DEUTERONOMIO 28

Cazujcunaca allicunata japinami

(Lv 26.3-13; Dt 7.12-24)

1Cunan ñuca cancunaman quillcashpa mandashcacunata chai yuyailla tucushpa pajtachingapaj Mandaj Dios cancunapaj Taita Dios rimashcata alli uyajpica, Mandaj Dios cancunapaj Taita Diosca cancunataca tucui cai pacha llajtacunapaj jahuapimi jatun canapi churanga. 2Mandaj Dios cancunapaj Taita Dios imalla nishcata cancuna uyashpa cazujpica, tucui cai allicunami cancunapajman jahuanpi jahuanpi shamushpa catinga. 3Pueblopi cashpapish, chagrapi cashpapish alli nishcacunami canguichij.

4Cancunapaj huijsamanta llujshishca huahuacunapish, cancunapaj allpapi p'ucushca granocunapish, cancunapaj animalcunapaj huahuacunapish, cancunapaj huagracunapaj huahuacunapish oveja canllapish tucui alli nishcacunami canga.

5Cancunapaj grano canastapish, tandata ruranapaj masana bateapish alli nishca cachun. 6Cancunapaj llujshinapipish cancunapaj yaicunapipish allimi canguichij.

7Cancunata p'iñashpa jatarijcunatapish Mandaj Diosmi mishanga. Cancunahuan macanacungapajca shuj ñanllatami llujshingacuna. Canchis ñancunatami cancunamantaca miticushpa callpangacuna. 8Cancunapaj granocunata huaquichinacunata, cancunapaj maquihuan tucui imallata ruracuncunatami Mandaj Dios cancunapaj Taita Diosca alli cachun ninga. Mandaj Dios cancunapaj Taita Dios cancunaman cushca llajtatapish alli cashca cachun ningami. 9Mandaj Dios cancunapaj Taita Dios mandashcacunata pajtachishpa, paipaj ñanllapi catijpica, Mandaj Diosca pai nishca shinallatajmi jucha illaj paipajlla sinchicuna cachun churanga. 10Chashna cajpimi shujtaj llajtacunapi causajcunaca Mandaj Diospaj shuti cancunapaj jahuapi cashcata ricushpa cancunataca manchangacuna. 11Cunan cancunaman cugrin llajtata cancunapaj ñaupa yayacunaman Mandaj Dios cushatajmi nishca llajtapi ña cancuna cajpica Mandaj Diosca achca charinacunayujta, achca huahuacunayujta, achca animalcunayujtami ruranga. Cancunapaj chagracunapipish jahuanpi jahuanpimi yallitaj p'ucuchinga. 12Mandaj Diosca tamyata huaquichishca jahua pachata pascashpami, cancunapaj allpacunapica tamyana punllacunapitaj tamyachishpa cancunapaj maquihuan tucui imalla rurashcacunapica allicunata cunga. Cancunaca achca shujtaj llajtacunaman mañachingapajmi charinguichij. Ashtahuanpish cancunaca pita mana mañanguichijchu. 13Mandaj Diosca cancunataca uma cachunmi churanga, chupa cachunca manataj churangachu. Paica cancunataca punta cachunmi churanga, huashaman cachunca nunca manataj churangachu. Mandaj Dios cancunapaj Taita Dios mandashcata cazuchun cunan ñuca mandashcacunata cazushpa, chaipi imalla nicushcacunata pajtachishpa causajpimi chashna ruranga. 14Chaimanta shujtaj dioscunata catishpa, shujtaj dioscunapaj ruranacunata rurangapaj ñataj cunan ñuca cancunata mandashcacunamantaca alli ladomanpish lluqui ladomanpish anchuringuichijman.

Mana cazushpaca llaquita apanami

(Lv 26.14-46)

15Mandaj Dios cancunapaj Taita Dios imalla nishcacunata mana uyashpa, tucui pai mandashcacunatapish, pai chaitataj pajtachichun nishcacunatapish, cunan ñuca cancunata mandashcacunatapish mana chai yuyailla tucushpa pajtachijpica, cancunapaj jahuamanca jahuanpi jahuanpimi tucui cai llaquicuna shamunga: 16Pueblopi cashpapish, chagrapi cashpapish mana alli nishcacunami canguichij. 17Cancunapaj grano canastapish, tandata ruranapaj masana bateapish mana alli nishcami canga.

18Cancunapaj huijsamanta llujshishca huahuacunapish, cancunapaj allpapi p'ucushca granocunapish, cancunapaj huagracunapaj huahuacunapish, cancunapaj oveja canllapish tucui mana alli nishcacunami canga. 19Cancunapaj llujshinapipish cancunapaj yaicunapipish manataj alli canguichijchu.

20Tucui can imata ruranapipish ima mana alli llujshinatami cachanga. Jatun llaquicunahuan aij ninatami cachanga. Tucui chaicunataca mandashcata mana cazushpa paimanta anchurishpa mana alli ruranacunallata rurashcamanta cancunata utca tucuchingapajmi chashna cachanga. 21Cancunapaj cachun cancuna japigricun llajtamanta tucui chingachingacamami, Mandaj Diosca cancunapaj jahuamanca huañuchij ungüita cachanga. 22Mandaj Diosca mana jambipaj ungüita, fiebreta, chuputa, rupari ungüitami cachanga. Shinallataj mana tamyachishpa cungaimanta llaquicunata cachashpa, granocunata chaquichishpami cancunata chingachingacama llaquichinga. 23Jahua pachapish bronce shinami canga. Cancunapaj chaqui sarucun allpapish fierro shinami canga. 24Mandaj Diosca cancunapaj allpamanca tamyapaj randica ñutu allpata, ushpatami cachanga. Cancuna tucuringacamami jahua pachamanta chashna llaquichinga. 25Cancunata p'iñajcunapaj maquipimi Mandaj Diosca paicuna mishachun cancunataca churanga. Paicunahuan macanacungapaj shuj ñanllata llujshishpapish, canchis ñancunatami paicunata miticushpa callpanguichij. Cancunaca tucui cai pachapi causajcuna mancharinami tucunguichij. 26Cancunapaj huañushca aichacunaca tucui angacuna, sacha animalcuna micunapajmi canga. Chaicunata manchachishpa catijca pi mana tiyangachu. 27Mandaj Diosca egipciocunata llaquichishca mana jambiri tucuipaj úlcera ungüihuan, chupu ungüihuan, caracha ungüihuan, shijshi ungüihuanmi cancunataca llaquichinga. 28Mandaj Diosca uma ungushcatapish, ñahui mana ricujtapish, musparijcunatapish rurashpami cancunataca llaquichinga. 29Ñahui mana ricuj tantiacuj shinami chaupi punllapi amsapi shina tantianguichij. Cancuna imata rurashcapish mana alli llujshingachu. Ashtahuanpish tucui punllacuna shujtajcuna llaquichishca, shuhuashcallami canguichij. Cancunata quishpichijca pi mana tiyangachu. 30Cazarangapaj ari ninacushca cajpipish, shujtaj c'arimi chai huarmihuanca dorminga. Huasita shayachishpapish chai huasipica mana causanguichijchu. Uvata tarpushpapish chai uvataca mana cancunachu micushpa cushicunguichij. 31Cancunapaj huagracunataca cancunapaj ñaupajpimi huañuchingacuna. Cancunaca mana micunguichijchu. Cancunapaj burrocunataca cancunapaj ñaupajmantami apashpa ringacuna. Manataj tigrachingacunachu. Ovejacunapish cancunata p'iñajcunapajmi tucunga. Chaitaca pi mana ayudashpa tigrachichingachu. 32Cancunapaj churicunata, cancunapaj ushushicunataca cancuna ricucujpimi shujtaj llajta gentecunaman cunga. Paicunata punllanta ricunaihuan cashpapish ñahuirajmi amsayanguichij. Imata mana rurai tucunguichijchu. 33Cancunapaj allpapi p'ucushcacunatapish, ima shujtajcunata cancuna trabajashcacunatapish cancuna mana rijsishcacunami micungacuna. Ashtahuanpish cancunaca punllanta p'iñashca llaquichishcallami canguichij. 34Chai tucuita cancuna ricushpaca locomi tucunguichij. 35Mandaj Diosca cancunataca chaqui puntamanta umacamami sanpicunapipish changacunapipish millai caracha ungüihuan chugrichinga. Chaicunaca pi mana jambi tucuipajmi canga. 36Mandaj Diosca cancunapish cancunapaj ñaupa yayacunapish mana rijsishca llajtamanmi cancunatapish cancunata mandaj cachun cancunapaj jahuapi churashca mandajtapish apanga. Chai llajtapimi cancunaca caspimanta, rumimanta rurashca dioscunapaj ruranacunata ruranguichij. 37Mandaj Dios cancunata apashca llajtacunapica cancunaca mancharishpa yuyanami tucunguichij, yuyachij shimicunahuan parlana, chanzata rurashpa asinami tucunguichij. 38Achca muyucunata llujshichishpa allpapi tarpushpapish, langostacuna micushcamanta ashallatami japinguichij. 39Uvatapish tarpunguichijmi, allichinatapish allichinguichijmi ashtahuanpish c'urucuna micushcamanta mana pallanguichijchu, vinotapish mana ubyanguichijchu. Chaitaca c'urucunallami micunga. 40Tucui cancunapaj allpacunapimi olivos yuracunata charinguichij. Ashtahuanpish olivos grano tucui urmajpimi cancuna llihuiringapajca ima aceiteta mana charinguichij. 41Churicunata, ushushicunata charinguichijmi. Tucuicunata prezu apajpi paicunaca mana cancunapaj cangachu. 42Tucui yuracunatapish, cancunapaj allpacunapi p'ucushcacunatapish langostacunallami tucui micungacuna. 43Shujtaj llajtamanta caj cancunapaj llajtapi causajcunarajmi ashtahuan ashtahuan charijyashpa catingacuna. Cancunaca ashtahuan ashtahuan urmarishpami catinguichij. 44Paicunaca cancunaman mañachijcunami cangacuna. Ashtahuanpish cancunaca paicunamanca imata mana mañachi tucunguichijchu. Paicunami cancunapaj uma canga cancunaca chupallami canguichij.

45Caipi nishca tucui llaquicuna jahuanpi jahuanpi cancunapaj jahuaman shamushpami tucui tucuringacama chingachinga. Mandaj Dios cancunapaj Taita Dios mandashcacunata, chaitataj pajtachichun nishpa pai mandashcacunata mana uyashcamantami chashna chingachinga. 46Chai llaquicunaca cancunapish, cancunapaj huahua huahuacunapish shujtajcuna ricushpa yuyaricunalla ricunacunami canga. 47Cancunaca imata yallijta charij cai punllacuna Mandaj Dios cancunapaj Taita Diospajllata tucui shunguhuan cushicushpa mana rurashcamantami chashna tucunguichij. 48Ashtahuanpish cancunata p'iñajcunata, Mandaj Dios cancunapajman cachajpimi cancunaca yaricaihuan, yacunaihuan, churana illajlla, tucui imapish illajlla paicunapajta ruranguichij. Mandaj Diosca, cancunapaj cungapi shuj fierro yugota churashpami chingachingacama cancunataca llaquichinga. 49Mandaj Diosca cancunata llaquichichunca, cai pacha tucuri caru llajtamanta cancuna mana entendipaj rimaita rimaj shujtaj gentecunatami apamunga. Paicunaca águila shinami utca callpangacuna. 50Chai runacunaca yuyajcunatapish, huahuacunatapish mana llaquishpami causaita quichunga. Manchanana ñahui runacunami canga. 51Chaicunaca cancunapaj animalcuna mirashcatapish, cancunapaj allpapi p'ucushcacunatapish cancuna tucui chingaringacamami micungacuna. Cancunapajca trigotapish, llullu vinotapish, aceitetapish, cancunapaj huagracunapaj, ovejacunapaj huahuacunatapish imata mana saquishpami tucui chingachingacuna.

52Paicunami cancunapaj tucui pueblocunataca muyunchinga. Cancuna shunguta churana jatun pircacunatapishmi urmachingacuna. Mandaj Dios cancunapaj Taita Dios cancunaman cushca tucui pueblocunatami tucui llajtacunapi muyunchingacuna. 53Cancunata p'iñajcuna cancunapaj pueblocunata muyunchishpa shayacujpi llaquipi cashpaca, Mandaj Dios cancunapaj Taita Dios cushca cancunapaj aichamanta llujshishca churicuna ushushicunatami micunguichij. 54Cancunapurapi caj mana p'iñarij c'uyaj runapish paipaj quiquin huauquita, yallitaj c'uyashca huarmita, caishuj huahuacunatapish p'iña ñahuihuanmi ricunga. 55Paicunapaj huahua aichata micucushcata mana carangapajmi chashna ricunga. Paicunata p'iñajcuna tucui pueblocunata muyunchishca cajpi micuna mana tiyajpimi chashna canga. 56Cancunapurapica mana p'iñarij alli nishca nunca mana allpapi lluchu chaquilla saruj huarmipish yallitaj c'uyaj cusatapish, paipaj churitapish, paipaj ushushitapish p'iña ñahuihuanmi ricunga. 57Cancunata p'iñajcuna cancunapaj tucui pueblocunata muyunchishca cai punllacunapi micungapaj ima mana tiyashcamantami chai huarmica paipaj huachashca huahuatapish, paipaj madretapish micungapaj pacashpa churanga.

58Cancunata Mandaj Diospaj sumaj manchana shutita manchashcamanta cai libropi quillcashca cai mandashca shimicunata pajtachina yuyailla tucushpa mana pajtachijpica, 59Mandaj Diosca cancunapajpish jatun llaquicunata, cancunapaj huahua huahuacunapajpish jatun llaquicunata yallitaj mana tucurij jatun llaquicunata, mana jambi tucuipaj ungüicunatami cachanga. 60Egiptopi llaquichij llaquillatatajmi cancunapaj jahuamanpish apamunga. Yallitaj llaquichishpami samaita aisachunllapish mana saquinga. 61Cai mandashca libropi mana quillcashca tiyacuj jatunta llaquichij ungüicunatapishmi Mandaj Diosca tucui cancunata chingachingacama cancunapaj jahuaman cachanga. 62Mandaj Dios cancunapaj Taita Dios rimashcacunata mana cazushcamantami cancunaca, jahua pachapi tiyaj luzerocuna shina yallitaj achcacuna cana cashca cashpapish ashacunalla saquiringuichij. 63Mandaj Diosca allicunata rurashpa, cancunata achcata mirachishpa cushicuj cashca shinallatajmi, cancunata jatunta llaquichishpa tucuchishpapish cushicunga. Cancuna japigricun llajtamantaca sapimanta aisashpa shitaj shinami anchuchinga. 64Mandaj Diosllatajmi cancunataca tucui cai pacha tucuri llajtacunacama caita chaita cachanga. Chai llajtacunapimi cancunapish, cancunapaj ñaupa yayacunapish mana rijsishca, caspi diospaj, rumi diospaj ruranacunata rurashpa causanguichij. 65Chai llajtacunapi causacushpaca mana samari tucunguichijchu, cancunapaj chaquillatapish mana samachi tucunguichijchu. Chaipica Mandaj Diosca cancunamanca manchacuj shungu canata, llaquijlla ñahui canata, llaquijlla alma canatami cunga. 66Cancunapaj causaica, p'itirinalla puchcahuan imata huarcushca shina cayapish, cunanpish huañuna manchaillami canguichij. 67Chai tucui llaquicunata ricucushpa shungu llaquilla cashpaca tutamantapish utca chishiyanman yuyanguichijmi, chishipish utca pacarinman yuyanguichijmi 68Mandaj Diosca: Cai ñantaca, manataj cutinca tigranguichijchu nishca ñantami Egiptomanca barcocunapi tigrachinga. Chaipica huatashca shina causachunmi cancunataca cancunata p'iñajcunaman c'atungacuna. Cancunataca pi mana randingacunachu.

Currently Selected:

DEUTERONOMIO 28: QCHI04

Highlight

Copy