Jọn 2

Orọvwe vwi Kana

1Vwẹ ẹdẹ rerha orọvwe kọ herọ vwi Kana vwi Galili, oni ri Jesu je hẹ etiyin rhe; 2e ji durhie Jesu vẹ idibo rọye kpo orọvwe na rhe. 3Ọke rẹ udi vwo re, oni ri Jesu da ta kẹ, Ayẹn vwo udi-i. 4Jesu da ta kẹ, E aye, die wọ vẹ ovwẹ gbi ru? Ọke mẹ ji te-e. 5Oni rọye da ta kẹ idibo rọye, Ru obo rọ ta kẹ ovwan. 6Asakiephana iche rẹ oragha esan mudia vwẹ etiyin, rẹ ihwo ri Ju vwọ họ ẹgua nẹ oma, usiobọ rẹ ame uje eyẹ ọghan re vọn ọvuọvo. 7Jesu da ta kẹ ayen, Vo ame vọn ichẹ na. Ayen de vo ame vọn ayen te unu. 8Ọ da ta kẹ ayen, Gba jẹ rhe, re we muo rhe omuidi rẹ orẹ na. Ọtiọye ayen de muo. 9Ọke rẹ omuidi rẹ orẹ na vwọ davwe ame re hirhe phihọ udi na, ọ riẹn asan ro nurhe-e (yẹ idibo re jẹ ame na riẹnre), omuidi rẹ orẹ na de se ọshare rẹ ọpha na. 10Ọ da ta kẹ, Udi ọvwevwerhe ọye kohwo kohwo ka jẹ karo; ọke rẹ udi de mu ihwo re, kẹsiẹye a ke vwẹ idi ebrabra cha; ẹkẹvuọvo wo si udi ọvwevwerhe nana nu rhi te ọke nana. 11Ọnana, hẹ oka rọye rẹsosuọ, ri Jesu ruru vwi Kana vwi Galili, ọ da vwẹ urinrin rọye phia; idibo rọye de segbuyota.

12Rẹ ọnana vwọ wan nu o de kpo Kepanọm, vẹ oni rọye kugbe iniọvo rọye kugbe idibo rọye; ayen da dia etiyin emerha.

Ephorho rẹ uwevwi rẹ ẹga na

(Matiu 21.12-13; Mak 11.15-17; Luk 19.45-46)

13Ewanvrẹn ri Ju si kẹri re, Jesu de kpo Jerusalẹm. 14Vwẹ evun rẹ uwevwi rẹ ẹga na, Ọ da mrẹ ihwo re shẹ irhuẹn kugbe igodẹ kugbe ilekuku, kugbe ihwo ri wene igho vwẹ oghwa rayen. 15Rọ vwọ reyọ ufi vwo me ophiaphiẹ, ọ da djẹ ayen ejobi, te igode te irhuẹn, nẹ uwevwi rẹ ẹga na; o de rhurie igho rẹ iwene-igho na she ọ da bọnvwọn imẹjẹ rayen rhu. 16Ọ da ta kẹ otu re shẹ ilekuku na, Si imu nana nẹ etinẹ; wo vwẹ uwevwi rẹ Ọsẹ mẹ vwo ruẹ uwevwi rẹ eki-i. 17Idibo rọye da karohọ nẹ e siro jovwo, Oruru rẹ uwevwi wẹn che mu uvwe rọ. 18Ihwo ri Ju na da ta kẹ, Didi oka wo se dje kẹ avwanre wo vwo ru onana? 19Jesu da kpahe kẹ ayen, Guọghọ uwevwi rẹ ẹga nana, vwẹ ẹdẹ erha ki mi muo vi. 20Ihwo ri Ju na da ta, Ikpe ujuvẹ gbẹ esan a vwọ bọn uwevwi rẹ ẹga nana, kọye wo se mu vi vwẹ ẹdẹ erha na? 21Ẹkẹvuọvo ọ ta ota kpahe uwevwi rẹ ẹga rẹ oma rọye. 22Ọke ra vwọ kparọ vrẹn nẹ ughwu nu, idibo rọye da rhe karohọ nẹ ọ je ta ọnana; ayen de se ọbe ọfuanfon na gbuyota kugbe ota na ri Jesu tare.

Jesu Riẹn udu rẹ Ihwo ejobi

23Asakiephana ọke rọ vwọ hẹ Jerusalẹm vwẹ ọke orẹ rẹ ẹwanvrẹn na, buebu de se odẹ rọye gbuyota vwẹ ọke rẹ ayen vwọ mrẹ eka ro ruru; 24ẹkẹvuọvo Jesu ghwa gba oma rọye vwra ayen nọ-ọ, 25fikiridie ọ riẹn ihwo ejobi ọ gbe guọnọ nẹ ọvuọvo dia oseri kẹ ohwo-o; kidie ekpuyovwi rọye riẹn obo re hẹ evun rẹ ohwo.

Currently Selected:

Jọn 2: UBV77

Highlight

Copy