Abakwane̩ 30

Amo̩ma Jeko̩b

1Tak e̩gba ku Reche̩l li ka kʼi ma bi o̩ma ñwu Jeko̩b in, i kwojogu o̩maye-wñ; oñ i ka ñwu Jeko̩b kakini, Kʼamo̩ma ñwu mi cho̩kpo̩ni naku! 2Tak e̩do̩ Jeko̩b kwane̩, i we̩do̩ ru Reche̩l. I kakini, Omi koji O̩jo̩, kʼi gbʼo̩na o̩ma ebi nyʼuwe̩? 3Oñ i kakini, Adu-mi onobule, Bilha la de̩; nyʼejefu ugbo-wñ, kʼowñ ki bi o̩ma nʼumi kʼomi kʼu ño̩ ne amo̩ma lʼugbo-wñ. 4Tak i mu Bilha, adu-wñ, du ñw u chʼo̩ya; oñ Jeko̩b le tejefu ugbo-wñ. 5Taku Bilha fefunyo̩, i la fʼo̩ma e̩ne̩ke̩le̩ bi ñwu Jeko̩b. 6Taku Reche̩l kakini, O̩jo̩ fʼajo̩-mi ka me̩, i ño̩ gbʼomu-mi i la mʼo̩ma e̩ne̩ke̩le̩ du ñwu mi; todule̩ i dʼodu-wñ ko̩ Dan.#30:6 Owñ kajo̩. 7Taku Bilha, adu Reche̩l le̩, ño̩ fefunyo̩ ge̩, i la fʼo̩ma e̩ne̩ke̩le̩ ekeji bi ñwu Jeko̩b. 8Taku Reche̩l kakini, Uja e-O̩jo̩ oñ u du bʼo̩maye-mi ja, u la fʼu du, oñ i dʼodu-wñ ko̩ Naftali.#30:8 Uja-mi de̩.

9E̩gba ku Lea li ka kʼi ma ño̩ bi o̩ma ge̩ n, i mu Zilpa, adu-wñ onobule̩ du, oñ i mʼu du ñwu Jeko̩b, kʼi chʼo̩ya-wñ. 10Taku Zilpa adu Lea le̩, fʼo̩ma e̩ne̩ke̩le̩ bi ñwu Jeko̩b. 11Oñ Lea kakini, Ojile de̩! Oñ i dʼodu-wñ ko̩ Gad.#30:11 Ojile. 12Taku Zilpa, adu Lea, ño̩ fʼo̩ma e̩ne̩ke̩le̩ ekeji bi ñwu Jeko̩b. 13Oñ Lea kakini, E̩do̩-mi bo̩ me̩! Todu amo̩ma onobule̩ ado̩ mi kʼe̩ne̩ ki gbede; oñ i dʼodu-wñ ko̩ Ashe̩r.#30:13 U gbede.

14Taku Rube̩n le tʼoko iko ku ma jʼo̩ka, i fʼe̩ro oli o̩lafe̩ li oko o̩mo̩, oñ i mʼu ko wʼugbo iye-wñ, Lea. Taku Reche̩l ka ñwu Lea kakini, E̩ bu e̩ro oli o̩lafe̩ e-o̩ma-we̩ le̩ ñwu mi, agba. 15Oñ i kakini, O̩ko̩-mi kʼe̩ gba, e̩wñ ke̩ke̩ i che eju-we̩? E̩ ño̩ tene kʼe̩ mʼe̩ro oli o̩lafe̩ e-o̩ma-mi du ge̩? Taku Reche̩l kakini, Todule̩ i abʼuwe̩ dachi odu-i koji e̩ro o̩lafe̩ e-o̩ma-we̩ le̩. 16Tak e̩gba ku Jeko̩b doji kwʼoko awa e̩gba ane̩, oñ Lea dufu aledʼo, i kakini, E̩ wʼejefu ugbo mi chuu; todu omi mʼe̩ro oli o̩lafe̩ e-o̩ma-mi du rʼo̩me̩-we̩. Tak i bʼo̩ dachi odu o̩jo̩ le̩. 17Oñ O̩jo̩ nyu Lea eti, oñ i fefunyo̩, i la fʼo̩ma e̩ne̩ke̩le̩ e̩ke̩lu bi ñwu Jeko̩b. 18Taku Lea kakini, O̩jo̩ fʼo̩me̩ ra ñwu mi me̩, todabu kʼu mʼadu-mi onobule̩ du ñw o̩ko̩-mi; oñ i dʼodu-wñ ko̩ Isakar.#30:18 O̩mo̩-wñ do̩mo̩. 19Taku Lea fʼefu omune̩ nyo̩ ge̩, i la fʼo̩ma e̩ne̩ke̩le̩ e̩ke̩fa bi ñwu Jeko̩b. 20Oñ Lea kakini, O̩jo̩ mʼukpe̩ ki nyo̩ du chʼumi ele me̩; fai o̩ko̩-mi abʼumi gugu, todabu kʼomi fʼo̩ma e̩ne̩ke̩le̩ me̩fa bi ñw u; oñ i dʼodu-wñ ko̩ Ze̩biulo̩n.#30:20 Ugugu. 21Anubi e-le̩ i la fʼo̩ma onobule̩ bi, oñ i dʼodu-wñ ko̩ Daina.#30:21 Akajo̩ (owñ kpai Dan me̩ru omune̩). 22Tak O̩jo̩ libekado Reche̩l, O̩jo̩ la nyʼowñ eti, oñ i mʼuji o̩ma ebi-wñ chi. 23Oñ i fefunyo̩, i la fʼo̩ma e̩ne̩ke̩le̩ bi, i kakini, O̩jo̩ mʼumi anyo̩ eju ko me̩; 24oñ i dʼodu-wñ ko̩ Jose̩f,#30:24 Owñ adutʼo̩. kakini, Jihofa kʼi mʼo̩ma e̩ne̩ke̩le̩ omune̩ du manyʼu ñwu mi ge̩!

25Oñ i lewatu abu ku Reche̩l fu Jose̩f bi, Jeko̩b ka ñwu Leban kakini, Tʼumi no̩ kʼu nadabi tʼe̩gu-mi, kpai ane̩-mi. 26Mʼamo̩ya-mi kpai amo̩ma-mi e-kʼomi chʼuko̩lo̩ ñw e̩ todu ma le̩ ko ñwu mi kʼe̩ je̩ ñwu mi lo; tod uwe̩ chemʼuko̩lo̩ kʼomi che ñw e̩. 27Leban muda ka ñw u kakini, Iche̩wñ kʼuwe̩ li mi eju, gugu emi ta, agba; todu kʼu go go ño̩ go ka ki chʼutod uwe̩ oñ Jihofa de̩nyo̩ ñwu mi. 28I ño̩ kakini, Fʼalu o̩me̩ kʼu nara ñw e̩ ka ñwu mi, kʼu nadu ñw e̩. 29Oñ i ka ñw u kakini, Uwe̩ chemʼalu kʼomi chʼuko̩lo̩ ñw e̩, kpai alu kʼame̩wñ ukpa-we̩ de̩ ugbo mi. 30Todu e̩wñ kʼuwe̩ ne̩ tak omi wa de̩ re, oñ i mud o̩be̩le̩ke̩te̩ jo̩-i; Jihofa la de̩nyo̩ ñw e̩ ugbo du kʼomi dʼe̩re̩ atʼo̩. E̩gba oñ omi ñʼachʼuko̩lo̩ unyi e-mi onugo ke?

Jeko̩b fʼugbeju che kʼane̩-wñ ki nyo̩gba

31Oñ i kakini, E̩wñ nadu ñw e̩? Taku Jeko̩b kakini, Uwe̩ ñʼadʼe̩wñ du ñw omi ge̩ n; iche̩wñ kʼuwe̩ ache e̩wñ-i kate todu mi mak u nadabi kʼuje̩wñ ñw ujo̩ ame̩wño̩re̩-we̩ je̩ kʼu ño̩ dejutʼo̩. 32Nale gu ef ujo̩ ame̩wño̩re̩-we̩ du eñini, kʼu mʼe̩wño̩re̩ egini adibabala kpai e-e̩kina chaka ko kpai e̩wño̩re̩ egini edudu du ki jʼef amala, kpai e-e̩kina kpai e-adibabala ku ma jʼef amewo; tak abo e-le̩ achʼe̩wñ uro̩me̩-mi. 33O̩kpakpa-mi adohi todu mi o̩jo̩ o̩na, e̩gba kʼe̩ wa tʼumi ene e̩wñ uro̩me̩-mi ki dʼo̩gba-we̩. E-du ki ma chʼadibabala kpai e-e̩kina ef amewo n, kpai e-edudu ef amala n, e-le̩ dʼugbo mi mak oji u ji. 34Taku Leban kakini, I nyo̩! i ki de̩ alu kʼe̩ ka ke. 35Tak o̩jo̩ le̩ Leban mʼamobuko̩ ku ma chʼe̩kina kpai e-adibabala ko, kpai amolewo du ku ma chʼadibabala kpai e̩kina, kpai e-du ki ne̩ efufu o̩la, kpai e-edudu du ku ma jʼef amala, oñ i mʼu ko jʼef o̩wo̩ amo̩ma-wñ e̩ne̩ke̩le̩; 36tak i mʼule̩ o̩jo̩ me̩ta du tʼagbagba owñ kpai Jeko̩b; Jeko̩b la nakʼuje̩wñ ñw ame̩wño̩re̩ Leban ki bo̩ je̩.

37Taku Jeko̩b mʼe̩to̩ oli poplar kpai e-almo̩nd kpai e-plen emimi ko, oñ i fʼo̩la-wñ po̩ e̩kina efufu, i che kʼefufu ki dʼef oli le̩ ki kwotejugede. 38Oñ i mʼoli kʼi po̩ le̩ ko dago o̩gba ame̩wño̩re̩ egini ef o̩go̩lo̩ ugbo kʼomi acha nyʼef agbada ugbo kʼame̩wño̩re̩ egini awa ñmʼomi. Oñ e̩gba ku ma wa ñmʼomi o̩ko̩ kpai o̩ya o̩mo̩. 39Tak ame̩wño̩re̩ egini le̩ fefunyo̩ ugbo oli le̩, oñ ma fʼame̩wño̩re̩ egini e̩kina kpai e-adibabala kpai e-e̩kina pepepe bi. 40Taku Jeko̩b fʼamala kpe̩ru meji, oñ i mʼeju ame̩wño̩re̩ egini le̩ ko kparu e-e̩kina kpai e-edudu ku ma jʼef ame̩wño̩re̩ Leban egini; tak i mʼujo̩ ame̩wño̩re̩ e-owñ ko jʼo̩wo̩ʼka, i la ko ma jʼef ame̩wño̩re̩ egini e-Leban in. 41Oñ i lewatu e̩gba du kʼabo ku ma chenʼukpahiu tule ef ujo̩ ame̩wño̩re̩ egini le̩ anyefu, Jeko̩b la mʼoli le̩ ko jʼo̩gba ame̩wño̩re̩ egini ef o̩go̩lo̩ ku ma jʼef oli le̩ anyefu o̩mo̩, 42ama e̩gba kʼame̩wño̩re̩ egini ku ma chʼe̩gbo wa, i la ko ma jʼefu-wñ n; abe̩le̩ abo e̩gbo chʼe-Leban, abo ku ma nʼukpahiu chʼe-Jeko̩b. 43Abe̩le̩ e̩ne̩ le̩ nana nyo̩gba ololo, i la nʼame̩wño̩re̩ egini wewe, kpai amadu onobule̩, kpai amadu e̩ne̩ke̩le̩, kpai aminyakulumi kpai amo̩ke̩ke̩te̩.

Currently Selected:

Abakwane̩ 30: IGL70

Highlight

Copy