Matana Enjil 17

Bag. 17.

1Ugros gorijn aharro Yesu tekkodon arejjusum Butruskon Yagubkon wide Hana timbeskongi. Wide agudan guna werdogor kujsan. 2Mando tinn owollo echelanossidirsum. Tenna koigon masil nawite ulisum. Tenna kadechigon dawi nawite aroyansan. 3Teddokollo tatidirsan Musegon wide Eliyagon. Tekkodon abaindan. 4Butrus mani wattigi Yesugodon baindigi wetirsum: „Wo tir, indo annā weleserar adelum. Er on aweriskin, keri toskigi bikojrin, wekkon endigir, wekkon Musen jiradilo, wekkon Eliyana joro.“ 5Elgon abainingon gem wer targi tagredirsum. Ter gemirtongon hisi wer bel targi wesum: „In ter teran anna tod desen dolbul. Tekked agurerin. Tekki gijirtirwe!“ 6Hirani in hisigi gijirsanna wattigi tinna koyin dogor ob digirsan sarkeged. 7Ama Yesu tirg abidi awtan wide kumir wetidirsum: „Imbelwe sarkimendungon.“ 8Tinna misichigi sokerangad zol wekkongi elkomnan, Yesu agudeg anmenkin.

9Gunarton shugurburangon Yesu weseirsum: „Zol wekkongodon bainmenwe iri nalsunged, zolna tod dielin barerton imbelinbokon.“ 10Hirani tekki isigsan: „Won mine abajili aweran: Malen owollo Eliya bitan an?“ 11Tirgi widegirtidirsum: „Eyo, Eliya targi haja malegi tenn agarro battan. 12Ama ai irgi awetidirrin, Eliya bidakosum. Wala tekki iyirkomnan. Ama tekked awsan tiri werissan malegi. Ikkegon teran zolna todted bawtakkikanin tirged.“ 13Hirani fehmesan tirgi Hana akidirilna jihar awetidirsingi.

14Jemanai tarangad ogij wer tekk abidi targi kurtichin dogor ungos tekki wetirsum: 15„Wo tir, anna todti rahme. Ter anattindum. Wide tenna odari desen gasichima. Mine gir digri wekki igir adigirton, widegir digri wekkon essin tur. 16Enna hiraninai attaringad, tekki gengirarki marossan.“ 17Yesu widegirsum: „Wo jil imankiy wide koroyebul, sittagbokon irgodon bikewidrin? Wide sittagbokon bihimleirrin? Aig abidi innegir attawe!“ 18Ter wide jezmetirsum. Newerti miligon teddoton belossum. Man ogicchod tenna watten genansum.

19Hirani wide Yesug abidi awtan tekki agudegir wetirsan: „Won ar ma in newerti miligi eske tur osmensunde?“ 20Ter widegirtirsum: „Inna imanna kinakaneged. Ai irgi aleged wetidirrin, ir on iman hardelna libi kottekki kokokrun, in gunagi wetirkrun: ‚Indoton duki bel, mando koj teb an,’ jurgi bikojtebin. Wekkongon indogochir bigasianmunum. 21In newerti milina jinsigona belmunum, salagon wide derligongedmenkin.“

22Jelillo agrangon Yesu wetidirsum: „Zolna tod ogjina ichin barer bitirtakkin. 23Wide tiri tekki biberan. Ama toskittin ugroski bimbelkanin.“ In werechi tirgi desenkiyr musulgrosirsan.

24Kafrinahumir bidarangad, derhem owingarigi aareli tale targi Butruski wetirsan: „Inna tirti derhem owingarigi buskurmunu?“ 25Ter wesum: „Buskurin.“ Kar torosingad, Yesu tenn owolgi arrigi wesum: „Mingi ennewertir awen, wo Siman? Ninaiton aridna ori makiski aarran? Tinna toninaitono? wala garibinaiton?“ 26Butrus tekki wetirsum: „Garibinaiton.“ Yesu tekki wetirsum: „Ikke bukin, tonin dogor dal damnum. 27Ama tirgi atrayantidirmendunna jiradilo essigir jurgi jakarki lufe. Kare koyalgi bel talgi morogir. Tenn agilgi kuskin, istater an aweran wekki belin. Arejjurgi tidir aigon ekkonna joro.“

Currently Selected:

Matana Enjil 17: XNZ1912

Highlight

Copy