MATEO 20
20
Uvasta pallanahuan chimbapurashpa Jesús parlashcamanta
1Jahua pacha Dios mandacucca, shuc amo paipac uvas chagrata pallachingapac, tutamanta gentecunata mashcangapac llucshic shinami. 2Ña tarishpaca, shuc punzhapi mashnata paganata parlashpami, uvasta pallachun cacharca. 3Cutin punzhallata puebloman llucshishpaca, taucacuna plazapi yangalla tiyacuctami ricurca. 4Paicunata ricushpaca: “Cancunapish ñuca chagrapi uvasta pallangapac richic. Mashnata pagana cashcataca pagashallami” nirca. Shina nicpica, paicunapish rircallami. 5Cutinllatac chaupi punzhata, quimsa pacha chishita rishpapish, chashnallatacmi ruhuarca. 6Cutinllatac pichca pacha chishita plazaman rishpapish, taucacuna yangalla tiyacuctami ricurca. Chashna ricushpaca: “¿Ima nishpatac cancunaca yanga tucui punzha caipi canguichic?” nirca. 7Shina nicpica paicunaca: “Pipish mana trabajota cunchu. Chaimantami yangalla caipi tiyacunchic” nirca. Chashna nicpimi amoca: “Cancunapish richic, ñuca chagrapi uvasta pallagrichic” nirca.
8Ña tutayamucucpi, amo mayordomota cayashpaca: “Pallaccunata cayashpa, quipata yaicuccunamanpish, punta yaicuccunacamanpish mashnata pagana cashcata pagai” nirca. 9Pichca pacha chishita yaicuccunapish tucui punzha trabajomantami cullquita chasquirca. 10Shinallatac tutamanta pallangapac yaicuccuna chayashpaca: “Ñucanchicca yallitami japishun” nishpami yuyacurca. Ashtahuanpish shuc punzha trabajollamantami japirca. 11Chashna shuc punzhallamanta japishpami chagrayuc amotaca: 12“Cai quipata yaicuccunaca shuc horasllatami trabajashca, ashtahuanpish ñucanchicca tucui punzhami rupaipi llaquita apashpa, trabajashcanchic. ¿Chashna cashca jahuachu, paicunamanpish ñucanchic-huan pacta pagangui?” nirca. 13Chaimantami amo paicunapuramanta shucta cayashpaca: “Uyai, cantaca ima mana allita mana ruhuacunichu. ¿Manachu shuc punzha mashnata paganata parlanacurcanchic? 14Cunanca cambac pagota japishpa ri. Ñucaca cai quipata pallangapac yaicuccunamanpish, canhuan pacta paganatami munani. 15Ñuca cullquihuanca, imata ruhuasha nishpapish ruhuashallami. ¿Chashna allita ruhuacpichu envidiahuan piñaringui?” nirca.
16Chai shinallatacmi punta caccunaca quipa cangacuna, cutin quipa caccunaca punta cangacuna— nishpami, Jesusca yachachirca.
Jesús pai huañunata cutin huillashcamanta
(Mr 10.32-34; Lc 18.31-34)
17Jesús Jerusalén puebloman ricushpa, paipac chunga ishcai yachacuccunallata cayashpaca: 18«Cunanca Jerusalenmanmi ricunchic. Chaipimi Runa Tucungapac shamushca ñucataca, curacunata mandac curacunaman, mandashcacunata yachachiccunamanmi japishpa cungacuna. Paicunami “huañunami cangui” nishpa, 19mana israelcunaman cungacuna. Paicunaca ñucata pucllashpa asingami. Macashpa, cruzpi chacatashpami huañuchinga. Chashna huañuchicpipish, quimsa punzhapica causarishallami» nirca.
Jacobopac, Juanpac mama mañashcamanta
(Mr 10.35-45)
20Zebedeopac huarmimi Jesuspacman shamushpa, paipac ñaupapi cungurishpa mañarca. 21Chashna mañacpimi Jesusca:
—¿Imatatac ningui?— nirca.
Chashna nicpimi chai huarmica:
—Ñuca huahuacunata can mandanapi shuctaca cambac alli maquiman, shuctaca cambac lluqui maquiman tiyachingui— nirca.
22Chashna nicpimi Jesusca:
—Cancunaca imata mañacushcatapish mana yachanguichicchu. ¿Cancunaca jayacta ubiac shina llaquita ñuca shina apai pudinguichicchu?— nirca.
Chashna nicpimi paicunaca:
—Ari, apashunllami— nirca.
23Chashna nicpimi Jesusca:
—Ari, cancunaca ñuca shina llaquita apanguichicmi. Ashtahuanpish maijanta ñuca alli maquiman, lluqui maquiman tiyachinataca, Diosmi maijanman allichishcata charicun. Chaitaca mana ñucachu ruhuasha— nirca.
24Chaita caishuc chunga yachacuccuna uyashpaca, chai huauquicunahuanca piñarircami. 25Chaimanta Jesús paicunata cayashpaca:
—Cai pachapi mandaccunaca quiquin munashcata ruhuachishpami, gentecunataca charincuna. Chai mandaccunatapish shuctac ashtahuan jatun mandacca mandanllami. Chaitaca yachanguichicmi. 26Cancunapurapica mana chashnachu cana canguichic, ashtahuanpish cancunapurapi maijan mandac casha nishpaca, caishuccunata servinami canguichic. 27Maijanpish cancunapurapi punta casha nishpaca, yangalla tucushpami, caishuccunata servina canguichic. 28Chai shinallatacmi Runa Tucungapac shamushca ñucaca, mana servichingapac shamurcani, ashtahuanpish servingapac, huañushpa achcacunata quishpichingapac shamurcani— nirca.
Jesús ñahui mana ricuc runacunata alliyachishcamanta
(Mr 10.42-52; Lc 18.35-43)
29Jesús paipac yachacuccunahuan Jericó pueblomanta llucshicucpica, achca gentecunami caticurca. 30Ñanpi tiyacuc, ñahui mana ricuc ishcai runacuna Jesús chaita pasacucta uyashpaca:
—¡Mandac Davidpac aillupuramanta Apunchic Jesús, ñucanchictaca llaquiyari!— nishpa, mañarca.
31Gentecuna upallai nicpipish paicunaca:
—¡Mandac Davidpac aillupuramanta Apunchic Jesús, ñucanchictaca llaquiyari!— nishpami, ashtahuan caparirca.
32Chaimanta Jesús shayarishpa, paicunata cayashpaca:
—¿Imatatac ruhuachun ninguichic?— nirca.
33Chashna nicpimi paicunaca:
—Apunchic Jesús, ñucanchic ñahuicuna ricuchunmi munanchic— nirca.
34Chaimantami Jesusca paicunata llaquishpa, paicunapac ñahuipi tuparirca. Chashna tuparicpica, ñapish ñahuicuna ricucpi, Jesusta catishpa rircacunallami.
Currently Selected:
MATEO 20: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
