Luka Enjil 16

Bag. 16.

1Tenna hiranigi wide wetidirsum: „Zol berbul wer dasum. Wekil wekkon kosum. Tekki wetirsan: ‚Ter enna sheigi adabrosn an.’ 2Ter uwe edtargi wetirsum: ‚In minde ai edderton agijirrin? Enna wekalana idigi awos. Mine er owittiged eskergi biwekilanmunum.’ 3Wekil tennewertigodon wesum: ‚Mine awrin terre, anna tirti wekalagi annaiton arekkin? Ai guna jeligi eskemnim. Beddarki aïstaherin. 4Ai iyirossin mine bawringi, mine, ai aziltakkoskirin, aigi tinna kachir bijamegirran.’ 5Ter wide tenna tirtina deyanigi wer nutingi uwedtargi wetirsum, koyaldigi: ‚Anna tirti endogor mukkottekki kon?’ 6Wetirsum: ‚Zetna bata imil wekki.’ Tekki wetirsum: ‚Enna senedti ared tegos shuttandigi hamsingi baju.’ 7Owittigi wetirsum: ‚Won er mukkotter endogor dan?’ Ter wesum: ‚Mashe imil wer? Tekki wetirsum: ‚Enna senedti ared tamaningi baju.’ 8Sheina tirti wekil miligi medhesum, mine ter erigked tennewertigi osingad. Minergi in jilna toni dawin affichin dogor erigkattichim tinn awdir.“

9„Aigon irgi wetidirrin, tiwrichi werigi innewertichir awwe shei milirton, mine, irgodon mirri ankin, irgi kerichi dimendichir bijamegrirranna joro.“

10„Gelillo eminanbul digrirgon teran eminum. Wide gelillogon hunel digrirgon teran haïnum. 11Ir on shei milir eminanmenkurun, ni terre irgi alen dogor bebririn? 12Widegon ir on zolindir eminanmenkurun, ni terre irgi indanilgi bitidirin?“

13„Wala nugud wer tirti owigi eskergi bijelimnum. Mine wekki tisos owittigi bidolin, walagon wekki jamegred owittigi biwaken. Ir eske artigon dugugongi bijelimnun.“

14Farisichigon in malegi agijirsan. Won tiri sheigi adolili ter esan. Inin joro tendogor aüsusan. 15Ter tirgi wetidirsum: „Ir terrun innewertichigi aseregrirrun zolin owollo. Ama arti inn achigi aïyirbun. Mine zolinai sokebul artin owollo garum.“

16„Sheriagon nebichigon Hanan bokodon esan. Man wattirton artina mulkiged abeshirtakkin. Wer nutingon tekk abidi abodton.“

17„Ama aridton simegonna nogar sahalum sheriarton amara wer nogsindogor.“

18„Wer nutin tenna engi mugos owitti wekki edkin, soroskanegi aawin. Wide wer nutin taligebul wekki edil soroskanegi aawin.“

19„Zol berbul wer dasum. Wide kade gelegon kitangongi aündursum. Wide numegidir wide norogidirgon aïbusum. 20Wide fegir wer dasum. Lezar esan. In manina babnai lufe busum koriged jombungon. 21Wide aïshtehesum berri an kirtichi berbulna kalen agarro digirbulirton. Weli taka tenna korigi agaysan. 22Man id fegir diossum. Malaikarigon Ebrehinna ogirro ebbijusan. Wide berbulgon diossum. 23Wide kuytakkossum. Dielin agarro azabir dabungon tenna misichigi kus uru nalsum warirton Ebrehingi, wide Lezarkon tenna ogirro agingi. 24Ter uwergi wesum: ‚Wo ambab Ebrehin, aigi rahme, wide Lezarki ishin, tenna subagi essiged neyigiros anna nedti orokegr an. Mine ai jugburin in igna nediged.’ 25Ebrehin wesum: ‚Wo anna tod, jiledta er enna dunyadir herki nalossingi, Lezarkon korigi. Elekengon ter tabebun, ekkon ajugtakkin. 26Inin masirgon argon ekkonna barer doli dul wer dan, mine indoton irg abidi juwarki wersili eskemendangi, wala teddo dalirton arg abidi tamendangi.’ 27Wide wesum: ‚Ai ekki abeddirin, ikke bundo, wo ambab, Lezarki ambabna kag abidi ishinu — 28mine ai timbes dicchi korin — tirgi shehdetidir an, tirgon indo in jugarn agarro tamendanna jiradilo.’ 29Ebrehin tekki wetirsum: ‚Tinnai daran Musegon wide nebichigon. Tirgi gijirtidirw agad.’ 30Ter wesum: ‚Ila, wo ambab Ebrehin, wer dielirton tirg abidi imbel jukin, bituberan.’ 31Tekki wetirsum: ‚Tir on Musegon wide nebichigongi gijirtidirmenkiran, dielirton wer imbel jukingon, bigijirtirminan.“

Currently Selected:

Luka Enjil 16: XNZ1912

Highlight

Copy