JOB 38
38
Jobta Dios rimashcamanta
1Chaimantami Mandac Diosca
manchana huaira chaupimanta Jobta rimashpaca:
2«¿Pitac ñuca yachachishcacunataca,
yanga rimashcacunahuan
pandachisha nicun?
3Cunanca sinchita chumbillirishpa,
ñuca tapushcata cutichingapac
allichiri.
4¿Ñuca cai pachata ruhuacucpica,
maipitac carcangui?
Allita entendic cashpaca
huillaiyari.
5¿Pitac cai pachataca medirca?
Chaitaca yachanami cangui.
¿Pitac chai jahuata
huascahuan medirca?
6¿Cai pachaca ima
jahuapitac tiyacun?
Cai pacha callari rumita churacpi,
7pacaric lucerocuna
tandanacushpa cantacucpi,
Diospac churicuna cushicushpa
caparicucpica,
¿maipitac carcangui?
8¿Pitac, allpa ucumanta
mama cucha llucshishpa talliricpi,
pungucunata churashpa huichcarca?
9Yacuta puyuhuan pillushpa,
manchana amsahuan
ñuca chumbillichicpica
¿Maipitac carcangui?
10Chaimanta maimanpish
ama llucshichunmi pungucunata
churashpa llavercani.
11Chaimantaca: “Caicamanllami
chayana cangui.
Caimantaca jatun huaj nicuc
yacuca mana pasangachu” nircanimi.
12¿Can causacushca punzhacunapica
shuc cutinllapish achicyachichun
mandarcanguichu?
¿Mana cashpaca, mai ladota
achicyamunataca ricuchircanguichu?
13¿Canchu achicyachictaca
tucui allpata achicyachishpa,
Diosta mana manchaccunata
maita cachachun ricuchircangui?
14Allpaca sellota churashpa sumacta
ruhuashca shinami sumac ricurin.
Sumacta churarishca
shinami saquirin.
15Diosta mana cazuccunamantaca
luzta anchuchinmi.
Jatun tucushcacunapac
rigratapish paquinmi.
16¿Canca mama cucha callari
pushtuman yaicushcanguichu?
¿Chai amsa ucuta ricsishpa
purishcanguichu?
17¿Huañushcacuna tiyana pungucuna
maipi cashcataca ricushcanguichu?
¿Huañuna amsa ucu pungutapish
ricushcanguichu?
18¿Cai pacha maicaman
cashcatapish yachanguichu?
¡Tucui caicunata can yachashpaca
ñucaman huillai!
19¿Sumaimana achicman
maita rinataca yachanguichu?
¿Maipitac manchana amsaca tiyacun?
20¿Paicunataca maipi cana
cashca pushtuman pushanata,
paicuna causana cashcaman
rina ñantapish ricuchi pudinguichu?
21¡Chaitaca tucuitachari
yachanguiyari!
¡Chaipacca ñachari huacharircangui!
¡Chaipacca ñachari unai
huatacunata causarcangui!
22¿Canca maipi rasu tiyac
ucumanpish, rundu tiyac ucumanpish
yaicushcanguichu?
23Chaicunataca llaqui punzhacunapac,
jatun macanacui punzhacunapac,
jatun huañunacui punzhapacmi
huacaichishpa charicuni.
24¿Achic maijan ñanta
chaupishpa ricushcata,
pambata tapac cunuclla
huaira maita shamuctapish
yachanguichu?
25¿Pitac sinchi tamyamanca
ñanta curca?
¿Pitac relampacuna tulun nichishpa,
purichunpish ñanta curca?
26¿Pitac pipish mana causana
shitashca allpapi tamyachishpa,
27chaquishca imatapish mana tarpuipac
allpapi llullu quihuacunataca
huiñachishca canga?
28¿Tamyaca taitata charinchu?
¿Garua tamyataca pitac
huachashca canga?
29¿Rasuca pipac huicsamantatac
llucshirca?
¿Pitac jahua pachamanta urmac
casataca huacharca?
30Yacucunapish sinchiyashpami
rumiyan.
Cai pachapi jatun mama cuchapish
rasumi tucunlla.
31¿Canca Pléyades lucerocunapac
huascacunata huatai pudinguichu?
¿Mana cashpaca, Orión lucerocunapac
huascacunatapish pascai pudinguichu?
32¿Canca lucerocunataca
llucshina punzhapi llucchi pudinguichu?
¿Mana cashpaca Osa Mayor
lucerotapish, paipac huahuacunandi
pushai pudinguichu?
33¿Canca jahua pacha ima shina
cana cashcata mandashcata yachanguichu?
¿Canca cai pachapi pai
imalla ruhuashcacunata
mandai pudinguichu?
34¿Puyucunapi yacu tandarishpa
tamyachun mandai pudinguichu?
35¿Canchu relampacunataca
maimanpish richun mandangui?
¿Cantachu chai relampacunaca:
“¡Caipimi canchic!” ningacuna?
36¿Pitac shungupi yachaita churarca?
¿Pitac allita yuyaricta ruhuarca?
37¿Pitac jahua pachapi
tiyac puyucunata yupangapac
yachaita charin?
¿Pitac jahua cielopi
tinajata puctic shina tamyachishpa,
38rumiyashca allpacunatapish,
sinchiyashca chambacunatapish
ñutuyachin?
39¿Animalta japishpaca
leonmanchu apamungui?
¿Canchu huahua leoncuna yarcaihuan
40jutcucunapi siricucpi,
mai pacallapi chapashpa cacpi,
aichata apamushpa sacsacta carangui?
41¿Pitac cuervocuna yarcaihuan
Diosta caparishpa,
caita chaita micunata mashcashpa
puricucpica caran?
Currently Selected:
JOB 38: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
