Matiu 22
22
Ñke usọrọ ndọ
1Yisọs amaamaana atañ ikọ anọ ammọ ke ñke ate, 2“Abio ubọọñ Abasi atie nte adidem a-akenamma usọrọ ndọ anọ ayịn amọ. 3Anye amaadọñ nditọufọk amọ ekebo mbio e-emakekood usọrọ ete ammọ edi, ado ammọ esịn adidi.
4 “Ndin anye amaana adọñ nditọufọk e-ekewakka ekan akpa ini ate, ‘Idọkkọ mbio e-ekekoodo usọrọ ami ete ke mmenam ndidia mma. Ewot enañ ye ñkpọ ebod mmi ndin afịd ñkpọ abono ke nde. Idi usọrọ ndọ.’
5 “Ado ammọ ikikpañña utọñ, utu ke ndo etịmme ekaiya ñkpọ mfen: keed aka inwañ amọ, mfen aka ndubeghe idem amọ. 6Mbio ñko emuum nditọufọk amọ etʌkkọ enyʌñ ewot ammọ. 7Esịd amaakpakka adidem eti-eti. Anye amaanọ ekọñ amọ ekewood mme awodawo ado enyʌñ efọp abio ammọ.
8 “Ndin anye abo nditọufọk amọ, ‘Ebeeñe idem usọrọ ndọ ema, ado mbio a-ami ñkekoodo ikidotto adidi. 9Ikaa ke mme inuuk efaak ikikood mme awo ake adodo a-ndufo ekịtte usọrọ ami.’ 10Ndin mme nditọufọk amọ emaewuọọñọ ekaiya mme efaak ekekoono mme awo ake adodo ammọ ekekanna ekịt, nti ye ndiọi, ndin itie ndọ anyʌñ ayọhọ ye isenawo.
11 “Ado ke ini adidem adʌkkọ adi adikịt mme isenawo, anye amaakịt awo keed a-mmiikisịneke afọñ ndọ. 12Ndin anye abịp anye ate, ‘Ufan, akesaña die adʌk mmi ke ini mmuusịneke afọñ ndọ?’ Awo ami ikikanna isio uyo.
13 “Ndin adidem abo mme akpeme itie usọrọ ate, ‘Bọp anye ubọk ye ukod nyʌñ top anye duọọk ke añwa akịm nte ntuaaña ye nta eded ediiba.’
14 “Sia ekood uwak ado ibad-ibad ke emek.”
Ukpe taksi nnọ Sisa
15Akem mme Farisi ewuọọñọ ekedioomo naña ammọ ediisaña imʌm anye ke ikọ amọ. 16Ammọ emaenọ mbed ammọ ye mme mbon ñka Herọd ekebo anye ntom ete, “Andikpeeb, ñnyịn imidiọọñọ ibo ke afo ado adinen awo, ñko afo akpeeb usʌñ Abasi akeene akpanikọ. Afo ubaaka awo anyen, sia afo useeghe se awo ado. 17Tañ inọ ñnyịn ndin, nso-o ido akikere mfo? Nte anen adikpe taksi nnọ Sisa me inenne?”
18Ado Yisọs, ke amaakediọọñọ ndubịk esịd ammọ abo, “Ndufo mme ndubịk, ntak a-ndufo eyemme intap miin-e? 19Iñwọt akʌk a-ndufo edatta ekpe taksi.” Ammọ edat denarius esọk anye, 20ndin anye abịp ammọ, “Ndise anie awo ido ami? Anyịñ anie awo ke ewet?”
21Ammọ ebọọrọ, “Ake Sisa.”
Ndin anye abo ammọ, “Nọ Sisa se ido ake Sisa, nyʌñ nọ Abasi se ido ake Abasi.”
22Ammọ emaekekop ami, idem amaakpa ammọ. Do ndin ammọ edaaña ekpọñ anye.
Ndọ ke adised ke ñkpa
23Kpa ke usen ado mme Sadusi, e-mmiinịmme adised ke ñkpa ke akpanikọ, edibịne anye ye mbịme keed, ete, 24“Andikpeeb, Moses akibo ñnyịn ate awo akpekpa inieeghe ayịn, ayịneka amọ ana aben anwaan amọ adọ anyʌñ abon nditọ anọ anye. 25Ke aditʌm ntañ, nditọeka itiaba emaebañña. Akpa adọ anwaan anyʌñ akpa inieeghe ayịn. Ndin sia anye mmiikinieeghe ayịn, anye amaakpọñ anwaan anọ ayịneka. 26Ukem ñkpọ ami amaatịppe anọ ayọhọ ayịneka iba ye ita tutu akesịm ayọhọ itiaba. 27Ke akpatre, awonwaan ado amaakpa. 28Amaaba ntom, ke ini used ke ñkpa, awonwaan ami adido anwaan anie awo ke atu nditọeka itiaba ami, sia afịd ammọ emaekedọ anye?”
29Yisọs abọọrọ ate, “Ndufo emenam edue sia ikọ Abasi inwañake ndufo; ndufo inyʌññọ idiọọñọ adudu Abasi. 30Ke ini used ke ñkpa mme awo idiidọọhọ ndọ, awo idinyʌññọ inọ mme awo ke ndọ. Ammọ ediiba nte mme enyere ke abio ubọọñ Abasi. 31Ado ke abaña used ke ñkpa ndufo ikoodo se Abasi akibo ndufo, 32‘Ami ndo Abasi Ebraham, Abasi Aisik, Abasi Yekọb?’ Anye idooho Abasi mme akpañkpa, ado Abasi mme adu uwem.”
33Ke ini mme atu awo ekoppo ami, idem amaakpa ammọ ke ukpeebñkpọ amọ.
Akaakan ibed
34Ke ini mme Farisi emaekekop ke Yisọs amaakʌp mme Sadusi inua, ammọ ekọọk iwuod atọ keed. 35Awo keed ke atu ammọ, abia ibed, adomo anye ye mbịme ami, 36“Andikpeeb, anye ake-e ido akaakan ke atu mme Ibed?”
37Yisọs abọọrọ, “ ‘Ma Abọọñ Abasi mfo ke afịd esịd mfo, ke afịd ukpọñ mfo, ke afịd akikere mfo.’ 38Anye ami ado akpa ye akaakan ibed. 39Ayọhọ iba abit akpa ami: ‘Ma mbọhọidʌñ mfo nte idem mfo.’ 40Afịd Ibed ye mme Brọfed ekọñọ ke ibed iba ami.”
Mesaya ado Ayịn anie?
41Ke ini mme Farisi emaekebono keed, Yisọs abịp ammọ ate, 42“Nse ndufo ekere ebaña Krais? Anye ado ayịn anie awo?”
Ammọ ebọọrọ, “Ayịn Defid.”
43Ndin anye abo ammọ, “Asaña die ado Defid, ke atañña ikọ ke Sịbidịd akood anye ‘Abọọñ’? Sia anye abo ntom,
44 “ ‘Abọọñ abo Abọọñ mmi
“Tie ke ubọk udom mmi
tutu ami nsịn mme asua
mfo ke idak ukod mfo.” ’
45 Adieke Defid akoodo anye, ‘Abọọñ,’ anye akeme die ido ayịn amọ?” 46Awo ndomokeed ikikanna ibọọrọ. Ndin tọọñọ ke usen ado awo ndomokeed ikinieeghe uko adimaana mbịp anye mbịme mfen aba.
Currently Selected:
Matiu 22: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
