SALMOS 2
2
Mandac Dios acllashcajatun mandac mandanamanta
1¿Imamantatac llactapi
causaccunaca caparicuncuna?
¿Imamantatac gentecunaca
manapish canata yuyarincuna?
2Cai pacha jatun mandaccunapish,
quipa mandaccunapish
tandanacushpami Mandac Diostapish,
aceitehuan cahuishca
jatun mandactapish, mana cazushpa
piñancuna.
3Chashna piñarishpami:
«¡Pai huatashcamanta
cacharirishunchic, pai huatashpa
charicushcamanta llucshishunchic!»
nishpami caparincuna.
4Jahua pachapi causac
Mandac Diosca asingami,
paicunataca burlatami ruhuanga.
5Chai quipaca nina japiric shina
piñarishpa manchachishpaca:
6«¡Ñucaca jatun mandactaca ñami
ñucapaclla chicanyachishpa Sión
urcupi mandachun churani!» nirca.
7Mandac Dios cushca
mandashcataca huillashami.
Pai ñucata rimashpaca:
«Canca ñuca churimi cangui.
Cunanmi canmanca causaita cuni.
8Llactacunatapish cambac cachun
mañailla, ñucaca cushallami.
Cai pacha tucuricamanmi
cambaclla canga.
9Paicunataca fierro varahuan
mandashpami llaquichingui.
Allpa mangata shinami
ñutuchingui» nirca.
10Jatun mandaccunalla, cunanca
allita yuyarishpa causaichic.
Llactacunata mandaccunapish
ñuca cunashcata chasquichicyari.
11Mandac Diostaca
manchaihuan servichicyari.
Chucchushpa cushicuichicyari.
12Paipac churita alli nichic,
pacta piñarinman.
Paica nina japiric
shinami piñaringa.
¡Paipi shunguta churaccunaca
cushicuichicyari!
Currently Selected:
SALMOS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
