Duk 14
14
Yisọs ke ufọk awo Farisi
1Ke usen Sabad keed, naña Yisọs akekaaha asen ke ufọk ekamba awo mme Farisi, uwak awo emaeba do adise se anye anam. 2Awo ñyọọk keed amaaba ke itie ado ke iso amọ. 3Yisọs amaabịp mme Farisi ye mme ntaifiọk ibed e-ekebaaha do ate, “Anen adikọk awo udọñọ ke usen Sabad me inenne?” 4Afịd ammọ emaedobo, isiooho uyo. Ndin Yisọs amaamʌm awo ado, akọk anye, ñyọọk ado akweeñe anye, anyʌñ anọ anye anyọñ.
5Ndin Yisọs amaabịp ammọ ate, “Anie ke atu ndufo a-anieeghe ayịn, me enañ, me edọñ a-aduọọhọ adʌk ube ke usen Sabad, akpetre adisio anye ke ube ado?” 6Ammọ ikinyʌññọ inie ibọọrọ se enọ.
7Mi ke anye aketop ñke anọ mbon se ekedood ndidia ado, ke anye amaakekịt naña ammọ emeek ñkpoon itie ukpono ebono. Yisọs ate ammọ, 8“Awo akpukood fiin usọrọ ndọ, kuudọọk ukutie ke ekamba itie; sia awo akponno ukan fiin akpedi, 9andinie usọrọ ayaadukood fiin ate, ‘Kpọñ itie nọ awo ami.’ Ndin afo ayaakpọñ itie ado ke buud. 10Ado emaukood fiin usọrọ, ka ketie ke ñkpọitie edem tutu anie usọrọ adukood fiin abo, ‘Ufan dọọk di ekamba itie.’ Idahado, afo ayaanie ukpono ke iso mme awo se iba do. 11Sia awo akeedodo a-akokkoke idem, eyaesuuhọ anye itie; ado awo a-asuuhọke idem eyaebenne anye.”
12Anye ndin akanna iso ase andikikood anye ufọk, ate anye, “Adieke akoodo awo ndidia uweeme, me ake ndubi, kuukood mme ufan mfo, nditọuka, me uyakka, me mme mbọhọidʌñ mfo e-emọiyọke. Ukpunam ntom, ammọ eyaenyʌñ ukood fiin usieene. 13Ado afo anamma usọrọ, kood mbon uwueene, mme inyọọn ye mbʌñọ ye nnan. 14Ke adinam ntom, afo ayaabọ adidiọñ. Ñkọm adooho ammọ ikanna unọ fiin usieene, afo ayaabọ usieene ke adised ke ñkpa ake nti awo.”
Ñke akwa usọrọ
15Awo keed ke itie ndidia ami akekop mme ikọ ami, anye amaabo Yisọs ate, “Afọfọn anọ awo a-adiidia ndidia ke itie usọrọ ke abio ubọọñ Abasi.”
16Yisọs ate anye, “Abọọñ keed akenam ekamba usọrọ, akood uwak-uwak awo. 17Ini usọrọ akekem, anye asio ayịnufọk ate asaña adọkkọ mbon se anye akekood abo, ‘Idi, ke enam afịd ndutʌm ema.’
18 “Afịd ammọ keed-e-keed etọọñọ adinọ mfaaña. Akpa awo ate, ‘Ñkedep ufa ikọd, ndin ñyem adikise naña aba. Mbọk kuuyat esịd ke ñkanna ndi.’
19 “Ayọhọ awo iba ate, ‘Mmaadep enañ utọ inwañ duob, ndin ñyem adikise naña ammọ ediiba. Mbọk kuuyat esịd ke ñkanna ndi.’
20 “Awo mfen ate, ‘Ndọ ufa añwaan mmi-mmi, ndiikanna ndi.’
21 “Ayịnufọk amaanyọñ aketañ afịd ami anọ eteufọk. Esịd amaayat eteufọk, anam anye anọ ayịnufọk uyo ate ‘Sọsọp dʌk ke mme efaak ye mme inuuk abio, kekood mme uwueene, mbʌñọ ye mme inyọọn, ye nnan di.’
22 “Ayịnufọk abo eteufọk, ‘Emaenam se afo abo enam, ado itie asʌk asọsʌhọ.’
23 “Eteufọk atịmme adọñ anye ate, ‘Wuọ ka akpọusʌñ, ñwaaña usʌñ, kood mme awo ake afo akekịt bo edi, tutu ufọk usọrọ mmi ayọhọ. 24Yak ntañ ami inọ ndufo, ndomo awo keed se ñketo ñkood ke akpa a-adiidia ndidia mmi ibaaha.’ ”
Ekọmudua adido Mbed
25Ata uwak awo emaesaña ye Yisọs, ndin anye awọññọ iso aneme ye ammọ ate: 26“Awo ake adodo a-ñkeeneke miin, ndin isuaaha ete ye eka, anwaan ye nditọ, nditọeka ideen ye ibaan; ih, kpa ye idem uwem amọ, idiikanna ido mbed mmi. 27Ndin awo ake adodo a-mmiibenne krọs amọ iñkeene miin, ikemeke adido mbed mmi.
28 “Nte awo ake adodo a-ayemme adibọp tọwa adooho ufọk anyọñ, inaaha asuuk atie, abat se ufọk ado adiikpa mbemiso anye atọọñọ? 29Mbaak adido anye amaakesịn itiad idakisọñ ima, anye ikanna ibọp ima; afịd awo se ikịt eyaesaha anye, 30ete, ‘Awo ami amaatọọñọ ibọp ufọk, ikanna ikweeñe.’
31 “Ñko, anie adidem ikpiyem ika ekọñ ye adidem mfen, itieeghe ke akpa ifed iduuñọ me iyaikan iben mbon ekọñ tọsịn duob ikinwana ye anye a-anieeghe mbon ekọñ tọsịn edịb? 32Anye akpekịt ke idiikanna, ana asio isʌñutom adọñ naña udịm ekọñ mbon ñko mmiikpereke, abo yak mmimọ inam emem. 33Ukem-ukem ado, awo ndufo ake adodo idiikanna ido mbed mmi ke anye mmiisaanake afịd se anye anie iyaak.
34 “Inʌñ afọn, ado inʌñ mmiinieeghe inem aba, ediidat nso-o inam anye amaana anie inem? 35Utọ inʌñ ami ibaaha ufọn inọ isọñ, inyʌññọ iba inọ itoon mbio; ukweeñe ado aditop anye nduọk.
“Yak awo a-anieeghe utọñ adikop ami, akop.”
Currently Selected:
Duk 14: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
