Matana Enjil 27

Bag. 27.

1Ugros belingad fegirina samli duli male, wide gebilana samligon, ittiwrigodon urki jomossan, Yesugi beru an. 2Shartiged teros Bilatus waligi kiye ojjutirsan.

3Yahuda Yesugi selimeler tendogor hukmossangi uru nalos, nedmos, riyal telatingi tekki tirsangi widegros, fegirina samli duligon wide samligongi wetidirsum: 4„Ai hatyossim irgi gew beryebulgi selimadted.“ Tir wesan: „Won min an̄dogochir dan? Er ennewertigi iyir.“ Dugugi jaman tur lufos nogsum. 5Wide jurgi tennewertigi gidossum. 6Fegirina samli duli dugugi arrigi wide wesan: „Dugugi hazinar undurar seremnum. Mine gewna dugw engad.“ 7Tir ittiwrigodon urki jomirgi sibeg agoilna gugi tekked jansan, garibina techigir. 8Terin jiradilo man gugi gewna gug an aweran olongunbokon. 9Mani wattigi timesum nebi Ermiyaged webul: „Tiri riyal talatingi arsan, teminebulna temengi, Israeln affichi teminedagsangi. 10Tirgon tidirossan sibeg agoilna guna jiradilo, arti aigi amresin nawite.“

11Yesu walin owollo wide kute tebsum. Wali tekki isig wesum: „Er aleged Yahudichina or terre? Yesu tekki wetirsum: „Er awen.“ 12Wide fegirina samli duligon wide samligon tekki ashekerangon, terwekkonged bainkomnum. 13Bilatus tekki wetirsum: „Er agijirmunum saï kottekki ekki ashekerangi?“ 14Ter tekki widegirtirkomnum wala were habbekked, wali teddeton desen ajibenbokon.

15Wali kurbusum kore nutindo esir tir werisran wekki talgetidirarki. 16Tinnaigon dasum esir shehrebul wer. Tenn erigon Barabas esan. 17Tiri jameburangon Bilatus tirgi wetidirsum: „Edi saïgi awerisrun irgi talgetidirringi? Barabaska? Wala Yesu komisbul an webulgi?“ 18Mine ter iyirossum hasedted kiyetakkitidirsingi. 19Ter wide walayana kursin dogor agingon, tenna en ishinewtir wetirsum: „Ekkon ter beryebulgonna barer wekkon damnum. Mine ai nalsim olongu anna nalun tur ugnuttichi usi werigi tenna jihar. 20Ama fegirina samli duligon wide samligon jemachigi jezmetidirsan, Barabaski talgetidir an, wide Yesugon bew an. 21Wali widegir wetidirsum: „Edi saïgi owirton awerisrun irgi talgetidirringi?“ 22Tir wesan: „Barabask an.“ Bilatus tirgi wetidirsum: „Won ai min wekki awrin Yesu komisbul an webulged?“ Male wetirsan: „Berro soligir!“ 23Wali wide wesum: „Minin miligi awingad?“ Ama tiri ju nutin uwerarro jugrian awesan: „Berro soligir!“ 24Bilatus uru nalsum wekkon nefaebumeningi, ju nutin igir torark anmenkin. Ter wide essi wekki attargi malen owollo tenna ichigi ewos wesum: „Ai in beryebulna gewirton sud erim. Ir terrun bisigtakkili. 25Gebila male widegir wide wesum: „Tenna gew an̄dogochir wide an̄n affichin dogochirum.“ 26Mani wattigi Barabaski talgetidirsum. Ama Yesugi bajos berro soligirw an kiyetidirsum.

27Walina askari Yesugi walayana kagir arejjurgi tendogor bulug malegi jamegirsan. 28Tekki wirijkidos kade gele wekki undurtirsan. 29Wide kasir kilisendi wekki mojos tenn urdogor kujurtirsan. Wide agen sha wekkon tenna iyindo undrossir tenn owolged ungos tekked aüsusan. Wide awetirsan: „Salam alek, wo Yahudichina or.“ 30Wide tendogor atufundursan. Widegon tennaiton agen shagi ared tenna urdogor tekked tekki ajomsan. 31Tekked aüsusann agabir kade gelegi dukossir tenna kadechigi undrossir, berdogor soligirw an tekked nogsan.

32Tiri belburangon ogij Kairawandi wekki abidisan. Tenn erigon Siman esan. Ingi tiri saharesan Yesuna ber, tendogor bisolitakkingi, inj an.

33Agar Juljutay an awerando — urna kidm ane teran — 34bidargi hali mararaged sawbul wekki tirsan, niy an. Ter dugergi niarki monossum. 35Yesugi soligrossann agabir tenna kadechigi bagijos kulugi tendogor injisan, mine nebiged webulgi timer an: „Anna kadechigi tinna barer bagijirgi wide anna jiban dogor kulugi injisan.“ 36Terin agabir teddo tegos tekki harsedagsan. 37Tenna urna dogogedgon bacchi wekki bajos soligredagsan, tenna zenbigi amn an: „In ter teran Yesu, Yahudichina or.“ 38Tekkodongon magas owigi soligredagsan, wekkon iyinneged, owittigon mayinneged. 39Nogbuligon tendogor jedife urigi guyigirka awesan: 40„Wo er, jamagi ugros toskir borkidos wide bigoil, ennewertigi os, er on tirna tod ekin, wide berdogorton shugur ta.“ 41Widegon figirin samli duligon abajiligon samligon teddo tebrangon tendogor usu awesan: „Echeligi aossum. 42Ama tennewertigi eskergi osarki marosum. Ter on ter Israelna or ter ekin, eleken shugur tar agad berdogorton. 43Argon tekked bamnerun. Ter artin dogor welesesum. Arti tekki eleken soke osos agad, ter on tekki adolkin. Mine ter wekosum: „Ai artina tod terrim an.“ 44Ter werechin kidtedgon magas owingari tekkodon solibuli adidsan.

45Saa gorjittirton arid kamildogor duluma wer dasum, saa iskodittinbokon. 46Saa iskodittig abidigon Yesu hisi dul wekked uwe wesum: „Eloï, Eloï, lema sabaktani?“, walagon: „Arti, arti, er ma aigi wakossum?“ 47Mando kute tebilirton weri gijredirgi wesan: „Ter Eliyagi aüwen.“ 48Tenna lehdayen tiddeton wer bod jurgi sifinja wekki injirgi hali wekked eyegros sha werdogor kujros tekki tirsum, ni an. 49Ama kewdeli wesan: „Mugos! Isso nallu, Eliya targi tekki bitalgekin.“ 50Owittiged Yesu hisi dul wekked uwos newertigi osossum. 51Tenna lehdar kade jamagi bagedagel gu owir bashtakkossum, dogorton togor junbokon. 52Aridton kerkersum. Wide kulwin gunachigon orijsan. Techigon kustakkisan. Wide tiddeton salahi dibulina jitachi digrichi weri imbelsan. 53Wide techirton belligi medine gadisebullo tosan. Wide digrichi werigi binetidirsan. 54Ama imilgi akiyel wide tekkodon dali Yesugi harsew an, aridna kerkerarki wide tekki tebaerelgongi nalos, sarke dul werro toros wesan: „Aleged in artina tod teran.“ 55Teddogon ecchi digrichi weri dasan. Wide warirton urwedagsan. Mine tiri Yesugi Jelilloton tebaedasan, tekki hadmeru an. 56Tinna barer Meryem Majdaliyagon, Meryem Yagubna wide Yusifna tinengon, wide Zabadin tonina tinengon dasan.

57Gu shareyaningad ogij berbul wer tasum. Tenn erigon Yusif esan. Tekkon Arimatiyartonum. Tekkon Yesuna hiran esum. 58In Bilatusnai jurgi Yesuna jitagi werissum. Bilatus tenna wattir amresum, jitagi tirw an. 59Yusif wide jitagi arrigi kitan hori wekked garos, tenna te erro, gunar goledagsinder, 60undros, kulu dul wekki gergijirgi ten agilgi kobos wide nogsum. 61Mandogon dasan Meryem Majdaliyagon, Meryem owittigon, ten owolged agrangon.

62Tenn asalgi, jehisadn agabir, fegirina samli duligon wide Farisichigon Bilatusnai jame targi wesan: 63„Wo wali, ar jilossun man atawihel, ter ayingon, wekosingi: ‚Ugros toskin aharro bimbelkandiy an.’ 64Amre tena harsadti ugros toskinbokon, tenna hirani ta, ugwen, jitagi maged gebilagi: ‚Imbolossum an’ wetirmendangon. In awid agabdigon owoldin dogor bikosanin.“ 65Bilatus wetidirsum: „Innai aharseli daran. Arejjurgi harsewe ir aïyirrun nawite.“ 66Tiri wide jurgi aharseliged tegi harisosir wide kulugi hatmossan.

Currently Selected:

Matana Enjil 27: XNZ1912

Highlight

Copy