Jọn 7
7
Ijesegbuyota rẹ Iniọvo ri Jesu
1Rẹ ọnana vwọ wan nu Jesu kẹ yan vwi Galili; ọ gbe guọnọ kpo Judia-a, fikiridie ihwo ri Ju na guọnọ hwe. 2Asakiephana orẹ rẹ Ọgarivi rẹ ihwo ri Ju si kẹre re. 3Ọtiọye na iniọvo rọye da ta kẹ, Vrẹn nẹ etinẹ re wo kpo Judia, rere idibo wẹn vwọ mrẹ iruo ru wo ruẹ. 4Kidie o vwo ohwo rọ guọnọ emu ruẹ vwẹ azagba ro de sionẹ vwẹ uvu-un. Wo de gbine ruẹ imu nana, gbe dje oma wẹn kẹ akpọ. 5Kidie iniọvo rọye dẹn na seregbuyota-a. 6Jesu da ta kẹ ayen, Ọke mẹ ji rhi te-e, ẹkẹvuọvo ọke rẹ ovwan ọ hẹ obọ rẹ ovwan. 7Akpọ na se tuoma rẹ ovwa-an, ẹkẹvuọvo o tuoma mẹ fikiridie mi se oseri kpahọ nẹ iruo rọye ọ rẹ uvumwemwu. 8Ekpuyovwi rẹ ovwan se kpo orẹ na; mi che kpo orẹ na-a, kidie ọke mẹ je nabọ te-e. 9Ọtiọye na rọ vwọ ta nu, ọ da daji Galili.
Jesu kpo Orẹ rẹ Ogarivi
10Ẹkẹvuọvo rẹ Iniọvo rọye vwọ yanran kpo orẹ na nu, etiyin ekpuyovwi rọye da je ra, ọ vwẹ oma phia-a ẹkẹvuọvo vwẹ odjahọ. 11Ihwo ri Ju na ke guọnọ vwẹ orẹ na, tanẹ, Tivọ ọ epha? 12Kẹ ayen guẹ huhuhu vwẹ ohri rẹ ihwo na. Yẹ evo ra tanẹ, Ohwo esiri o ruẹ, Efa da rha ta, Ejo, o suẹn ihwo na ghwrẹ. 13Vwi fiki rẹ osho ri Ju na ohwo ọvuọvo gbe ta ota rọye phia-a.
14Vwẹ uherevie rẹ orẹ na Jesu da yanran kpo uwevwi rẹ ẹga na o de yono. 15Ọ de gbe ihwo ri Ju na unu, tanẹ, Mavọ ohwo nana vwo vwo erianriẹn, yo ji kpo uyono dẹvo-o? 16Ọtiọye na Jesu da kpahe kẹ ayen, uyono mẹ dia ọmẹ-ẹ, ẹkẹvuọvo ọ rẹ o ro ji vwe rhe; 17ọ da dianẹ ohwo vwo ọhọre ro vwo ru ọhọre rọye gba, ko cha riẹn sẹ uyono na obọ rẹ Ọghẹnẹ o nurhe eyẹ se ogangan robọ mẹ me vwọ ta ota na. 18Ọ rọ vwẹ ogangan robọ rọye ta ota yọ guọnọ urinrin robo rọye; ẹkẹvuọvo ọ rọ guọnọ urinrin rẹ ohwo ro jiro rhe yẹ ọye ohwo rẹ uyota, kaka efian rhere-e. 19Ọ dia Mosis re kẹ ovwan urhi na? Yẹ ovwan ọvuọvo yọnre urhi na-a. Kidie wa vwọ guọnọ ovwẹ hwe? 20Ihwo na da kpahe, Wo vwo idẹbono! Kono re guọnọ owẹ hwe? 21Jesu da kpahe kẹ ayen, Emu rẹ igbunu ọvuọvo ọ ye mi ruru, o de gbe ovwan ejobi unu. 22Mosis kẹ ovwan oyanvwe ọ dianẹ obọ ri Mosis o nurhe-e, ẹkẹvuọvo obọ rẹ ọsẹ na, yẹ ovwan yanvwe ohwo vwẹ edidjala. 23Ọ da dianẹ ovwan yanvwe ohwo vwẹ ẹdidjala, rere e vwo jẹ urhi ri Mosis ẹchọ, kẹ ivun miovwẹ ovwan ri mi vwo sivwi ekroma soso vwẹ ẹdidjala? 24We nẹ opharo guẹdjọ-ọ, ẹkẹvuọvo we guẹdjọ rẹ ọsoso.
Ọnana hẹ Kristi na?
25Ihwo ri Jerusalẹm evo da ta, Ọnana dia ohwo rẹ ayen guọnọ hwe na-a? 26Ọye hẹ etinẹ na, rọ ta ota vwẹ azagba na, yẹ ayen kpahe ota ọvuọvo kẹ-ẹ. Kẹ otu ri vwo ogangan rẹ usuo na sa riẹn nẹ ọnana hẹ Kristi na? 27Avwanre riẹn asan rẹ ohwo nana nurhe; ọke ri Kristi na da rhe, ohwo ọvuọvo cha riẹn asan ro nurhe-e. 28Kọye Jesu de ghwoghwo, ro vwo yono vwẹ uwevwi rẹ ẹga na, Wa riẹn vwẹ, wa je riẹn asan ri mi nurhe? Ẹkẹvuọvo me vwẹ ọhọrobọ mẹ rhe-e; ohwo ro ji vwe rhe na hẹ uyota, kọye ovwan jẹ riẹn na. 29Me riẹnrẹ, kidie obọ rọye mi nurhe, ọye ri ji vwe rhe. 30Ọtiọye na kẹ ayen guọnọ muẹ; ẹkẹvuọvo ohwo ọvuọvo shabọ phihọ-ọ, fikiridie ọke rọye ji rhi te-e. 31Yẹ ihwo na buebu sere gbuyota; ayen da ta, Ọke rẹ Kristi na da rhe, ko che ru eka re nọ ọ rẹ ohwo nana ruẹ na?
E Ji Ikpihwo rhi Mu Jesu
32Farisi na de nyo ihwo na ri guẹ huhuhu kpahọ, ilori rẹ irherẹn kugbe Farisi de ji iruiruo re muo. 33Etiyin Jesu da ta, Me vẹ ovwan je cha dia emerha, ki mi che rhivwi bru ọ ro ji vwe ra; 34ovwan cha guọnọ ovwẹ yẹ ovwan cha mrẹ vwẹ-ẹ; asan re me epha ovwan che se te-e. 35Ihwo ri Ju na da ta kẹ ohwohwo, Tivọ ohwo nana guọnọ ra rẹ avwanre de jẹ mrẹ? Kọ guọnọ bru otu re hrabọ ro ohri rẹ ihwo ri Grik na re yono ihwo ri Grik? 36Die ọ vwẹ ota nana ta, Wọ cha guọnọ ovwẹ yu wo cha mrẹ vwẹ-ẹ, Asan re me epha we che se te-e?
Irhie rẹ Amẹ rẹ Arhọ
37Vwẹ ẹdẹ rọ ka oba vwẹ orẹ na, ẹdẹ rode na, Jesu de mudia o de ghwoghwo, Ohwo rẹ urhuru rẹ ame hwe, e jo bru uvwe rhe rhe da. 38Ọ ro se vwe gbuyota, kirobo rẹ ọbe ọfuanfon na tare, Irhie rẹ arhọ ke djẹ nẹ udu rọye rhe. 39Asakiephana ọ ta ọnana kpahe Erhi na, rẹ otu ri sere gbuyota che vwo; kidie rhi te ọke na yọ je vwẹ Erhi na kẹ aye-en, fikiridie yẹ a je vwẹ urinrin na kẹ-ẹ.
Ogharẹ vwẹ Ohri rẹ Ihwo na
40Ọke rẹ ayen vwo nyo eta nana, evo vwẹ ihwo na da ta, Ọnana ghene hẹ ọmraro na. 41Efa da rha ta, Ọnana hẹ Kristi na. Ẹkẹvuọvo evo da ta, Kristi na kẹ Galili o che nurhe? 42Ọ dianẹ ọbe ọfuanfon na tare nẹ uvwiẹ ri Devid Krisri na che nurhe, o che nẹ Bẹtlẹhẹm rhe, ọko ri Devid diare jovwo? 43Ọtiọye na ohẹriẹ da hẹ ohri rẹ ihwo na fiki rọye. 44Evo vwẹ usun rẹ ayen da guọnọ mu, ẹkẹvuọvo ohwo ọvuọvo shabọ phihọ-ọ.
Ijesegbuyota rẹ Ihwo Ride
45Iruiruo na de rhivwi bru ilori rẹ irherẹn na kugbe Farisi na, re ta kẹ ayen, Die we gbi muo rhe-e? 46Iruiruo na da kpahe, A je mrẹ ohwo rọ ta ota kerẹ ohwo nana-a. 47Farisi na da kpahe kẹ ayen, A je phiẹn ovwan ghwru rhe? 48Kẹ otu ri vwo ogangan na eyẹ Farisi na sere gbuyota? 49Ẹkẹvuọvo vwọ kẹ otu nana, re riẹn urhi na-a na, e duvwu ayen iyori. 50Nikodimọs, rọ bru ro ra jovwo na, rọ je dia ọvo vwẹ usun rẹ ayen, da ta kẹ ayen, 51Kẹ urhi rẹ avwanre brorhiẹ hwe ohwo ye ji nyo ọ rẹ unu rọye ra da mrẹ obo ro ruru-u? 52Ayen da kpahe, Galili wo ji nurhe? Nabọ fuẹrẹ, wọ cha mrẹ nẹ ọmraro ọvuọvo che nẹ Galili cha-a.
[ 53Dohwo duwevwi rọye da ra.
Currently Selected:
Jọn 7: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
