San Lucas 17

Suk Sala'

(San Mateo 18.6-7, 21-22; San Marcos 9.42)

1Miktalu' si Jesus tu se ngak tinu'unaan, “Su ngag betang neng mekegbaal se nga getaw sek pekpekesala' mehitabu' gaid; ma'ad mekelelaat su getaw ne tendeng ri seniin, mehitabu' ne ngag betang keni. 2Melengas pa ri seniin ne iketani dliigen se gembagel neg batu ne dligisan bu' leddu'en giin tu sed dagat ay se mbaal giin ne getaran sek pekpekesala' sek sala seng miika' ne ngag bata' keni.#17.2 sek sala seng miika' ne ngag bata': sug be'et pesabut: ngak pupus awas begu pa sek pektu'u. 3Aas pekpetigaam amu ri se ngag baalen niyu!”

“Bu' mekesala'ik sementaun mu, pemaag mu giin. Bu' meddiksu' giin, pasaylu mu rema. 4Bu' mekesala' giin seni'a se kepitu puli'#17.4 pitu puli': sek tinuntulan neng migulugan ‘nda'iruni gekteben.’ sek sendaw, bu' se kada nek panahun meritu seni'a neng mektalu' ‘Pasaylu mau,’ kina'enlan nek pasayluun mu giin.”

Suk Pektu'u

5Miktalu' su nga gapustulis ri se Ginu'u, “Dugangay mu suk pektu'u nami.”

6Miksembag su Ginu'u senilan, “Bu' duunik pektu'u niyu isan maa' kitut ne dlisu neng muntasa,#17.6 Enlengay niyu su 13.19 mbaal niyu suk pektalu' se gayu keni, ‘Mbakut'a bu' mpemulaa sed dagat!’ Bu' keni mekpetuud ri seniyu.”

Su Ketendanan nek Sesugu'en

7“Penenggi', duunik sala seniyu ned duunik sesugu'enen neng middaru awas migbantay ri se nga karniru. Bu' mateng giin buwat seg binaal, telu'an mu ba giin, ‘Peksempun'a bu' aan'a?’ 8Ndi' gaid. Ngani' mektalu'a, ‘Ala, andam mu reli' suk penihapun'u, bu' ilakay mau tampan metubusu maan. Rayun peketubus'u maan, maan'a rema.’ 9Suk sala nek sesugu'en ndi' mbaya' pesalamatan tendeng sek pektumanen se ngak sugu', ndi' ba? 10Maa' run rema gamu. Bu' mibaal na niyu su dlaun nek sinugu' riin seniyu, talu' niyu, ‘Ngak sesugu'en ami bu' migbaal ma'aray se ketendanan nami.’”

Pitelen ni Jesus suk Sepulu' Tawan ne Dlai ned duuni Dleruun ri sek Panit

11Seng mikpagaw giin tu seg Jerusalem, minayan si Jesus ri sed dulunan nek Samaria bu' Galilea. 12Bu' sek pekseleren ri sek sala neg baryu, sinungkak giin nek sepulu' tawan neng midlaru seng mekeendekendek ne dleruun ri sek panit. Mingindeg ilan ra ri seng melayu'layu', 13bu' mimbeksay, “Jesus, Ginu'u! Melelaat'a ri senami!”

14Pekiita' ni Jesus senilan, miktalu' giin, “Ritu amu se ngak pari' bu' pekpe'enleng amu.”

Saanay midlaang ilan pa, mitelen ilan na.#17.14 Enlengay niyu su 5.12 15Sek pekiita' nuk sala ri senilan neng mitelen na giin, mipuli' giin tu ni Jesus. Seng mesekeg nek talu', miksaya' giin sed Diwata. 16Middempug giin ri se geksud ni Jesus bu' mikpesalamat ri seniin. Getaw ketu taga Samaria. 17Mbuus miktalu' si Jesus, “Gena' ba sepulu' tawan maing mitelen? Ta' nema suk siyam? 18Lama sakan nda'irun isan sala ri senilan neng mipuli' arun mekpesalamat ri sed Diwata gawas ri se getaw keni neg buwat se dlain neng nasud?” 19Bu' miktalu' si Jesus ri seniin, “Gindeg'a bu' uli'a na. Suk pektu'u mu giin sung mikepetelen seni'a.”

Suk Pedlegari' ned Diwata

(San Mateo 24.23-28, 37-41)

20Duma ne ngak Pariseo miksaak riin ni Jesus bu' nanu suk pedlegari' ned Diwata. Miksembag si Jesus ri senilan, “Suk pedlegari' ned Diwata gena' betang neng me'ita'. 21Aas nda'iruning meketalu', ‘Enlengay niyu, keni ra!’ awas, ‘Ritu!’ Ay suk pedlegari' ned Diwata riin na seniyu.”

22Mbuus miktalu' si Jesus ri se ngak tinu'unaan, “Matengik panahun neng mengangut amu sa'wan neng me'ita' niyu isan sala se nga gendaw sug Bata' ne Getaw ma'ad ndi' niyu ini me'ita'. 23Duuni nga getaw neng mektalu' ri seniyu, ‘Enlengay niyu, ritu giin!’ awas, ‘Rini giin!’ Ma'ad ndi' amu peritu sek pekpenengaw run nini. 24Ay maa' ne gilat ne kuminlap ri se dlangit bu' meddelaag buwat ri se dlain neg bahin pagaw sed dibaluy, maa' run rema su gendaw sek peddateng neg Bata' ne Getaw. 25Ma'ad kina'enlan neng meleget reli' ne ngak pegantusi gembiyanaan. Bibain giin ne nga getaw sek panahun keni. 26#Su Getaran se Dlaunan 6.5-8. Bu' landunig binaal nu nga getaw sek panahun ni Noe, giin remaig baalen ne nga getaw se gendaw nek peddateng neg Bata' ne Getaw. 27#Su Getaran se Dlaunan 7.6-24. Salasala ri senilan miksigi ma'aray maan, minum, bu' minsuway tampan minateng su gendaw nek sinumeled ilan ni Noe tu seg arka. Mbuus minateng sug baa' bu' dlaun nilan milemes. 28#Su Getaran se Dlaunan 18.20—19.25. Maa' rema sek panahun ni Lot, su nga getaw miksigi ra maan, minum, memenaluy, memeledya', menggimula, bu' membaal neg balay nilan. 29Ma'ad se gendaw ketu ne ginumawas si Lot sek Sodoma, middupi' ritu ne gapuy bu' asupri buwat se dlangit bu' mimatay ilan gela'. 30Giin rema ini sung mehitabu' se gendaw neng mekpe'ita' sug Bata' ne Getaw.

31 # San Mateo 24.17-18; San Marcos 13.15-16. “Se gendaw ketu, su getaw, ned diin seng melantang ne gatep neg balain, ndi' na kina'enlan menaug pa arun uwanenen su ngag betangen. Bu' sud ditu seg binaal, ndi' na kina'enlan muli' pa tu seg balain. 32#Su Getaran se Dlaunan 19.26. Pegena'ena' niyu sung mihitabu' ri sek sawa ni Lot. 33#San Mateo 10.39; 16.25; San Marcos 8.35; San Lucas 9.24; San Juan 12.25. Su ngang menugaling sek pedluwas ri se ketubu' nilan, merela'an tumu' run nini. Ma'ad su ngang merela'an ne ketubu' nilan, meluwas run nini. 34Telu'an'u amu, se gebii ketu, bu' duunid duwa' tawan neng mektepad sek pektulug sek sala nek pektulugan, suk sala uwanen bu' suk sala bilinen. 35-36Bu' duunid duwa' ne dlibun neng medligis, suk sala uwanen bu' suk sala bilinen.”#17.35-36 Sud duma ne nga kesulatan middugang: [Bu' duunid duwa' tawan neng mekterbahu ritu sek pikterbehuwan nilan, suk sala uwanen bu' suk sala bilinen, (enlengay niyu su dlibru ni San Mateo 24.40).] 37Mbuus miksaak su ngak tinu'unan, “Ta' ma, Ginu'u?”

Sinembagen ilan pibiyan ri sek penuntulen, “Bu' ta' su ngag bangkay, ritu rema mektipempen su ngang manuktalun neng maan ne ngag bangkay.”

Currently Selected:

San Lucas 17: stb

Highlight

Copy