Jo̩n 10

E̩ne̩ ki nyo̩ ki adide amala

1Ami, ami, naka ñwu me̩ kakini, E̩ne̩ ki ma le alugbana iga-ala gudu tef uwñ n, kʼi muda ate̩gu le ugbo omune̩ wa, e̩ne̩ le̩ chʼajoji kpai adinya. 2Ama e̩ne̩ ki agudu lʼalugbana, chʼadide amala. 3Adaku abi o̩na ñw e̩ne̩ le̩, amala la agbʼomu-wñ; oñ i ado̩ amala e-wñ odu okoka, tak i ako ma dufu. 4E̩gba du kʼi ne̩ e-i ki chʼe-wñ dufu i atʼuma o̩gba alo, oñ amala le̩ atʼowñ ubi; todabu ku ma chema omuko̩la-wñ. 5I la nʼugbo du ku ma tʼe̩nomune̩ ojoji ubi n, ma la ara bʼo̩ te̩; todabu ku ma ma ma omuko̩la abomune̩ ojoji n. 6Jisus kpʼita kide̩ ñwu ma; abo le̩ muda mʼoji e̩wñ ki che kʼi ako̩la ñwu ma n.

7Todule̩ Jisus ño̩ dabi ka ñwu ma kakini, Ami, ami, naka ñwu me̩, ka kʼomi chʼalugbana amala. 8Abo du ku ma wa o̩gba mi le̩ chʼamajoji kpʼamadinya; amala muda gbo̩la-ma n. 9Omi chʼalugbana; iche̩wñ kʼe̩ne̩ du guduwa lefu mi ma ajadu-wñ; tak i anyʼejefu, i adufu, oñ i ali ije̩ kʼi je̩. 10Ajoji awa ofo n, chai todu kʼi joji, kʼi la fʼe̩wñ kpa, kʼi ño̩ kpʼe̩wñ bie̩; omi lewa todu ku ma ki nʼiñmi, ku ma ki nʼe̩ ololo. 11Omi chʼadide o̩me̩me̩le̩ ki ade amala; adide o̩me̩me̩le̩ adʼoji-o̩la-wñ tinyo̩ tod amala. 12E̩ne̩ ku ma rʼo̩me̩ ñw u, kʼi ma chʼamala e-wñ onugo i ade n, i li abu kʼogu awa tak i atʼamala no̩, oñ i ara, tak o̩gu le̩ adʼuma inya, oñ i akpa ma tuka; 13todabu kʼi chʼe̩ne̩ ku ma rʼo̩me̩ ñw u, kʼo̩la amala le̩ ma wʼowñ eju n. 14Omi chʼadide e-o̩me̩me̩le̩ ki ade amala; u chema e-mi, e-mi la chemʼomi ge̩, 15alu kʼAta chema mi, kʼomi laño̩ chema Ata; kʼu nadʼoji-o̩la-mi tane̩ tod amala. 16U laño̩ chenʼamala omune̩, e-ku ma ma chʼabo iga kide̩ n; i ño̩ dukpe̩ kʼu naño̩ mʼabo le kowa ge̩, ama la agbo̩ omu-mi; tak ujo̩ amala amud okate, adide-ma la chʼoka. 17Tod e-kide̩ oñ Ata afe̩do̩ mi, todabu kʼu nadʼoji-o̩la-mi tane̩, todu kʼu ño̩ dabi gba ge̩. 18E̩ne̩ du la abʼumi gba n, chai omi age̩do̩la-mi adʼu tane̩. U chenʼo̩da kʼu nadʼu tane̩, u laño̩ chenʼo̩da kʼu nadabi dʼu ge̩. O̩la uko̩ kide̩ u gba ugbo Ata-mi.

19AmaJu ño̩ dabi kpe̩ru ojoji ojoji noj o̩la-i ge̩. 20Oñ amone̩ wewe efu ma kakini, I chenʼebili, imu i ahi le̩; e̩wñ chi ku me̩ gbʼo̩la-wñ? 21Abo-mune̩ kakini, Uko̩la kide̩ chʼo̩la e̩ne-bili de̩ n; ebili neke mʼeju amafeju chi?

Jisus nyʼucholo e̩wñ edaji etito̩ Je̩rusale̩m

22Oñ i mud iko ucholo e̩wñ edaji etito̩ Je̩rusale̩m; e̩gba afu o̩we̩ i che. 23Oñ Jisus do̩mo̩ alule̩ ef unyi O̩jo̩ ef atakpa So̩lo̩mo̩n. 24Todule̩ amaJu donyʼu daka, oñ ma ka ñw u kakini, Gbogbo wʼe̩gba oñ e̩ dʼonugo-wa nyʼojale kade ta? Iche̩wñ kʼuwe̩ che Kraist, ka ñwu wa pee. 25Jisus dohi ñwu ma kakini, U ka ñwu me̩, me̩ la ke̩do̩no n; uko̩lo̩ kʼomi ache ef odu Ata-mi, e-le̩ agba mi ibenu. Me̩ la ke̩do̩no n, 26todabu ku me̩ ma jʼef amala e-mi n. 27Amala e-mi agbʼomuko̩la-mi; omi la chema ma, ma la atʼumi ubi; 28oñ omi adʼiñmi ogbegbele̩ ñwu ma, i ñʼanʼugbo du ku ma alenyo̩ ogbegbele̩ n, e̩ne̩ du la adʼuma inya kwef o̩wo̩-mi n. 29Ata-mi e-kʼi mʼuma ko ñwu mi, owñ tʼe̩ne̩ du le; i la nʼe̩ne̩ du ki neke dʼuma inya kwef o̩wo̩ Ata-mi n. 30Omi kpai Ata chʼoka.

AmaJu chʼulaka-wñ

31AmaJu ño̩ dabi mʼokuta konyʼo̩wo̩ todu ku ma ro̩dʼo. 32Jisus dohi ñwu ma kakini, Uko̩lo̩ o̩me̩me̩le̩ ki kwʼugbo Ata kʼu du ña me̩ chewewe, kali e-ki che ku me̩ kʼokuta ro̩ do mi tod uwñ? 33AmaJu dohi ñw u kakini, I chʼutodu uko̩lo̩ o̩me̩me̩le̩ oñ a kʼokuta ro̩ dʼe̩-i n, chai todu akpabie̩ O̩jo̩ kʼe̩ che; i laño̩ chʼutodabu kʼuwe̩ kʼe̩chʼone̩ adʼo̩la-we̩ chʼO̩jo̩. 34Jisus dohi ñwu ma kakini, I che̩ko̩ tʼef o̩lo̩da-me̩ kakini, Omi ka kʼame̩ chʼamo̩jo̩ n? 35Iche̩wñ kʼi ka kʼabo kʼo̩lO̩jo̩ wate̩ ñwu ma le̩ chʼamo̩jo̩ ma la neke tu o̩la ki dʼef O̩takada O̩la O̩jo̩ n, 36e̩ne̩ kʼO̩jo̩ mʼefo̩ du ñw u kʼi la kpʼo̩ uche̩ tef ile̩, ame̩ ka kakini, Uwe̩ chakpabie̩ O̩jo̩, todabu kʼu kakini, O̩ma O̩jo̩ u che? 37Iche̩wñ kʼu ma chʼuko̩lo̩ Ata-mi n, me̩ ki ke̩do̩nʼomi n; 38i muda che̩wñ kʼu do̩mo̩ ache, dagba me̩ ma chaka ke̩do̩nʼomi n, me̩ nake̩do̩nʼuko̩lo̩ le̩, todu ku me̩ ki ma, kʼame̩ ki laño̩ ma gbogbo alo kakini, Ata dʼef umi, omi la dʼef Ata. 39Todule̩ ma ño̩ dabi feju emʼu; oñ i kwʼef o̩wo̩-ma le.

40Tak i ño̩ dabi le tʼudaba Jo̩rdan ugbo ku Jo̩n de̩ ache baptism e̩gba ejodudu le̩, oñ i kwogugu o̩mo̩. 41Tak amone̩ wewe wʼugbo-wñ; oñ ma kakini, Jo̩n chʼujiwe du n, ama o̩la e̩ne̩-i du ku Jo̩n ka chʼochochi. 42Oñ amone̩ wewe ke̩do̩nʼowñ o̩mo̩.

Currently Selected:

Jo̩n 10: IGL70

Highlight

Copy