Hanana Enjil 4
4
Bag. 4.
1Yesu iyirsum Farisichi gijirsangi ter hirani digrichi werigi awka akidigringi Hanan dogor — 2won Yesu tenna kidir akidirmeningon, tenna hiranig anmenkin. — 3Yahudiyegi wakos Jelilgir mukisum.
4Samiraged nogarkon tekki lezmebusum.
5Samirana neja werro tasum. Tenn erigon Sikar esan, Yagub Yusif tenna todti tirsinna gun awtir. 6Mandogon Yagubna mitar tebsum. Yesu safarroton marsos teddo mitardogor tegossum. Mani wattigon saa gorjitti ter esum.
7En Samirandi wer tasum, essigi kasiry an. Yesu wetirsum: „Aigi igidos.“ 8Man wattigon tenna hirani medinegir bijusan, kal wekki jandu an. 9En Samirandi tekki wetirsum: „Won mine er, Yahudiy engon wide aigon en Samirand eringon, annaiton ningi abirgin?“ — Mine Yahudichigon Samirandichigon ittiwrigodon asawkomnan.— 10Yesu rude wetirsum: „Er on artina tirarki iyirkokin wide nigon ekki awetiringi: ‚Aigi igid’ an, er tennaiton bibirigsum essi ayardigi, tekkon ekki bitirsum.“ 11En tekki wetirsum: „Wo anna tirti, ekkodon dalu wer damnum. Mitarkon dolum. Sayerton elon in essi ayardi ekki tatirum? 12Er aba Yagub antimbabdogor dulle, ter argi mitarki decchireldogor? Wide teddoton nisan tekkon tenna tonigon wide tenna urtichigon.“ 13Yesu rude tekki wetirsum: „In essirton nil male owittiged berdin. 14Ama ai tirrinna essirton nil male kidir beridmunum. In essigon tirrinna tirtir mitarna misi nawre bigufrigin ayar dimendigir.“ 15En tekki wetirsum: „Wo anna tirti, aigi in essigi denu, eridmendinna joro, wala owittiged indo ta kasmendinna joro.“ 16Yesu tekki wetirsum: „Ju, enn idti uwedirgi indo ta!“ 17En rude wide wesum: „Ai ogicchi komnim.“ Yesu tekki wetirsum: „Er alegi wesum: ‚Ogicchi komnim an.’ 18Won er ogij dicchi kosum. Eleken ekkodon dalgon enn ogij termunum. Ingi er wesum aleged.“ 19En tekki wetirsum: „Wo anna tirti, ai anallin er nebiy engi. 20Annā timbabi in jebeldogor sejdekosan. Widegon ir awerun: Sejdadn agar Urushalim term an.“ 21Yesu tekki wetirsum: „Wo en, aigi sadige: Watti wer bitan, wala in jebeldogor wala Urushalimir abogi bisejdetirkanminan. 22Iri asejdetirrun aïyirmendunna tirtigi. Ama ari aïyirrunna tirtigi asejdetirrun. Mine osarna kid Yahudichirtonum. 23Ama watti wer bitan, won ter elekentonum, tedder aleged asejdeli abogi bisejdetirran newertigon wide alegedgon. Abogon in asejdeli galigki awersin tekki sejdetirrangi. 24Arti newertum. Tekki sejdetirilin dogorgon dan newertigon wide alegedgon tekki sejdetirrangi.“ 25En wetirsum: „Ai iyirburin Mesih — komisbul an aweran — bitangi. Man bidakin, ter argi haja malegi bikurkidirkanin.“ 26Yesu tekki wetirsum: „Ai ekkodon abainil ter terrim.“
27Mani wattigi tenna hirani tasan. Wide ajibesan engodon abainingi. Ama wekkon tiddeton mingi ter akashingi, wala ter ma engodon abainingi isigkomnum. 28En wide tenna kubegi teddo mugos nejagir talossum. 29Wide zoligi wetidirsum: „Ta nalwe zol wer aigi wedensingi ai awsin malegi. Aba in komisbul terre?“ 30Nejana zoli belligi tekk abidi tasan.
31In owin barer tenna hirani isigsan: „Wo rabi, kal!“ 32Ter wetidirsum: „Ai kal wekki korin kalli an, ir inna kidir iyirmunun.“ 33Hirani ittiwrigodon wesan: „Aba wer haja wekki attatirma, kal andigi?“ 34Yesu wetidirsum: „Anna kale in teran: Aigi ishinelna birgarki awar, wide tenna awidti temimad. 35Iri awemnu?: ‚Shahar kemsir jorar atan an.’ Ahan ai irgi awetidirrin, inna misichigi soke uru nalwe: Guchi aroyanos jorarki awerisran. 36Ajorilgon tenna keregi aarin, wide terigi ajamegrin ayar dimendigir, aewrilgon wide ajamegrilgon ittiwrigodon gurew an. 37Inder teran were aaleyanin: ‚Wekkon aewrin. Owittigon ajorin.’ 38Ai irgi ishinirsan, jorw an tedder marismensunder. Echeli weri marissan, irgon tinna marsigiddogor tosun.“
39Man medinen idirton, Samirandichirton, digrichi weri tekked amnesan enna wereged, ter tekked shehede wide wesinged: „Ai awsin malegi wedensum an.“ 40Samirandichi tennai targi isigsan tinnai kewdingi. Teddogon ugros owigi kewidsum. 41Tekked desen digri amnesan, tenna werena jiradilo. 42Wide engi wetirsan: „Ar wide enna wereged elgon aamnemnun. Mine ar anna kidir gijir wide iyirossun, in aleged ter komisbul, zolig aosil, ter engi.“
43Ugros owin aharro teddoton belligi Jelilgir bijusum. 44Mine Yesu tennewertir shehedesum: „Nebi tenna esheir dulkanegi komnum an.“ 45Jelillo tasinna wattigi Jelildichi tekki abidisan, goben ter awsinna awdi malegi Urushalimir korer nalsan. Mine tirgon korer dasanged.
46Ikke owittiged Yesu kana Jelildir tasum, ter essigi nebittir deyiresinn agarro.
Orna hadamna tod odisum, Kafrinahumna mediner. 47In Yesu Yahudiyerton Jelillo bidasingi gijred tekk abidi nogsum. Wide tekki beddisum, shugurrigi tenna todti gengros an, goben diarkir gebilebusum. 48Yesu wetirsum: „Iri ayachigon wide ajebigongi nalmenkurun, aamnemnun.“ 49Orna hadam wetirsum: „Wo anna tirti, shugur, anna tod diosmeninn owollo.“ 50Yesu tekki wetirsum: „Ju, enna tod ayin.“ Id amnossum Yesu tekki wetirsinna wereged. Widegon bijusum tenna darbir. 51Ter shugurbungon tenna nugdi tekki abidi wetirsan: „Enna tod ayin.“ 52Ter wide isigirsum watti, tedder afyad tedder binesingi. Wetirsan: „Wilgi, saa gorjittir, huma tekki fargossum.“ 53Todna timbab iyirsum tenna tod genansingi man saa, Yesu tedder: „Enna tod ayin“ an wetirsinder. Tekkon tenna ka kamilgon Yesuged amnesan.
54In aya owitti teran Yesu awsin, Yahudiyerton Jelillo tasinna wattigi.
Currently Selected:
Hanana Enjil 4: XNZ1912
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1912.
