2 PEDRO 1
1
Allillachu canguichij nishcami
1Jesucristopaj apóstol, paipajta ruraj Simón Pedromi cani. Cashcata ruraj ñucanchij Dios, Quishpichij Jesucristomantami cancunapish ñucanchij shinallataj alli sumaj crinata japircanguichij. 2Taita Diostapish, ñucanchijta Mandaj Jesustapish rijsishcamantaca, mana c'uyaipajta c'uyaj canata, sumaj causaitapish ashtahuan mirachishca cachun ninimi.
Dios ima shina caj shinallataj canami
3Diosca jatun mancharinacunata ruraj cashpami, ñucanchijta agllashpa alli sumaj Jesucristota rijsichishpaca, pai tucuita rurai tucuj cashcahuan ñucanchij causaipaj tucui ima illashcata pai yuyailla alli causanatapish cushca. 4Chashnami tucuita yalli valij, jatun cushami nishcacunataca ñucanchijman cushca. Chaicunahuanca cai pachapi ismuchicuj millai munaicunamanta anchushpa, Dios ima shina caj shinallataj cachunmi chashna rurashca. 5Chashna cajpica, crijtaj cashcata ricuchina yuyailla alli causaichij. Chashna causashpa alli yachajcuna caichij. 6Alli yachajcuna cashpaca, quiquinllataj jarcarij caichij. Quiquinllataj jarcarij cashpaca, mana p'iñarij caichij. Mana p'iñarij cashpaca, Diosta alli yuyarij caichij. 7Diosta alli yuyarij cashpaca, quiquin huauquindij shina c'uyanacuj caichij. Quiquin huauquindij shina c'uyanacuj cashpaca, tucuicunata c'uyaj caichij.
8Cancunapi chai yuyaicuna yallitaj tiyashpaca q'uillacuna cachun, ñucanchijta Mandaj Jesucristomanta yachashcatapish grano mana p'ucushca shina chushaj cachunca mana saquingachu. 9Ashtahuanpish chaicunata maijan mana charijca, caruta mana ricui tucuj shina, mana cashpaca ñahui mana ricuj shinami. Paipaj ñaupa juchacunata maillashca cashcata cungarishcamantami chashna tucushca. 10Chaimanta huauquicuna, cancunata cayashpa agllashcapica ashtahuan sinchiyarina yuyailla caichij. Chaicunata rurashpaca manataj urmanguichijchu. 11Chashna cajpimi, cancunataca pi mana jarcaipaj cajpi, ñucanchijta Quishpichij Jesucristo huiñaita mandacunmanca yaicuchingalla.
12Chaimantami cancunataca caicunata ña yachashca cajpipish, mana llullata cunan yachashpa sinchiyashca cajpipish, caicunata yuyachinataca ñucaca manataj saquishachu. 13Caicunataca ñuca causaicama cancunata yuyachinataj cajpimi, rijchachishpa cunacushalla nini. 14Ñucanchijta Mandaj Jesucristo huillashca shinallataj, cai cuerpota ñalla shitashpa rina cashcata yachashcamantami chashnaca nini. 15Ñuca huañushca q'uipa caicunata cancuna tucuipi yuyarichunmi, caicunataca huillana yuyailla huillacuni.
Cristotaca quiquin ñahuihuantaj ricushcatami huillani nishcami
16Ñucanchijta Mandaj Jesucristo shamuna cashcatapish, paica tucuita rurai tucuj cashcatapish cancunata yachachishpaca, quiquin yuyaimanta surcushca yanga parlocunataca mana yachachircanchijchu. Ashtahuanpish paitaca jatun mandajtaj cashcata, ñucanchij quiquin ñahuihuan ricushcatami huillarcanchij. 17Alli nishca canata, jatunyachishca canata, Dios Yayamanta pai chasquicuipica jahua pacha sumaj achij nicujmantaca cashna nishcami uyarirca: “Caica ñuca c'uyashca Churimi, paipimi cushicuita charini” nircami. 18Ñucanchijca Diospajlla urcupi Jesushuan cashpami, jahua pachamanta chashna rimashcataca uyarcanchij.
19Chaicunataca profetacunaman Quillcachishcacunami chashnataj cashcata huillan. Chaicunataca amsata nina sindi achijyachijta alli ricuraj shina ricurashpaca, allitami ruranguichij. Pacari luzero punllayachij shina cancunapaj shunguta achijyachingacamami chashna rurana canguichij. 20Chashna cajpipish tucuimanta yallica, caitami yachaj cana canguichij. Profetacuna Quillcashcaca, maijan Quillca mana paicunapaj yuyaillamanta Quillcashcachu. 21Profetacunaca paicunapaj yuyaillamantaca manataj huillashcacunachu. Ashtahuanpish Diospajlla caj runacunami, Diospaj jucha illaj Espíritu huillachijpi huillashcacuna.
Currently Selected:
2 PEDRO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
