Luk 8

Eya na ẹvo ri Nene Jesu

1Vwẹ ọke yena kọ yan wan irere vẹ ẹko na, ro ghwoghwo jo gbe iyẹnrẹ esiri rẹ uvie rẹ Ọghẹnẹ. Ye ihwivẹ na vẹ ọye usun, 2kugbe eya na ẹvo ro sivwi emiavwe nu vẹ efa rọ djẹ erhi rẹ idẹbono nu; Meri rẹ ohwo ri Magdala, rọ djẹ erhi rẹ idẹbono ighwrẹ nẹ oma, 3kugbe Joana, aye ri Chuza, odibo ri Herọd, kugbe Suzana, vẹ efa buebu re vwẹ emu rẹ obọ rayen vwọ ghẹrẹ ayen.

Itẹ re Ọkekakọn na

(Matiu 13.1-9; Mak 4.1-9)

4Ọke rẹ ihwo buebu na vwo bro rhe, rẹ ihwo vwo nẹ irho efa bro rhe, o de kpe itẹ kẹ ayen; 5Ọghwẹrẹ da ra kọn ekankọn; rọ vwọ kọn re, evo de she phihọ orhoma rẹ idjerhe, e de chiyin ayen wan, emephran rẹ obenu da sohrọ re. 6Evo de she phiyọ enu rẹ oragha; rẹ e vwọ djẹ rhe re, i de vwioro, fikiridie e mrẹ ame-e. 7Ẹvo de she phiyọ ohri rẹ iwen; iwen na vẹ ayen da rho kugbe i de duvwu aye hwe. 8Efa de she phiyọ otọ esiri, e da djẹ, e da mọ emamọ uri akon uri. Rẹ ọ vwọ ta Ọnana, o de kperi, ''Ọ ro vwo erhọn ro vwo nyo, e jẹ o nyo.

Obo re Sọrọ re Vwo kpe Itẹ na

(Matiu 13.10-17; Mak 4.10-12)

9Rẹ idibo rọyen vwọ nọ otọ rẹ itẹ na, 10ọ da ta, ''Ovwan a vwe rọ kẹ ne riẹn odjahọ rẹ uvie rẹ Ọghẹnẹ na; ẹkẹvuọvo ihwo efa itẹ kọyen e vwo kpe ke ayen, rere dede nẹ ayen mrẹ-ẹ, enyo ayen nyo jọ sa ro aye-en.

Jesu fan Otọ rẹ Itẹ rẹ Ọkekakọn na

(Matiu 13.18-23; Mak 4.13-20)

11Asakiephana otọ rẹ itẹ na kẹ ọna, Ekankọn na ọyẹn ota rẹ Ọghẹnẹ. 12I ri she phiyọ orhoma rẹ idjerhe na ayen Ihwo ri nyori; ọke rẹ idẹbono vwọ rhe ọ da rhe kọrọ ota na nẹ udu rayen, rere ayen de rhe segbuyota e de rhe sivwi ayen. 13I ri she phiyọ enu rẹ oragha na ayen ihwo ri nyo ota na, ayen da vwẹ aghọghọ reyọ; ẹkẹvuọvo enana rhe vwo awọ-ọ, i de segbuyota emerha ọke rẹ odavwini ayen de she. 14Ena iri she phiyọ ohri rẹ iwen, ena ihwo ri nyori, ẹkẹvuọvo rẹ ayen vwọ yanran vwẹ idjerhe re, ẹnwan rẹ akpọ efe kugbe avwerhe rẹ akpọ de rhi keke ota na, o gbi jẹ ayen mọ ubi-i. 15I ri she phiyọ otọ esiri na, ena ihwo re vwẹ udu esiri reyọ ota na, vwẹ evun rẹ erhiori ayen da mọ ubi.

Urhukpẹ rẹ hẹ Otọ rẹ Ikuru

(Mak 4.21-25)

16O vwo ohwo rọ sa vwẹ urhukpẹ rhu nu rọ da vwẹ ekpeti rhurho-o, eyẹn o de muo phiyọ otọ rẹ ehwa-a, ẹkẹvuọvo ko muo kpahe ogburhukpẹ rere ihwo re ro uwevwi vwọ mrẹ orẹ. 17Kidie o vwo emuọvuọvo rọ djahere ro jẹ phia-a, eyẹn emuọvuọvo re sinu re jẹ mrẹ-ẹ. 18Kẹnoma rẹ obo ru wo nyo; kidie ohwo ro vwori ọyen a kẹ, ọ rọ vwori-i, emerha ro rhere na ka karhiẹ mie.

Oni kugbe Iniọvo ri Jesu

(Matiu 12.46-50; Mak 3.31-35)

19Etiyin oni rọyen kugbe iniọvo rọyen de bro rhe ayen de mudia otafe fikiridie ihwo buebu vọn uwevwi na. 20Ayen da vuẹ, ''Oni wẹn kugbe iniọvo wẹn mudia vwẹ otafe, re guọnọ owẹ mrẹ. 21Ẹkẹvuọvo ọ da kpahe kẹ ayen, Oni mẹ kugbe iniọvo mẹ vwonẹ ayen ihwo ri nyo ota rẹ Ọghẹnẹ ayen de ruo.

Jesu fue Ọgbọghọ rẹ Abadi

(Matiu 8.23-27; Mak 4.35-41)

22Ẹdẹ ọvo ọ da ro evun rẹ okọ ọ vẹ idibo rọyen, ọ da ta kẹ ayen, E je bi kpo esamuo rẹ avware na. Ẹtiyin ayen de ghine bi yanran, 23Rẹ ayen vwo biẹ na ovwerhẹ de muo. Ogiriho de ri dju vwa ayen vwẹ evun rẹ avwanre na, ame ko brẹ ro okọ na, uguegue da ro ayen oma. 24Ayen da yanran ra rhọvwọ, tanẹ, Onini, Onini, avwanre ghwrẹ Ọ da rhọvwọ ọ da ghwọ ku aphopho na kugbe omimi na; ayen da ghwa ka, asan ejobi ki riẹn. 25Ọ da ta kẹ ayen, Esegbuyota rẹ ovwan rhọ? Oshọ de mu ayen, o de gbe ayen unu, ta kẹ ohwohwo, Ọna tobọ ono, rọ ta ota kẹ odju vẹ ame, ri de mu ọghọ kẹ?

Erhi rẹ Idẹbono ri Gerasin ro Sivwiri

(Matiu 8.28-34; Mak 5.1-20)

26Ayen de rhi te orho rẹ ihwo ri Gẹrasin, ro hirhe opharo ku Galili. 27Rẹ ayen ghwe rhi vwo te otọ, ohwo ọvo ro vwo idẹbono de nẹ evun rẹ orere na rhe vwa; rọ ban phihọ rhaha, ọ dia uwevwi-i ẹkẹvuọvo ohri re ishi. 28Ọke rọ vwọ mrẹ Jesu, o de kperi phia o de she diguẹ vwẹ obaro rọye, ọ da van gangan tanẹ, Die wọ vẹ ovwẹ gbi ru, Jesu, Ọmọ rẹ ọ ro Me kpenu? Me rẹ wẹ, Wọ lagba ovwẹ-ẹ. 29Kidie o ji urhi kẹ erhi ro jẹfuọn na nẹ o nẹ oma rẹ ohwo na. (Kidie ọke buebu o vwo muo ghri; ka rhẹrẹ, a Me vwẹ ejọnrọn vẹ igoni gba, ẹkẹvuọvo o mi vwirhi igoni na erhi ro jẹfuọn na mi muo kpo evun rẹ aton.) 30Etiyin Jesu da nọ, Odẹ wẹn rhọ? Ọ da ta, Lijiọn; kidie erhi rẹ idẹbono buebu ro evun rọye. 31Ayen da rẹ nẹ ọ djẹ ayen kpo evun rẹ Uyere na-a. 32Asakiephana otu rẹ isi buebu ra ria vwẹ orhoma rẹ ugbenu; ayen da rẹ nẹ o jẹn ayen ro evun rayen. Ọ da rhọvwe kẹ ayen. 33Etiyin erhi rẹ idẹbono na de nẹ evun rẹ ohwo na ra ro evun rẹ isi na, isi na da djẹ nene ọghwrọrọ na re she phiyọ avware na i de divwi ghwu.

34Ọke rẹ otu ri churu isi na vwọ mrẹ obo re phiare, ayen da djẹ, re gbe ikun na vwẹ obo orere na kugbe evun rẹ orho na. 35Etiyin ihwo da yanran ra mrẹ obo re phiare na, ayen de bru Jesu rhe, ayen da mrẹ ohwo na ra djẹ erhi rẹ idẹbono nu na, o tidia vwẹ awọ ri Jesu, ọ vwẹ amwa rhuo ẹro rọye te otọ; oshọ de mu ayen. 36Ayen otu re mrẹrẹ de gbe kẹ ayen obo re sivwi ohwo ro vwo erhi rẹ idẹbono na wan. 37Ihwo rẹ orho ri Gẹrasin ejobi da ta kẹ nẹ o bi nẹ ayen oma; kidie oshọ rode mu ayen; Etiyin ọ da ro okọ o de rhivwi. 38Ohwo rọ djẹ Idẹbono nu na da rẹ nẹ ọye vẹ Jesu dia; ẹkẹvuọvo ọ da sen nẹ, 39Rhivwi kpo uwevwi wẹn, ru wo re ghwoghwo obo rẹ Ọghẹnẹ ru kẹ wẹ. Ọ da yauran re ghwughwu vwẹ evun rẹ orere na obo ri Jesu ru kẹ.

Ọmọtẹ ri Jairọs vẹ Aye na Rọ vwẹ Ọbe Te Ewun ri Jesu

(Matiu 9.18-26; Mak 5.21-43)

40Asakiephana ri Jesu vwo rhivwi rhe, ihwo buebu de dede, kidie ayen ejobi hẹrhẹ. 41Ọshare ọvo re se Jairọs da rhe, osun ri Sinagọg; ro vwo shiguẹ vwẹ awọ ri Jesu ọ da rẹ nẹ ọ rhe uwevwi rọye, 42kidie o vwo ọmọtẹ ọvo sogono, ọmọ rẹ ikpe ihwivẹ, ro muegbe rẹ ughwu.

Rọ vwọ yanran, ihwo ki keke. 43Ayen rọ dia afe ikpe ihwivẹ re ohwo ọvuọvo se sivwo-o,. 44ọ da rhe obuko rọye, ọ da hẹhẹ vwẹ obo te akakọ rẹ ewun rọye; siẹvuọvo na afe na da ghwa ka. 45Jesu da ta, Ono re vwẹ obọ te vwe na? Rẹ ihwo ejobi vwọ ghwọunu re, Pita da ta, Onini, urogho na riariẹ owẹ ri keke uwe! 46Ẹkẹvuọvo Jesu da ta, Ohwo ọvo vwẹ obo te vwẹ kidie o mu vwe ẹro nẹ ogangan nẹ uvwe oma yanran. 47Ọke rẹ aye na vwọ mrẹ nẹ ọye gbe sa djahe-e, ọ da rhe rọ phariẹ, o de shiguẹ vwẹ obaro rọye o de ghwoghwo vwẹ irharo rẹ ihwo na ejobi obo re sorọ rọ vwẹ obọ te, kugbe obo re ghwe sivwo ichiehiyi na. 48Ọ da ta kẹ, Ọmọtẹ, esegbuyota o sivwi uwe; yanran vwẹ ufuoma.

49Rọ ghwa vwọ ta ota na, ohwo de nẹ uwevwi rẹ osun na rhe ọ da ta, Ọmọtẹ wẹn o ghwu nure; wo gbi kpokpo oyono na ọfa-a. 50Ẹkẹvuọvo ri Jesu vwo nyo ọnana o da kpahe kẹ, Wọ djẹ oshọ-ọ; takpi segbuyota, oma rọye kọ gan. 51Ro rhi vwo te uwevwi na, ọ rhọvwe nẹ ohwo ọvuọvo nene ọye-e, jokpa ri Pita, Jọn kugbe Jems, kugbe ọsẹ vẹ oni rẹ ọmọ na. 52Ayen ejobi ra viẹ re beroma kẹ; ẹkẹvuọvo ọ da ta, Wọ viẹ-ẹ; kidie o ghwuru-u ọ vwerhẹ. 53Ayen ke hwẹ, rẹ ayen vwọ riẹn nẹ o ghwu nure. 54Ẹkẹvuọvo rọ vwọ yọnrọn obọ o de se tanẹ, Ọmọ, vrẹn. 55Erhi rọye de rhivwi rhe, siẹvuọvo ọ da rhọvwọ; ọ da ta nẹ a vwẹ emu kẹ re ọ re. 56O de gbe ọsẹ vẹ oni rọye unu; ẹkẹvuọvo o de ji urhi kẹ ayen nẹ ayen ta obo re phiare na kẹ ohwo ọvuọvo-o.

Currently Selected:

Luk 8: UBV77

Highlight

Copy