Luk 21

Ẹkpẹvwẹ rẹ Ayeuku na

(Mak 12.41-44)

1O de ni enu ọ da mrẹ edafe ri phi okẹ rayen phihọ ekpo; 2ọ da mrẹ ayeuku ovwiogbere ro phi anini ivẹ phihọ. 3Ọ da ta, Uyota me ta kẹ wẹ, ayeuku nana rẹ ovwiogbere na phi phihọ bu nọ ayen ejobi 4Kidie evun rẹ obuebu rẹ ayen vwori ayen de phi emerha phihọ na, ẹkẹvuọvo ayeuku nana obo ri rhere ejobi ọye phihọ na.

Jesu ta Ota kpahe Ẹghwọrọ rẹ uwevwi rẹ ẹga na

(Matiu 24.1-2; Mak 13.1-2)

5Rẹ evo vwo gbe ikun rẹ uwevwi rẹ ẹga na, obo ra vwẹ eragha yoyovwi vwọ rhuẹrẹ kugbe izobo, o da ta, 6vwọ kẹ imu nana re wọ mrẹ na, ẹdẹ cha re che vwo jẹ oragha ọvo vwo vwẹ enu rẹ ọfa re che je kporo te otọ-ọ.

Eka vẹ Ukpokpogho

(Matiu 24.3-14; Mak 13.3-15)

7Ayen da nọ, Oyono, ọkevọ ọnana cha vwọ phia, kidie re cha dia oka rẹ ọke rẹ ọnana cha vwọ phia? 8Ọ da ta, Kẹnoma rere e vwo jẹ uwe esuo ghwro; kidie buebu cha rhe vwẹ odẹ mẹ, tanẹ, Mẹvwẹ hẹ ọye! yẹ ọke na si kẹre re! Wo nene aye-en. 9Wo de nyo umri rẹ ofovwi kugbe ekuvwie, we guegue-e; kidie ọnana re ka phia, ẹkẹvuọvo yẹ oba na ji te-e.

10Etiyin ọ da ta kẹ ayen, Ẹgborho che vrẹn vwọ so ẹgborho, uvie cha vwọ so uvie; 11otọ che mu kpogho, owẹvwe che fi vwẹ asan buebu kugbe ọtiekọ; uguegue rode cha phia eka ride che nẹ odjuvwu rhe. 12Ẹkẹvuọvo tavwe rẹ ọnana ke rhe phia ayen che shabọ họ ovwan ayen mi mu ovwan, sun ovwan kpo sinagọg vẹ uwodi, ka reyọ ovwan kpo obaro rẹ ivie kugbe isun fiki rẹ odẹ mẹ. 13Ọnana ko cha dia ọke rẹ ovwan che vwo se iseri. 14Gbe jẹ ọnana dia udu rẹ ovwan, wa jẹ iroro phihọ evun obo rẹ ovwan cha kpahe-e; 15kidie me cha kẹ ovwan unu kugbe aghwanre, rẹ udu rẹ ukọn rẹ ovwan cha sa gba eyẹ phro-o. 16Esẹ vẹ ini kugbe iniọvo kugbe imoni kugbe igbeyan ọvo che mu ovwan rhe, ayen che hwe otu ẹvo rẹ ovwan ghwu; 17ayen buebu che tuoma wẹ fiki rẹ odẹ mẹ. 18Ẹkẹvuọvo ogẹto rẹ uyovwi rẹ ovwan ọvuọvo cha ghwọrọ-ọ. 19Akoechiro wẹn wọ cha vwọ mrẹ arhọ wẹn reyọ.

Jesu Ta Ota kpahe Ẹguọghọ ri Jerusalẹm

(Matiu 24.15-22; Mak 13.14-19)

20Ẹkẹvuọvo ọke wọ da mrẹ Jerusalẹm rẹ otuofovwi gba riariẹ phihọ, etiyin gba ghwa riẹn nẹ ọke rẹ ẹkua fiotọ rọye si kẹre re. 21Etiyin gbe jẹ otu re hẹ obi Judia djẹ kpo obo igbenu, gbe jẹn otu re hẹ evun rẹ orere na kua, e jẹn otu re hẹ obo otafe vwẹ obo orho vwẹriẹ-ẹ; 22Kidie enana ẹdẹ rẹ ihriẹriọ, rere obo re siri na vwọ gba. 23E kperi eghwo vwọ kẹ otu ri vwo ọmọ kugbe otu re vwẹ evie kẹ vwẹ ẹdẹ yena! Kidie uvwerhe rode cha dia enu rẹ akpọ na ivuemiovwo kọ cha dia kẹ ihwo nana; 24Ka vwẹ ọlọkọ nyavwe ayen she, ke mu ayen ighuvwn vwẹ ohri rẹ ẹgborho na; Keferi ki chiyi Jerusalẹm muotọ, bẹsiẹ rẹ ọke ri Keferi cha vwọ gba.

Ẹcha rẹ Ọmọ rẹ Ohwo

(Matiu 24.29-31; Mak 13.24-27)

25Oka kọ cha dia evun rẹ ọnre kugbe emeranvwe kugbe isio, vwẹ enu rẹ akpọ na kẹ uvwerhe rẹ ẹgborho na vẹ ofuedje vwẹ ẹsiẹ rẹ ọsẹghẹ rẹ abadi da cha rọ da gbogha, 26ihwo ki sherua vẹ oshọ kugbe ẹnwan rẹ obo re cha vwẹ akpọ na; kidie ogangan rẹ idjuvwu na ki che kpogho. 27Etiyin kẹ ayen cha mrẹ Ọmọ rẹ ohwo rọ cha vwẹ egho vẹ ogangan kugbe urinrin rode. 28Asakiephana ọke rẹ imu nana da cha phiare, ni enu re wa kpare iyovwi rẹ ovwan, fikiridie etanhirhe wẹn re siẹ kẹrẹ re.

Uyono rẹ Urhe rẹ Owe na

(Matiu 24.32-35; Mak 13.28-31)

29O de kpe itẹ kẹ ayen. Ni urhe rẹ owe na, kugbe irhe ejobi na; 30siẹvuọvo re da ghwẹ ẹbe phihọ re, gba ghwa mrẹ kẹ oma wẹn nẹ okẹ uvo si kẹre re. 31Ọtiọye rhe, ọke wọ da ghwa mrẹ imu nana re phiare, gba ghwa riẹn nẹ uvie rẹ Ọghẹnẹ na kẹri re. 32Uyota, me ta kẹ owẹ, uvwie nana cha sa wanvrẹ-ẹn bẹsiẹ rẹ enana ejobi vwọ phia. 33Odjuvwu vẹ akpọ cha wanvrẹn, ẹkẹvuọvo eta mẹ cha wanvrẹ-ẹn.

Ushebro kpahe Ẹrhẹrẹ

34Ẹkẹvuọvo kẹnoma wẹn ọ dia eriyi-in iroro wẹn da rhe vọn vẹ oseghe kugbe idiẹda vẹ enwan rẹ akpọ nana, rẹ ẹdẹ yena da rhe vwa wẹ kpregede kerẹ ufi; 35Kidie ọ cha rhe enu rẹ ihwo re dia otọ rẹ akpọ na ejobi. 36Ẹkẹvuọvo rhẹrẹ vwẹ ọke ejobi, nẹ ẹrhovwo rere wo se vwo ogangan wọ vwọ vabọ rẹ imu nana ejobi re cha phia na, re wo vwo se mudia vwẹ obaro rẹ Ọmọ rẹ ohwo.

37Kẹdẹ kẹdẹ kọye o vwo yono vwẹ uwevwi rẹ ẹga na, ẹkẹvuọvo vwẹ ason ọ me yan ro uphẹphẹ re wo phihọ enu rẹ ugbenu re se Olivẹt. 38Vwẹ irhiọke ride ihwo na ejobi mi bro rhe uwevwi rẹ ẹga na rhi nyo.

Currently Selected:

Luk 21: UBV77

Highlight

Copy