Matiu 23
23
Ndʌdutọñ ke abaña ndubịk
1Ndin ke Yisọs aditañ ikọ nnọ mme atu awo ye mme mbed amọ anye amaabo, 2“Mme Skraib ye mme Farisi edat itie ake Moses. 3Ke ntodo ana ndufo enam enyʌñ etʌm ese se ammọ idọkkọ ndufo, ado ikiiyak se ammọ enam ado uwọdñkpọ inọ ndufo, sia ammọ inamma se ammọ ekwọrọ. 4Ammọ ebọp ndodoppo mbiomo edot mbon awo ke afara, ado ammọ idịppeke nnuun ammọ keed adinam mme ñkpọ ado.
5 “Afịd ñkpọ se ammọ enam ado nọ ato do mme awo ekịt; nte adiwañ ikpọ fidakteri ye nnyọọn afọñ akam; 6nte adiyem ikpọ itie ukpono ke mme itie ndia ye mme ñkpọitie iso ke mme itie ubọñ akam; 7nte mme awo adikọọm ammọ ke edu ukpono ke añwa udua ye mme awo adikood ammọ, ‘Andikpeeb.’
8 “Ndufo ikiiyak awo ikood ndufo ‘Andikpeeb,’ sia ndufo enie Andikpeeb keed kpọd, afịd ndufo enyʌñ edo nditọeka. 9Ndufo inaaha ekood awo nte keed ke isọñ ‘Ete,’ sia ndufo enie Ete keed ikpọọñ, a-abaaha ke anyọñ. 10Ikiinyʌñ iyak awo ikood ndufo mme ‘andikpeeb’ sia ndufo enie Andikpeeb keed kpọd, a-adooho Mesaya. 11Andikpon ñkan ke atu ndufo ana ado ayịnufọk ndufo. 12Awo ake adodo a-adịppeke idem amọ ke anyọñ eyaesuuhọ anye, ñko awo a-asuuhọke idem amọ eyaedịppe anye.
Isuuñọ itiaba asịmme mme akpeeb ibed ye mme Farisi
13 “Adọdiọọk inọ ndufo mme akpeeb ibed ye mme Farisi, ndufo mbon ndubịk. Ndufo emekʌk abio ubọọñ Abasi ebaha mme awo, ndufo idʌkkọ dʌk, inyʌññọ iyak mbon mfen e-eyemme adidʌk eboiyo edʌk. 14Adọdiọọk inọ ndufo mme akpeeb ibed ye mme Farisi, ndufo mbon ndubịk! Ndufo ema adifiik mme ebekpa mbọ ufọk, enyʌñ ewọt idem ke adibọñ ñnyan akam. Ke ntodo, ndufo eyaebọ ekamba ufen.
15 “Adọdiọọk inọ ndufo mme akpeeb ibed ye mme Farisi, ndufo mbon ndubịk. Ndufo esaaña ke mmọọñ ye abod eyem awo akappa esịd, ado awo amaakappa esịd ndufo enam anye adọdiọọk ñkemba adot se adʌk ikañ nsi-nsi nte ndufo ke idem ndufo.
16 “Adọdiọọk inọ ndufo mme nnan adat awo usʌñ. Ndufo esibo, ‘Awo akpenwọñọ tembịd ke ado inieeghe adudu, ado akpenwọñọ ke kood ake tembịd, ami amʌm anye.’ 17Ndufo mme ndisịme ye mme nnan! Ake-e akpon ekọmudua akan: kood me tembịd a-anamma kood ado adisana? 18Ndufo emaana ebo, ‘Adieke awo añwọñọke itie uwa, ado idooho ñkpọ nte keed, ado akpeñwọñọ enọ a-adoroke ke itie uwa, unwọñọ amʌm anye.’ 19Ndufo mme nnan, ake-e ikpon ikan, enọ me itie uwa a-anamma anye ado adisana? 20Do ndin awo a-añwọñọke ke anyịñ itie uwa, añwọñọ anye ye afịd ñkpọ se idoro ke anye. 21Ñko, awo a-añwọñọke anyịñ tembịd añwọñọ anye ye anye a-adʌññọ do. 22Ñko awo a-añwọñọke anyọñ, añwọñọ ebekpo Abasi ye anye a-atieeghe do.
23 “Adọdiọọk inọ ndufo mme akpeeb ibed ye mme Farisi, ndufo mbon ndubịk. Ndufo esikpe utịb tembịd ekewuọ ata akpatre mfañ ke inwañ, ado etre akpan ñkpọ ibed abañake unen, mbọm ye mbuọdidem. Ih, akpena ekpe utịb tembịd, ado ikpinaaha etre inam mme ñkpọ se ikap ikpokpon ikan ami. 24Ndufo mme nnan adadusʌñ. Ndufo esʌkkọ nsʌñ esio ke ukọd, ado emen enañ mbiomo.
25 “Adọdiọọk inọ ndufo mme akpeeb ibed ye mme Farisi, ndufo mbon ndubịk. Ndufo eyet edem kọọb ye usan ado eyaak esịd ayọhọ ye idiọọk itọñ ye adinọ idem inemesịd. 26Nnan Farisi, to yet esịd kọọb ye usan, ndin afịd kọọb ayaasana.
27 “Adọdiọọk inọ ndufo mme akpeeb ibed ye mme Farisi, ndufo mbon ndubịk, ndufo eba nte mfọọn itiad udi ke adoro, ado esịd ayọhọ ye akpọ mme akpaññañkpa ye afịd mme ndedeghe ñkpọ. 28Ke ukem usʌñ ami ke ido ndufo ke añwa ebiod mme ndinen awo, ado esịd ndufo eyọhọ ye ndubịk ye ndiọi uwem.
29 “Adọdiọọk inọ ndufo mme akpeeb ibed ye mme Farisi, ndufo mbon ndubịk, ndufo ebọp mme itiad udi enọ mme brọfed enyʌñ ebana mme itiad udi ndinen awo. 30Ndin ebo, ‘Ñnyịn ikpikikeeneke iduọk iyiib mme brọfed akpedo ñnyịn imaikibañña ke ayo mme eteete ñnyịn.’ 31Ke ndufo aditañ ntom, ndufo emebiom idem ndufo ikpe nte edoñño nditọ mbon e-ekewotto mme brọfed. 32Do ndin, inam ndiọi ubọkutom mme ete ndufo eketọọñọke ima!
33 “Ndufo mme udʌkikọd! Ndufo mme nditọ udʌkikọd! Ndufo adinam die ibọkkọ ubiomikpe ake nsi-nsi ikañ? 34Sese, ntak ado ami, Ami ndọññọ mme brọfed, ntaifiọk ye mme andikpeeb inọ, ubaak ndufo eyaewood enyʌñ ekọọñ ke krọs; ndusʌk eyaemia ke itie ubọñ akam ndufo enyʌñ ebine ke abio ke abio. 35Do ndin afịd iyiib mme ndinen awo se ebiad ke ederimbod eyaidoro ndufo ke iwuod, tọọñọ ke iyiib Ebeed, a-akedooho eti awo tutu asim iyiib Sekaraya, ayịn Berekaya, a-ndufo ekewotto ke ufọọd tembịd ye itie uwa. 36Ami ntañ akpanikọ inọ ndufo, afịd ñkpọ ami ayaatịppe ke emana ami.
37 “O Yerusedem, O Yerusedem, ndufo e-ewoodo mme brọfed enyʌñ etọọñ mbon enọọhọ isọk ndufo ke itiad, akañ ifañ ke ñkeyem adikood nditọ ndufo mbək nte unen abəkko nditọ ke idak mba amọ ado ndufo imaaha. 38Sese, ekappa ufọk ndufo inọ ñwuuro-ñwuuro. 39Sia ami ntañ inọ ndufo, ndufo idiiñkịtte aba tutu ndufo ebo, ‘Emaediọñ anye a-adieeghe ke anyịñ Abọọñ.’ ”
Currently Selected:
Matiu 23: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
