Jo̩n 18

Ma fu Jisus mu

1Abu ku Jisus fʼe-kide̩ ka owñ kpai amako̩che̩-wñ dufu tʼudaba ukpolo Ke̩dro̩n, ugbo kʼuche̩ de̩, owñ kpai amako̩che̩-wñ mugudu tef uwñ. 2Judas, e̩ne̩ ki adʼuwñ ñwu ma mu, ño̩ chema ugbo le̩, todabu ku Jisus kpai amako̩che̩-wñ jeju o̩mo̩ o̩gbe̩nugbe̩. 3Todule̩ abu ku Judas mʼuche̩ amiso̩jaʼka kpai abimo̩to̩ kwʼo̩wo̩ amagboji amatama kpai amaFarisi gba, i nʼomutula kpai e̩mu kpai e̩wñ ido̩na ogu awa o̩mo̩. 4Todule̩ abu ku Jisus chema e̩wñ du ki awa abʼowñ ma, i ledufu oñ i ka ñwu ma kakini, E̩ne̩ me̩feju? 5Madohi ñwu kakini, Jisus abo Nazare̩t. Jisus ka ñwu ma kakini, Omi de̩. Judas, e-kʼi adʼuwñ ñwu ma mu, la dago efu ma ge̩. 6Todule̩ abu kʼi ka ñwu ma ka kʼomi de̩, ma lʼubi ubi oñ ma lewa nʼane̩. 7Todule̩ i ño̩ dabi tʼuma ene ge̩ kaikini, E̩ne̩ me̩ feju? Oñ ma ka ñw u kakini, Jisus abo Nazare̩t. 8Jisus dohi kakini, U ka ñwu me̩ ka kʼomi de̩. Todule̩ iche̩wñ ku me̩ feju mi, me̩ tʼabo-i no̩ ku ma lo ma, 9todu kʼo̩la kʼi ka kakini, Abo kʼe̩ ko ñwu mi le̩ u je̩ ñw e̩ne̩ du efu ma lenyo̩ n, ki che̩ kpa. 10Todule̩ abu ku Saimo̩n Pita nʼugbada i mʼu wo̩ oñ i fʼadu agboji amatama da, i la mʼeti-wñ awo̩to̩ la. Odu adu le̩ la ko̩ Malkus. 11Todule̩ Jisus ka ñwu Pita kakini, Mʼugbada du tunyʼako̩-wñ; ago kʼAta du ñwu mi i nʼugbo du kʼu nañmo̩ ge̩ n?

12Todule̩ uche̩ amiso̩ja kpai onu-ogu kpai abimo̩to̩ e-amaju le̩ fu Jisus mu, ma la fʼu ji; 13taku ma mʼu du nyʼugbo Anas ejodudu, todu owñ chʼata o̩ya Kayafas, e-kʼi chʼagboji amatama o̩do̩ le̩. 14Kayafas le̩ la chʼe̩ne̩ ki tʼohio̩la ñwu amaju ka ki chenʼile kʼone̩ okate ki leku todu amone̩.

Pita fʼaire̩ Jisus re̩

15Oñ Saimo̩n Pita kpai ako̩che̩ omune̩ʼka tu Jisus ubi. Agboji amatama la chema ako̩che̩ e-le̩, oñ i gudu kpai Jisus tef anuku atama le̩. 16Pita muda dago alugbana o̩do̩da. Todule̩ ako̩che̩ omune̩ le̩, e-kʼagboji amatama chemʼo̩, ledufu oñ i ko̩la ñw onobule̩ ki adʼalugbana tak i mu Pita du wʼejefu. 17Todule̩ imo̩to̩ onobule̩ ki adʼalugbana le̩ ka ñwu Pita kakini, Uwe̩ ño̩ dʼef amako̩che̩ e̩ne̩ le̩ ge̩? Owñ le̩ kakini, U dʼefu ma no. 18Abu ku ma fʼuna-ige̩ ko omadu kpai abimo̩to̩ dago jʼo̩mo̩ todabu kʼafu akpa, oñ ma jʼawuna; Pita la dago efu ma awuna.

19Todule̩ agboji amatama tu Jisus ene o̩la amako̩che̩-wñ, kpai o̩la e̩wñ kʼi akone̩. 20Jisus dohi ñw u kakini, Omi te̩tako̩la ejugede ñw abile̩; omi ko̩ ma ef unyi ujeju kpai ef unyi O̩jo̩ ugbo kʼamaJu chaka wa jeju e̩gba du, u la ko̩la e̩wñ du maja n. 21E̩wñ chi kʼe̩ tʼumi ene? Tʼabo ki gbʼo̩la e̩wñ kʼu ka ñwu ma ene; go, abo-i chema e̩wñ kʼomi ka. 22Abu kʼi fʼe-kide̩ ka imo̩to̩ʼka ki dago o̩mo̩ fʼawo ko̩ Jisus, i kakini, Abu kʼe̩ dohi ñw agboji amatama de̩-i? 23Jisus dohi ñw u kakini, I chʼo̩la e̩bie̩ne̩ u ka le̩ mak e̩ gbibenu e̩bie̩ne̩ kʼi che, i la chʼo̩me̩me̩le̩ e̩wñ chi kʼe̩ dʼo̩wo̩ gwo mi? 24Todule̩ Anas mʼowñ du kpuche̩ alu kʼi che̩ji le̩ nyʼugbo Kayafas, agboji amatama.

25Saimo̩n Pita la dago awuna. Todule̩ ma ka ñw u kakini, Uwe̩ ño̩ dʼef amako̩che̩-wñ ge̩? E̩ne̩ le̩ raire̩, i kakini, U dʼefu ma no. 26E̩ne̩ʼka ef amadu agboji amatama, kʼi chʼefu e̩ne̩ ku Pita mʼeti-wñ la le̩, kakini, Omi li we̩ ef uche̩ le̩ kpai owñ n? 27Todule̩ Pita ño̩ dabi raire̩ ge̩; ababale̩ aiko̩ la ko̩.

Jisus wʼo̩gba Pailat

28Todule̩ ma du Jisus kwugbo Kayafas alo tef unyi Praito̩rio̩n, odudodudu i la che. Ama le̩ la gudu tefu Praito̩rio̩n n, tode̩gba kʼo̩la-ma adaji, chai kʼama ki je̩ Elaloji le̩. 29Todule̩ Pailati ledufu wʼo̩do̩da ugbo ma, oñ i kakini, O̩la e̩wñ me̩ du dʼe̩ne̩-i ajo̩? 30Ma dohi ka ñw u kakini, Owñ le̩ ma chʼe̩ne̩ ki ache e̩bie̩ne̩ n, a ma dʼowñ ñw e̩ n. 31Todule̩ Pailati ka ñwu ma kakini, A me̩ mʼowñ du ku me̩ kajo̩-wñ teju o̩lo̩da e-me̩. AmaJu ka ñw u kakini, O̩da je̩ ñwu wa kpʼe̩ne̩ du n; 32todu kʼo̩la Jisus ki che̩, owñ chʼe-kʼi ka kʼi du jiwe alu kʼuku kʼi ache kʼi ku de̩.

33Todule̩ Pailati ño̩ dabi gudu tef unyi Praito̩rio̩n, oñ i fu Jisus do̩, i la ka ñw u kakini, Uwe̩ chʼOnu amaJu? 34Jisus dohi kakini, Uwe̩ gʼe̩do̩la-we̩ ko̩la kide̩? abe̩k abomune̩ kʼo̩la-mi ñw e̩? 35Pailati dohi kakini, Omi che Ju? Abuche̩ichi e-we̩ kpai amagboji amatama inʼuwe̩ du ñwu mi; ab e̩ che ke? 36Jisus dohi kakini, E̩te̩ o̩da Ojane̩ e-mi chʼile̩ kide̩ n. E̩te̩ o̩da Ojane̩ e-mi ma chʼe-ile̩ kide̩, abimo̩to̩-mi ma fʼeju gbiti ajuja todu ku ma ki we edu mi ñw amaJu; ama o̩da Ojane̩ e-mi dʼemi fa-i n. 37Todule̩ Pailati ka ñw u kakini, Mak onu we̩ che ke? Jisus dohi kakini, Uwe̩ ka kʼu chʼonu. Todu e-kide̩ ma bi mi, tod e-kide̩ oñ u lewʼef ile̩, todu kʼu gbʼochochi ibenu. E̩ne̩ du kʼe̩te̩-wñ chʼochochi agbʼomu-mi. 38Pailati ka ñw u kakini, E̩wñ chʼochochi?

Abu kʼi fʼe-kide̩ ka, i dabi dufu nyʼugbo amaJu, oñ i ka ñwu ma kakini, Omi li o̩la du kʼi fe̩ n. 39I muda chenʼe̩wñ o̩gu ku ma te̩tache ñwu me̩, todu kʼu tʼe̩ne̩ʼka no̩ tane̩ ñwu me̩ ef Elaloji: todule̩ ame̩ neku kʼu natʼOnu amaJu no̩ tane̩ ñwu me̩? 40Todule̩ ma dabi kpogu kakini, I chʼe̩ne̩ kide̩ n, chai Barabas. Barabas le̩ la chʼadinya.

Currently Selected:

Jo̩n 18: IGL70

Highlight

Copy