Hanana Enjil 6

Bag. 6.

1Manin aharro Yesu wawsum Jeliln essin jerkir. In essina erigon Tiberyandiy eran. 2Jema digri wer tekki tebaesum, ter odilir awsinna ay achigi nalosirgi. 3Jebel werdogor Yesu darirgi teddo tenna hiranigodon tegsum. 4Basa, Yahudichina kore, awt esum. 5Yesu tenna misichigi soke wide uru nalsum jema digri wer tekk abidi sugbungi. Filibuski wide wetirsum: „Sayerton kal wekki bijandun, ingugi kalw an?“ 6Ter ikke wesum, tidder dalgi nalli an, ter iyirbungon ter bawingi. 7Filibus rudetirsum: „Dinar iml owina kal wekki bawtidirmunum, wer nutin guda kinatoddekki arkin. 8Wer tenna hiranirton wetirsum, tekkon Andrawus ter esum, Siman Butrusna timbes: „Indo tod wer dan. 9Tekkodon serinna tube dicchon wide kare owigon daran. Ama ingon minde in jemana joro?“ 10Yesu wide wesum: „Zoligi agidirwe!“ Mandogon magise digri wer dasum. Ogji tendogor tegsan. Tinna idigon eluf dij esum. 11Wide Yesu tubechigi arrigi shukrossinn aharro hiranigi tidirsum. Wide hirani agiligi tidirsan. Ikkegon kare owirton tir birigsan nawite. 12Beressann aharro tenna hiranigi wetidirsum: „Tomattichi kewidbuligi jamegirwe, teddeton wekkongi dabmen an.“ 13Jamegir shibir diminde owigi eyegirsan, tube dijna tomattichi kewidbulirton.

14Zoli ayachi Yesu awsinigi nalosirgi wesan: „In aleged nebi alamir bital teran.“ 15Ama Yesu iyiros tiri targi, tekki arrigi tindogochir orkirw an, tinnaiton tennewertig os jebelgir agudan kujsum.

16Share tangad tenna hirani essigir shugursan. 17Wide kubir tosan, essin jerkir wawirw an, Kafrinahungir. Dulumanosgongessum. Yesugon man wattigi elgon tinnai takomnum. 18Essigon turugked desen hijebusum. 19Gulwa are dicchi wala telatingi wawossann agabir urusan Yesu essin dogor talebungi wide kubk abidi awtanbungi. 20Nalos sarkisan. Ter tirgi wetidirsum: „Ai terrim, sarkimenwe!“ 21Birigsan kubir tangi. Tenna saayengon kub arid tiri birigbusangi duressum.

22Ugros owittir jema essin jerro darel uru nalsum kub wer damensingi, habber, hirani tedder tokosang anmenkin. Yesugon ter kubir hiranigodon tomensingi iyirsan, ama hirani agudan wawsangi. 23Ama kubli weri Tiberyarton takosan, kalgi kalsanna agarn awtir tirti shukresinn agabir. 24Jema uru nalsum Yesu mandomeningi wala tenna hirani. Tirgon wide kublir torgi Kafrinahumir tasan, Yesugi kashrangon. 25Teddo essin jerro eledirgi wesan: „Wo rabi, sittagki er indo tam?“ 26Yesu rude wetidirsum: „Aleged, aleged irgi wetidirri, ir aigi akashmunun ayachigi nallungad, ama kalloton kalligi beredrungad. 27Kale nogbuldigir jelimenwe, ama kewidbuldigir jeliwe, tekkon ay ardi teran. Tekki zolna tod irgi bitidirin. Mine ingi teran arti abo hatmesum.“ 28Tekki wetirsan: „Mingi awrun artina awidti awrunna jiradilo?“ 29Yesu rude wetidirsum: „Artina awid in teran, ter ishinsinged amnerungi.“ 30Tekki wetirsan: „Aya edi saïgi bawin, naled ekked amnerunna joro? Mingi bawin? 31Ambabi managi halar kalsan, bajbun nawre: Ter simerton kalgi shuguditidirsum, kalw an.“

32Yesu wide wetidirsum: „Aleged, aleged irgi wetidirri, Muse termunum irgi kalgi simerton shuguditidirel. Abo teran irgi kal alendigi atidiril simerton. 33Mine artina kal teran simerton shugurbul, wehbebul alamna ayarkir.“ 34Tekki wetirsan: „Wo anna tirti, argi watti malegi in kalgi decchiru!“

35Yesu tirgi wetidirsum: „Ai terrim in ayarna kal. Aig abidi tal kidir borugmunum. Wide aiged amnel kidir beridmunum. 36Ama ai irgi wetidirkosim, ir aigi nalkosun, wala aamnemnun. 37Abo aigi densin male aig abidi atan. Aig abidi talgon bochigir bosminim. Mine ai 38simerton shugur tasim, ai abirigringi awiry anmunum, ama aigi ishineldigi awiry an. 39Ingon abo aigi ishinelna birgar teran: Aigi densin malerton wekki dabirmendingi, ama ugros kemaldir agsarna masir. 40Mine in teran abona birgar: Todti nalil male wide tekked amnel, ayar dimendi tendanin. Aigon wide tekki ugros kemaldir bagiskandi.“

41Yahudichi tendogor anugnugsan ter wesinged: „Ai kal simerton shugur tarel terrim“ an. 42Widegon wesan: „In eleken ter termunu Yesu Yusifna tod, ari timbabkon wide tinengon iyirbunna tirti? Won minegon ikke awen: Ai simerton shugur tasim an?“ 43Yesu rude wetidirsum: „Innewertichir nugnugmenwe. 44Zol wekkon eske aig abidi tamnum, aboy on, aigi ishinel, tolemenkin. Aigon ugros kemaldir tekki bagiskandi. 45Nebichina bacchichirgon bajbun: Zol male artiged bikurkandan. Aborton gijrel male wide kuredel, aig abidi atan. 46Zol wekkongon abogi nalkomnum, artinaiton tarelg anmenkin. In ter teran abogi nalel. 47Aleged, aleged irgi wetidirrin, aiged amnel ayar dimendi tendum.“

48„Ai ter terrim kal ayardi. 49Imbabi managi halar kaledirgi diossan. 50In teran kal simerton shugur tarel: Teddeton zol kaledkin, dimnum. 51Ai kal ayardi ter erim, simerton shugur tarel. Zol wer on teddeton kalekkin, dimen bokon bayin. Wide kal ai atirrin, anna jita teran. Zolina ayarna joro buskurrin.“

52Yahudichi ittiwrigi hasmesan wide wegongessan: „Won mine in argi tenna jitagi bidecchirin, kalw an?“ 53Yesu wide wetidirsum: „Aleged, aleged irgi wetidirrin, ir on zolna todna jitagi kalmenkurun, wide tenna gewgi nimenkurun, idder ayar wer damnum. 54Zol anna jitagi kalil wide anna gewgi nil, ayar dimendi tendum. Wide aigon ugros kemaldir bagiskandi. 55Mine anna jita kale suhundi teran. Wide anna gewgon niar suhundi teran. 56Anna jitagi kalil wide anna gewgi nilna tirti adder bikewdin, aigon tedder. 57Abo aigi ishinel aïbun nawre wide aigon aboged aïburin nawre, ikke aigi kalinna tirtigon aiged bayin. 58In teran kal simerton shugur tarel. Imbabi kaled disan termunum. In kalgi kalinna tirti, ter bayin dimen bokon.“ 59Ingi ter wesum jaman tur akurkidingon, Kafrinahumir.

60Tenna hiranirton digrichi weri in weregi gijred wesan: „In were gasima. Ni ingi eske gijrille?“ 61Yesu tennewertir iyirsum tenna hirani inin joro anugnugsangi wide wetidirsum: „In irgi atreirma? 62Won mingi biwekandun, zolna todti nallunna wattigi kujbungi ter owollo dasinn agarkir? 63Newerti teran aaïgril. Ama jita wekkondo anefaemnum. Were, tekked irgodon abaindin, newertum wide ayarum. Ama idder weri aamnemnan.“ 64Mine Yesu koyalloton iyirbusum nigu ter esangi, bamnemeniligi wide tekki biselimenna tirtigi. 65Wide wesum: „Inin joro irgi wetidirsim: Zol wekkon eske aig abidi tamnum, aboged tirtakkimenkin.“

66Mani wattirton digri weri tenna hiranirton agabkir rejaesan. Wala owittiged tekkodon talekomnan. 67Yesu wide tenna hirani diminde owingarigi wetidirsum: „Irgon aba aharkir bibujurua?“ 68Siman Butrus rudetirsum: „Wo anna tirti, ninai juru? Were ayar dimendi ekkodonum. 69Argon amnossun wide iyirossun er komisbul ter engi, arti aïbulna tod.“ 70Yesu nadetidirsum: „Ai ma ir dimind owingarigi barirkoregrin? Won wekkon iddeton shetanum.“ 71Yahuda Simanna tod Isharyutin dogor ingi wesum. Mine in awtanbusum, tekki selimeri an. Tekkon dimind owingarirton esum.

Currently Selected:

Hanana Enjil 6: XNZ1912

Highlight

Copy