Markusna Enjil 10

Bag. 10.

1Yesu teddoton talos Yahudiyena kellogon wide Urdunina jerro tasum. Owittiged jemachi digrichi weri tenna hawalendo jamesan. Ter aawsin nawre akurkidirsum.

2Farisichi tekk abidi targi wide tekki isigsan: „Ogicchi hiletirna tenna engi taligad?“

3Tekki jeriberu an ikke wesan. Ter rude wide wetidirsum: „Minged irgi Muse weseiru?“ 4Tir wesan: „Muse izingi decchirsum talagna waragki bajos wide taligew an.“ 5Yesu rude wetidirsum: „Inna achina kogorkaneged irgi bajtidirsum in sheriagi. 6Ama dunyana kelloton arti awsum ondi weri wide kari wekki. 7Inin joro id timbabkon wide tinengon mugosir wide tenna engi morogrin. Wide owingarigon jita habberandan. 8Ikke bundo tiri elgon owimnan. Ama jita habberim. 9Won arti jamegirsingi zol wer bagmen agad.“ 10Kan tur tenna hiranigon tekki isigsan ini jihagi. 11Ter wetidirsum: „Wer on tenna engi taligos wide owitti wekki edkin, soroskanegi tekked aawin. 12Won en wer on tenna ogicchi taligos wide owitti wekki edkin, tekkon tedder soroskanegi aawin.“

13Wide affichi werigi tekki gedimetirsan, kumosir an. Ama hirani gedimeleligi nehreirsan. Yesu ingi nalos dolkomnum. 14Wide wetidirsum: „Affitonigi mugirwe, aig abidi taw an. Wala gobrirmenwe. Mine artina mulki ingu galigdum. 15Aleged irgi wetidirri, zol artina mulkigi geblemenil ogicchod nawite, teddo tokanmunum.“ 16Tenna ogirro jamegredir wide tenna ichigi tindogor kujir barikeirsum.

17Wide ter darubkir belbungon, wer bod targi sejdossir wide isigsum: „Wo arif sere, mingi awkirin, ayar dimendigi biwirterin?“ 18Yesu tekki wetirsum: „Er ma aigi serem an aüwen? Mine wekkon seremnum, wekk anmenkin. 19Tekkon arti teran. Er sheriachigi aïyiririn?: Bemen. Wala soroskanegi awmen. Wala magmen. Wala mursiged shehdemen. Wala gudraged armen. Wide imbabkon inengongi kermeir.“ 20Rude tekki wetirsum: „Wo arif, ingu malegi anna kinakanerton hafadedagrin.“ 21Yesu tekki ururgi dolossum. Wide tekki wetirsum: „Haja habbekki er birigbun: Jurgi ennai dal malegi janos hajebuligi tidiros. Mani wattigi enna hazin bisimeranin. Wide targi aigi tebae.“ 22Ter wereged gumetakkossum wide newertigi miligred talossum. Mine tennai mal digri wer dasinged.

23Yesu tenna hawalengi ururgi wide tenna hiranigi wetidirsum: „Saï kottekki gasire sheigi kolina torar artina mulkir!“ 24Hirani tenna in wereged hayirtakkisan. Yesu owittiged rude wetidirsum: „Wo anna ogicchoni, saï kottekki gasire artina mulkir torar! 25Kamna nogar ittilena urbirked sahalum berbul werna torardogor artina mulkin tur.“ 26Hirani inged desen ajibe wide ittiwrigi wetidirsan: „Ni wer ini hallo bostakkin?“ 27Yesu tirgi ururgi wide wesum: „Zolinai esketakkimenil artinai besketakkin. Mine artinai haja male esketakkibun.“

28Butrus wide ugudi wetirsum: „Ahan ari haja malegi wakos ekki tebaedarun.“ 29Yesu rude wide wesum: „Aleged irgi wetidirrin, zol wer on anna joro wala enjilna joro ka wekki wakel, wala timbesi werigi wakel, wala tinisichi werigi wakel, wala timbab wekki wakel, wala tinen wekki wakel, wala en wekki wakel, wala affichi werigi wakel, wala ardi werigi, 30ingun agarro barin tindogochir gir imil wekki kachirton, wide timbesirton, tinisichirton, tinecchirton, wide affichirton, wide guchirton, eleken in wattir, turarigodon, wide jer tallo ayar dimendigi. 31Ama digrichi weri owolin baharandan. Wide aharigon bowolandan.“

32Darubked Urushalimgir kujburangon Yesu tinn owolgi arbusum. Tekki tebaedaligon sarkibusan. Owittiged diminde owingarigi jamegrir wide ugudi wetidirsum tekki bitaduringi: 33„Ahan ari kujburun Urushalimgir. Widegon zolna tod biselimtakkin fegirina samli dulin ichirgon wide abajilindichirgon. Tendogorgon diarked bihukmeran. Widegon tekki umachigi biselimeran. 34Tirgon tekked busuran. Wide bitukiran. Wide tendogor jumbudti bitufundurran. Wide tekki biberan. Wide toskittin ugroski bimbelkanin.“

35Wide tekk abidi tale tosan Yagubkon Hanagon, Zabadina toni. Wide wetirsan: „Wo fegir, ari abirigrun ennaiton ar birigrungi awdecchiringi.“ 36Tirgi wetidirsum: „Mingi iri abirigrun ai irgi awtidirrangi?“ 37Tekki wetirsan: „Argi iznedecchiru tegrungi, wekkon enna iyinneged wide owittigon enna mayinneged, enna mejdir.“ 38Yesu tirgi wetidirsum: „Iri aïyirmunun iri abirigrungi. Ir eskergi binirua ai dibite biniringi? Wide eskergi bisabigtakkirua sabgad ai tekked bisabigtakkiringed?“ 39Tekki wetirsan: „Beskeru an.“ Yesu tirgi wetidirsum: „Dibite ai biniringi iri binikandun. Wide sabgad ai tekked bisabigtakkiringed bisabigtakkirun. 40Ama inna tegar anna iyinneged wide anna mayinneged, in andimnum irgi tidirar, in agari tirgi allebutidirrann idindum.“

41Dimningari gijredirgi Yagubkon wide Hanagong abidi imbelsan, tinna sangadna joro. 42Yesu tirgi uwedtaïrrigi wide wetidirsum: „Iri iyirrun gebilachina ori tindogochir karab dulog akujurrangi, wide tinna duligon tirgi aürirrangi. 43Ama irgodon ikke biturubmunum. Idder dulkanegi akashil, in irgi hadmer agad.

44Wide idderton owolaningi awersil, malena nugdan agad. 45Mine zolna todton takomnum, hadimtakk an, ama hadmeri an, wide tennewertigi uskurri an digrichina joro.“

46Wide Arihagir tasan. Wide Ariharton Yesu belsum tenna hiraniged wide jema dul wekked. Wide dugur wer darubdogor beddingon agsum. Tenn erigon Bartimawus, Timawusna tod, esan. 47In gijirsum zoli nogbuli awerangi: „Yesu Nasirandi nogbun an.“ Ter wide uwe wesum: „Wo Yesu, Dawudna tod, aigi shefege!“ 48Digrichi weri jemarton garetirsan, kiter an. Ama ter owoldogor odigir uwe wesum: „Dawudna tod, aigi shefege.“ 49Yesu tebos wesum: „Uwetirwe!“ Dugurki uwetirsan: „Azime. Imbel. Ter ekki aüwen.“ 50Tenna kade degedasingi lufe shugudos Yesug abidi tasum. 51Yesu wide wetirsum: „Mingi er abirgin ekki awtirringi?“ Dugur tekki wetirsum: „Wo rabuni, nallingi.“ 52Yesu wetirsum: „Enna girro ju. Enna iman ekki gengirossum.“ Tenna saayen tenna misichi kustakkisan. Wide Yesugi darubked tebaesum.

Currently Selected:

Markusna Enjil 10: XNZ1912

Highlight

Copy