2 REYES 21
21
Judá llajtata Manasés mandashcami
(2 Cr 33.1-20)
1Manasesca, Judá llajtata mandai callarinapajca chunga ishqui huatayujmi carca. Paica pichca chunga pichca huatatami, Jerusalenpi mandarca. Paipaj mamaca, Hepsiba shutimi carca. 2Manasesca Mandaj Diospaj ñaupajpica, yallitaj millaitami rurarca. Mandaj Dios israelcunapaj ñaupajmanta llujshichishpa cachashca runacuna rurashca millanana ruranacunatami rurarca. 3Lomacunapi tiyaj altarcunata paipaj yaya Ezequías urmachishcatami cutin shayachirca. Israel llajtata jatun mandaj Acab rurashca shinallatajmi, Baalpaj altarcunata rurachirca. Asera huarmi diosman rijchajtapishmi rurachirca. Jahua pachapi tucui imalla tiyajcunatapish adorarcami. Chaicunatami llaquihuai nishpa adorashpa mañarca. 4Mandaj Diosca: “Jerusalenpi caj ñuca huasipimi ñuca shutitaca churani” nircami. Chai huasipipish altarcunata rurachircami. 5Mandaj Diospaj huasi canllapipish, ishquindij ladopimi jahua pachapi tucui imalla tiyajcunapaj altarcunata rurachirca.
6Manasesca paipaj churitapish rurashcalla diosman cushpami rupachirca. Imalla punllacunapi imalla tucunata yachaj canata, brujo canata, muspachij yumbu canata, adivinaj canata yachanatapishmi churarca. Chashna pai rurashcacunahuan yallitaj millaita mirachishpami Mandaj Diostaca p'iñachirca. 7Mandaj Diosca Davidmanpish paipaj churi Salomonmanpish: Tucui israelcunapaj aillupuramanta agllashpa Jerusalenpi churashca ñuca huasipimi ñuca shutitaca huiñaipaj churani nircami. Chai huasipimi Manasesca, pai rurashca Asera huarmi diosman rijchajta churarca. 8Diosca israelcunataca cancunapaj ñaupa yayacunaman cushca llajtamanta llujshishpa caita chaita llaquinayajta purichunca mana saquishachu. Ashtahuanca ñucapajta ruraj Moisesman ñuca cushca mandashcacunata cancunata mandashcataca tucuita chaitataj pajtachinguichijlla.
9Chashna nishcataca israelcunaca mana uyarcacunachu. Ashtahuanpish Manasescarin Mandaj Dios israelcunapaj ñaupajmanta chingachishca llajtacuna rurashcatapish yalli millaitami rurachishpa catirca. 10Chaimi Mandaj Diosca, paipajta ruraj profetacunaman huillachishpaca: 11“Judá llajtata jatun mandaj Manasesca, ñaupa cai llajtapi causaj amorreocuna rurashcata yalli millanayajcunata rurashpami, paipaj rurashcalla dioscunahuan judacunata juchallichirca. 12Chaimi Mandaj israelcunapaj Diosca: Jerusalencunapaj, judacunapajpish ñucami jatun llaquicunata apamuni. Cai llaquicunata uyajcunaca, ishquindij lado rinrincunatami nanachingacuna. 13Samariata ricushca coldel-llahuantajmi Jerusalentapish ricusha. Acabpaj familiacunata ricushca plomadallahuantajmi Jerusalentapish ricusha. Jerusalentaca platota maillanahuan sobashpa maillashpa urisingaman churaj shinami p'ichasha. 14Ñuca agllashcacunataca puchurijpipish paicunata p'iñajcunapaj maquipi churashpami, paicuna mirga mirgata rurashpa shitachun saquisha. 15Egipto llajtamanta paicunapaj ñaupa yayacunata llujshichimushca punllamantapacha cunanca mana cazushpa ñuca ñaupajpi millaita rurashpa ñucata yallitaj p'iñachishcamantami llaquichigrini”.
16Chai jahuami Manasesca ima mana allita manapish ruraj runacunata huañuchishpa, Jerusalenpica yallitaj yahuarta jundachirca. Chai jahuapishmi judacunataca Mandaj Diospaj ñaupajpi millai ricurichun pai juchallishca shinallataj juchallichirca. 17Manasés ashtahuan imalla rurashcata, tucui pai imalla rurashcata, imalla juchacunata rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna. 18Manasés paipaj ñaupa yayacunahuan dormijpica, mandana huasi c'uchupi caj Uza runapaj huertapimi pambarcacuna. Paipaj randica paipaj churi Amonmi mandarca.
Judá llajtata Amón mandashcami
(2 Cr 33.21-25)
19Amonca Judá llajtata mandai callarinapajca ishqui chunga huatayujmi carca. Ishqui huatatami, Jerusalenpi mandarca. Paipaj mamaca, Jotba pueblomanta caj Haruz runapaj ushushi Mesulemetmi carca. 20Amonca paipaj yaya Manasés rurashca shinallataj millaitami Mandaj Diospaj ñaupajpica rurarca. 21Paipaj yaya purishca tucui ñancunallapitajmi purirca. Paipaj yaya servishca manapish dioscunapajta rurashpami chaicunata adorarca. 22Paipaj ñaupa yayacunapaj Mandaj Diosta saquishpami, Mandaj Diospaj ñanpica mana purirca.
23Jatun mandaj Amontaca paipajta rurajcunallataj huashalla shujtajcunahuan yuyarinacushpami, paipaj huasipi huañuchircacuna. 24Huashalla yuyarinacushpa jatun mandaj Amonta huañuchijcunatapish, Judá llajtapi causajcunaca tucuicunata huañuchishpami, Amonpaj randica paipaj churi Josiasta mandachun churarcacuna.
25Amón ashtahuan imalla rurashcata, ashtahuan yachasha nishpaca Judá llajta jatun mandajcuna imallata rurashcata quillcashca libropimi ricuna. 26Amontaca, Uza runapaj huertapi caj jutcupimi churarcacuna. Paipaj randica paipaj churi Josiasmi mandarca.
Currently Selected:
2 REYES 21: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
