Utom 2
2
Adisana Sịbidịd adi ke usen Bentikọs
1Ke usen Bentikọs amaakedikem, mme mbed emaesoobo atọ keed. 2Ke idaha keed ado, akpọsọñ uyom amaato ikpaanyọñ adiyọhọ ufọk ammọ ekebaaha. 3Ndin ammọ emaekiid se ikibañña nte mme edeme ikañ nte esuana ekeedoro ammọ keed-e-keed ke idem. 4Ammọ emaeyọhọ ye Adisana Sịbidịd enyʌñ etọọñọ adisem mme nsio-nsio usem nte Sịbidịd akenọọhọ ammọ ukeme.
5Ke ini ado mme Yuu e-efeheke Abasi, e-eketooho mme nsio-nsio idịd ke ederimbod emaebañña ke Yerusedem. 6Ke ini mme atu awo ekekoppo uyom ami, ammọ emaewuọọñọ edi ke ñkpaidem, sia mme awo keed-e-keed emaekop nte mme mbed esem nsio-nsio usem idʌñ ammọ. 7Ke ata ñkpaidem, ammọ emaebịp, “Nte afịd mme awo e-esemme mme usem ami itooho Kadidi? 8Anam die ndin yak ñnyịn keed-e keed ikop se ammọ etañ ke mme usem idʌñ ukañ ñnyịn? 9Ñnyịn ido mbon Betian, Medes, Edamaid, mbon e-tooho ke Mesopotemia, Yudia, Kapadosia, Bọntus ye Esia, 10Frikia ye Bamfidia, Iyịpt ye mme ubaak itie ke Dibia ke ñkanñkʌk Sirin; mme esenawo e-etooho Rum 11(mme Yuu ye mbon se ikappa esịd idʌk edu ukpono ake Yudaisịm); Mme Kretan ye mme Arab, ñnyịn ikop nte ammọ etañ ebaña mme utịbe ñkpọ Abasi ke mme nsio-nsio usem ñnyịn.” 12Idem amaakpa afịd awo, ammọ ebiime emọ-emọ aken ebo, “Ami awuọọñọ so-o?”
13Ado ubaak awo emaesaha ammọ enyʌñ ebo ete, “Ukọd anaam ammọ.”
Bita atañ iko anọ atu awo
14Ndin Bita amaadakka ada yemme abọsịd duob ye keed anyʌñ abọñ ke akpọsọñ uyo anọ mme atu awo abo: “Inekke ikpañ utọñ, afịd ndufo mbon Yuu ñnyin ye mme andidʌñ ke Yerusedem, ikop se ami ntañ. 15Idooho ukọd anaam ibon ami naña ubaak ndufo ekere. Abak abọhọ, awo isikpaaha mmịn ke ñkanika usʌkkeed ubakusen! 16Iyoo, se brọfed Yoed amaaketañ anịm ado ami:
17“ ‘Ke mme akpatre usen, Abọọñ Abasi atañ,
ami ñyaanwañña Sịbidịd mmi nduọk afịd uduod awo.
Mme nditọ ideen ye ibaan ndufo eyaetañ brọfesi,
ñkparawa ideen ndufo eyaenyʌñ ekiid ñkukịd,
mme ikpọ ideen ndufo eyaedappa ndab.
18Ñko ye nditọufọk mmi ideen ye ibaan,
ami ñyaaduọk Sịbidịd mmi ke mme usen ado,
ammọ eyaenyʌñ etañ brọfesi.
19Ami ñyaanịm mme idiọọñọ ke ikpaanyọñ ye mme
idiọọñọ ke idakisọñ,
iyiib ye ikañ ye ndubek ikañ.
20Utịn ayaakappa ado akịm
afiọñ anyʌñ akappa iyiib
mbemiso usen Abọọñ Abasi adi, akwa usen itooro.
21Ado awo ake adodo a-akoodo
anyịñ Abọọñ Abasi ayaabọkkọ.’
22“Ndito Isred ñnyịn, ikpañ utọñ ikop se mbo ntañ: Yisọs ayịn Nasared akedo awo a-Abasi akebenne iwọt ndufo anwa-anwa ato ke mme utịbe ñkpọ ñkpaidem ye mme idiọọñọ a-Abasi akanamma ke ufọọd ndufo ato ke ubọk amọ, nte ndufo ke idem ndufo ediọọñọke. 23Emaekappa anye enọ ndufo ato ke uduak ye ubonoñkpọ Abasi akenieeghe, ndin ato ke unwam mbon ibak, ndufo emaekọñ anye ewot ke eto krọs. 24Ado Abasi amaanam anye aset ke ñkpa, anam anye abọkkọ ndutʌghọ ñkpa, sia ñkpa ikinieeghe adudu adimʌm anye ukad. 25Ñko Defid amaatañ ami abaña Yisọs:
“ ‘Ami mmaakịt Abọọñ Abasi ke iso mmi afịd ini.
Sia anye abaaha ke ubọk nnasia mmi,
ñkpọ ndomokeed idiintəkkoke.
26Ke ntak ado esịd andat, edeme mmi anyʌñ akwọ itooro Abasi;
ikpọkidem mmi ñko ayaanie idodanyen,
27sia afo uduñkpọññọ miin ke abioekpo,
afo uduunyʌññọ uyaak adisana awo mfo akịt mbiara.
28Afo amenam ami ndiọọñọ mme usʌñ uwem;
ayaannọ miin ayọhọ idaresịd ke iso mfo.’
29“Ikọd ñnyịn Isred, yak ntañ inọ ndufo uko-uko ke nsọbom ñnyịn Defid amaakpa enyʌñ ebuuk anye, itiad udi amọ asʌk ababa awuọ mfịn. 30Ado anye akedo brọfed, amaanyʌñ adiọọñọ ke Abasi amaanam akaakan enwọñọ adimek keed ke atu ayeyịn amọ ndot ke ebekpo amọ. 31Defid amaanie ifiọk ibaña ini iso ke anye adibem iso ntañ adised Mesaya ke ñkpa, ke awo idiikpọññọ anye ke abioekpo, ñko ke ikpọkidem amọ idiikịtte mbiara. 32Abasi anam Yisọs ami aset ke ñkpa, ndin ñnyịn ido ntiense ibaña. 33Ke emaekedịppe anye itie idot ke ubọkudom Abọọñ Abasi, anye abọ Adisana Sịbidịd a-anye akenwọñọke ato Ete. Do ke anye aduọk ammọ Sịbidịd a-ndufo ekịtte enyʌñ ekop mi mfịn. 34Sia Defid ke idem amọ ikidọọhọ ika abio ubọọñ Abasi, ado amaabo,
“ ‘Abọọñ amaabo Abọọñ mmi ate:
“Tie ke ubọk udom mmi
35tutu ami nnam mme asua mfo
edoñño ñkpọ udodukod mfo.” ’
36“Ke ntodo, yak afịd ufọk Isred ediọọñọ ayọhọ-ayọhọ: ke Abasi amaanam Yisọs a-ndufo ekekọññọ ewot ke eto krọs, ado Abọọñ ye Mesaya.”
37Ikọ ami amaatuuk mbon awo se ikikop esịd, ndin ammọ emaebịp Bita ye mme abọsịd mbio ako ebo, “Nditọeka, nso-o ke ñnyịn ibiinam die?”
38Ndin Bita amaabọọrọ ammọ abo ate, “Afịd ndufo ikappa esịd inyʌñ ibọ uduọkmmọọñ ke anyịñ Yisọs Krais nọ afeen mme idiọọkñkpọ ndufo. Ndufo ñko eyaebọ enọ Adisana Sịbidịd. 39Enwọñọ ami inie ndufo ye nditọ ndufo, ye afịd awo e-ebaaha ke anyanusʌñ, ye afịd mbon Abọọñ Abasi ñnyịn adikood inọ idem amọ.”
40Ndin Bita amaakwọrọ ikọ akpeene, adʌt ammọ utọñ anyʌñ akpeiye ammọ ate, “Inyaaña idem ndufo isio ke mbiara emana ami.” 41Mbon se ikitat esịd ikop ikọ amọ emaebọ uduọkmmọọñ, ndin ñkpọ nte awo tọsịn ita emaekeene edʌk ke atu ammọ usen ado.
Ewana mme andinịm ke akpanikọ
42Ammọ emaenekke esịn idem ke ukpeebñkpọ mme abọsịd ekenọọhọ ye ke nsañaewana mme abọsịd, ke adibuuñ uyo ye ke adibọñ akam. 43Uteñe amaamʌm afịd ammọ adikịt umiañ utịbe ñkpọ ye mme utom idiọọñọ a-mme abọsịd ekenaññake. 44Afịd mbon se ikinịm ke akpanikọ emaesisoobo itie keed, enyʌñ ewawana afịd ñkpọ enie. 45Ammọ emaenyaam afịd ñkpọ ye inie ammọ enyʌñ edeeme enọọñọ mme awo naña mfịna awo keed-e-keed akedo. 46Kwa usen, afịd ammọ emaesisoobo ke mme afe tembịd. Ammọ emaesibuuñ uyo ke ufọk ammọ, ewana ediaagha ke inem ye inwañ-inwañ esịd, 47etooro Abasi, enyʌñ ekịt asaña-saña mfọn eto mme awo ñko ke abio. Ke usen ke usen, Abọọñ amaaka iso adian mme awo e-ekebọọhọ adinyaaña anọ ammọ.
Currently Selected:
Utom 2: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
