Utom 9
9
Sọọd akappa esịd
1Ado Sọọd akesʌk akaaka iso ke adikọbọ ye adidịkke mme mbed Abọọñ uwem. Anye amaadakka abịne akwa aku 2akebo yak anye inọ imọ ñwed iben ika mme Sinakọk ke Damaskọs nọ ato do adieke ikịtte awo ake adodo a-asañake ke usʌñ Krais, ideen me ibaan, imọ ikoono ammọ nte mbon ñkpakọb inyọñ idi Yerusedem. 3Ke anye amaakesaña adikpere Damaskọs, unwana ikañ amaato anyọñ idahado-idahado ayamma akanna anye. 4Anye amaaduọ ke isọñ, anyʌñ akop uyo naña abo anye ate: “Sọọd, Sọọd, ntak afo añkọbọke miin-e?”
5Sọọd amaabịp abo, “Afo ado anie, Abọọñ?”
Abọọñ amaabọọrọ, “Ami ndo Yisọs a-afo akọbọke. 6Dakka da, nyʌñ saña dʌk esịd abio, ndin eyautemme se anie adinam.”
7Mbon se ikisaña ye Sọọd ikikanna uyo isio; ammọ emaekop uyo, ado ikikịtte awo ndomokeed. 8Sọọd amaadakka ada ke isọñ, ado ke anye amaaketaad anyen, ikikanna ikịt ñkpọ ndomokeed aba. Ke ntodo, emaemʌm anye ubọk eben eka Damaskọs. 9Anye amaatie usen ita ikịtte ñkpọ, idiaaha ñkpọ, inyʌññọ inwọñ ñkpọ.
10Ndin mbed keed amaaba ke Damaskọs a-akekereke Ananayas. Abọọñ amaatañ ikọ anọ anye ke ñkukịd ate, “Ananayas!”
Anye amaabọọrọ ate, “Ih, Abọọñ se miin mi.”
11Abọọñ amaabo anye, “Dakka da nyʌñ ka efaak ekoodo Stred ke ufọk Yudas, nyʌñ bịp baña Sọọd a-atooho Tasọs, sia anye asʌk abọñ akam. 12Anye akịt ke ñkukịd nte awo a-akekereke Ananayas adidot anye ubọk nọ anye atịmme amọọnọ ñkpọ.”
13Do ke Ananayas akebọọrọ abo ate, “Abọọñ, ami mmekop uwak mbʌk nto umiañ awo abañake awo ami, ye umiañ ndiọiñkpọ a-anye anamma ndisana awo mfo ke Yerusedem. 14Ndin anye adi mi ye adudu ato mme ikpọ aku nọ amʌm afịd mbon e-ekoodo anyịñ mfo.”
15Ado Abọọñ amaabọọrọ Ananayas ate, “Kaa! Awo ami ado ñkpọutom a-ami mmekke nnịm nnọ idem mmi, nọ anye aben anyịñ mmi akesuan anọ mme Yentaid ye mme ndidem ammọ ye nditọ Isred. 16Ami ñyaawọt anye adaña umiañ ukuud a-anaaha nte anye abọ ke ntak anyịñ mmi.”
17Ndin Ananayas amaadakka aka ufọk Sọọd, akedot anye ubọk abo ate: “Sọọd, ayịneka mmi, Abọọñ Yisọs a-akewuọọhọ uwọt fiin idem amọ ke usʌñ ke ini a-afo akedieeghe, andọñ utom unọ, nọ ato do afo amaana akịt usʌñ anyʌñ ayọhọ ye Adisana Sịbidịd.” 18Ke ataa idahado, mme ñkpọ e-eketieeghe nte ikpọk emaewuọọñọ Sọọd ke anyen, ndin anye amaamaana amọọnọ ñkpọ. Anye amaadakka ada, emaenyʌñ eduọk anye mmọọñ, 19ndin ke anye amaakedia ndidia, amaatịmme anie adudu.
Sọọd ke Damaskọs ye ke Yerusedem
Sọọd amaaba ye mme mbed se ikiba ke Damaskọs ke ñkpọ nte usen ifañ. 20Anye ikibiadda ini aditọọñọ ñkwọrọ ikọ ke mme Sinakọk, ate ke Yisọs ado Ayịn Abasi. 21Ado idem amaakpa afịd mbon e-ekekoppo naña anye akekwọrọ ikọ, ammọ emaenyʌñ ebịp ebo, “Me idooho awo a-akesitʌkkọke mbon e-ekekooddo anyịñ Yisọs ami ke Yerusedem, a-akenyʌññọ adi Damaskọs ke ukem ntak ado, nọ ato do amuum mme mbed nte mbon ñkpakọb asọk mme ikpọ aku ado mi?” 22Ado Sọọd amaaka iso akop adudu, anyʌñ anam idem akpa mme Yuu e-ekedʌññọ ke Damaskọs, ke adiwọt mbo ke Yisọs ado Mesaya.
23Ke umiañ usen emaekeboiyo, mme Yuu emaedʌk edioomo ammọ-ammọ adiwot Sọọd, 24ado anye amaakop abaña edioomo ammọ. Ammọ emaekpeme mme usʌñ abio akoneyo ye uweemeayo nọ ato do enie ufañ ewot anye. 25Ado mme mbed emaeben anye esịn ke akpasa esuuk ke adudu ke ndibene akonayo.
26Ke Sọọd amaakedi Yerusedem, anye amaadomo ukeme adidʌk atu mme andinịm ke akpanikọ, ado afịd ammọ ekebaabaak anye, inịmme ke anye akedo emọ-emọ mbed. 27Ado Banabas amaadat anye anyʌñ aben anye abịne mme abọsịd. Anye amaatañ anọ ammọ naña Sọọd akekịt Abọọñ ke usʌñ, ye naña Abọọñ aketañ ikọ ye anye, naña anye akekwọrọ ikọ uko-uko ke Damaskọs ke anyịñ Yisọs. 28Ndin Sọọd amaadañ ye ammọ, asiekeene ammọ awuọ esiin naña amama ke Yerusedem, akwọrọ ikọ uko-uko ke anyịñ Abọọñ. 29Anye amaasiefaaña ye mme Yuu e-ekesemme Krik, ado mbon ami emaeyem usʌñ naña ekpewot anye. 30Ado ke mme andinịm ke akpanikọ emaekediọọñọ ibaña uduak ami, ammọ emaeben anye esọiyọ eka Siseria enyʌñ ekenọ anye aka Tasọs.
31Do ndin ke ufọkabasi ke afịd-afịd Yudia, ye ke Kadidi, ye ke Sameria ekebọ emem ye nsọọñọnda. Ke idak mbaak Abasi ye nsọọñọidem ake Adisana Sịbidịd, ufọkabasi amaatọt.
Enias ye Dọkas
32Naña Bita akekaaha mme nsio-nsio itie, anye amaasaaña akese mme ikot Abọọñ e-ekedʌñọ ke Dida. 33Anye amaakịt awodeen keed do a-akekereke Enias, a-akedọñọke akpaubeñ ana ke ikʌk isua itiaita. 34Ndin Bita amaabo anye ate, “Enias, Yisọs Krais anam udọñọ mfo akweeñe, dakka da, nyʌñ ben aya mfo.” Enias amaadakka ada ini keed. 35Afịd mme andikidʌñ ke Dida ye Sarọn emaekịt anye, enyʌñ ekappa esịd ekeene Abọọñ Abasi.
36Ado mbed keed amaaba ke Yopa a-akekereke Tabita, (a-awuọọñọke Dọkas ke usem Krik). Mma ami akeyọhọ ye nti utom ye andiyaaña mme uweene. 37Akem anye amaadidọñọ anyʌñ akpa; emaeyet akpo amọ enyʌñ enịm ke ubeed keed ke ufọk anyọñ. 38Ado sia Dida akekpereke Yopa, ndin mme mbed ñko emaenyʌñ ekop ke Bita mmọdo akeba, ammọ emaesio awo iba edọñ utom enọ anye, ete mbọk yak anye ibịne mmimọ, usọp-usọp.
39Bita amaadakka ada akeene ammọ, ndin ke anye amaakekewuọ do, emaeben anye edọọk eka ubeed ufọk anyọñ. Afịd mme ebekpa emaeda ekanna Bita ekʌk, etua enyʌñ ewọt anye mme afọñ esịd idem ye ake anyọñ idem a-Dọkas akenamma ke ini a-anye akebaaha ye ammọ.
40Ado Bita amaasiooño afịd ammọ ke ubeed, anyʌñ atọọñọ edọñ abọñ akam. Ndin anye akanna iso ase akpo mma ado, anyʌñ abo ate, “Tabita, dakka da.” Do ke anye aketaad anyen, ndin ke anye amaakekịt Bita, anye amaadakka atietie. 41Bita amaanyan ubọk amọ anọ anye, anyʌñ adịppe anye adaaha. Ke anye amaakekood mme andinịm ke akpanikọ, akpan-akpan mme ebekpa nọ edʌk edi, anye amaaben Dọkas ke uwem ayaak anọ ammọ. 42Etob ñkpọ ami amaasuana akara ke afịd-afịd Yopa, ñko umiañ awo emaenịm Abọọñ Abasi ke akpanikọ. 43Bita amaaba ke Yopa umiañ usen ye adeppeikpa keed a-akekereke Saimọn.
Currently Selected:
Utom 9: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
