Maak 1
1
Yọọn Aduọkmmọọñ atʌm usʌñ
1Ntọọñọ eti etob a-abañake Yisọs a-dooho Mesaya, Ayịn Abasi, 2nte ewette ke ñwed brọfed Aisaya:
“Ami ñyaanọ isʌñutom mmi ubem fiin iso,
a-adikidiọñ usʌñ unọ fiin,”
3“uyo awo andikood ke akpautatan abo,
‘Idiọñ usʌñ inọ Abọọñ,
tʌm usʌñ inọ anye.’ ”
4Ke ntom ke Yọọn Aduọkmmọọñ akedi ke akpautatan, akwọrọ uduọkmmọọñ, adikappa esịd, nọ adifeen aba ke mme idiọọkñkpọ. 5Afịd-afịd abio esịd idʌñ Yudia ye afịd mbioawo ke Yerusedem emaewuọọñọ eka ebịne anye. Ke ammọ emaekeyaara mme idiọọkñkpọ ammọ, anye amaaduọk ammọ mmọọñ ke Akpa Yọdan. 6Yọọn akesịne afọñ e-edatta ided enañ mbiomo enam, ye ñkpaha ikpa ke isịn amọ, anye akenyʌñ ata ñkukuñkpọyọriyọ, ye adan akwọọk ikọd. 7Etob a-anye akenọọhọ ado ami: anye a-adiidi ke ini iso anie adudu akan mien, ukod ikpaukod amọ ami ndoto adiitad. 8Ami ndat mmọọñ inim ndufo uduọkmmọọñ ado anye aduuduọk mmọọñ ke Adisana Sịbidịd.
Uduọkmmọọñ ye adidomo Yisọs
9Ke ini ado, Yisọs amaato Nasared ke Kadidi adi ndin Yọọn amaanyʌñ aduọk anye mmọọñ ke Yọdan. 10Ke ini Yisọs asañake awuọ ke mmọọñ, anye amaakịt nte anyọñ abakka iba ye naña Adisana Sịbidịd asọiyọ nte ibiom adoro anye ke iwuod. 11Nkọ uyo ama ato anyọñ ate: “Afo ado ata adima Ayịn mmi, a-ami mmaaha; mmenem esịd ye afo ayọhọ-ayọhọ.”
12Idaha-idaha ado, Sịbidịd amaaben anye aka ke akpautatan; 13Anye akeba ke akpautatan usen aba, ndin Setan akaiso anyʌñ adomo anye idomo. Mme unam ikọd emaenyʌñ eba do, mme enyere Abasi enyʌñ ese ñkpọ ebaña anye.
Yisọs abʌk mbʌk eti etob
14Ke emaekesịn Yọọn ke ufọk ñkpakọb, Yisọs amaaka Kadidi, akekwọrọ eti etob Abasi ke udo. 15Ukwọrọ ikọ amọ akedo, “Ini adi. Abio ubọọñ Abasi akpere. Ikappa esịd inyʌñ inịm eti etob ke akpanikọ!”
Yisọs akood mme akpa mbed
16Naña Yisọs akeasañake ke mben Akpa Inyañ Kadidi, anye amaakịt Saimọn ye ayịneka amọ Andru nte eyaak iyịre esịn ke ibiok, sia ammọ ekedooho mme akọiyak. 17Yisọs amaabo ammọ ate, “Idi, iñkeene miin, ndin ami nyainam ndufo edo mme akọawo.” 18Ini keed, ammọ emaekpọñ iyịre ammọ, enyʌñ ekeene anye.
19Anye ikisañake inyọọñ usʌñ ke anye akekịtte Yemsi, ayịn Sebidi, ye ayịneka amọ Yọọn ke ubom nte esʌk ediọñ iyịre ammọ. 20Yisọs ikibiatta ini adikood ammọ, ammọ ñko ikibiatta ini adikpọñ ete ammọ, Sebidi ke ubom, ye mbon utom ammọ ñnyʌñ ñkeene Yisọs.
Yisọs abịn ndedeghe sịbidịd
21Ammọ emaeka Kapanọm, ndin ke usen Sabad amaakedi, Yisọs amaadʌk aka sinakọk anyʌñ atọọñọ adikpeeb ñkpọ. 22Ukpeebñkpọ amọ amaakpa mme awo idem sia anye akekpeeb ammọ nte ataifiọk ñwed, idooho nte mme andikpeeb ibed. 23Kpa ke idahado awodeen keed ke sinakọk amọ a-akenieeghe ndedeghe sịbidịd amaabọñ ate, 24“Nso-o ke ayem ye ñnyịn, Yisọs Ayịn Nasared? Afo adisobo ñnyịn? Mmediọọñọ se afo ado: Adisana Ayịn Abasi!”
25Yisọs amaaduat anye ke akpọsọñ uyo ate: “Dop uyo. Wuọ anye ke idem!” 26Ndedeghe sịbidịd ami amaatuak awo ami afai-afai, abọọñ akpọsọñ ñkpo anyʌñ awuọ akpọñ anye.
27Idem amaakpa mme awo tutu ammọ edubiime, “Nso-o ido ami? Ufa ukpeeb a-ayọhọke ye adudu! Tutu asinọ mme ndedeghe sịbidịd uyo, ammọ enyʌñ ekop!” 28Etob amọ amaasuana usọp-usọp akanna afịd nkanñkʌk Kadidi.
Yisọs akọk uwak awo udọñọ
29Ke ammọ adikisʌk nkpọñ sinakọk, ammọ emaesaña ye Yemsi ye Yọọn eka ufọk Saimọn ye Andru. 30Eka anwaan Saimọn akenaana ke ñkpana sia anye akenie ufiobidem, ndin ammọ emaekedọkkọ Yisọs ebaña anye. 31Ndin Yisọs amaaka akemʌm anye ubọk anyʌñ añwam anye adakka ada. Ufiobidem ado amaakpọñ anye, anye anyʌñ atọọñọ adise ñkpọ mbaña ammọ.
32Ndubi ado, ke utịn amaakesop, mme awo emaekoono mbon udọñọ ye mme anieeñe ndiọi sịbidịd esọk anye. 33Afịd awo ke abio edibono ke mben udọk, 34ndin Yisọs amaakọk mme nsio-nsio awo udọñọ. Anye amaanyʌñ abịn mme uwak dimọn asiooño mme awo ke idem, ado anye ikiyakka ndiọi sịbidịd ami etañ ikọ, sia ammọ emaediọọñọ se anye akedo.
Yisọs abọñ akam ke ndịbe-ndịbe itie
35Ke ata ubak-ubak usen, ke utịn miisakkake dion, Yisọs amaadakka ada, akpọñ ufọk aka ndobo-ndobo itie, a-anye akebọñ akam. 36Saimọn ye mme nsaña amọ emaekaa ekeyem anye, 37ndin ke emaekekịt anye, ammọ esio ñkpo ke ñkpaidem ete: “Afịd awo esʌk uyem fiin!”
38Yisọs abọọrọ ammọ ate: “Yak ika mme abio mfen mme idʌñ se ikpere mi, ma nyʌñ ñkekwọrọ ikọ ke udo. Ntak añkediighe ado ado.” 39Ndin anye amaasaña ke afịd Kadidi, akwọrọ ikọ ke sinakọk anyʌñ abịn ndiọi sịbidịd asiooño mme awo ke idem.
Yisọs akọk awo akpamfia
40Awo akpamfia keed amaadikịt Yisọs amaatọọñọ edọñ anyʌñ akpeiye anye ate, “Akpenyịmme, amekeme inam nọ ami nsana.”
41Mbọm amọ amaanam Yisọs. Anye amaasio ubọk amọ atuuk awo akpamfia ami ate, “Ami mmenyịmme, sana!” 42Ke ndo-ndo ado, akpamfia amaakpọñ anye, idem amọ amaanyʌñ asọñ.
43Yisọs amaasio awo akpamfia ado unyọñ ini keed anyʌñ adʌt anye utọñ ate: 44“Kịt bo ke utañña ñkpọ ami unọ awo ndomokeed. Ado kaa ke wọt aku idem mfo nyʌñ nam mme uwa naña Moses akenịm ke akpamfia amaasana, nte ñkpọ ntiese nọ ammọ.” 45Ado awo ami amaaketaañ añwa-añwa se Yisọs akenam anọ anye. Ke ntak ami, Yisọs ikikanna idʌk mme abio aba añwa-añwa, ado akappa akeba ke mme ndịbe-ndịbe itie. Kpa ye ado, mme awo ke afịd itie ekesʌk edidi ebịne anye.
Currently Selected:
Maak 1: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
