Matiu 16

Jisus ko̩ edʼujiwe ñwu ma

1Tak amaFarisi kpʼamaSadiusi lewa ajʼo̩ ma, oñ ma tʼowñ ene kʼi dʼujiwe kwʼefojale ña ma. 2I muda dohi ñwu ma kakini, Ojale gu una te̩ gaa e̩gba olane̩, me̩ kakini, Ane̩ muda gboo; 3ojale la kpa gaa odudu, me̩ kakini, Ane̩ nyo̩ eñini n, gʼakpa ki jukpa te̩. Me̩ la meju eñwa eju ojale go, me̩ neke mejuma ujiwe adiko adiko n? 4Abo̩gba bibi kpʼamajo̩ko̩ kpʼamache̩ño̩ya feju ujiwe; ma la adʼujiwe du ñw u n, chai ujiwe e-Jona. Tak i tʼuma no̩ oñ i le e-wñ.

Jisus kicha ñwu ma tod ejuchubi-ma

5Oñ amako̩che̩-wñ lewʼej udaba, ma la gbenyo̩ uje̩wñ ene̩ wa. 6Oñ Jisus ka ñwu ma kakini, Me̩ nago, me̩ mʼo̩la-me̩ ne̩ ugbo o̩jo̩wu e-amaFarisi kpʼamaSadiusi. 7Taku ma kwolʼo̩la ef uma kakini, Tod uje̩wñ kʼa ma ne̩ wa ni de̩. 8Jisus ma, oñ i kakini, Ame̩ abe̩do̩ ekono re, e̩wñ chi ku me̩ lʼo̩la ef ume̩ todabu ku me̩ ma nʼuje̩-wñ n? 9Ame̩ mʼoji-wñ ta n, me̩ laño̩ rewa akala me̩lu e-one̩ icham me̩fa nyʼo̩gwo̩ko̩ le̩ kpʼaligada monu ku me̩ ko n? 10Kpʼakala mebie e-one̩ icham me̩lu le̩, kpʼagba monu ku me̩ ko le̩ n? 11Abile ku me̩ ma mʼoji-wñ n kakini, I chʼo̩la uje̩wñ oñ u ka ñwu me̩-i n? Me̩ muda mʼo̩la-me̩ ne̩ ugbo o̩jo̩wu e-amaFarisi kpʼamaSadiusi. 12E̩gbale̩ taku ma mʼoji-wñ kakini, I chʼo̩la emune̩ ugbo o̩jo̩wu ku ma du tʼuje̩wñ n, chai ugbo uko̩ o̩la e-amaFarisi kpʼamaSadiusi.

Pita gbalu ka ku Jisus che Kraisti

13Oñ abu ku Jisus lewa oj ane̩ Se̩saria e-Filipai, i nʼamako̩che̩-wñ ene kakini, E̩ne̩ oñ amone̩ aka kʼO̩ma One̩ che ta? 14Oñ ma kakini, Aboʼka aka ki Jo̩n kʼi ache baptism le̩; abo iche̩ka ka kʼE̩laija; abomune̩ ojoji ojoji la ka ku Je̩re̩maya, cho̩kpo̩ni e̩ne̩ʼka ef amakache̩. 15I ka ñwu ma kakini, Ama ame̩ fa. E̩ne̩ oñ ame̩ ka kʼomi che? 16Taku Saimo̩n Pita dohi kakini, Uwe̩ chʼiKraisti, O̩ma e-O̩jo̩ kʼi deju. 17Oñ Jisus dohi ka ñw u kakini, Uwe̩ gbede, uwe̩ Saimo̩n Barjona, todu o̩re̩la kpʼe̩bie̩ biʼi rʼe̩ eju n, chai Ata-mi kʼi dʼefojale. 18Omi laño̩ aka ñw e̩ ge̩ kakini, Uwe̩ che Pita, oñ oj apata le̩ u la ako̩#16:18 Ko̩—alu ku ma ko̩ unyi. ujeju abo-mi kʼu do̩; e̩wñ uro̩na alaku o̩jegu ñʼagbiti bʼowñ jo̩ n. 19Nakʼo̩ma igede ojane̩ efojale ñw e̩; oñ e̩wñ duu kʼe̩ fʼu ji ane̩-ile̩-i achʼe-kʼi chʼe̩ji efojale. Oñ e̩wñ du kʼe̩ tu ane̩-ile̩-i achʼe-kʼi chʼe̩tu efojale. 20E̩gbale̩ i hi amako̩che̩-wñ owu ku ma we eka ñw e̩ne̩ du ka kʼowñ che Kraisti.

Jisus kʼo̩la uku-wñ kpai udajikwane̩-wñ tane̩ ñwa ma

21Akwʼe̩gbale̩ Jisus chane̩ eña amako̩che̩-wñ ka kʼenyi Je̩rusale̩m e-wñ nʼechi n, kʼi ali uwa nana o̩wo̩ abogijo kpʼo̩wo̩ amagboji amatama kpʼamako̩takada, kʼekpa ma akpa, taku ma ñʼadʼu kwane̩ o̩jo̩ e̩ke̩ta-wñ. 22Taku Pita mʼowñ du, i chane̩ edejurʼu kakini, O̩jo̩ ki li ejumomi-we̩, Ondu; i nʼugbo du kʼe-le̩ ake̩re̩bʼuwe̩ n. 23Oñ i murida ka ñwu Pita kakini, Lale tʼubi-mi, Setan: e̩wñ e̩da mi hi e̩ che, todabu kʼe̩ ma dʼibe tʼe̩wñ e-O̩jo̩ n, chai tʼe̩wñ e-amone̩.

Me̩ ki fʼaire̩ o̩la-me̩ re̩

24Taku Jisus ka ñw amako̩che̩-wñ kakini, Iche̩wñ ki dʼe̩ne̩ du e̩do̩ kʼi tʼumi ubi, i ki fʼaire̩ o̩la-wñ re̩, kʼi la mʼoli uku-wñ du, kʼi tʼumi ubi. 25Todu e̩ne̩ du ki dʼe̩ e̩do̩ kʼi fʼoji o̩la-wñ jadu, i afʼu o̩wo̩ tinyo̩; oñ e̩ne̩ du kʼi la adʼoji o̩la-wñ tinyo̩ todu mi, i ñʼaliʼi. 26Todu e̩wñ chʼile-wñ kʼone̩ ki mʼile̩-i du gba nyʼo̩wo̩, kʼoji-wñ onugo la chʼofu? Abe̩k e̩wñ oñ one̩ adʼu kpailo̩ oji-wñ? 27Todu O̩ma One̩ ache kʼi wa ef ojima Ata-wñ manyʼamonuche̩-wñ, e̩gbale̩ tak i adu ñw one̩ akoji alu kʼe̩ne̩ne̩ne̩ne̩ che e̩wñ e-wñ. 28Ami, naka ñwu me̩ kakini, Iche̩ka jʼef abo ku ma dago emi-i ki ma nʼugbo du ku ma ñʼama alu kʼuku de̩ n, gbogbo wʼe̩gba ku ma li abu kʼO̩ma One̩ awa ef o̩da ojane̩-wñ.

Currently Selected:

Matiu 16: IGL70

Highlight

Copy