ÉXODO 18
18
Moisesta Jetro ricunaman rishcami
1Madián llajta cura Moisespaj suegro Jetroca, Taita Dios Moiseshuan imallata rurashcata, israelcunatapish imallata rurashcata, Egiptomanta israelcunata Mandaj Dios ima shina llujshichimushcatami uyarca. 2Moisespaj suegro Jetroca Moisés paipaj huarmi Seforata paipajman tigrachishpa cachajpica, 3paipaj ishqui churicunandijtami chasquirca. Moisespaj shuj churica Gersón shutimi carca. Paitaca: “Cai ajeno llajtapica catishpa causajllami cani” nishpami chashna shutichirca. 4Caishuj churica Eliezer shutimi carca. Paitaca: “Faraonpaj espadamantaca ñuca yayapaj Taita Diosmi quishpichishpa ayudahuarca” nishpami, chashna shutichirca.
5Moisespaj suegro Jetroca Moisespaj ishqui churicunandij Moisespaj huarmindij pushashpami, Moisés maipi carpa huasita shayachishpa tiyacun Taita Diospaj urcu c'uchupi caj shitashca pambaman chayashpaca, 6Moisestaca:
–Ñuca, cambaj suegro Jetromi cambaj huarmitapish, cambaj ishqui churicunatapish pushashpa cambajman shamuni– nirca.
7Moisés paipaj suegrota tupanaman llujshishpaca, paipaj ñaupajpi cumurishpa muchashpami, caishuj chaishuj allillachu cangui ninacushpaca, carpa huasiman yaicurcacuna. 8Moisesca paipaj suegromanca, Mandaj Diosca israelcunata c'uyashcamantaca faraontapish, egipciocunatapish imallata rurashcata, israelcunahuan ñanpi cashpa imalla llaquicunata apashcata Mandaj Dios ima shinalla paicunata quishpichishcatapishmi parlarca.
9Jetroca Mandaj Dios israelcunata egipciocunapaj maquimanta llujshichishpa israelcunapaj allita rurashcamantaca jatuntami cushicurca. 10Chaimi Jetroca:
–Israelcunata egipciocunapaj maquimanta, faraonpaj maquimanta cacharichij Mandaj Diosca alli nishca cachun. Egipciocunapaj maquimantaca israelcunataca paimari cacharichishca. 11Paicuna imahuanmi jatun tucushpa llaquichicurca chaillahuantajmi paicunatapish llaquichishpa israelcunata cacharichirca. Cunantajca Mandaj Diosca tucui dioscunamanta yalli tucuita rurai tucuj, jatun cashcatami yachani– nircami.
12Moisespaj suegro Jetroca Diosman cushpa tucuita rupachinata, shujtaj sacrificiocunatapishmi Taita Diosman curca. Aaronpish, israelcunata cunaj yuyajcunapish Moisespaj suegrohuan Taita Diospaj ñaupajpi micunamanmi rircacuna.
Moisesca juezcunata churashcami
(Dt 1.9-18)
13Chai cayandij punllaca, Moisesca israelcunapaj llaquicunata allichingapajmi tiyarirca. Israelcunaca tutamantamanta chishicamami, Moisespaj ñaupajpi achcacuna shayacurcallacuna. 14Israelcunahuan Moisés tucui ima shinalla ruracujta ricushpami Moisespaj suegroca:
–Cai tucui ruranataca ¿ima nishpataj canlla ruracungui? Quiquinlla tiyarishpa cai tucuita ruracujpica tucuicunamari tutamantamanta chishicama cambaj ñaupajpi shayacunllacuna– nirca.
15Shina nijpi Moisesca paipaj suegrotaca:
–Paicunaca Taita Diosta tapungapajmari ñucapajman shamuncuna. 16Maijancunaca p'iñanacushca cashpami, ñucapajman shamuncuna. Paicunataca caishujmanpish, chaishujmanpish ima shina cashcata ricuchishpami, Taita Dios ima shina causachun nishcacunatapish, mandashcacunatapish ricuchishpa huillani– nirca.
17Shina nijpi Moisespaj suegro Jetroca:
–Can ruracushca shinaca mana allichu. 18Canpish, canhuan caipi caj gentecunapish shaicunguichijmi. Cai ruranacunaca cambajca yallitaj sinchimari. Canllaca mana rurai tucunguichu. 19Ñuca yuyaita cushcacunata cunanca uyai. Taita Diosca canhuanmi canga. Canmari tucui israelcunapaj randi Taita Diospaj ñaupajpi shayarishpa tucui paicunapaj llaquicunata Taita Diosman huillana cangui. 20Paicunamanca ima shina causachun mandashcata yachachi. Paicuna mailla ñanta purina ñantapish, imallata rurana cashcatapish ricuchi. 21Chashna yachachishpaca tucui israelcunapurallamantataj mandai tucuipajcunata, Taita Diosta manchajcunata, imatapish cashcata rurajcunata, quiquinpajlla charij canata mana munajcunata agllashpa, shujcunataca huaranga runacunata, shujcunataca patsaj runacunata, shujcunataca pichca chunga runacunata, shujcunataca chunga runacunata mandajcuna cachun churai. 22Israelcuna ima shinalla cashcataca paicunami punllanta paicunapaj llaquicunata ricuchinga. Yallitaj llaquicunallata canmanca huillaj shamuchun. Uchillalla llaquicunataca paicunallataj ima shina cashcata ricuchichun. Ima shinalla apanata paicuna chashna ayudajpimi, cambaj sinchi trabajomantaca samaringui. 23Ñuca nishcata can rurajpi Taita Dios allimi nijpica, chaita rurailla. Chashna rurashpami, ashtahuan ñaupajman apai tucungui. Israelcunapish cushicushpami paicunapaj huasicunaman ringacuna– nircami.
24Moisesca paipaj suegro yuyaita cushcata cazushpami, tucuita chashnataj rurarca. 25Moisesca israelcunapurapi mandai tucuipaj cajcunata agllashpami, huaranga runacunata, patsaj runacunata, pichca chunga runacunata, chunga runacunata mandajcuna cachun churarca. 26Paicunami israelcuna llaquicunata charijpica maijanpajlla ima shinalla cashcata ricuchijcuna carca. Uchilla llaquicunataca paicunallatajmi ima shina cashcata ricuchijcuna carca. Sinchi llaquicunahuan cajllapimi Moisespajman pushamujcuna carca. 27Chai q'uipaca Moiseshuan paipaj suegrohuan minchacama ninacushpaca, Jetroca paipaj llajtaman rircallami.
Currently Selected:
ÉXODO 18: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.