'icanta rurashpa tucui cai pachata caita chaita cachashcamantami chai pueblotaca, Babelta shutichirca.
Sempaj huahua huahuacunami
(1 Cr 1.24-27)
10Sempaj huahua huahua callari yayacunaca caicunami: Semca yacu juillu tiyashca ishqui huata q'uipa ña patsaj huatayuj cashpami, Arfaxad churita charirca. 11Semca Arfaxad churita charishca q'uipaca 500 huatacunahuanmi causarca. Churicunatapish ushushicunatapish charircarajmi.
12Arfaxadca quimsa chunga pichca huatayuj cashpami, Sala churita charirca. 13Arfaxadca Sala churita charishca q'uipaca, 403 huatacunahuanmi causarca. Churicunatapish, ushushicunatapish charircarajmi.
14Salaca quimsa chunga huatayuj cashpami, Heber churita charirca. 15Salaca, Heber churita charishca q'uipaca 403 huatacunahuanmi causarca. Churicunatapish, ushushicunatapish charircarajmi.
16Heberca quimsa chunga chuscu huatayuj cashpami, Peleg churita charirca. 17Heberca, Peleg churita charishca q'uipaca 430 huatacunahuanmi causarca. Churicunatapish, ushushicunatapish charircarajmi.
18Pelegca quimsa chunga huatayuj cashpami, Reu churita charirca. 19Pelegca, Reu churita charishca q'uipaca 209 huatacunahuanmi causarca. Churicunatapish, ushushicunatapish charircarajmi.
20Reuca quimsa chunga ishqui huatayuj cashpami, Serug churita charirca. 21Reuca, Serug churita charishca q'uipaca 207 huatacunahuanmi causarca. Churicunatapish, ushushicunatapish charircarajmi.
22Serugca quimsa chunga huatayuj cashpami, Nacor churita charirca. 23Serugca, Nacor churita charishca q'uipaca 200 huatacunahuanmi causarca. Churicunatapish, ushushicunatapish charircarajmi.
24Nacorca ishqui chunga iscun huatayuj cashpami, Taré churita charirca. 25Nacorca, Taré churita charishca q'uipaca 119 huatacunahuanmi causarca. Churicunatapish, ushushicunatapish charircarajmi.
26Tareca canchis chunga huatayuj cashpami, Abram, Nacor, Harán shuti churicunata charirca.
Tarepaj huahua huahuacunami
27Tarepaj huahua huahua callari yayacunaca caicunami: Tareca Abram, Nacor, Harán churicunatami charirca. Haranca Lot churitami charirca. 28Haranca paipaj yaya Taré manaraj huañujpimi, pai huacharishca caldeocuna causacun Ur pueblollapitaj huañurca.
29Abramhuan Nacorhuanca paicunapaj huarmicuna cachunca cai huarmicunatami japirca. Abrampaj huarmica Saraimi carca. Nacorpaj huarmica Milcami carca. Haranca Milcapaj, Iscapaj yayami carca. 30Saraica mana huachaj cashpami, huahuacunataca mana charirca.
31Tareca paipaj churi Abramtapish, paipaj nuera Saraitapish, paipaj churi Haranpaj churi Lottapish, pushashpami Canaanman ringapaj, caldeocuna causacun Ur pueblomanta llujshishpa rirca. Ashtahuanpish Haranman chayashpaca chaillapimi saquirirca. 32Tareca, 205 huatayuj cashpami Haranpi huañurca.
Currently Selected:
GÉNESIS 11: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
