Yọọn 15
15
Eto fain ye mme ñkọk
1 “Ami ndo ata eto fain, Ete mmi ado atọ inwañ. 2Anye akpịkke afịd ñkọk ke idem mmi ammiinwịmme mfịd, ado afịd ñkọk se inwịm mfịd anye atʌm adiọñ nọ anenekke anwịm uwak mfịd. 3Ndufo emesana ke ntak ikọ a-ami ñketañña inọ ndufo. 4Indʌñ miin ke idem, nte a-ami idʌññọ ndufo ke idem. Ñkọk ndomokeed ikemeke adinwịm mfịd ke idem amọ, ibọhọke anye ayịre ke fain. Ndufo ñko idiikanna inwịm mfịd ibọhọke endʌñ miin ke idem.
5 “Ami ndo eto fain, ndufo edo mme ñkọk. Awo akpedʌñ ke ami, ami ñnyʌñ ndʌñ ke anye, anye ayaanwịm uwak mfịd; ekpensio miin efep ndufo idiikanna inam ñkpọ bene keed. 6Awo keed ake adodo a-mmiidʌññọ ke ami aba nte ñkọk e-ekpịkkeke nọ ana asaad, e-ekoonoke mme utọ ñkọk ado etop edọñ ke ikañ enyʌñ efọọmọ. 7Ndufo ekpedʌñ ke ami ndin ikọ mmi isịne ndufo ke idem, ibịp se eyeyem ke eyainọ ndufo. 8Ubọọñ Ete mmi ado ami, ete ndufo enwịm uwak mfịd, ke adiwọt idem ndufo nte mme mbed mmi.
9 “Nte Ete mmi ammaagha miin, kpa ntodo ke ami ima ndufo, ndin edʌñ ke ima mmi. 10Ndufo ekpenịm ibed mmi, eyaedʌñ ke ima mmi, kpa naña ami nnịm ibed Ete mmi ñnyʌñ mba ke ima amọ. 11Mmetañ ami inọ ndufo ma idaara mmi aba ye ndufo, ñko nọ idaara ndufo anyʌñ ayọhọ. 12Ibed mmi ado ami: ima keed aken naña ami ima ndufo. 13Awo ndomokeed inieeghe ima a-akponno akan anye ami anye aduọhọ uwem amọ ke ntak mme ufan amọ. 14Ndufo edo mme ufan mmi ekpenam se mbo ndufo enam. 15Ami ikoodo ndufo nditọufọk mmi aba sia ayịnufọk idiọọñọke ndubeghe eteufọk. Ado ami ikood ndufo mme ufan mmi, sia ami mmenam ndufo ediọọñọ afịd ñkpọ se ñkekpeeb nto Ete mmi. 16Ndufo ikimmekke miin, ado ami ñkimek ndufo nte eka enyʌñ enwịm mfịd, mfịd a-adiikpeene, ndin Ete ayainọ se ebeeñe ke anyịñ mmi. 17Ibed mmi ado: Ima keed aken.”
Ederimbod esua mme mbed
18 “Ederimbod akpisua ndufo idiọọñọ ibo ke ederimbod amaatoto insua miin. 19Akpedo ndufo ekedo ake ederimbod, ederimbod akpaima ndufo nte ake amọ. Nte abaaha ntom, ndufo idooho ake ederimbod, ado ami mmimek ndufo nsio ke ederimbod. Ado anam ederimbod isua ndufo. 20Itoiyo ikọ ami ñketañña inọ ndufo: ‘Ayịnufọk ikponno ikan eteufọk.’ Adieke ammọ ekeñkọbọke miin, ammọ eyaikọbọ ndufo ñkọ. Adieke ammọ ekekpañña utọñ enọ ikọ mmi, ammọ eyaekpañ utọñ inọ ndufo ñko. 21Ammọ ediinam ntom mme ndufo ke ntak anyịñ mmi sia ammọ idiọọñọke andikindọñ miin. 22Akpedo ami ñkedieeghe nditañ nnọ ammọ, ammọ ikpinieeghe ubiom ikpe; ado idahami, ammọ inieeghe ntak ntreutọñ idiọọkñkpọ ammọ. 23Awo a-ansuaha miin asua Ete mmi ñko. 24Akpedo ami ñkenamma ke ufọọd ammọ se awo mfen mmiikinamma, ammọ ikpinieeghe ubiom ikpe. Ado naña aba ami, ammọ ekịt mme utịbe ñkpọ ami ado ammọ esʌk ensuasua miin ye Ete mmi. 25Ado ami ado adinam nọ se ekewet ke Ibed ammọ asu: ‘Ammọ ekensua miin ke unana ntak.’ ”
Utom Adisana Sịbidịd
26 “Adọñ awo esịd amaadi, a-ami ndibọ Ete nnọ isọk ndufo, Sịbidịd akpanikọ a-atooho Ete, anye ayaatie ntiense ambaña miin. 27Ndufo ñko anaetie ntiense embaña miin sia ndufo emeba ye ami tọọñọ ke aditọọñọ.”
Currently Selected:
Yọọn 15: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
