Luka Enjil 3
3
Bag. 3.
1Jen diminde dijittir Tiberius gaisarna hukmir Bunti Bilatus Yahudiyena wali esum; Wide Hiruduskon Jelildogor kemsiren or esum. Wide Filibus timbeskon Ituriyegon wide Trakonitigonna kemsirena or esum. Lisaniaskon Abiliyen dogor kemsirena or esum. 2Hanangon wide Kayafagon fegirina samli duliy esan.
In ugresir artina were Hana Zakariyana toddogor dasum halar. 3Hana wide Urdunina hawalenir jusum, beshireirri an kidirar tobandiged wide zenbichina komsarked, 4bajbun nawre Eshaya nebina bacchir: „Gijirwe. Hisi wer aüwen halar. Tirtina darubki allewe. 5Tenna mishrachigi sewachigrirwe! Jer nutin beyen wide guna nutin bitogoyanin. Wide berianbulgon bisewayanin. Wide kororked tagbulgon binoroyanin. 6Wide zol nutin artina osarki binalin.“
7Hana wide zoli tennai kidirtakkiru an bel tali malegi awetidirsum: „Wo wisi dugurn affichi, ni irgi amintidiru artina gadabirton dosarki? 8Teri sere tobandigi awwe. Ugudi wemenwe innewertichir: ‚Ar Ebrehingi abogir koru an.’ Mine ai irgi wetidirrin, arti eske in kulwirton affichigi Ebrehingi awtirarki. 9Elekengon gambu jowin bundogor kujbun. Jowi male teri adelgi awmenil mertakkirgi igir bilufetakkin.“
10Wide jemachi tekki isigirgi wetirsan: „Won mingi awrun terre?“ 11Ter widegir wetidirsum: „Kad owigi kol komenilgi tir agad. Kalegi kolgon ikke aw agad.“ 12Mekisn idi werigon kidirtakkiru an targi tekki wetirsan: „Wo arif, min wekki awrun terre?“ 13Tirgi wetidirsum: „Webulloton dogogir armenwe.“ 14Askari werigon isig wetirsan: „Argon mine terre awrun?“ Tirgi wetidirsum: „Wekkongi zalmemenwe. Wala zol wekkongi usked widegirtirmenwe. Inna keregedgon gurebuwe.“
15Gebila erjed tebingon wide malegon tinn achigodon awesan Hanana jihar, komisbul termenkin an. 16Malegi wide Hana widegir wetidirsum: „Ai irgi essiged akidirirrin. Ama wer bitan. Ter andogor gudrakolum. Ai anna kidir istahalemnim tenna taragachina serigi kusarki. Ter teran irgi newerti gadisebulgon wide igkonged bikidirirkanin. 17Ter tenna baredigi ir kagin, tenna darki barri an, wide tenna ilegi tenna shunar jamegir undurri an, ama siltigi jugurri an ig adimenilder.“
18Ikke teran enjilged gebilagi abeshiresum. Wide werechi echeli digrichi weriged awazeirsum.
19Ama Hirudus kemsirena or, Hana tekki wabihesum an, Hirudya timbes Filibusn ēnna jihaged, wide tenna awdi milichina jiradilo, 20inin dogoged tenna milikane zidengad Hanagi arrigi habsir luf undrossum.
21Gebila male kidirtakkosingad Yesugon wide kidirtakkisum. 22Wide asalingon sime kustakkisum. Wide newerti gadisebul tendogor shugursum mine nawre. Wide hisi wer simerton wesum: „Er anna tod dolida teran. Ekked guresim.“
23Yesu ugudisin kello tenna omr jen telatini toskikiriy esum. Tekkon Yusifna todkiri esum, 24Helina tod, Matatna tod, Lawina tod, 25Melkina tod, Yanana tod, Yusifna tod, Matatiyana tod, Amusna tod, Nahumna tod, Haslina tod, 26Nanjaina tod, Maatna tod, Matatiyana tod, Shimina tod, Yusekna tod, Yodana tod, 27Yuhanana tod, Risana tod, Zarubbelna tod, 28Shaaltielna tod, Nerina tod, Melkina tod, Adina tod, Gusamna tod, Elmadamna tod, Ema tod, 29Yesuna tod, Aliazarna tod, Yurimna tod, Matatna tod, Lawina tod, Simanna tod, Yahudana tod, 30Yusifna tod, Yunamna tod, Alyagimna tod, 31Malyana tod, Minanna tod, Matatana tod, Natanna tod, Dawudna tod, Yesana tod, 32Ubedna tod, Buasna tod, Salmana tod, Nahshunna tod, Aminadabna tod, Aramna tod, 33Hasrunna tod, Farisna tod, Yahudana tod, 34Yagubna tod, Isaagna tod, Ebrehinna tod, Tarahna tod, Nahurna tod, Sarukna tod, 35Raünan tod, Falajna tod, Abirna tod, Salihna tod, 36Kinanna tod, Arfakshadna tod, Samna tod, Nuhna tod, Lamekna tod, 37Metusalehna tod, Aknukna tod, Yaridna tod, Mahlilna tod, Kinanna tod, Anushna tod, Setna tod, 38Ademna tod, artin tod.
Currently Selected:
Luka Enjil 3: XNZ1912
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1912.
