Mark 16

Jisus mudaji kwane̩

1E̩gba kʼo̩jo̩ uñmi lale, Me̩ri Magdalini kpai Me̩ri iye Jeme̩s, kpai Salome fʼe̩wñ ki akpo ojoji ojoji la todu ku ma lewa fo̩ nyʼoku-wñ. 2Odudu odudu ef o̩jo̩ ejodudu ef o̩jo̩ mebie, ma wʼugbo oji e̩gba kʼolu adufu. 3Ma naka ñw o̩la-ma, kakini, E̩ne̩ ali okuta le̩ bʼalu oji te̩ ñw a? 4Taku ma chʼeju nyate̩, ma go abu kʼokuta le̩ muli ubi; todu i nana tabale. 5Abu ku ma gudu nyʼef oji, ma li okolobiaʼka ki gugu o̩wo̩ awo̩to̩, otogbo efufu dʼo̩la-wñ; tak e̩gahi-wñ fu ma mu. 6Oñ i ka ñwu ma, kakini, Awuwu ki mu me̩ n; me̩ feju Jisus, abo Nazare̩t, ku ma du kamoli le̩; i mudajikwane̩ me̩; i dʼemi n; me̩ go, ugbo ku ma dʼu dachi de̩! 7Me̩ muda nalo, ku me̩ ka ñw amako̩che̩-wñ kpai Pita kakini, I atʼume̩ o̩gba nyi Galili; o̩mo̩ ame̩ ali u, alu kʼi ka ñwu me̩. 8Ma kwodufu oñ ma ra bʼoji te̩; todu o̩la-ma chane̩ ega, ibe-ma ño̩ mukpatuka ge̩; ma ka abu du ñw e̩ne̩ du n; todu ma chʼokpo tabale.

[ 9E̩gba kʼi kwane̩ odudu odudu o̩jo̩ ejodudu ef o̩jo̩ mebie, i tejugede ñwu Me̩ri Magdalini ejodudu, owñ chʼe̩ne̩ kʼi fʼamebili mebie ne kwef uwñ dufu le̩. 10I lenaka ñw abo ku ma jʼugbo-wñ akwoubi, abu ku ma jʼadaido̩ ku ma la araku. 11Tak e̩gba ku ma gbo̩ ka kʼi deju, kʼowñ ño̩ fʼu li, ma ko̩ edo̩ rʼochochi.

12Tak anubi e-le̩, i kwotejugede o̩la ojoji ñw abo meji ef uma, abu ku ma alule̩ nyʼegbili. 13Tak abo le̩ kwʼo̩mo̩ mʼu duka ñw abo ki bo̩; ma la ke̩do̩nʼo̩la-ma ni ge̩.

14Ubi le̩ i tejugede ñw amame̩gwaka onugo, abu ku ma chekukane̩ ajʼuje̩wñ; oñ i du eke̩do̩no ku ma ko̩ eke̩do̩no kpai ugbiti e̩do̩-ma kicha ñwu ma, todabu ku ma ma ke̩do̩nʼo̩la abo ku ma fʼowñ li abu kʼi mudajikwane̩ n. 15Tak i ka ñwu ma kakini, Me̩ lo tef ile̩ du, ku me̩ natakoya uche̩nyo̩ ñw e̩wñ du kʼO̩jo̩ nyi. 16Ma ajadu e̩ne̩ ki ake̩do̩nʼo, ku ma la chʼo baptism. Ma muda akpʼe̩ne̩ ki ako̩ eke̩do̩no abi. 17Ujiwe ki alebʼabo ku ma ke̩do̩nʼo la jo̩-i: ma ane amebili dufu ef odu-mi; ma ako̩la alu ichi tito̩ ojoji ojoji; 18ma amʼamejo̩ ko nʼo̩wo̩; i la che̩wñ ku ma ñmo̩ e̩wñ ki akpone̩, i nʼugbo du kʼi ache ma abu du n; ma akʼo̩wo̩ nʼoji ame̩no̩ga, taku ma anʼo̩lafia.

19Abe̩le̩ e̩gba kʼOndu Jisus ko̩la ñwu ma kpa, ma mʼowñ gba tʼefojale, oñ i kwogugu o̩wo̩ awo̩to̩ O̩jo̩. 20Tak abo le̩ ledufu atakoya ugbo du, Ondu la bʼuma chuko̩lo̩, i je̩ ñw O̩la le̩ lonyane̩ lef ujiwe ki tʼo̩ ubi.]

Currently Selected:

Mark 16: IGL70

Highlight

Copy